எங்க ஊரில் சுதந்திரதின விழாக் கொண்டாட்டங்கள் !

எங்க வழக்கப்படி மூணு/ நாலு  நாட்களுக்கு முன்பே ஆரம்பிச்சுட்டோம் !

முதலில் வீடு என்றதாலும்.....எங்கள்    யோகா வகுப்பு தினம் என்றதாலும்  வீட்டிலிருந்து கொடிகளைக்கொண்டுபோய்  தேசியகீதம் பாடிச்  சின்னதாக ஒரு கொண்டாட்டம். நம்மூரில் ஒரு காலத்தில் பள்ளிக்கூடபிள்ளைகளுக்குக் கொடியேற்றி முடிச்சதும்  ஆரஞ்சு மிட்டாய் கிடைக்குமில்லையா.... அதையே கொஞ்சம்  மேம்படுத்தியது போல ஆரஞ்சு  பர்ஃபி விநியோகம் !  வகுப்புத் தோழி ஒருவரின் தங்கை  நியூஸி அக்கா வீட்டிற்கு நாக்பூரிலிருந்து வந்துள்ளார்.

ஆகஸ்ட் 15 பொழுது விடியுமுன்னே (இங்கே குளிர்காலம் என்பதால் சூரிய உதயம் அதிகாலை ஏழரைக்கு ! அப்போது குளிர் 2 டிகிரி.) கிளம்பிக் கொடியேற்றும் வைபவத்திற்குப் போனோம். 

ஒரு  பதினைஞ்சு வருஷங்களாக நண்பர் அவருடைய  பொறுப்பில் கொடியேற்றும் விழாவை நடத்திக்கிட்டு இருக்கார். 

ஒரு மூணு வருஷங்களாக, இந்திய ராணுவத்தில் லெஃப். கர்னலாக இருந்தவர், இப்போ எங்கூரில் வசிக்கிறார்.  கொடி ஏற்றும் கௌரவத்தை அவருக்குக் கொடுத்தாச்சு !

இந்தமுறை இந்தியக் கடற்படையில் கமாண்டராக இருந்தவர்  ( எங்கூரில் வசிக்கும் மகன் வீட்டுக்கு வருகை ) எங்கள் கொண்டாட்டத்தில் பங்கு கொண்டது சிறப்பு ! 

மேலே படத்தில்,  முதலில் நிற்பவர் எங்கூர் மல்ட்டிகல்ச்சுரல்  கவுன்ஸிலின் தலைவர், அடுத்து நேவி அப்புறம் ஆர்மி !

(ஆர்மி & நேவி வந்தாச்சு. இன்னும் ஏர்ஃபோர்ஸ்தான் வரலை. பேசாம நானே ஏர்ஃபோர்ஸ் பதவியை எடுத்துக்கலாமான்னு தோணுச்சு)

கொடியேற்றி முடிச்சு, நம் தேசியகீதம் பாடியதும் ஒரு மனநிறைவு வந்தது உண்மை ! 

சுமார் ஒரு ஐம்பது கிவி இண்டியன்ஸ் கலந்து கொண்டோம். 

பாரத் மாதா கி ஜெய் ! வந்தே மாத்ரம் ! ஜெய் ஹிந்த் !