Monday, April 22, 2024

பொட்டி வந்துருச்சா ?

நம்மூர்லே முக்கியமான பண்டிகைகள்  சமயம்,  வீட்டு வேலைகளில்  நமக்கு உதவி செய்யும் பணியாளர்களுக்குப்  பரிசு கொடுப்போம்தானே ! நாங்க சின்னப்பிள்ளைகளா இருந்த காலத்தில் பண்டிகை தினத்தின்  காலையிலேயே.....  வீட்டுக்கு வந்து  வாங்கிக்குவாங்க.  அதுக்கு அப்போ பேரு  'இனாம்' 
(Pic from Google. Thanks to owner )

ஆனா..... பிரபுக்களும் சீமாட்டிகளும் வெள்ளைக்கார ஸ்டைலில் இதுக்குன்னு ஒரு நாள் ஒதுக்கி வச்சு அன்றைக்குத்தான் பரிசுப்பொருட்களை ஒரு பொட்டியில் வச்சுக் கொடுப்பாங்களாம்.  அது முதல்நாள் பண்டிகை முடிஞ்ச மறுநாள்! ஏற்கெனவே அவுங்களுடைய பெரிய பண்டிகையான க்றிஸ்மஸ்  தினத்துக்கான  விருந்துன்னு ஏகப்பட்ட கேக், பிஸ்கெட், புட்டிங், ரோஸ்ட் அது இதுன்னு சமைச்சுக் கொண்டாடி முடிச்ச  மறுநாள் நிறைய சமாச்சாரங்கள் அப்படியப்படியே மீந்து போய் இருக்குமாம். அதையெல்லாம் என்ன செய்வது ?
 
எடு அட்டைப்பொட்டிகளை ! அடுக்கு பலகாரங்களை !  கொண்டுபோய்க் கொடு அநாதை இல்லங்களுக்கு !

இப்படிச் சமையல் மொதக்கொண்டு எல்லா வேலைகளையும்  செஞ்சு முடிச்ச  , மாளிகைப் பணியாளர்களுக்குப் பரிசும் பொட்டிகளில்தான்! 
அதனால் இந்த நாளுக்கு பாக்ஸிங் டே  (Boxing Day )ன்னு பெயர்  அமைஞ்சுருக்கு ! 

நம்ம பக்கங்களில் க்றிஸ்மஸ் தினத்துக்கு மட்டும்தான் அரசு விடுமுறை.  மற்றபடி வெள்ளையர் நாடுகளில்  பாக்ஸிங் தினத்துக்கும் சேர்த்துதான்  விடுமுறை.  மேலும் வருஷக்கடைசியில் வரும் இந்தப் பண்டிகைக்கு ஏழாம்நாள் அவுங்களுக்குப் புதுவருஷத் தொடக்கம் வேற இருப்பதால்  சுமார் ரெண்டு வாரமாவது  நாடுமுழுக்க  விடுமுறைதான். 

ஒரு சுவாரஸ்யமான சேதி.....  பண்டிகை, விழா நாட்கள்,  சனி ஞாயிறாக அமைஞ்சுருச்சுன்னால்..... அடடா...வடை போச்சேன்னு வருந்த வேணாம். தொடர்ந்துவரும் திங்கள் செவ்வாய் கிழமைகள்  அரசு விடுமுறையாக இருக்கும்! 

இங்கே தென்கோளத்தில் இருக்கும் நாடுகளுக்கு இது கோடைகாலம் என்பதால்   கோடைகால விடுமுறையும் கூடச் சேர்ந்துக்குது ! 

நாங்க நியூஸி வந்த புதுசில் முதல்முறையா 'பாக்ஸிங் டே' பற்றித் தெரியவந்தது. முதலில் நான் நினைச்சேன் 'குத்துச்சண்டை'  நடக்கும் போலன்னு !  இல்லையாம்.  அன்றைக்குக் கடைகளில் முக்கால்வாசிப் பொருட்கள் நல்ல கழிவில்  கிடைக்குமாம். சிலசமயம்  50 முதல் 75 வரையிலும் கூட ! ஒரு வருஷம், ஒரு  கார் விற்பனைக் கடையில்  இப்படி ஸேல் போட்டு,  முதலில் வரும் நபருக்கு மட்டும் 90% கழிவுன்னு போட்டதும், சனம்  முதல்நாள் ராத்ரியே போய் ஷோரூம்  வெளியே வரிசை கட்டி நின்னதெல்லாம் கூட நடந்துச்சு !

ஆகக்கூடி, பொட்டிகளில் வச்சு தானம் வழங்கிய தினம், இப்ப  ஸேல் சீஸனாக்கிப் போயிருக்கு !  நம்ம அக்ஷயத்ருதியையை நினைச்சுக்குங்க.  உண்மையை விட்டுட்டு எப்படி ஆக்கி வச்சுருக்கோமுன்னு !!!!

பண்டிகைக்கான அலங்காரப்பொருட்களை வண்டிவண்டியா வாங்கி, யானைவிலையில் போட்டு  பண்டிகைக்கு முதல்நாள் வரை விற்றதுபோக , பாக்கியானதையெல்லாம்,  டிசம்பர் 26 இல்  50% கழிவுன்னு ஆரம்பிச்சு  டிசம்பர் 31 தேதியாகும்போது 90% லே வந்து நிக்கும். 

இங்கே நியூஸியில்  'அவுங்க' பண்டிகையான  குட் ஃப்ரைடே, ஈஸ்டர், க்றிஸ்மஸ்  தினங்களில் முழுக் கடையடைப்புத்தான்.  டிவியில் கூட  கமர்ஸியல் கிடையாதுன்னா  பாருங்க !  சனமும் செய்வதறியாது திகைச்சுக்கிடக்கும்.....  அதனால் மறுநாள் காலையிலேயே கடைகளில் கூட்டம் அம்முவது வாடிக்கை.

இப்படிக் கோலாகலமாக இருக்கும் பாக்ஸிங் டே நாளில் நாம் யானை பார்க்கக் கிளம்பினோம். ஊருக்குள்ளே முப்பது யானைகளை ஓட்டிவிட்டுருக்காங்க.  இது ஒரு சம்மர் ஆக்டிவிட்டின்னு சொல்லலாம். எங்கெங்கே நிக்குதுன்னு ஒரு வரைபடம்  வேற  இருக்கும். போய்ப் பார்த்துட்டு அதன்கூட ஒரு படமெடுத்து அனுப்பி வைக்கணும்.  முப்பதையும் பார்த்து முடிச்ச பிள்ளைகளுக்கு ஏதோ பரிசும் உண்டு. 

நம்மூரில் நிலநடுக்கம் ஏற்பட்டுப் பல உயிர்களைப் பறிகொடுத்து மனசொடைஞ்சு இருந்த காலத்தில், நம்மூர் சிட்டிக்கவுன்ஸில் இப்படி ஒன்னை ஆரம்பிச்சது. 'நிமிர்ந்து நில்' என்ற பெயரில்  49 பெருசு & 50 சிறுசுன்ற கணக்கில் ஒட்டைச்சிவிங்கிகளை ஊருக்குள்  அங்கங்கே வச்சதும்,  மக்கள் எல்லோரும் ஓடியோடிப்போய்ப் பார்த்ததும் எல்லாம் நம்ம துளசிதளத்துலேயே விரிவாக ஒரு பதிவில் வந்துருக்கு. அப்போப் பார்த்தது நினைவில்லைன்னால்.... இப்போப் பார்க்கலாம் இந்தச் சுட்டியில் !

https://thulasidhalam.blogspot.com/2015/02/blog-post_6.html

ரெண்டு மூணுமாசம் டிஸ்ப்ளேயில் வச்சுருந்துக் கடைசியில்  ஒரே இடத்தில் எல்லோரையும் கூட்டியாந்து வச்சு, ஏலம் விட்டு, அதில் கிடைக்கும் தொகையை ஒரு தருமக் காரியத்துக்குக் கொடுப்பது வழக்கம் !  பெரிய பெரிய வியாபார நிறுவனங்கள் இதை ஏலத்தில் எடுத்து அவுங்க அலுவலகத்தில் காட்சிப்பொருளா வச்சுருக்காங்க. பெருமைக்குப் பெருமை, தருமத்துக்குத் தருமம்!

https://www.facebook.com/media/set/?set=a.10203739811678337&type=3

 அப்புறம் ஒரு அஞ்சாறு வருஷம் கழிச்சு 50 பெருசு, 5 சின்னதுன்னு பெங்குவின் பறவைகள் !

இப்போ  30 யானைகள். யானைக்குப் பெயரும் வச்சாச். எல்மெர் !  இந்த முறை மூளைக்காயத்துக்கு உதவி.   Laura Fergusson Brain Injury Trust 




நேத்து  நியூஸி க்றிஸ்மஸ் மரம் பார்க்கப் பீச் வரை போனப்ப வண்ணத்துப்பூச்சி யானையை தரிசனம் செஞ்சாச் ! இன்றைக்கு  நகரமையத்துக்கு வந்துருக்கோம்.

இப்பெல்லாம் எதுக்கெடுத்தாலும் ஆப் னு ஆப்பு வச்சுடறாங்க.  நம்ம மொபைல்ஃபோனில் அதை இறக்கினாலும் சரியா ஒன்னும் தெரியலை.  எந்தத் தெருன்னு குறிப்பிட்டு இருந்தால் சுலபம்.  நாம்தான் தேடிக்கிட்டு ஓடவேண்டியிருக்கு. ப்ச்.....

நகரமையத்துலே  அங்கங்கே  கொஞ்சம் க்றிஸ்மஸ் அலங்காரங்களையும் வேடிக்கை பார்த்துக்கிட்டே... யானைகளைத் தேடிப்போறோம்.  ஒரு பத்து யானைகள் கிடைச்சதும்,  நேரமாகுதுன்னு வீடு திரும்பினோம்.  இன்னொரு நாள் கிளம்பி வேற பேட்டைகளுக்குப் போகணும். ஆனால்..... நேரம் சரியா அமையலை. 









கடைசியில் ஏலம் விடுமுன் போய் எல்லோரையும் ஒரே இடத்தில் பார்க்கணுமுன்னு நினைச்சதும் நடக்கலை.....
யானைக்காரியின் நிலையைப் பார்த்தீங்களா ?  ப்ச்.....  

Thursday, April 11, 2024

விளக்கலங்காரம் நம்மூரில் !

ஒரு மூணு வாரமா நடந்துக்கிட்டு இருக்கும் கொண்டாட்டத்தைப் போய்ப் பார்க்க இப்பதான் நமக்கு நேரம் கிடைச்சுருக்கு !
நம்ம பக்கத்துப்பேட்டைதான் ! அஞ்சு கிமீவுக்கும் குறைவான தூரம். பத்து நிமிட்லே போயிறலாம்.  இன்னும் இருட்டலையே.....  அவுங்களே ராத்ரி எட்டரைக்குத்தான்  விளக்கேத்தறாங்க. ராத்ரி பத்தரைக்கு லைட்ஸ் ஆஃப்.  மணி ஒன்பதைத் தாண்டிருச்சேன்னு கிளம்பிப்போறோம்.

இந்த  அலங்காரம் ஆரம்பிச்சு இது அஞ்சாவது  வருஷம்.  நாலு லக்ஷம்  LED lights னு சொல்றாங்க. எண்ணிப்பார்க்க யாராலெ முடியும் ? :-) டிசம்பர் ஒன்னு முதல் ஜனவரி ஒன்னுவரை இருக்கும்.  இந்த வருஷம் (2024)நவம்பர் முப்பதுக்கு ஆரம்பிக்கப் போறாங்களாம். இப்பவே சொல்லிட்டாங்க. இன்னும் பெருசா இருக்குமாம் ! ஒருவேளை எட்டு லக்ஷமோ?   

இதுக்குன்னே ஒரு வலைப்பக்கம் வேற வச்சுருக்காங்க.  'நாட் இனஃப் லைட்ஸ்' னு பெயர். பாருங்க, நாலு லக்ஷம் போதலையாமே!!!! 

   http://www.notenoughlights.co.nz/

Cul de Sac லே  இந்த  ஷோ நடப்பதால்  பொதுவா வண்டிகள் போக்குவரத்து கிடையாது. ஷோ நடக்கும் நேரம், அந்தப்பகுதியில் இருக்கும் வீட்டுமக்களும் ஒத்துழைப்பதால்  அவுங்க வீட்டு வண்டி நடமாட்டங்களும் கிடையாது.  வேடிக்கை பார்க்கும் நாம்தான்  அடுத்துள்ள தெருவில் வண்டியை நிறுத்திட்டு நடந்து போகணும். போகட்டும், ஒரு ரெண்டு நிமிட் நடையில் நாமென்ன குறைஞ்சு போறோம் ? 

https://www.facebook.com/1309695969/videos/322881160657786/

இந்த வீட்டுக்கு எதிர்ப்பக்கம் இருக்கும் இன்னொரு வீட்டிலும் விளக்கு அலங்காரம் செஞ்சுருக்காங்க. 

இந்தப்பதிவை எழுதும்போதுதான் இது சம்பந்தப்பட்ட வீடியோ க்ளிப் கண்ணில் பட்டது. உடனே ஃபேஸ்புக்கில் போட்டுருக்கேன். 
அதன் சுட்டி இதோ !

https://www.facebook.com/1309695969/videos/1186434079400386/

இலவச அனுமதின்னாலும்..... எவ்ளோ வேலை செஞ்சுருக்காங்கன்னு பார்த்தால்  மலைப்புதான்!  அதுக்காகவே  அங்கிருக்கும் உண்டியலில் நம் வகையில் கொஞ்சம் போடத்தான் வேணும். அப்படியே ஆச்சு ! 



வீடுவந்து சேர்ந்தால் 'நம்மவன்'  வாசப்பக்கம் போய்ப் பார்த்தான்.  இவனுக்கு அந்த லைட் ஷோ பார்க்கக் கொடுத்துவைக்கலை..... அதுக்காக அப்படியே விடமுடியுமா ?
இப்படித்தாண்டா இருந்ததுன்னு 'கோடி' காமிச்சோம் :-) 



Monday, April 08, 2024

மாக்கோலம் கூட போட்டாச் :-)

க்றிஸ்மஸ் பண்டிகை சமீபிச்சுருச்சு. இன்னும் மூணே நாட்கள்தான் நடுவிலே.........  விடுமுறைக்காலம் தொடங்குமுன் இந்தவருஷத்துக்கான சமாச்சாரங்களை  முடிக்கணும்தான் !
கண்ணாடிக்குமிழில் வைக்கச் சின்ன மரத்தேடல் இன்னும் முடியலை. ஒரு கடையில் ஒரு பொண் குழந்தை எனக்காகக் காத்திருந்தாள். வீட்டுக்குக் கூட்டிவந்தேன். ஏறக்குறைய நம்ம ஜன்னுவின் உயரம் ! யூரோப்பியன். அவளை நம்மவளா மாத்தணும். 'நம்மவன்' வந்து பார்த்துட்டு ஓக்கேன்னான் ! 


முதலில் கண்களை மாத்தணும். பழைய உடுப்புகளைக் களைஞ்சு நம்ம ஸ்டைல் உடுப்புகளைப் போட்டுவிடணும். அப்படியே கொஞ்சம் அலங்காரமும். நம்ம ஜன்னுவின்  உடைகளையும் நகைகளையும் இரவல் வாங்கினேன். இனி  பெயர் வைக்கணும். ஜன்னுவின் களித்தோழி என்பதால்  பெயரும் அவள் பெயருக்குப் பொருத்தமா இருக்கணும்.  அன்னு என்று முடிவாச்சு. அனுஷ்காவின் சுருக்கம்.  ஜன்னு &  அன்னு !  நல்லா இருக்குல்லே !
ஒரு வெட் க்ரைண்டர் ஒன்னும் இன்றைக்கான வரவு. மார்ச் மாசம்தான்  பழசு , பாதி அரைக்கையில் மண்டையைப்போட்டுருச்சுன்னு ஓடிப்போய் ஒன்னு வாங்கியிருந்தோம். அது ப்ரெஸ்டீஜ். அப்போதைக்கு ஓக்கே என்றாலும் கழட்டிக் கல் எடுக்க ரொம்பவே கஷ்டமா இருந்தது.  புதுசா வேற மெஷீன்கள் வந்துருக்குன்னு போய்ப் பார்த்தால்  அல்ட்ரா  மினி இருந்தது.  அதன் உபயத்தால் வாசலில் மாக்கோலம் :-))))
நம்ம நண்பருக்கு  அவர் துறையில் தேர்வுகள் முடிஞ்சு நியூஸி அங்கீகாரம் வழங்கும் தனிப்பட்ட விழாவுக்குப் போயிருந்தோம். இவர் இந்திய வாழ்க்கையில் ஹைதராபாத், பூனா என்ற ஊர்களில் இருக்கும் தாஜ் ஹொட்டேலின் செஃப். இங்கே வந்ததும்  சிலபல ஊர்களில் வேலையில் இருந்துவிட்டு, நம்ம ஊருக்கு வந்து ஒரு  ஏழெட்டு வருஷம் ஆகிருக்கு.  (இவர் நம்மூருக்கு வந்தது நமக்கு நல்லதாப் போச்சு ! நம்ம வீட்டு விசேஷங்களுக்கு இவர்தான் பொறுப்பு ! ) விழாவில் லெவல் 3 & 4 க்கான  New Zealand Certificate வழங்குனாங்க. வாழ்க்கையில் முன்னேறணும் என்றால்  நம் துறையில் அப்படியே நின்னு போகாமல் மேற்படிப்பு,  பயிற்சின்னு நம் தகுதியை மேலும் மேலும் வளர்த்துக்கணும் ! 'நம்மவர்' போலவே இவரும் ஆர்வமா இருப்பது எனக்கு ரொம்பவே பிடிச்சுருக்கு !
வைகுண்ட ஏகாதசி சொர்கவாசல் திறப்புக்குக் காத்திருந்தோம். சின்னவன் வந்தான்.  அவனுக்கும் அக்காக்களைப் பிடிச்சுப்போச்சு !

நம்ம தாமரைக்குளத்தில்  புதுச் செடியிலும் பூ !  வாங்கிவச்சு வருஷம் மூணாச்சு. போன வருஷம் குட்டியா ஒன்னு நானும் இருக்கேன்னு வந்து போனது, இப்பத்தான் முழுப்பூவா மலர்ந்துருக்கு !  ஆப்ரிகாட் நிறம் னு ஆசையோடு வாங்கிவந்தால். கொஞ்சம் வெளிறிய ஆப்ரிகாட்டா வந்துருக்கு. பலம் இல்லை போல...... வெஜிடேரியன் இல்லையோ !!!!

க்றிஸ்மஸ் நாளும் வந்துருச்சு. நாடு முழுசும் ஒரு கடையும் திறந்துருக்காது.  எங்கோ ஒரு தெருமுனை டைரியும், பெட்ரோல் பங்கும்தான் திறந்துருக்கும். டிவியில் கூட விற்பனை சம்பந்தமுள்ள எந்த கமர்ஸியலும் இருக்காது. குட் ஃப்ரைடேவுக்கும் ஈஸ்டர் நாளுக்கும் கூட  இப்படித்தான் ! 

 பொதுப்போக்குவரத்து பஸ்கள் மட்டும் ஓடும். பொதுவாகவே பஸ்ஸில் வேலைநேரங்களில் (8 -6 ) பத்திருபது ஆட்கள் இருந்தால் அதிகம்.  பாக்கி நேரங்களில் ஒன்னு ரெண்டு பேர் இருந்தால் ட்ரைவருக்கு அதிர்ஷ்டம்.  பயமாகவும் இருக்காது.  இப்போ க்றிஸ்மஸ் நாளுன்னா... சுத்தம். ஆளில்லா பஸ் ஊர் சுத்திக்கிட்டு இருக்கு!

நாமும் இந்த இடும்பியின்   சம்ப்ரதாயப்படி க்றிஸ்துவக் கோவிலுக்குக் கிளம்பினோம்.  முதலில் வீட்டாண்டை, பக்கத்துத்தெருதான் !  வழக்கம்போல் ஏகாந்த  தரிசனம் ராத்ரி பனிரெண்டுக்குக் குழந்தை பொறந்தாச் ! (உண்மையில் அப்போ நடுநிசி ஆகலை. டேலைட் ஸேவிங் காலம் என்பதால் பதினொன்னுதான், கேட்டோ !)



அங்கிருந்து கார்ட்போர்ட் கதீட்ரல்.  நாளும் கிழமையுமா மூடி வச்சுருக்காங்க. இது தாற்காலிகம்னு சொல்லிதான்  கட்டுனாங்க.  போறபோக்கைப் பார்த்தால் இது நிரந்தரமாகிரும்னு தோணுது.  13 வருஷங்களுக்கு முன் நிலநடுக்கத்தில் இடிஞ்சு போன எங்க க்றைஸ்ட்சர்ச் கதீட்ரலை இன்னும் கட்டிமுடிச்ச பாடில்லை.  அப்பவே பலநாடுகள் தாமாக முன்வந்து பழுது பார்த்துத் தர்றோமுன்னு சொன்னதை சர்ச் மேலிடம் ஒத்துக்கலை. கர்வமா இருந்துட்டு இப்போ கர்வபங்கம்.
ஒரு நாலைஞ்சு வருஷத்துக்குமுன்  பழுது பார்க்கறோமுன்னு ஆரம்பிச்சு வேலைகள் ஆமை வேகத்தில் (! ) நடந்துக்கிட்டு இருக்கு. மக்கள் பலரும் நம்மூர் என்ற அபிமானத்தில் பொருளுதவி செய்தோம்தான்.  இப்ப  அந்த நிதி போதாதாம். இன்னும் முப்பது மில்லியன் (மூணு கோடி டாலர் ) வேணுமாம். கொடுக்கலைன்னா   நடந்துக்கிட்டு இருந்த வேலையை அப்படியே விட்டுருவாங்களாம்.  விட்டுட்டுப்போங்க..... யாராலெ முடியும் என்ற நிலைக்கு  மக்கள்  வந்தாச்.  முந்தியெல்லாம் அந்தப் பக்கம் போனாலே கண்ணுலே ஜலம் வச்சுப்பேன். இப்போ  இல்லை.  கல்மனசு வந்துருக்கு இதுலே மட்டும். ப்ச்....

நல்ல வெயிலும் இருக்குன்னு அப்படியே கடற்கரைப் பக்கம் போனோம். நியூஸிக்குன்னே ஒரு வகை க்றிஸ்மஸ் மரம் இருக்கு, தெரியுமோ !


பொஹுட்டுக்காவா (  Pohutukawa) என்று மவொரி பெயர்.  மவொரி மக்களுக்கு  இது ரொம்பவே புனிதமான மரம்.  மவொரி போர்வீரர்  (young Maori warrior, Tawhaki )ஒருவருடைய  தகப்பனை, எதிரிகள் கொன்னுட்டாங்க. அவுங்களைப் பழிவாங்கணும். தன் ஒருவரால் முடியாத காரியம். உதவி வேண்டி  மேலுலகம் நோக்கிப் போறார். மவொரிகளின் கடவுள் நம்பிக்கை, கலாச்சாரத்தின் படி ஆகாயமே தந்தை, பூமியே தாய் !   இவருடைய பயணம் தோல்வியில் முடிஞ்சு அங்கிருந்து கீழே விழுந்துடறார். அவருடைய ரத்தம் தெறித்த இடத்தில் எல்லாம் சிகப்பு நிறமுள்ள பூக்கள்  பூக்கும் மரம் முளைச்சுருது.  அந்த மரம்தான் இந்த மரம் ! இப்ப மஞ்சப்பூவும்   வந்துருச்சு !    

 கடற்கரையையொட்டியே இந்த மரங்கள் முளைக்கும். பச்சையும் சிகப்புமா பார்க்கவே ஒரு அழகு ! எனக்கு ரொம்பவும் பிடிச்ச மரமும் கூட.  கோடையில் மலரும் பூக்கள், நம்ம க்றிஸ்மஸ் காலத்தோடு சேர்ந்து போச்சு ! 


மரங்களை ரசிச்ச கையோடு நம்ம சம்னர் வாழ் வரசித்திவிநாயகரையும் போய் தரிசனம் செஞ்சுக்கிட்டு சில யானைகளையும் பார்த்துட்டு வந்தோம்.      ( இதைப்பற்றி அடுத்த பதிவில் சொல்றேன் !) 

பண்டிகை நாளிலே சர்ச்சுலே ஆளைக்காணோம். ஊர்சனம் முழுக்க பீச்சுலே இருக்கு.

 கொஞ்சம் ஓய்வெடுங்க. இருட்டுனாவுட்டு  ஒரு இடத்துக்குப் போகலாம் !