நியூஸிலாந்து பகுதி 63

பிரதமர் ஜிம்(ஜேம்ஸ்) போல்ஜர், எப்ப என்ன ஆகுமோன்ற கவலையில் ரொம்பக் 'கவனமா' ஆட்சி செஞ்சுக்கிட்டு இருக்கார். கட்சிக்குள்ளில் தனக்கு ஆதரவு திரட்டிக்கிட்டு இருந்தாங்க ஜென்னி ஷெப்லி. இவுங்க நல்ல நேரமோ, இல்லை பிரதமரின் கெட்ட நேரமோ தெரியலை.ஒரு சமயம் பிரதமர் ஸ்காட்லாந்து நாட்டில் ஒரு கான்ஃபரன்ஸ்க்குப் போயிருந்தார். அவருக்கு ஆப்பு வைக்கச் சரியான சமயம் அகப்பட்டுருச்சு. ஷெப்லி தன்னோட ஆதரவாளர்களைத் திரட்டுனாங்க. நேஷனல் கட்சித் தலைவியா(வும்) ஆகிட்டாங்க. (இதுக்குத்தான் உக்கார்ந்த நாற்காலியை விட்டு எழுந்திரிக்கவே கூடாதுன்றது.) திரும்ப வந்த பிரதமர், இப்படி முதுகில் குத்து வாங்கின மனக்கஷ்டத்தில் ராஜினாமா செஞ்சுட்டார். ஷிப்லி பிரதமர் ஆனாங்க. நியூஸியின் முதல் பெண் பிரதமர். எங்க ( Beehive) தேன்கூட்டின் முதல் ராணித்தேனீ ! இந்த இடத்துலே ஒண்ணு சொல்லிக்கறேன். ஷிப்லி ஒரு டீச்சர். 19 வயசுலே டீச்சராகி அஞ்சு வருஷம் ஆரம்பப்பள்ளியில் ஆசிரியையா இருந்து அரசியலுக்கு வந்தவுங்க.

எதிர்க்கட்சித் தலைவியா இருந்த ஹெலன் க்ளார்க்குக்கு பெரிய இடி! ஒரு நாள் இல்லாட்டா ஒரு நாள் தாந்தான் முதல் பெண் பிரதமரா ஆகப்போறொமுன்னு இருந்தாங்களே. சட்டசபையில் எதிரும் புதிருமா ரெண்டு பெண்கள்.இந்தக் கணக்குலே பார்த்தால் இதுவும் உலகில் முதல்முறைதானே?

இந்த மந்திரி சபைக்கு இன்னும் ரெண்டு வருசம் ஆயுள் இருக்கு.
சமையலில் குழம்பு தாக்குப் பிடிக்கிற மாதிரி கூட்டு இருக்காதுல்லே? சீக்கிரமாக் கெட்டுரும்தானே? அதே கதைதான் இந்த அரசியல் கூட்டுலேயும். உள்ளுக்குள்ளெ புகைய ஆரம்பிச்சது. இந்த அழகுலே போனா, வரப்போற தேர்தலில் நம்ம கட்சி நிலைக்கறது கஷ்டமுன்னு நியூஸி ஃபர்ஸ்ட்க்குத் தோணிருச்சு. இதே தோணல் பிரதமருக்கும். கூட்டோட ஸ்ட்ரெஸ் தாங்க முடியலை. இப்பப் பார்த்து ஆக்லாந்து பன்னாட்டு விமான நிலையத்தைத் தனியாருக்கு வித்தாங்க. இதனால் கூட்டுலே பிரதமருக்கும் உதவிப் பிரதமருக்கும் ஏகப்பட்ட கருத்து வேற்றுமை. முடிவு? உதவிப் பிரதமர் பதவிக்கு(ம்) ஆப்பு. பதவி பறிபோனாலும் கூடவே இருக்கணுமுன்னு தலையெழுத்தா என்ன? கொஞ்ச நாளில் வின்ஸ்டன் பீட்டர், கூட்டுக்குக் கொடுத்த ஆதரவை வாபஸ் வாங்கிக்கிட்டார். அவர் மட்டும்தான் வாபஸ். அவர் கட்சியில் இருந்த மத்தவங்க எல்லாரும் அல்வாக் கிண்டித் தலைவருக்கு ஊட்டிட்டுக் கட்சியில் இருந்து வெளியே வந்து, அலையன்ஸ் கட்சியில் சேர்ந்துக்கிட்டு ஆளும் கட்சிக்கு ஆதரவு கொடுத்துட்டாங்க. அடுத்த தேர்தல்வரை வண்டி இப்படியே ஓடுச்சு. 'யஹாங் ஸே வஹாங், வஹாங்ஸே யஹாங்':-)))))

ச்சீனாவுக்கு(1997) ஹாங்காங் திரும்பக் கிடைச்ச சமயம், நிறையப்பேர் அங்கிருந்து பிஸினெஸ் மைக்ரேஷன்லே நியூஸி வர்றதுக்கு முயற்சி செஞ்சாங்க. குறைஞ்சது அரை மில்லியன் டாலர் இங்கே நியூஸியில் முதலீடு செய்யணுமுன்னு அரசாங்கம் சொல்லுச்சு. அதுவுமில்லாம அதுவரை ஹாங்காங் பிரிட்டிஷ் வசம்தானே இருந்துச்சு.அப்ப ஒரு அம்பதாயிரம் பேர் இங்கே வந்துட்டாங்க. கடந்த சில வருசங்களா ஃபிலிப்பினோப் பெண்கள், மலேசியப் பெண்கள் இங்கத்து 'கிவி' ஆட்களைக் கல்யாணம் செஞ்சுக்கிட்டு நியூஸிக்கு குடிவந்தாங்க. அப்புறம் கொரியா, ஜப்பான்னு சில இடங்களில் இருந்து கொஞ்சமுன்னு வெவ்வேறு நாடுகளில் இருந்து புது ஜனங்கள் வந்துக்கிட்டுத்தான் இருந்தாங்க. ஐரோப்பியர்கள் வருவது ரொம்பவே குறைஞ்சு போச்சு.சீனாவிலே இருந்தும் ஏராளமான ஜனங்கள் வியாபார விஸா வாங்கி வந்து குடியேறுனாங்க.சமோவா, இன்னும் மத்த பஸிபிக் தீவுகளில் இருந்து நிறையப்பேர் வந்துக்கிட்டு இருந்தாங்க. நியூஸி பல்வேறு கலாச்சாரம் கொண்ட மக்கள் இருக்கும் நாடா மாறிக்கிட்டு இருந்துச்சு. அரசியலில் பெண்களின் பங்கு கூடிக்கிட்டுப் போச்சு. ஒரு ச்சீனப் பெண்மணி பார்லிமெண்ட் அங்கத்தினராகவும்( லிஸ்ட் எம்.பி) ஆனாங்க.

குடும்ப வன்முறைகளில் கஷ்டப்பட்டவங்க எண்ணிக்கையில் ஆசியப் பெண்கள் நிறைய இருந்தாங்க. ஆங்கிலமொழி தெரியாத பலர், தேவையான சமயங்களில் உதவிக்கு எங்கே போய் யாரிடம் கஷ்டத்தை விளக்கிச் சொல்லறதுன்றது ஒருபிரச்சனையா இருந்துச்சு. அதுவுமில்லாம , குடும்பத்தில் நடக்கறதை வெளியே போய் சொல்றது ஒரு அவமானமுன்னு எண்ணம். இதைக் கவனிச்ச சில ஆசியப் பெண்கள் ஏழு பேர் சேர்ந்து 'சக்தி'ன்னு ஒரு அமைப்பைத் தொடங்குனாங்க. இது இப்பபெரிய அளவில் வளர்ந்து ஆசியப் பெண்களுக்கு மட்டுமில்லாம பொதுவா எல்லாருக்கும் உதவுது. எல்லா முக்கிய நகரங்களிலும் கிளைகள் இருக்கு. சீனா, தாய்லாந்து, மலேயா, வியட்நாம், கம்போடியா, கொரியா, இந்தியா, ஜப்பான், பர்மா,பாகிஸ்தான், பங்களாதேஷ், இரான், இராக், ஆஃப்கானிஸ்தான், ஆஃப்ரிக்கா, ஸ்ரீலங்கான்னு பலநாடுகளைச் சேர்ந்த 20,000பெண்கள் இதன்மூலம் உதவியடைஞ்சிருக்காங்க. பல ஆசிய மொழிகளிலும் 'சக்தி' என்ற சொல்லுக்கு 'பலம் (ஸ்ட்ரெந்த்) என்ற பொருள் இருக்கறதாலே இந்தப் பெயர் ரொம்பப் பொருத்தமா அமைஞ்சுருச்சு. பெண்கள் நலனுக்காகவே அரசு ஒரு புது இலாக்கா ஏற்படுத்துச்சு.

நியூஸிலாந்து பகுதி 62

அரசியல் நிகழ்ச்சிகள் ஒரு கூத்து பார்க்கறமாதிரி ஆயிருச்சுங்க. திருப்பித் திருப்பி சரித்திரத்துலே அரசியல் முக்கிய இடம் பிடிச்சிருது. சொல்லித்தான் ஆகணும். ஒருத்தரை ஒருத்தர் காலை வாருவது, சமயம் பார்த்து முதுகுலே குத்துறது( சீஸருக்கும் இப்படித்தானே?) கட்சித்தாவல் ( இதுக்கு இங்கே 'waka jumping' னு பேர்)இதெல்லாம் அரசியலிலே சகஜமப்பா:-)))) நாடுகள்தோறும் மொழிகள் (மட்டுமே) வேறு என்பது நூத்துக்கு இருநூறு உண்மை!



இந்த இடத்துலே இன்னொண்ணு சொல்லிக்கறேன். இங்கே பெரிய தலைவர்களா இருந்தாலும் சரி, சின்னப் பிள்ளைகளா இருந்தாலும் சரி, எல்லாருக்கும் அவுங்க பெயரை சுருக்கி ஒரு செல்லப் பெயர் வச்சுக்கிறது வழக்கம். அந்தச் செல்லப்பேரிலேயே பத்திரிக்கைகள், தொலைக்காட்சிகள் இன்னும் எல்லா இடங்களிலும் சொல்றதும் ஒரு வழக்கம். ஆனா,பட்டப்பேர் கொடுக்கறதோ, அதால் அறியப்படுறதோ கிடையவே கிடையாது. ( ஹூம்....... எப்பத்தான் திருந்தப் போகுதோ?)




தலைக்கு மேலேக் கத்தி தொங்கிக்கிட்டு இருந்தா எப்படி இருக்கும்? அப்படி ஆகிப்போச்சு ஆளும் கட்சியின் நிலமை.எந்த சமயம் யார் எதிர்க்கட்சியில் போய் சேர்ந்துருவாங்களோன்னு பயமா இருந்திருக்கும். போன சட்டசபையில்இவுங்க பக்கம் உக்காந்துருந்தவங்க சிலர் இப்ப எதிர்வரிசையில் இருக்காங்களே. போன பகுதியில் குறிப்பிட்டேன் பாருங்க,வின்ஸ்டன் பீட்டர் சுவாரசியமானவர்னு. இப்ப அவரைப் பத்துன சில செய்திகளைப் பார்க்கலாம்.



1990 தேர்தலில் நேஷனல் கட்சி அபார வெற்றியடைஞ்சது பாருங்க, அப்ப இவர் அந்தக் கட்சியில்தான் இருந்தார்.இவருக்கு 'மவொரி அபேர்ஸ்' மந்திரிப் பதவியும் கிடைச்சது. மனசில் பட்டதை அப்படியே 'பளிச்'னு பேசற குணம்இருக்கறதாலே, கட்சித் தலைமையுடன் பல விஷயங்களில் கருத்து வேறுபாடு. இந்த மோதல்கள் எல்லாம் ஒளிவுமறைவு இல்லாம வெளியே செய்திகளா வந்துக்கிட்டு இருந்ததாலே பொதுஜனங்கள் மத்தியில் இவருக்குப் புகழ் கூடுதலாச்சு.அதே சமயம் கட்சியைப் பத்துன நல்ல எண்ணங்களுக்கு இறக்கம். கட்சியில் பல்லைக் கடிச்சுக்கிட்டுப் பொறுத்துப் போய்க்கிட்டுஇருந்தாலும், அடுத்த தேர்தலில் எங்கே மக்கள் ஆப்படிச்சுருவாங்கன்ற பயம் வந்துருச்சு. மந்திரிப் பதவியைப் பிடுங்கிடுச்சுக் கட்சி.பேசாம வெறும் பார்லிமெண்டு அங்கத்தினரா இருந்தார். அடுத்த தேர்தலுக்கு, கட்சிசார்பா யார் யார் நிக்கப்போறாங்கன்னு லிஸ்ட் போட்டப்ப இவர் பேரே அதுலே இல்லை. இதை எதிர்த்து வழக்குப் போட்டார். அதுலே இவர் பக்கம் தோல்வி.



கொஞ்சம் யோசிச்ச மனிதர், பேசாம கட்சியில் இருந்தும், பாராளுமன்ற அங்கத்தினர் பதவியில் இருந்தும் ராஜினாமா செஞ்சுட்டார். அவரோட தொகுதிக்கு இடைத் தேர்தல் வந்துச்சு. அந்தத் தொகுதியின் பெயர் டாவ்ராங்கா( Tauranga)அந்த இடத்துலே சுயேச்சையா நின்னு 90.71% ஓட்டுகள் வாங்கி வெற்றியடைஞ்சார். பொதுத் தேர்தல் வர்றதுக்கு ஆறே மாசம்தான் இருந்துச்சு.அதனாலே மெனெக்கெட வேணாமுன்னுட்டு இந்த இடைத்தேர்தலில் பெரியகட்சி எதுவும் நிக்கலை. பத்துச் சின்னக் கட்சிகள்தான் விலை போகுமா, மார்கெட் இருக்கான்னு பரிசோதனையா நின்னு பார்த்தாங்க. இதுலே ஒரு கட்சி வெறும் 24 ஓட்டுகள் தான் வாங்குச்சு.



ஆஹா........ மக்கள் நம்மைக் கைவிடலைன்னு புரிஞ்சுபோச்சு. அப்புறம் என்ன........ 'நியூஸி ஃபர்ஸ்ட்'னு புதுக் கட்சி ஆரம்பிச்சார். இதுதான் இப்ப அவர் எதிர்க்கட்சி வரிசையில் உட்கார்ந்திருக்கும் 'கதை'. இது இப்படி இருக்க,
அதே 1990 சமயம் ஜென்னி( ஜெனிஃபர்) ஷிப்லின்ற பெண்மணி, சோஷியல் வெல்ஃபேர் மந்திரியா இருந்தார். இவரும்,நிதி மந்திரியம்மா (ரூத் ரிச்சர்ட்ஸன்) சேர்ந்துதான் அப்ப உதவித் தொகைகளையெல்லாம் குறைச்சாங்க. நாட்டுக்கு நல்லதுன்னாலும், அதேதான் கட்சியின் இறக்கத்துக்குக் காரணமாப் போச்சு. 1993 அமைச்சரவையில் ஷிப்லிக்கு வேற இலாகா சுகாதாரம் & பெண்கள் நலம் மந்திரி ஒதுக்குனாங்க. இந்த 1996 அமைச்சரவையில் நைஸா நிதி அமைச்சர் பதவியை, 'பில் பிர்ச்' என்றவருக்குக் கொடுத்துட்டார் பிரதமர். நம்ம ஜென்னி ஷிப்லி, இப்ப அரசாங்கத்துக்குச் சொந்தமான கம்பெனிகள் நிர்வாக மந்திரி.


இந்த 1996 தேர்தல்தான் யாருக்கும் மெஜாரிட்டி இல்லாம ஆயிருச்சு. சபாஷ்! சரியான போட்டி. நேஷனல் & லேபர் ரெண்டுபேருக்கும் சரிசமமா 41 இடங்கள். பாக்கி இருந்த 17 இடத்துலே யுனைட்டட் கட்சிக்கு 7, நியூஸி ஃபர்ஸ்ட்க்கு 5, அப்புறம் அலையன்ஸ்க்கு 2. மிச்சம் இருந்த 3 இடங்கள் மூணு வெவ்வேற கட்சிக்கு ஆளுக்கு ஒண்ணு. மீண்டும் டானிக்,தாது புஷ்டி எல்லாம் தேவை. இந்த சங்கடமான நிலையில்தான் 'கேக்' உதவிக்கரம் கொடுத்துச்சு.




அதான் MMP க்கு ஆதரவு தெரிவிச்சிருந்தோமே. பாராளுமன்றத்தை விரிவாக்குறோமுன்னு 120 இடங்கள்னு முடிவாச்சு. அப்புறம் சரிக்குச் சரியாப்போனா வம்புன்னுட்டு 121 இடங்கள்னு ஆக்குனாங்க. அந்தக் கணக்குலே 'கேக்'கைப் பங்குபோடறோமுன்னு இங்கே வெட்டி, அங்கெ வெட்டி விகிதாச்சாரம் பார்த்துக் கடைசியிலே அறிவிச்சது இப்படி.


நேஷனலுக்கு 44

லேபருக்கு 37

நியூஸி ஃபர்ஸ்ட் 17

அலையன்ஸ் 13

ஆக்ட் 8

யுனைட்டட் நியூஸி 1

கணக்கு ஒண்ணும் எனக்கு(!) சரியாப் புரியலை. வாயைத் திறந்து கேக்கலாமுன்னா........... கேக்கால வாய் அடைஞ்சு போயிருந்துச்சு. யார் ஆட்சி அமைக்கப் போறாங்க? கூட்டு மந்திரி சபைதான்னு தெரிஞ்சுபோச்சு.'ஆதாயம் இல்லாம யாராவது ஆத்தோட போவாங்களா'? யார்....... யாரோட? 'பேச்சு வார்த்தைகள்' நடக்குது. ( நோ ஸூட் கேஸ்)


நாங்களும் தொலைக்காட்சியும், தினசரிப் பேப்பருமா கண்ணு நட்டுக்கிட்டு இருக்கோம். நேஷனலும், நியூஸி ஃபர்ஸ்ட் கூட்டு. அடிச்சது லக்கி பிரைஸ் நியூஸி ஃபர்ஸ்ட்க்கு. என்ன அப்படிப் பிரமாதமான பிரைஸ்? பிரமாதம்தான்.(உதவி)பிரதமர்தான். 'கூட்டத்துலே கோவிந்தா'ன்னு இல்லாமத் தனியாப் போனது நல்லதாப் போச்சோ?


'யானை'க்கு வாலா இருக்கறதைவிட 'பூனை'க்குத் தலையா......... இது எப்படி இருக்கு?எப்பப் பார்த்தாலும் புலி, எலின்னு சொல்றதை எப்படி மாத்திட்டேன்:-))) ( அப்பாடா, நம்ம யானையையும் பூனையும் சரித்திர வகுப்புக்குக் கொண்டாந்துட்டேன்)



வின்ஸ்டன் பீட்டர் இப்ப உதவிப் பிரதமர். அவரோட கட்சி எம்.பி.ங்க சிலருக்கு 'இணை அமைச்சர்' பதவிகள். ( உங்களுக்கு வேற ஞாபகம்
வந்தால் நான் பொறுப்பல்ல!)


எங்கூரு பார்லிமெண்டுக்குப் பேர் 'தேன்கூடு' ! விளையாட்டுக்குச் சொல்லலைங்க. உண்மையாத்தான். தேன்கூடுமாதிரி வட்டமான டிஸைன்லே கட்டி இருக்காங்க. உள்ளே சபை எப்படி இருக்கு பாருங்க. படம் போட்டுருக்கேன்!

நியூஸிலாந்து பகுதி 61

அரசியலுக்குள்ளெ நுழைஞ்சுட்டா வெளியே வர வழி தெரியாம உங்களையும் இழுத்துக்கிட்டு எங்கியோ போயிட்டேன் பாருங்க. அந்தக் காலக்கட்டத்துலே 'நாட்டுலே நடந்தவை'களைப் பார்க்கலாம் வாங்க.

'ச்சும்மா இருந்த சங்கை ஊதிக் கெடுத்தானாம்'னு நியூஸியின் முதல் சூதாட்ட விடுதி(casino) திறந்தாங்க. அதுவும் எந்த ஊருலே? நான் இருக்கற கிறைஸ்ட்சர்ச் மாநகரத்துலே! இந்த ஊர்லேதான் சுற்றுலாப் பயணிகள் அதிகம்.அவுங்களுக்குப் பொழுது போக்காம். உள்ளூரு சனம் ச்சும்மா இருப்போமா? உள்ளே அருமையான ரெஸ்டாரண்ட்இருக்காம். ஆனா உள்ளே அனுமதி 20 வயசுக்கு மேலே இருக்கறவங்களுக்கு மட்டும். ட்ரெஸ் கோட் இருக்கு.ஜீன்ஸ், ஸ்போர்ட்ஸ் ஷூ எல்லாத்துக்கும் தடா. ஆசையா இருக்கு, உள்ளே வேடிக்கை பார்க்கவாவது போகலாமுன்னு.11 வயசு மகளை வீட்டுலே விட்டுட்டுப் போக மனசு வரலை(-:

இங்கே அரசாங்க விதிப்படி 16 வயசு வரை பிள்ளைகளைத் தனியா வீட்டுலே விட்டுட்டுப் போகக்கூடாது. பார்த்துக்க வீட்டாளுங்க இல்லைன்னா ஒரு 'பேபி சிட்டரை' ஏற்பாடு செஞ்சுக்கலாம். வர்ற பேபி சிட்டர் எப்படி இருப்பாங்களோ?நமக்கு இதெல்லாம் பழக்கமில்லாத காரணத்தால் எதுக்கு வம்புன்னு நாங்களே பார்த்துக்குவோம். தனியா விட்டுட்டுப்போன சேதி தெரிஞ்சா போலிஸ் கேஸ் புக் பண்ணிருவாங்க.

நல்லா இருந்த மக்களுக்கு இதைக் காமிச்சுட்டு, இப்ப அரசாங்கம் சூதாட்டப் பழக்கத்துக்கு 'அடிமை'யா ஆனவங்களுக்கு'ஹெல்ப் லைன்' வச்சுருக்கு. ஏற்கெனவே லாட்டோ விளையாட்டுலே கணக்கு வழக்கில்லாம செலவு பண்ணுறவங்க அதிகமாகிக்கிட்டு வர்றாங்க. வெறும் லாட்டோன்னு இல்லாம, ஒரு டாலர், 2, 5, 10ன்னு சுரண்டல் சீட்டுவேற வந்துக்கிட்டு இருக்கு. இதுலே பார்த்தீங்கன்னா............. அரசாங்கத்துக்கிட்டே உதவிப்பணம் வாங்குற மக்களில் பலர் வாராவாரம் கிடைக்கும் தொகையில் கணிசமானதை இங்கே அழறாங்க. எப்படியாவது பணக்காரனா ஆயிரணும்.அதுவும் கொஞ்சம்கூட உழைக்காமல். உலகம் பூராவும் இப்படிப்பட்ட மக்கள் இருக்காங்க(-:

இந்த நாடு வடக்கு, தெற்குன்னு ரெண்டு பெரிய தீவுகள் கொண்டது. இங்கிருந்து அங்கே போகணுமுன்னா ஃபெரிலேபோகணும். இல்லைன்னா விமானம். ஏற்கெனவே ஒரு கடல்வழிப் போக்குவரத்து நடந்துக்கிட்டு இருக்கு. மூணு மணிநேரம் ஆகும். இப்ப இன்னும் வேகமாப் போறதுக்காக இன்னொரு தனியார் கம்பெனி முன்வந்துச்சு. ஒன்னரை மணி,இன்னும் அதிகமாப் போனா ரெண்டு மணி நேரத்துலெ போயிரலாமாம். மெதுவாப் போறதுலே போனோமுன்னா, பலசமயங்களில் டால்ஃபின் மீன்கள் நம்மோடு வரும்.

நியூஸிதான் விளையாட்டுக்களில் ரொம்ப ஆர்வம் காட்டுற நாடுன்னு சொல்லி இருக்கேனில்லை. அமெரிக்கா கோப்பைன்னு சொல்லி ஒரு படகுப்போட்டி நடக்குதுல்லே? பாய்மரப் படகு. இந்தப் போட்டி ஆரம்பிச்சு முதல்132 வருஷம் அமெரிக்கர்களே ஜெயிச்சுக்கிட்டு இருந்தாங்க. அதுக்கப்புறம், 1983லே ஆஸ்தராலியா ஜெயிச்சுருச்சு.அதுக்கப்புறம் நடந்த மூணு போட்டிகளில் கப் மறுபடியும் அமெரிக்கா பக்கமே போயிருச்சு. ஆஸ்தராலியா ஜெயிச்சா நாங்களும் ஜெயிச்சே ஆகணுமே. அப்படி ஒரு உறவு & அன்பு(!!) எங்களுக்குள்ளே இருக்குல்லே?

1995 வருஷம் இந்தக் கப்பை நியூஸி ஜெயிச்சு, இங்கே கொண்டாந்துருச்சு. நாடே கோலாகலமாயிருச்சு. வழக்கம்போல எல்லா ஊருக்கும் கொண்டாந்து காட்டிட்டுப் போனாங்க. நானும் போய் பார்த்தேன். இங்கே அநேகமா எல்லா ஊர்களிலும் விசேஷங்களுக்கு கூடறதுக்குன்னே ஒரு மைதானம்(??) /சதுக்கம் இருக்கும். எங்க ஊருக்கு இது சிட்டி ஸ்கொயர். அன்னிக்கு மட்டும் ஒரு லட்சம்பேர் கூடுனாங்க. ஊரோட ஜனத்தொகை மூணு லட்சம்தான்.

காமன்வெல்த் நாடுகளின் தலைவர்கள் இந்த வருஷம் இங்கே கூடுனாங்க. மக்கள் தலைவர் நெல்சன் மாண்டேலா வந்துருந்தார். பயங்கர வரவேற்பு. மக்கள் உள்ளத்தை அப்படியே கொள்ளை அடிச்சுக்கிட்டு போனார்.

அரசியல்வாதிகள் அவர்கள் வழக்கம்போல புதுக் கட்சிகள் ஆரம்பிக்கறதும், பழைய கட்சிகளுக்குப் பேர் மாத்தறதுமா பிஸியா இருந்தாங்க.

மவொரிகளுக்கு அந்தக் காலத்துலே அநீதி செஞ்சுட்டோமுன்னு அரசாங்கம் மன்னிப்புக் கேட்டுக்கிட்டு, அவுங்களுக்கு நஷ்ட ஈடு கொடுக்கலாமுன்னு அவுங்க குறை கேட்க ஒரு ட்ரிப்யூனல் அமைச்சதில்லையா? அது ரெண்டு குழுக்களுக்கு,170 மில்லியன், 40 மில்லியன் டாலர்களைக் கொடுத்துச்சு.

இதெல்லாம் முடிச்சுத்தான் 1996 தேர்தல் வந்துச்சு.

இந்த தேர்தல் தேர்தல்னு சொல்றது இங்கே மஜாவா இல்லீங்க(-: லட்டுக்குள்ளே ஒரு மூக்குத்தி உண்டா, குடம் உண்டா? என்னவோ ஒரு நாள் நிச்சயம் செஞ்சு தினசரிப் பத்திரிக்கை,தொலைக்காட்சின்னு சொன்னாப் போதுமா? ஒரு பொதுக்கூட்டம் உண்டா? ஒலிபெருக்கி வச்சு அண்ணனுக்கோ, அக்காவுக்கோ,அம்மாவுக்கோ, அய்யாவுக்கோ ஓட்டுப்போடுன்னு, மக்கள் காது சவ்வைக் கிழிச்சுக்கிட்டுக் கூவறது உண்டா? வூட்டாண்ட வந்து நம்மளைக் கண்டுக்கறது உண்டா? அங்கங்கே போஸ்டர் அடிச்சு ஒட்டி, நம்ம வீட்டுச் சுவத்தையெல்லாம் பாழ்படுத்தற விதரணை உண்டா? ஒருத்தர் போஸ்டர் மேலெ இன்னொருத்தர் அவுங்க போஸ்டரை ஒட்டிட்டா, போனாப் போகுதுன்னு ஒட்டுனவன் கை எடுக்கற கலாச்சாரம் உண்டா?

அட அத்தை விடுங்க......... ஓட்டுப்போட ஒரு லீவு உண்டா? பொல்லாத தேர்தல்......... சனிக்கிழமையாப் பார்த்து நடத்துறது என்னாங்க கணக்கு? அந்தந்த பேட்டையில் இருக்கும் பள்ளிக்கூடத்து ஹாலிலே போலிங் பூத் வச்சுடராங்க.காலையில் 9 மணிக்கு ஆரம்பிச்சு மாலை 7 வரை திறந்திருக்கும். அதுகூடப் பாருங்க, இங்கத்து சம்மர்தான் தேர்தலுக்கு.குளிர்காலமுன்னா யாரும் மெனெக்கெட மாட்டாங்களாம்.

அன்னிக்குக் கடைகளுக்குப் போக நாம் கிளம்புவோமில்லையா,அப்படியே போய் நம்ம ஓட்டையும் போட்டுட்டுப் போய்க்கிட்டே இருக்க வேண்டியதுதான். நாலு ஆளுக்கு மேலே லைன்லே நின்னாங்கன்னா நான் பயங்கரக் கூட்டமுன்னு சொல்லிருவேன். அந்த ஓட்டுப் பெட்டிக் கூட ஒரு அந்தஸ்த்து இல்லாம வெறும் அட்டைப் பொட்டிங்க. ஒரு பூட்டு உண்டா? அந்த வளாகத்துலே ஒரு போலீஸ் உண்டா? ஹூம்...... வேஸ்ட்ங்க!

தேர்தலுக்கு ஒரு மாசம் முன்னால்கூட வாக்காளராப் பதிவு செஞ்சுக்கலாம். ஒரு இமெயிலோ, இலவசத் தொலைபேசியோகூடப் போதும். என்ன செய்யணும், எப்படி ன்னு எல்லா விவரமும் கதறிக்கிட்டு ரெண்டு மூணு நாளுக்குள்ளே வந்துரும்.

வாக்குப்பதிவுக்கு ஊர்லே இருக்கமுடியாதா? ரெண்டரை வாரத்துக்கு முன்னெயே ஸ்பெஷலா ஓட்டுப் போட்டுக்கலாம்.
தேர்தலுக்கு ஒரு மாசம் இருக்கறப்பவே ஏற்கெனவே பதிவு செஞ்ச வாக்காளர்களுக்கு 'ஈஸி ஓட்டு கார்டு'ன்னு நம்ம விவரம் அடங்குன கடுதாசியை நம்ம வீட்டுக்குத் தேர்தல் வாரியம் அனுப்பி வைக்கும். அதைக் கொண்டுபோனாப் போதும்.

17 வயசானதும் பதிவு செஞ்சுக்கலாம். 18 வயசு ஆனதும் போட்டுறலாம் உங்க ஓட்டை:-)
ஆனா ஒண்ணு, நாமேதான் போய் ஓட்டுப்போடணும். வீட்டாண்டை வந்து கூட்டிக்கிட்டுப் போக மாட்டாங்க.நம்ம ஓட்டை யாராவது போட்டுக்கட்டுமுன்னு இருக்க முடியாது. என்னவோ போங்க.ம்ம்ம்ம்ம்,புலம்பல்தான்.

நியூஸிலாந்து பகுதி 60

போன தேர்தலில்(1990) முழுசா அதிக இடம் பிடிச்சு ஆட்சிக்கு வந்த நேஷனல் கட்சிதான் இப்பவும் ஜெயிச்சது. ஆனா 'கரணம் தப்புனா மரண'முன்னு சொல்றாப்போல ஒரே ஒரு ஸீட் மெஜாரிட்டி. இந்தத் தேர்தலுக்கு சில மாசத்துக்கு முன்னே, இன்னொரு புதுக் கட்சியும் உதயமாச்சு. இதுவரை மவொரி விஷயங்களுக்கான மந்திரியா இருந்த வின்ஸ்டன் பீட்டர் (இவர் மவொரி இனத்தைச் சேர்ந்தவர். ரொம்ப சுவாரசியமான நபர். இவரைப்பத்தி நிறையவே சொல்லலாம்) கருத்து வேறுபாடு காரணம் 'நியூஸிலாந்து ஃபர்ஸ்ட்' ( NZ First) ஆரம்பிச்சு,ரெண்டு ஸீட்டும் பிடிச்சிட்டார். அலையன்ஸ்-ம் ரெண்டு இடம். லேபர் 45. இவுங்க எல்லாரும் கூடிக்கிட்டாங்கன்னா49 ஆயிரும். இந்தத் தேர்தலில் ரெண்டு தொகுதி கூடுதலா ஆகி இருந்தது. மொத்தம் 99 தொகுதி. 50/49 னு இருந்துச்சு கட்சி நிலவரம். எப்பவும் எதுவும் நடக்கலாம்.

நேஷனல் அரசு ஒரு காரியம் செஞ்சது. கூடுதல் பலம் வேணுமே....... அதுக்கு எதாவது டானிக், தாதுபுஷ்டி லேகியம்,மருந்து மாத்திரை? சபாநாயகர் பதவிக்கு எதிர்க்கட்சியிலிருந்து ஒருத்தரைத் தேர்ந்தெடுத்துச்சு. தன் கட்சியில் இருந்துஎடுத்தா 49/49 ன்னு சரிசமமா ஆயிருமே! லேபர் கட்சியின் எம்.பி.யான, பீட்டர் டாப்செல்(Peter Tapsell)க்கு இந்தப் பதவியைக் கொடுத்தாங்க. இது லேபர் கட்சிக்குக் கொஞ்சமும் பிடிக்கலை. ஆனா பீட்டர் டாப்செல் இதுக்கெல்லாம் கவலைப்படலை. அவர் மவொரி இனத்தைச் சேர்ந்தவர்ன்றதாலே அவ்வளவா தகராறு இல்லை. இவர்தான் மவொரி இனத்தைச் சேர்ந்த முதல் சபாநாயகர் என்ற அந்தஸ்த்தும் கிடைச்சது.

இப்படி ஒரு கழுத்தைப் பிடிக்கும் நிலமை வந்ததுக்கு நிதியமைச்சரின் நடவடிக்கைதான் காரணமுன்னு நினைச்சுக்கிட்டு, இந்த முறை 'பில் பிர்ச்' என்றவருக்கு நிதி அமைச்சர் பதவியைக் கொடுத்தார் பிரதமர். போனமுறையே இவருக்குக் கொடுக்கணுமுன்னுதான் எண்ணம் இருந்துச்சு. ஆனா அப்ப ரூத் ரிச்சர்ட்ஸனுக்குத்தான் கட்சிக்குள்ளே பலத்த ஆதரவு. ஒருமாதிரி வண்டி ஓடுச்சு 3 வருசம்.

பெண்களுக்கு ஓட்டுரிமை கொடுத்த முதல் நாடு நியூஸிதான்னு உங்களுக்குத்தான் ஏற்கெனவெ தெரியுமில்லையா?அது 1893 வது வருஷம். இந்த வருஷம் நூற்றாண்டு விழா. கொண்டாட்டம்தான். உயர்நீதி மன்றதுக்கு டேம் சில்வியாகார்ட்ரைட்(Dame Silvia Cartwright) முதல் பெண் நீதிபதியா ஆனாங்க. சாண்ட்ரா லீ என்ற மவொரிப் பெண்மணி,முழுக்க முழுக்க வெள்ளைக்காரர்கள் இருக்கும் தொகுதியிலே, தேர்தலில் நின்னு ஜெயிச்சு எம்.பி. ஆனாங்க.( அடடாடா.....சாதி ஓட்டு இப்படியா ஆகணும்?) ஹெலன் க்ளார்க் என்ற லேபர் கட்சி எம்.பி. எதிர்க்கட்சித் தலைவியா ஆனாங்க.இதுவரை எந்தப் பெண்களுமே கட்சித் தலைமைவரை வந்ததில்லை. ரொம்பப் புரட்சிகரமா இருந்துச்சு.

எம் எம் பி ( MMP, மிக்ஸட் மெம்பர் ப்ரபோர்ஷனல்) முறையில் பாராளுமன்ற உறுப்பினர்களைத் தேர்வு செய்யலாமான்னுகேட்டு ஒரு கருத்துக் கணிப்புத் தேர்தல் நடந்துச்சு. இது என்னன்னு விளக்கோ விளக்குன்னு மக்களுக்கு விளக்குனாங்க. பொதுத்தேர்தல் நடக்கும்போது எந்தெந்தக் கட்சிக்கு, மொத்தத்தில் எவ்வளவு ஓட்டு விழுதோ,அந்த விகிதாச்சாரப்படி அந்தந்தக் கட்சியில் இருந்து நபர்களைக் கட்சியின் மேலிடம் தெரிவு செஞ்சு அவுங்களையும் பாராளுமன்ற உறுப்பினர்(List M.P.) ஆக்குவாங்களாம். ( புகழ் பெற்ற(??) ஆளுங்களை நம்மூர் ராஜ்ய சபாவுக்கு தேர்ந்தெடுக்கற மாதிரி இருக்கே)

ஒரு பெரிய கேக். அதை விகிதாசாரப்படி வெட்டிப் பங்கு போடற மாதிரி தொலைக்காட்சி, தினப்பத்திரிக்கை, இன்னும்வீட்டு வீட்டுக்கு வரும் ஜங்க் மெயில்னு எல்லா இடத்திலும் காட்டிக் காட்டிச் சொன்னாங்க. நாங்களும் அதைப் புரிஞ்சுக்கிட்டு(???)ஆகட்டுமுன்னு அதுக்கு ஒரு ஓட்டுப் போட்டுத் தேர்ந்தெடுத்தோம். அடுத்த பொதுத்தேர்தலில் இது நடைமுறைக்கு வருமுன்னு சொன்னாங்க. ஆகக்கூடி 'அல்வா'ன்ற ஒரு பொருள் இங்கே 'கேக்'காக மாறி இருந்துச்சு. அவுங்க ஊட்டுன அந்த(அல்வா) கேக்கை, 'ஆ.....'ன்னு வாய் திறந்து வாங்கிக்கிட்டோம்.

நியூஸியில் எடுத்த திரைப்படம் ' த பியானோ' உலக அளவுலே பேசப்பட்டுச்சு. காரணம் சில பல ஆஸ்கார்களை வாங்கிக் குவிச்சதால். சிறந்த நடிகை, சிறந்த துணை நடிகை, சிறந்த கதை, திரைக்கதைன்னு ரொம்பப் புகழ். சிறந்த துணை நடிகைக்கான ஆஸ்கார் வாங்கின 'ஆனா பேக்வின்'(Anna Paquin) வயசு வெறும் 11 தான்.

ப்ரிஸ்பேன்

மக்கள்ஸ், பிரிஸ்பேன் நகரில் இருந்து வலைபதியும் நண்பர்கள் யாராவதுஇருந்தால் பின்னூட்டத்தில் உங்க மெயில் ஐடியோ இல்லே தொலைபேசி எண்களோ தெரிவிச்சீங்கன்னா.............. சந்திக்க முயற்சிப்பேன்.


வரும் வாரம் முழுசும் அங்கேதான் கேம்ப்:-)


உங்கள் சொந்த விவரங்கள்(???) அடங்கிய பின்னூட்டங்கள் வெளியிடப்படாது.


என்றும் அன்புடன்,

துளசி.

நியூஸிலாந்து பகுதி 59

"சேர்த்த பணத்தைச் சிக்கனமா செலவு பண்ண பக்குவமா
அம்மா கையிலே கொடுத்துப்போடுச் சின்னக்கண்ணு,
அவுங்க ஆறை நூறு ஆக்குவாங்கச் செல்லக்கண்ணு"



காசுலே கண்ணும் கருத்துமா இருக்கறது பெண்களுக்கு மட்டும் கைவந்த கலையோ? அதிக செலவு எங்கெங்கே அனாவசியமா(??) ஆகுதுன்னு பார்த்து அங்கெல்லாம் ஒரே போடாப் போட்டாங்க நாட்டின் புது நிதி அமைச்சரம்மா.ரூத் ரிச்சர்ட்ஸன். இந்தப் பதவிக்கு வந்த முதல் பெண்மணி! முதல் என்ன முதல் ? இவுங்கதான் ஒரே பெண்மணி. இவுங்களுக்கப்புறம் இன்றுவரைக்கும் வேறு பெண்கள் யாருமே நிதியமைச்சரா வரவேயில்லை(-:



பசங்களுக்குக் கொடுத்துக்கிட்டு இருந்த ஆறு $க்கு முதல் ஆப்பு(-: வெல்ஃபேர் கவர்மெண்டு ஆச்சே இங்கே. யாரும்பட்டினியா இருக்கக்கூடாதுன்றதுலெ அரசு கவனமா இருக்கும். அரசு கொடுக்கும் காசையும் கண்டமாதிரி செலவு செஞ்சுட்டு, சாப்பாட்டுக்காக 'சூப் கிச்சன்' போற ஆட்களும் உண்டுதான். வெல்ஃபேர் காசைக் கொஞ்சம் குறைச்சதும் அதை வாங்கிக்கிட்டு இருந்தவங்களுக்கு மனக்கசப்பு ஏற்பட்டுச்சு. ஆனா, ரூத் ரொம்பக் கண்டிப்பானவங்களா இருந்தாங்க.உண்மைக்கும் சொன்னா, இன்னொருத்தரை நிதியமைச்சரா ஆக்கணுமுன்னு பிரதமருக்கு விருப்பம் இருந்துச்சு. ஆனாகட்சியில் ரூத் ரிச்சர்ட்ஸனுக்கு ஆதரவு நிறைய இருந்தது.



வேலை இல்லாதோர் எண்ணிக்கை ஏறிக்கிட்டே போச்சு. இதுவரை நியூஸியின் சரித்திரத்துலே முதல் முறையா ரெண்டு லட்சத்துக்கு மேல் வேலை இல்லாதவங்க. இவ்வளவு பேருக்கும் அரசாங்கம் காசு கொடுக்கணுமே! முழி பிதுங்கிப் போச்சு.


வேலை செய்யறவங்களுக்கும், முதலாளிகளுக்கும் ஒப்பந்தம் பண்ணிக்கிற சட்டம் ஒண்ணு கொண்டுவந்தாங்க.எம்ப்ளாய்மெண்ட் காண்ட்ராக்ட். தொழிற்சாலையில் வேலை செய்யறவங்கன்னா எல்லாத் தொழிலாளர்களுக்கும்சேர்த்து கலெக்டிவ்வா ஒரு ஒப்பந்தம். நிர்வாகத்துலே இருக்கறவங்களுக்கு தனித்தனி ஒப்பந்தமுன்னு ஆச்சு.வேலையில் இருந்து தூக்குனாங்கன்னா நஷ்ட ஈடு எவ்வளவு கிடைக்கும், வேலையில் இருந்தா எத்தனை நாள் சம்பளத்தோட லீவு, எத்தனை மணி நேர வேலை இப்படி எல்லாத்துக்கும் சேர்த்துத்தான் இந்த ஒப்பந்தங்கள்.இந்தக் காரணத்தாலே தொழிற்சங்கங்கள் கொஞ்சம் பலவீனமாச்சு.



ஃப்ரீ மார்கெட் பாலிஸி கொண்டு வந்தாங்க. பல்கலைக் கழகங்கள், ஆஸ்பத்திரிகள் எல்லாம் சேவை மனப்பான்மையைக் கொஞ்சம் ஒதுக்கிட்டு, பயன்படுத்தறவங்க பணம்(User Pay) கொடுக்கணுமுன்னு ஒரு திட்டம் வந்துச்சு. மாணவர்கள் எண்ணிக்கையைப் பொறுத்துத்தான் பல்கலைக் கழகங்களுக்கு வருமானம்னு ஆகிப்போனதால் ஒவ்வொரு பல்கலைக்கழகமும் வெளிநாட்டு மாணவர்களை வருந்திக் கூப்புட ஆரம்பிச்சது. உள்ளூர் மாணவர்களுக்கு ஒரு பங்குக் கட்டணமுன்னா,அதே படிப்புப் படிக்க வெளிநாட்டிலே இருந்து வரும் மாணவர்களிடம் ரெண்டு மூணு மடங்கு அதிகம் வாங்கலாமே!ஒவ்வொரு பல்கலைக்கழகமும் 'புள்ளை புடிச்சுக்கிட்டு வர்றதுக்காக' ஆட்களை வெளிநாடுகளுக்கு அனுப்புச்சு.



'இங்கிலீஷ் டீச்சிங் ஸ்கூல்ஸ்' வேற முளைச்சது. எப்படி? மழை பேய்ஞ்ச மறுநாள் முளைக்கும் காளான்களைப்போல.முக்கியமா சீனர்கள் இங்கே ஆங்கிலம் படிக்கன்னு வந்தாங்க. இதெல்லாம் தனியார் செஞ்சுக்கிட்டது. அவுங்ககிட்டே இருந்து நல்ல பணவரவு. அந்தப் பசங்க இங்கே வெள்ளைக்காரர்கள் வீடுகளில் தங்கறதுக்கு இடம் ஏற்பாடு செஞ்சு கொடுக்கறது, இங்கே இருக்கறதுக்கு விஸா எல்லாம் அந்தப் பள்ளிக்கூடங்களே ஏற்பாடு செஞ்சாங்க. காசோ காசு மழைதான்.



பள்ளிக்கூடம் முடிச்சுட்டு மேல்கொண்டு படிக்க உள்நாட்டு மாணவர்களுக்கு அரசாங்கமே 'ஸ்டுடண்ட்ஸ் லோன்'கொடுக்க ஆரம்பிச்சது. அதுக்கும் வட்டி உண்டு. ஆனா ரொம்பக் குறைஞ்ச விகிதம். படிச்சு முடிச்சுட்டு அப்புறம் கட்டலாமுன்னு சொன்னாங்க.



அரசியல்வாதிகளுக்கு அவுங்க கவலை. ஒரு நாலு கட்சி ஒண்ணா சேர்ந்து ஒரு புது கட்சி ஆரம்பிச்சாங்க. லேபர் கட்சியிலே இருந்து பிரிஞ்சு போய், புது லேபர் கட்சின்னு தனிக்கட்சி ஆரம்பிச்ச ஜிம் ஆண்டர்டன்தான் இதையும் செஞ்சவர். நடந்து முடிஞ்ச தேர்தலில் இவர் மட்டும்தானே புது லேபர் சார்பா ஜெயிச்சார். ஒரே ஒரு ஸீட் வச்சுக்கிட்டு என்ன செய்யமுடியும்?



இந்த சமயத்துலே நடந்த கல்ஃப் போரில், ஐக்கியநாடுகள் கேட்டுக்கிச்சுன்னு நியூஸியின் படைவீரர்கள் கலந்துக்கிட்டு இருந்தாங்க. இந்தப் புதுகட்சி ( அலையன்ஸ் கட்சி) அவுங்க கட்சிக் கொள்கைகளை அறிவிச்சது. என்னன்னா, எல்லாருக்கும் இலவசக் கல்வி, இலவச மருத்துவம், வேலையில்லாத் திண்டாத்தைக் குறைக்கிறது, மக்கள் நலத்துக்கான வெல்ஃபேர்திட்டத்தைத் தொடர்ந்து நடத்துவது, பெண்களுக்கான உரிமைகள், மவோரிகளுக்கான உரிமைகள், சுற்றுப்புற சூழலைப் பாதுகாக்கறதுன்னு அருமையான கொள்கைகள். இதுலே முக்கியமான, கவர்ச்சிகரமானது என்னன்னா, GST ன்னு இருந்த வரியைத் தூக்கிடறது. ஏற்கெனவே அரசாங்கம் நடத்துன பல நிறுவனங்களை வெளி நாட்டுக்காரர்கள் வாங்கியதையும் இவுங்க எதிர்த்தாங்க.




இந்த சமயத்துலேதான் பனி மழை கூடுதலா வந்து அதிகப்பனியைத் தாங்க முடியாம நாட்டின் மிக உயர்ந்த மலைச்சிகரம் 'மவுண்ட் குக்', அப்ப மலைக்கு அடியில் வந்த நிலநடுக்கத்தாலே உச்சி இடிஞ்சு அப்படியே பெயர்ந்து விழுந்துருச்சு.இதனாலே சிகரத்தோட உயரம் ஏறக்குறைய 20 மீட்டர் குறைஞ்சு போச்சு. ஆனாலும் இப்பவும் இதுதான் நாட்டின் உயர்ந்தசிகரம். இந்த மலையைப் பத்தி ஏற்கெனவே நியூசிலாந்து பகுதி 43 லே சொல்லி இருக்கு. பாருங்க.




உச்சி இடியும் முன்பு ( காலை வெயிலில் )




உச்சி இடிஞ்ச பிறகு ( கடும் பனியில்)


'உச்சிமீது வான் இடிந்து வீழுகின்ற போதிலும் அச்சமில்லை அச்சமில்லை அச்சமென்பதில்லையே' இது எப்படி இங்கத்து நிதி அமைச்சருக்குத் தெரிஞ்சது? நிதி நிலையைச் சரிக்கட்ட ரொம்பப் பாடு படவேண்டியதாப் போச்சு.நியூஸி வங்கியையே ஆஸ்தராலியா வாங்கிட்டாங்க. நியூஸி ரெயில்வேயைக்கூட அப்புறம் ஒரு தனியார் கம்பெனிக்கு வித்துட்டாங்க.


அரசாங்கம் வீடுகளை கட்டி வச்சு, குறைஞ்ச வாடகைக்குத் தந்துக்கிட்டு இருந்ததையும் நிப்பாட்டுனாங்க. வெளியிடத்தில் என்ன வாடகையோ அதேதான் இனிமேல் வசூலிக்கணுமுன்னு முடிவு செஞ்சாங்க. வருமானம் குறைச்சலா இருந்தவங்களுக்கு இது இன்னும் ஒரு இடியா விழுந்துச்சு.
போன அரசாங்கத்துலே 'ரோஜர்னாமிக்ஸ்' வந்ததைப்போல இப்ப 'Ruthanasia' (Ruth and euthanasia),என்ற சொல் பிரபலமாச்சு. மக்களுக்குப் பிடிக்காமப்போன நிதி அமைச்சரா இருந்தாங்க ரூத். அப்படியும் இவுங்க 3 வருஷம் பதவியிலே இருந்தாங்கதான். மூணு வருசம் ஓடி அடுத்த தேர்தல் வந்துச்சுங்க. ஜெயிச்சது யாரு?



கொசுறுச் செய்தி: கருத்துக்கணிப்பு.


இன்னிக்குக் காலையில்( 14/05/07) வந்த இந்தக் கருத்துக் கணிப்பு உங்கள் பார்வைக்கு.
ச்சும்மா........... உங்களுக்குச் சொல்லணுமுனுன்னு தோணுச்சு. அதனாலேதான்.........

நியூஸிலாந்து பகுதி 58

சரியா 150 வருசமாயிருச்சு, இங்கே பிரிட்டிஷ்காரங்க வந்து, உள்ளூர் மவொரிகளுடன் ஒப்பந்தம் போட்டு, கடைசியில்நாட்டையே வளைச்சுப்போட்டு............... இப்ப வருஷம் 1990 பிறந்துருச்சே.
இதைப் பெரிய அளவுலே கொண்டாடுனாங்க. எல்லா பெரிய நகரங்களிலும் தேர்த்திருவிழா போல கண்காட்சிகள்.ஒரு பத்து டாலர் நோட்டு இந்த விசேஷத்துக்காகவே புது டிசைனோட வந்துச்சு. மவொரித் தலைவர்களும் ஒண்ணு சேர்ந்து அவுங்க இனத்தையெல்லாம் கூட்டி நேஷனல் காங்ரெஸ் தொடங்குனாங்க. இந்த வைட்டாங்கி தினம் பிப்ரவரி மாசம் 6ஆம்தேதி கொண்டாடப்படுது. இந்த தினத்தை தேசீய விடுமுறையா அறிவிச்சது இப்ப ஒரு முப்பதுவருசத்துக்கு முந்திதான். அப்ப ஆண்டுக்கிட்டு இருந்த லேபர் கட்சிதான் இதுக்கு முன்கை எடுத்தது.

இந்தியா கிரிக்கெட் விளையாட்டுக்கு இங்கே வந்தாங்க. சச்சின் டெண்டூல்கர் ரொம்பச் சின்னப்பையனா இருந்தார்.காமன்வெல்த் நாடுகளின் விளையாட்டும் இந்த வருஷம் நியுஸிலாந்தில் நடந்துச்சு. அதுக்காக எலிஸபெத் மகாராணி வந்திருந்து விழாவை ஆரம்பிச்சு வச்சாங்க. ஒரே கோலாகலம்தான். விளையாட்டுப்போட்டிகள் ஆக்லாந்து நகரில்தான்னு இருந்தாலும், குடி மக்களைப் பார்க்க ராணியம்மா முக்கிய நகரங்கள் சிலதுக்குப் போனாங்க. அதுக்கென்ன? வடக்குத்தீவு,தெற்குத்தீவுலே ரெவ்வெண்டு ஊர்கள்தானே? எங்கூருக்கும் வந்தாங்க.நாங்களும் போய் 'பார்த்துட்டு' வந்தோம்:-)( இம்மாந்தூரம் வந்துருக்காங்க. நம்ம 'வீட்டுக்கு' வரலைன்னு நாம கோச்சுக்க முடியுமா?)

பெரிய நிறுவனங்கள் சில தனியார்வசம் விற்கப்பட்டன. அதுலே ஒண்ணு இங்கத்து டெலிகாம். இந்தியாவுக்குப் பேசணுமுன்னா நிமிஷத்துக்கு ரெண்டு டாலருக்கும் கூடுதலா வாங்கியே ரொம்பப் பணம் பண்ணிட்டாங்க. 'ஸ்டாப் வாட்ச்' வச்சுக்கிட்டுத்தான் தொலைபேசியையே தொடுவோம்.

செப்புக்காசுகள் ஒரு செண்ட், ரெண்டு செண்ட் காசுகள் இனிமே செல்லாதுன்னுமுடிவு செஞ்சு தூக்கிட்டாங்க. தயாரிப்புச் செலவு கூடுதலா ஆனதும் ஒரு காரணம். ஆனாலும் கடைகளில் ** 99 செண்ட்ன்னு அறிவிச்சுக்கிட்டு இருந்தாங்க.அதை ரவுண்டப் செய்யறோமுன்னு சில கடைகளில் 95 ன்னு 4 செண்ட் நஷ்டத்துக்கும், சில இடங்களில் முழு டாலராஎடுத்துக்கிட்டு ஒரு செண்ட் லாபமும் பார்த்தாங்க.

பூகம்பம் அடிக்கடிச் சின்னச்சின்னதா வரும் நாடுன்னாலும் 'பே ஆஃப் ப்ளெண்டி' என்ற ஊரில் ஒரு பூகம்பம் சொல்றாப்புலே வந்துச்சு. ஒரு அம்பத்தொம்பது வருசத்துக்கு முந்தி 1931 லே பெருசா ஒண்ணு வந்து 258 பேர் உயிரிழக்கும்படியானது. அந்தமாதிரி ஆகிருமோன்னு ரொம்பக் கவலையா இருந்துச்சு. ஆனா நல்லகாலம் அப்படிஉயிரிழப்புகள் நடக்கலை. ஒரே ஒருத்தர்தான் இறந்துட்டார். அதுவும், பூகம்பம் வந்துருச்சுன்ற செய்தியைக் கேட்டு,அதிர்ச்சியிலே இதயத்துடிப்பு நின்னு போச்சாம்(-:

கவர்னர் ஜெனரலின் பதவிக்காலம் முடிஞ்சு புது கவர்னர் ஜெனரல் வந்தாங்க.நாட்டின் சரித்திரத்துலே முதல் முறையா பெண் கவர்னர் ஜெனரல். அவுங்க பெயர் டேம் காதரீன் டிஸார்ட் (Dame Catherine Tizard )
கிறைஸ்ட்சர்ச் மாநகர வரலாற்றிலேயே முதல் பெண் மேயரா 'விக்கி பக்' ஆனதும் போனவருசம் (1989 லே)தான். இவுங்க தொடர்ந்து ஒன்பது வருஷம்( 3 தேர்தல்) இந்தப் பதவியில் இருந்தாங்க.

திடீர்னு இந்தப் பிரதமரும் வேலையை விட்டுட்டு விலகினார். அப்ப தேர்தலுக்கு ரெண்டு மாசம்தான் இருந்துச்சு. ஆட்சி சரியில்லை,சனங்கள் எதிர்பார்த்த அளவுக்கு ஒண்ணும் செய்யலை, இந்தத் தேர்தலில் ஜெயிக்கறது ரொம்பக் கஷ்டமுன்னு ஆகியிருக்கு.அதான் விலகிட்டார்ன்னு சொன்னாங்க. மைக் மூர் என்பவர் பிரதமராப் பதவிக்கு வந்தார். சொல்லி வச்சது போலவே லேபர் தோத்துப் போச்சு. நேஷனல் கட்சி ஜெயிச்சாங்க. ஜிம் போல்ஜர் ( ஜேம்ஸ் போல்ஜர், செல்லமா ஜிம்னு கூப்புட்டாங்க)என்பவர் புதுப் பிரதமரா வந்தார். இந்த ஒரு வருஷம் மட்டும் 3 பிரதமர் பார்த்த நாடு இதுவாத்தான் இருக்கும்!

இங்கத்துப் பார்லிமெண்டில் அப்பெல்லாம் மொத்த சீட்கள் 97 தான். 18 வயசாச்சுன்னா நீங்க ஓட்டுப்போடலாம்.கிட்டத்தட்ட34 லட்சம் ஜனத்தொகை இருந்த காலக்கட்டம். P.R.லே இங்கே வந்தவங்களுக்கும் ஓட்டுரிமை இருக்கு. வாக்காளர்கள் எண்ணிக்கை 22 லட்சத்துக்குக் கொஞ்சம் கூடுதலா இருந்துச்சு. இந்தத் தேர்தலில் நேஷனல் கட்சி ஜெயிச்ச இடங்கள் 67. லேபருக்குச் சரியான அடி. வெறும் 29 இடம்தான் ஜெயிச்சாங்க. புது லேபர் கட்சி தொடங்குனாங்க பாருங்க, அவுங்களும் இந்த 97 இடத்திலும் போட்டி போட்டு ஒரே ஒரு இடம் ஜெயிச்சாங்க. ஜெயிச்சவர், அந்தக் கட்சியின் தலைவர் மட்டும்.

(இது அப்படியே நம்ம தமிழ்நாட்டுத் தேர்தலில் ஒருமுறை நடந்துச்சுலே?)

நேஷனல், லேபர், புது லேபர், க்ரீன்ஸ் ( வேல்யூஸ் கட்சிதான் க்ரீன்ஸ் கட்சின்னு இப்பப் புதுப்பெயர் மாத்திக்கிச்சு. வாஸ்து? )இப்படி பெரிய கட்சிகளா நாலு இருந்தாலும், 27 ச்சோட்டாமோட்டாக் கட்சிகள் இருக்கு. அவுங்களும் கொஞ்சம் இடங்களில் தேர்தலுக்கு நின்னாங்க. இதில்லாம சுயேட்சையா 39 பேர் நின்னாங்க. இவுங்களில் யாருமே ஜெயிக்கலை.

ஆன்னா ஊன்னா கட்சி ஆரம்பிக்கறது இங்கேயும் இருக்கு பார்த்தீங்களா?

மனுஷங்க எல்லோரும் ஒண்ணுதான்,இல்லே?

நியூஸிலாந்து பகுதி 57

பள்ளிக்கூடத்தை அரசு நடத்துனாலும், இன்னும் அது சம்பந்தப்பட்டப் பொறுப்புகளை முக்கியமா வரவு செலவுகளைக் கவனிச்சுக்க புதுசா ஒரு ஏற்பாடு உருவாச்சு. Board of Trusteesன்னு அந்தந்தப் பள்ளிக்கூடத்துக்குன்னு பெற்றோர்கள்,ஆசிரியர்கள், இன்னும் விருப்பம் இருக்கும் பொது மக்கள்னு யார்வேணுமுன்னாலும் இதுக்குண்டான தேர்தலில் பங்கு பெறலாம். அந்தந்தப் பள்ளிகளின் தலைமை ஆசிரியர் இதில் ஒரு உறுப்பினராக இருப்பார். உயர்நிலைப் பள்ளிகளில் மட்டும், மாணவர் சார்பாக ஒரு மாணவரும் உறுப்பினராகத் தேர்ந்தெடுக்கப்படுவார்.

அரசாங்கம் பள்ளிகளுக்குத் தரும் மானியம் மட்டும் போதாதுன்னு பெற்றோர்கள் கிட்டே ஒரு விதமான டொனேஷன் வாங்கும் வழக்கம் இருக்கு. அது எவ்வளவுன்றதை இந்த போர்டு தீர்மானிக்கும். ஒரு குழந்தைக்கு இவ்வளவு, ஒரே குடும்பத்தில் ஒன்றுக்கு மேற்பட்டப் பிள்ளைகள் பள்ளியில் இருந்தால் இவ்வளவுன்னு சொல்வாங்க. அதுவும் ரொம்பக் காசெல்லாம் கிடையாது. வருஷத்துக்கு 30$ வரைக்கும் இருக்கலாம். முதல் குழந்தைக்கு 30ம், அடுத்து வரும் குழந்தைகளுக்கு 20ம் வாங்கறதும் உண்டு. ஆனா எல்லாக் குடும்பத்துக்கும் இது ஒண்ணுபோலத்தான்.இதைக் கட்டாயம் தரணுமுன்ற நிர்பந்தமும் கிடையாது. முடியாதுன்னுக் கூட சொல்லலாம்.

அதே மாதிரி பள்ளியின் வருமானத்தைக் கூட்ட எதாவது 'ஃபண்ட் ரெய்சிங்' நிகழ்ச்சிகளும் நடத்துவது பள்ளிக்கூடத்துக்கான சீருடைகள் தெரிவு என்று எல்லாமே இவங்க பொறுப்புதான். இந்த போர்டு உறுப்பினர்கள் அப்பப்ப ஒன்றுகூடி விவாதிச்சு, பள்ளிக்கூடத்துக்கு வேண்டியதைச் செய்வாங்க. வருசக் கடைசியில் அரசாங்கத்துக்கு இவுங்க செஞ்ச விவரங்களோட அறிக்கையை அனுப்பணும்.

எல்லாப் பள்ளிக்கூடங்களிலும் குறைஞ்சது ரெண்டு வருசத்துக்கு ஒரு முறை School Fair நடத்துறது உண்டு. ( இந்த மாதிரி ஒருஸ்கூல்ஃபேர் படங்கள்தான் இந்தப் பதிவுலே போட்டிருக்கேன். )பெற்றோர்களுக்கும் வீட்டுலே இருக்கும் வேண்டாத சாமான்களைக் கழிச்சுக்கட்ட வழி கிடைச்சுருச்சு. ஒருத்தருக்குத் தேவை இல்லாதது அடுத்தவங்களுக்குத் தேவைப்படலாம் இல்லையா? எதைத்தான் பள்ளிக்கூடத்து ஃபேர்லே கொடுக்கறதுன்னு இல்லாம டி.வி, கட்டில், மேசை நாற்காலி முதற்கொண்டு, போடாம சும்மாக் கிடக்கற செருப்பு வரைக்கும் கொண்டு வந்து குமிச்சுருவாங்க. இப்பக் கொஞ்சவருஷமா கணினியும் வந்துருது:-))))

கேக் ஸ்டால்னு விதவிதமா பிஸ்கெட், மஃப்பின், கேக் பண்ணிக் கொண்டுவந்து கொடுப்பாங்க. நான் ஒரு சமயம் ரெண்டு பக்கெட் நிறைய முறுக்கு பண்ணிக் கொடுத்தேன். ஒரு சமயம் நானும் கோபாலுமா சேர்ந்து இண்டியன் சமையல்ன்னு ஃப்ரைடு ரைஸ், உருளைக்கிழங்கு கறி, அங்கே பள்ளி வளாகத்துலேயே செஞ்சோம். 120 பேருக்கு அதை வித்துட்டோம்:-)))))

வர்றவங்களுக்குப் போரடிக்காம இருக்க இசை நிகழ்ச்சி, face painting, மிஸ்ட்ரி பாட்டில்ஸ்ன்னு பேப்பர்லே பொதிஞ்சு வச்சுவிக்கறது( உள்ளே நல்ல சாமான்கள்தான் சாக்லேட், பிஸ்கட், மிட்டாய்ன்னு) குதிரை வச்சுருக்கறவங்க அதை இங்கே கொண்டு வந்து பிள்ளைங்களை சவாரிக்கு ஏத்தி விடறதுன்னு கலகலன்னு இருக்கும். பண்ணை வச்சு இருக்கும் பெற்றோர் காய்கறி, பழங்கள்னு கொண்டுவந்து விப்பாங்க. எல்லா வருமானமும் அன்னிக்குப் பள்ளிக்கூடத்துக்குத்தான். நான்கூட ஒரு பாட்டில் எலுமிச்சை வாங்குனேன்.

ஆனா கடைசியில் விக்காத சாமான்களை பத்து காசு, அம்பது காசுன்னு தள்ளிவிட்டுருவோம். அப்படியும் பாக்கி ஆனது இங்கே இருக்கும் சிட்டி மிஷன் வந்து எடுத்துக்கும். அவுங்களுக்கும் வேண்டாத பொருள்? நேரா டம்ப் தான்(-:

ஞாயித்துக்கிழமைகளிலும் கடைகளைத் திறந்துக்கலாமுன்னு ஆரம்பிச்சதும் இந்த வருசம்தான். முக்கியமா சூப்பர்மார்கெட்டுகள் இதை வரவேற்றுச்சு. மக்களும்தான். லீவுன்னுட்டு முடங்கிக் கிடக்காம 'மால்' சுத்த வசதியாப் போச்சு.

இதுவரைக்கும் இங்கே ரெண்டே ரெண்டு டிவி சேனல்கள்தான் அரசு நடத்திக்கிட்டு இருந்துச்சு. இப்ப ஒரு தனியார் ஒளிபரப்பு மூணாவது சேனலா ஆரம்பிச்சது. அவுங்க நல்லா நடத்த ஆரம்பிச்சதும், முதல்லெ இருந்த ரெண்டுசேனல்களும் கொஞ்சம் தரத்தை(?)க் கூட்டுச்சு. இதுலே சேனல் ஒண்ணு, இங்கிலாந்து தேசத்து நிகழ்ச்சிகளுக்கு இங்கே ஆதரவா செயல் பட்டுச்சு. சேனல் ரெண்டு, அண்டை நாடான ஆஸ்தராலியா நிகழ்ச்சிகளை இங்கே காமிச்சது.மூணாவது சும்மா இருக்குமா? நான் அமெரிக்காவுக்குன்னுட்டு, அமெரிக்கன் நிகழ்ச்சிகள். எல்லாம் அங்கெ இருந்து இங்கேன்னு 'ரிப்பீட்டு'தான். நாடு சின்னதா இருக்கறதாலே நியூஸும் கொஞ்சமாத்தானே இருக்கும். பின்னே எப்படி நேரத்தை இட்டு நிரப்பறது? 'போதாக்குறைக்குப் பொன்னம்மா'ன்னுட்டு இந்த சானல் 3 என்னடான்னா, 24 மணி நேரமும்ஒளிபரப்புச்சு. மத்தவங்க ச்சும்மா இருக்கமுடியுமா? நாங்களுமுன்னு போட்டிக்கு வந்தாங்க. இதனாலே என்ன ஆச்சு?தேசிய கீதத்துக்கு ஆப்பு! தினமும் காலையிலே பத்து மணிக்கு ஆரம்பிச்சு, ராத்திரி பத்தரை, பதினொண்ணுவரை மட்டும் இருந்த குறிப்பிட்ட நேரத்து தொலைக்காட்சியில் ஒளிபரப்பு ஆரம்பிக்கும் சமயம் நியூஸி தேசிய கீதம் பின்னணியில் ஒலிக்க, இங்கத்து இயற்கைக் காட்சிகள் அப்படியே திரையில் ஓடும். பார்க்கவே ரம்மியமான காட்சிகள். மாலை எட்டரை ஆச்சுன்னா பிள்ளைங்களுக்குப் படுக்கற நேரம் என்றதாலே 'குட் நைட் சில்ரன்'னு கார்டு காமிச்சுருவாங்க. எதாவதுவயது வந்தவர்கள் மட்டுமே பார்க்கும் காட்சிகள் உள்ள திரைப்படங்களோ, மத்த விஷயங்களோ அதுக்கு அப்புறம்தான் ஒளிபரப்பு. இப்படி இருந்த நேர்த்தியான ஒழுங்கு முறை எல்லாம் போய் 24 மணி நேரமும் 'லோ லோ'ன்னு தொலைக்காட்சிஓட ஆரம்பிச்சது. இந்த லட்சணத்துலே தேசிய கீதத்தை எப்பப் போடறது?

மவொரிகள், மீன் பிடிக்கும் உரிமை அவுங்களுக்குதான்னு சொல்லிக் கொஞ்சம் ஆர்ப்பாட்டமெல்லாம் செஞ்சு,ஆறுகளிலும், சில கடல் பகுதிகளிலும் அவுங்களுக்கு மட்டுமே மீன் பிடிக்க உரிமைன்னு அரசாங்கத்துக்கிட்டே இருந்து அனுமதி வாங்கிக்கிட்டாங்க. அதுக்குன்னு ஒரு சட்டம்கூட வந்துருச்சு. ச்சும்மாப் பொழுது போக்கா மீன் பிடிக்க விரும்பும் மத்தவங்களுக்கு என்ன இடம், எங்கேன்னு சொல்லி ஒரு லைசன்ஸ் வாங்கிக்கணும். இங்கே கட்டுமரம் எல்லாம் இல்லாததால் மீனவர் கடற்கரையில் குடி இருக்கும் நிலமை கிடையாது. எல்லாமே இயந்திரப்படகுகள். மீன் வியாபாரம் இன்னும் மவொரிகள் நடத்தும் நிறுவனங்களின் கைகளில்தான்.

இதுவரை லேபர் கட்சியின் தலைவரா இருந்தவர் கருத்து வேறுபாடு காரணம் தனியாப் பிரிஞ்சுபோய் 'புது லேபர் கட்சி'ன்னு தொடங்குனார். ( தி.க, திமுக, அதிமுகன்னு பிரிவுகளைப் பத்தித் தெரிஞ்சதாலே இது ஒண்ணும் அதிர்ச்சிதரும் புதுவிஷயமா எனக்குப் படலை.ஆனா....) மக்களுக்கு ரொம்ப ஆச்சரியமாப் போச்சு. அவர் கட்சிக்கும் ஆதரவாளர்கள் இருந்தாங்க.

நியூஸிலாந்து பகுதி 56

1988லே ரெண்டு முக்கிய நிகழ்ச்சிகள் இங்கே நடந்துச்சு. ரெண்டுமே ஒரு ரெண்டு வார இடைவெளியில்.


1988 பிப்ரவரி மாதம் 23ந்தேதி. சரித்திரத்தில் பொறிக்கப்பட வேண்டிய நாள்:-) உங்க டீச்சராகிய நான், நாலரை வயசான மகளொடும், கணவரோடும் இங்கே குடியேறினேன். எண்ணி ரெண்டாவது வாரம் மார்ச் 7 தேதி. புயல்'போலா' ஊரையே பிரிச்சு மேஞ்சிருச்சு. ஹிந்தியிலே 'போலா'ன்னு சொன்னால் 'அப்பாவி, வெகுளி'ன்னு அர்த்தம்.ஆனா இந்த 'சைக்ளோன் போலா' அடிச்ச அடியிலே 90 மில்லியன் டாலர் நஷ்டக்கணக்கு. வடக்குத் தீவின் கிழக்குப்பகுதி பூராவும் பயங்கர சேதம். உயிர்ச்சேதமுன்னு சொன்னால் 3 பேர். இந்தப் பக்கங்களில் பண்ணைகளும், பழத்தோட்டங்களும் அதிகம் இருக்கு. கிவிப் பழங்கள் மிகவும் கூடுதலா விளையும் தோட்டங்கள். எல்லாத்துக்கும் பயங்கர சேதம். 1765 பண்ணையாளர்களுக்கு பாதிப்பு. இனி வருங்காலத்தில் வெள்ளம் வந்தால் என்னென்ன ஏற்பாடுகள் செஞ்சுக்கவேண்டி இருக்குமுன்னு திட்டங்கள் எல்லாம் தயாரிச்சு வச்சுக்கிட்டாங்க. ஆனா இதெல்லாம் சொல்லிட்டா வருது?


இறந்த மூணு பேரும் காருலே பயணம் செஞ்சுக்கிட்டு இருந்தப்ப, ஆத்துலே வெள்ளம் எதிர்பாராம வந்து ரோடை அப்படியே அரிச்சுக் காரை உருட்டிக்கிட்டுப் போயிருச்சு. அப்படியும் அந்த வண்டியில் இருந்த மத்த ரெண்டுபேரை ஒரு வழியாக் காப்பாத்துனாங்கதான்.ஆனா பாவம், இந்த மூணு பேருக்கு தப்பிக்கச் சான்ஸ் கிடைக்கலை.


இந்த சமயத்துலே வேலை இல்லாத் திண்டாட்டம் வேற சேர்ந்துக்கிச்சு. ஒரு லட்சம் பேருக்கு மேலெ வேலை இல்லாம இருந்தாங்க. அரசாங்கத்துக்குச் செலவு அதிகமாகுதுன்னு சின்ன ஊர்களில் இருந்த 432 தபால் ஆபீஸுகளை மூடும்படியாச்சு.


ஆனா அரசாங்கம் ச்சின்னப்பிள்ளைகளுக்குக் கொடுத்துக்கிட்டு இருந்த அலவன்ஸை நிறுத்தலை. ஒரு ரெண்டு மூணுவருஷமாக் கொடுத்துக்கிட்டுத்தான் இருக்காங்களாம். தாய்தகப்பனோட வருமானம் கணக்கில் எடுத்துக்காம, 16 வயசுக்குக் கீழே இருக்கும் ஒவ்வொரு குழந்தைக்கும் வாரம் 6 டாலர் அரசாங்கம் தந்துக்கிட்டு இருக்கு. அந்தக் குழந்தையின்பெயரில் ஒரு பேங்க் கணக்கு ஆரம்பிக்கணும். அந்தக் கணக்குக்கு வாராவாரம் தானாவே இந்தக் காசு வந்து சேர்ந்துரும்.சேமிப்பின் அவசியத்தைக் குழந்தைகள் உணரணுமுன்னு தபால் இலாக்கா மூலம் சேமிப்புக் கணக்குக்கு வாரம் ஒரு நாள்னு பள்ளிக்கூடத்துலேயே வந்து பிள்ளைங்கள் கொடுக்குற காசை வரவு வச்சு அவுங்களுக்குன்னே ஒரு பாஸ் புக் கொடுத்துவச்சிருந்தாங்க.( எல்லாம் நம்மூர் போஸ்ட் ஆஃபீஸ் சேவிங்க்ஸ் பேங்க்தான்)பிள்ளைகளும் ஒரு அம்பது செண்ட் கிடைச்சாலும் அதுலே போட்டுச்சுங்க.


மக்களுக்குக் குடி இருக்க வீடுகள் பற்றாக்குறை அதிகமா இருந்துச்சு. அரசாங்கத்தாலே எல்லாருக்கும் வீட்டைக் கட்டிக்கொடுக்க முடியலை. வீடு சொந்தமா வாங்கிக்கலாமுன்னா வீட்டுக் கடனுக்கு வட்டி ஏறக்குறைய 19 சதமானம்.வட்டி கட்டுறதுமில்லாம, மக்கள் 20 சதமானம் முதல் வச்சுக்கிட்டுத்தான் வீடு தேடணும். அவ்வளவு பணம் அப்ப யார் கிட்டே இருக்கு? எப்படியாவதுஒரு வழி வேணுமேன்னு அரசாங்கம் முதல்முறையா வீடு வாங்கறவங்களுக்குக் குறைஞ்ச வட்டியில் கொஞ்சம் தொகைகடன் கொடுக்க முன்வந்துச்சு. வங்கிகளும் தொலைக்காட்சியிலும் ரேடியோவிலும் 'நாங்க கடன் தரோம் வாங்க வாங்க'ன்னு இடைவிடாமக் கூப்புட்டுக்கிட்டு இருந்துச்சு. நிரந்தர வருமானம் இருக்கும் வேலையில் இருந்தால் 'இவ்வளவு தொகையைக்கடன் தர்றோம். வீடு வாங்கிக்க'ன்னு முன் அனுமதி வேற கொடுத்துச்சு. அந்தக் காசுக்குத் தகுந்தபடி வீடு வாங்கிக்கலாம்.ஆனா அந்தக் காசுக்குள்ளெ அடங்கும் வீடுகள் அவ்வளவா நல்லா இல்லைன்றது வேற கதை! எப்பவுமே வீடுன்றது நம்ம பட்ஜெட்டை மீறும் விஷயம்தானே?

இன்னொண்ணு , இந்த நாட்டுலே வீட்டுவாடகை வாரம் இவ்வளவுன்ற கணக்குதான். மாச வாடகை கிடையாது. சம்பளமும் வாரம் இவ்வளவுன்னு கிடைக்கும். சம்பளம் வாங்குன கையோடு வாடகை கொடுத்துடலாம். இருக்க இடம் ரொம்ப முக்கியமாச்சே. ரெண்டு வார வாடகை அட்வான்ஸ் கொடுக்கணும். அந்தக் காசு இங்கே இருக்கும் ஒரு தனி நிறுவனத்துக்குப் போய்ச்சேரும். வீட்டைக் காலி செய்யும்போது, வீட்டுக்குச் சொந்தக்காரர்
வந்து பார்த்து எல்லாம் ஒழுங்காக இருக்குன்னுன்னு கையெழுத்துப் போட்டுத்தரணும். அதை அனுப்புனதும், அந்த நிறுவனம் அட்வான்ஸ் காசைத்
திருப்பி நமக்கு அனுப்பிரும். நாம் குடியிருந்த வீட்டில் எதாவது உடைச்சுக்கிடைச்சு வச்சுருந்தோமுன்னு வையுங்க, அதுக்குண்டான செலவை
அட்வான்ஸ் தொகையிலிருந்து எடுத்து உடமையாளருக்குத் தந்துருவாங்க.


ஒருநாள் திடீர்னு ஒரு செய்தியைக் கேட்டுட்டு அப்படியே திகைச்சு நின்னுட்டேன். வேலையை வேணாமுன்னுசொல்லி விலகிட்டார் நாட்டின் பிரதமர்!! காரணம் ? உடல் நிலை சரி இல்லையாம். இன்னுமொரு அதிர்ச்சி. என்னதான்உடம்பு முடியாமப் போனாலும் விடாப்பிடியா பதவியில் இருக்கும் மந்திரிகளை மட்டுமேப் பார்த்துப் பழக்கப்பட்டிருந்த மனசுக்கு இது நம்ப முடியாத நிகழ்ச்சியா இருந்தது.' ஜெஃப்ரி பால்மர் என்ற உதவிப் பிரதமர் இப்போ பிரதமர் நாற்காலியில் உக்கார்ந்தார்.

நியூஸிலாந்து பகுதி 55

ஒன்னுலே இருந்து நாப்பது வரை இருக்கும் எண்களில் எதாவது ஆறு எண்களைத் தேர்ந்தெடுத்துக்கணும். இப்படியே வேற வேற காம்பினேஷனில் குறைஞ்ச பட்சம் நாலு வரிசை எடுத்துக்கிட்டு, இதுக்குன்னே இருக்கும் தாளில் இந்த எண்களைக் குறிச்சுக் கொடுத்துக் கூடவே ரெண்டு டாலரையும் தந்தால், உங்களுக்கு நீங்க எழுதுன எண்கள் அடங்கிய லாட்டரிச்சீட்டுத் தருவாங்க. சனிக்கிழமை ராத்திரி எட்டு மணி அஞ்சு நிமிஷமானா நீங்க பணக்காரரா ஆனீங்களா,இல்லையான்னு தெரிஞ்சுருமாம்:-)

இந்த வருஷம்(1987) லேதான் 'லாட்டோ'ன்னு சொல்லும் ஒரு லாட்டரி விளையாட்டு(???) ஆரம்பிச்சாங்க. இதுலே கிடைக்கும் லாபம் எல்லாம் தர்ம காரியங்களுக்காக மட்டுமேன்னு சொன்னாங்க. தொலைக்காட்சியிலே நேரடி ஒளிபரப்பா,இந்தக் குலுக்கல் நடக்கும். ஏமாத்துவேலை ஒண்ணும் இல்லைன்னதும் மக்கள் ஆர்வமா லாட்டரிச் சீட்டுகளை வாங்குனாங்க. பரிசு கிடைச்சாச் சரி, இல்லேன்னா தர்மம் செஞ்சோமுன்னு நினைச்சுக்கலாமே! ஒவ்வொரு சனிக்கிழமையும்ராத்திரி எட்டு மணிக்கு குலுக்கல். அன்னிக்குச் சாயங்காலம் ஏழு மணிவரையும் டிக்கெட் விற்பனை உண்டு. அநேகமாஎல்லா சூப்பர் மார்கெட்லேயும் இதுக்குன்னே ஒரு தனி இடம் இருக்கு. மக்கள் உப்புப்புளி மொளகா வாங்கும்போதே இதையும் வாங்கிக்கலாமாம். அதுக்குன்னு ஒரு நடை நீங்க வரவேணாம்,பாருங்க :-))))

இதே வருஷம்தான், முதல் முறையா இங்கத்து நோயாளிக்கு இருதய மாற்று சிகிச்சை வெற்றிகரமா நடந்துச்சு. இதுக்குமுன்னே இப்படி பெரிய சிகிச்சைக்கு அண்டைநாடான ஆஸ்தராலியாவுக்குத்தான் போய்க்கிட்டு இருந்தாங்க. தனியார் மருத்துவ மனையெல்லாம் இங்கே இல்லை. எல்லாமே அரசாங்க மருத்துவமனைகள்தான். ஆனா ஆஸ்பத்திரிகள் சுமாரான பெரிய ஊர்களில்தான் இருக்கு. ஒவ்வொண்ணும் நல்ல தரமான சிகிச்சை. என்னமோ ஃபைவ் ஸ்டார் ஹொட்டேல் மாதிரிதான் இருக்கு.

மவோரிகள் தங்களுடைய மொழியை எப்படியாவது காப்பாத்திக்கணுமுன்னு போராடிக்கிட்டு இருந்தாங்க. அவுங்களோட வருங்கால சந்ததிகளுக்கு மவொரி மொழின்னு ஒண்ணு இருந்ததே தெரியாமப் போயிருமோன்னு கவலை. இவுங்கஆரம்பிச்ச 'கொஹங்கா ரிஓ' ( Kohanga Rio - Language Nest) நர்ஸரிப் பள்ளிகள் நல்லாவே நடந்துக்கிட்டு இருந்துச்சு. ரொம்ப இளவயசுப் பிள்ளைங்கன்றதாலே சட்ன்னு அவுங்களாலே புரிஞ்சுக்கவும் முடிஞ்சது. இனியும் இந்த மொழிக்கான அந்தஸ்தைக் கொடுக்கலைன்னா சரி இல்லைன்னுட்டு, மவோரி மொழியையும் அரசாங்கம் அதிகாரபூர்வமான மொழின்னு அங்கீகரிச்சது.

இப்பெல்லாம் அநேகமா எல்லா 'முக்கிய' விளையாட்டுகளிலும் உலகக்கோப்பைப் போட்டின்னு ஒண்ணு வந்துருச்சுல்லே?இந்த 1987வது வருஷம்தான் ரக்பி விளையாட்டுக்கும் உலகக்கோப்பைப் போட்டின்னு ஒண்ணு உலகில் முதல்முறையாஆரம்பிச்சது. நியூஸிலாந்துலே ரக்பிதான் தேசீய விளையாட்டு. இதை வச்சு எத்தனையோ தொழில்கள், வேலை வாய்ப்புகள் எல்லாம் சுத்துது. ரக்பின்னா சோறு, சரி ப்ரெட்ன்னு வச்சுக்கலாம். ப்ரெட், தண்ணி( இது யாருக்கு வேணும்?) இல்லாமக் கிடப்பாங்க மக்கள்ஸ். இந்த உலகக்கோப்பையை, உலகிலேயே முதல்முதலா ஜெயிச்சு வாங்கி வந்துட்டாங்க.

இந்த நாட்டுலே முக்கியமா பாராட்ட வேண்டிய விஷயம் ஒண்ணு இருக்குன்னா, இது இந்த வெற்றி விழாக்கள்தான்.நாட்டுக்கு எந்த வெற்றியா இருந்தாலும், அதை சாதாரண சாமானியர்கள் பார்வைக்கும் கொண்டு வருவாங்க. எல்லா ஊர்லேயும் இந்த கோப்பையைக் கொண்டுபோய் காமிச்சாங்க(ளாம்)

பொதுத்தேர்தல் வந்துச்சு. இந்த முறையும் லேபர் கட்சிக்குத்தான் வெற்றி. டேவிட் லாங்கேதான் பிரதமராத் தொடர்ந்தார். அணு சம்பந்தமான எதுவுமே கூடாதுன்ற கொள்கையில் பிடிப்பா இருந்துச்சு நாடு. இதுலே கட்சி வேறுபாடு இல்லாம நாடு முழுசும் ஒரே ஒற்றுமையா இருந்துச்சு.

நியூஸிலாந்து பகுதி 54

பத்துமாசம் பள்ளிக்கூடம், பெரிய லீவு ரெண்டு மாசமுன்னு இருக்கற நடப்பு உலகத்துலே,நம்ம வலை உலகப் பள்ளிக்கூடம் மட்டும் அப்படியே தலைகீழ் மாற்றத்துலே போகுது மக்கள்ஸ்.போனவருஷம் ஜூலை மாசம் தொடங்குன லீவு இப்ப முடிஞ்சுருச்சு. இந்த மே & ஜூன் பள்ளிக்கூடம் திறந்து இந்த வருசத்துக்கான 'நியூஸி சிலபஸ்' இன்று முதல் ஆ...........'ரம்பம்'.

இந்த சமயம் பார்த்து 'க்ளாஸ் லீடர்' வேற இல்லை. எல்லாம் கொஞ்சம் 'பார்த்து'ப் படிங்க.:-))))

ச்சும்மா மறந்து போனவுங்களுக்கு எடுத்துக்கொடுக்க, நியூஸிலாந்து பகுதி 53 இங்கே.

இதுவரை இப்படி ஒண்ணும் செஞ்சதில்லை. முன் அனுபவம் இல்லாத காரணம். காசு கொண்டு வந்தா உள்ளேவிடுவோம்னு சொன்னவங்க, காசை எங்கையிலே தாங்கன்னு சொல்லி இருக்கலாமில்லையா? கால் மில்லியன்
காசை அப்படியே வங்கியிலே போட்டுக் கணக்குக் காமிச்சாப் போதும். சரின்னு காசைக் கொடுத்து வங்கிக் கணக்கு ஆரம்பிச்சாங்க. அதைக் காமிச்சு, அவுங்க பாஸ்போர்ட்லே நிரந்தரத் தங்கல் உரிமைக்கான ஸ்டாம்ப் பதிக்கப்பட்டது. இவுங்க மறுபடி சொந்த நாட்டுக்குப் போகணும். அங்கேதானே சொத்து பத்து, செளகரியம் எல்லாம் இருக்கு. அங்கே எதாவது ஆபத்துன்னா, இங்கே வந்துறலாமுன்ற ஒரு முன் ஜாக்கிரதைக்கான ஏற்பாடுதானே இது. அதனாலே ரீ எண்ட்ரி விஸா வாங்கிக்கலாம், ஆனா ஒரு கண்டிஷன். நியூஸியிலே P.R. வாங்கிட்டு வெளியே போனா, மறுபடி வரணுமுன்னா 4 வருஷத்துக்குள்ளே திரும்ப வந்துரணும். அப்படி வரலைன்னா கிடைச்ச நிரந்தரத் தங்கல் உரிமை ரத்தாயிரும்.


நாலு வருசமுன்னா நாலு வருஷம்னுட்டு நிறைய ஃபிஜிவாழ் இந்தியர்கள், அதிலும் முக்கியமா குஜராத்தி இனத்தவர்( வேற யார்கிட்டே இவ்வளவு காசு இருக்காம்?) இங்கே நியூஸிக்கு வந்து செய்யவேண்டியதைச் செஞ்சு ரீ எண்ட்ரி வாங்கிக்கிட்டுப் போனாங்க. போய்ச் சேர்ந்த கையோட இங்கே வங்கியில் காமிச்ச பணத்தை மறுபடியும் அவுங்களோட உள்ளூர் வங்கிக்கு மாத்திக்கிட்டாங்க. இங்கத்து வங்கிகளுக்கெல்லாம் அந்த நாட்டுலேயும் கிளைகள் இருக்கே, அதனாலே மணி ட்ரான்ஸ்பர் சுலபமாப் போயிருச்சு. அரசாங்கம் இதைக் கண்டுக்கறதுக்குள்ளே நிறையப்பேர் வந்துட்டு, வாங்கவேண்டியதை வாங்கிக்கிட்டுப் போயிட்டாங்க.

இப்படித்தான் பிஸினெஸ் மைக்ரேஷன் பேருலே பலர் வந்துட்டுப் போனது நடந்தது. அதுக்கப்புறம் ஒரு 75% மக்கள் நாலு வருஷத்துக்குள்ளே வந்துட்டாங்கதான். நம்மாளுங்களுக்கு எதை எப்படிச் செஞ்சுக்கணுமுன்னு தெரியாதா, என்ன?


சரி. இப்ப எண்பதுகளிலே நடந்த சில விவரங்களைப் பார்க்கலாம். இந்த எம்பதுகளின் ஆரம்பத்துலே நேஷனல் பார்ட்டிதான் அரசு. 1984 ஜூலை வந்த தேர்தலில் லேபர் ஜெயிச்ச பிறகுதான் மாற்றங்கள் வேகமா வர ஆரம்பிச்சது. இப்ப லேபர் கட்சி நாலாவது முறையா ஆட்சிக்கு வந்துருக்கு.


இவுங்க வந்தவுடன் நாட்டு நிதிநிலையைச் சீர்படுத்தறோமுன்னு சொல்லி 20% டாலர் மதிப்பைக் குறைச்சாங்க. போன வகுப்பில் சொன்னது போல நிதிமந்திரி புதுத் திட்டங்களை அறிமுகப்படுத்துனார். இதை அவரோட பெயரை வச்சு'ரோஜர்னாமிக்ஸ்'ன்னு சொன்னாங்க. அவரோட பெயர் ரோஜர் டக்ளஸ்.


இந்த வருசத்துலேதான் இன்னொரு முக்கிய சம்பவம் நடந்துச்சு. பெண்களுக்கு எதிரான எல்லாவித போக்குக்களையும் (Convention on the Elimination of All Forms of Discrimination against Women . CEDAW) தடை செய்யணுமுன்னு ஐ.நா. சபையின் தீர்மானத்துக்கு ஆதரவு தந்தாங்க.
1985 ஜூலை மாசம், க்ரீன்பீஸைச் சேர்ந்த ரெயின்போ வாரியர் கப்பல் ரோந்துக்கு வந்து இங்கே ஆக்லாந்து ஹார்பரில் தங்குனப்ப, ப்ரெஞ்சுஅரசாங்க ஏஜெண்ட் இதுக்கு ரகசியமா குண்டு வச்சு மூழ்கடிச்ச விவரம் பரபரப்பா உலகநாடுகளால் கவனிக்கப்பட்டுச்சு.


பழைய கவர்னர் ஜெனரல் பதவிகாலம் முடிஞ்சு புதியவர் பதவிக்கு வந்தார். இன்னும் பிரிட்டனின் கீழ்தான் நாடுஇருக்குன்னாலும், 1967-இல் இருந்தே உள்ளூர் ஆட்களை இந்தப் பதவிக்கு அமர்த்தும் வழக்கம் வந்துருச்சு.இல்லேன்னா, ராணியம்மா சொல்றவங்கதான் இங்கே வந்து கவர்னர் ஜெனரல் நாற்காலியில் உக்காருவாங்க.


வைட்டாங்கி ட்ரிப்யூனல், இந்த வைட்டாங்கி ஒப்பந்தம் நடந்த முறையைப் பத்தி முறையிடும் மவோரிகளுக்கு,அவுங்க குறைகளைக் கேக்க ஆரம்பிச்சது. இதுவரை இன்னும் பூரணமா குறைகள் நிவர்த்தி செய்யப்படலை. இப்பவும் ஒவ்வொரு வருஷமும் வைட்டாங்கி தினம்( பிப்ரவரி 6) வர்ற சமயம் இதைப் பத்திப் பேச்சு நடந்துக்கிட்டுத்தான் இருக்கு.


1986லே GST ( Goods & Services Tax)ன்னு ஒரு புது வரி வாங்க ஆரம்பிச்சாங்க.10% வரி. எந்தப் பொருள் வாங்கினாலும், ஏன் ஒரு ரொட்டிக்கூட இந்த வரி உண்டு. ஆனா கடைகளில் எல்லாப் பொருட்களிலுமே ஜிஎஸ்டி சேர்த்தபின் இருக்கும் விலைதான் போட்டுருப்பாங்க. அதனாலே நமக்கு, இதுக்கெல்லாம்கூட வரி கொடுக்கறோமேன்னு வருத்தப்பட்டுக்கச் சான்ஸ் இல்லை:-)))) மறைமுகமாக் கொடுக்கும்போது மனக்கவலை இல்லை. கொஞ்ச நாளிலே டாலர் மதிப்பு மீண்டும் மெதுவா பழைய நிலைக்குப் போகவும் ஆரம்பிச்சது.


கத்தோலிக்க மதத்தின் தலைமை குருவான போப் ஆண்டவர் முதல்முறையா நியூஸிக்கு விஜயம் செஞ்சார். இங்கே இருந்த கத்தோலிக்கர்கள் மட்டுமில்லாம நாடே இவர் வருகையைக் கொண்டாடுச்சு.


MMP ன்னு சொல்லும் மிக்ஸட் மெம்பர் பார்லிமெண்ட் வச்சுக்குங்கோ அது நல்லதுன்னு இங்கிலாந்து அரசு நமக்கு பரிஞ்சுரைச்சாங்க. கொஞ்ச நாளிலே, என்னாத்துக்கு எப்பப் பார்த்தாலும் இங்கே நியூஸியிலே என்ன செய்யணும், எப்படிச் செய்யணுமுன்னு பிரிட்டிஷ் பார்லிமெண்ட் மூக்கை நுழைச்சுக்கிட்டு இருக்கு? இனிமேல் நமக்கு வேணுங்கற சட்டதிட்டங்களை நாமே செஞ்சுக்கலாமுன்னு நியூஸி முடிவு செஞ்சதும் இந்த வருஷம்தான். 'ஏறக்குறைய அதையொட்டித்தான் இங்கே எல்லாம் நடக்குதுன்னாலும், அதை நீ சொல்லி, நான் செஞ்சதா இருக்கக்கூடாது.நாங்களே 'யோசிச்சு'ச் செஞ்சதா இருக்கட்டும்.' தமிழ்சினிமா வர்ற பஞ்ச் டயலாக் மாதிரி:-)


ஓரினச்சேர்க்கையாளர்களுக்குக் கடுமையான தண்டனை வழங்கப்பட்டுக் கொண்டு இருந்த அரசாங்கம், விதிகளைத் தளர்த்தி அவர்களையும் எல்லா மக்களையும் போலவே நடத்தணுங்கற சட்டம் கொண்டு வந்துச்சு. இதுக்கும் ஒரு இருபத்தஞ்சு வருஷ போராட்டம் நடந்துச்சுன்னு வச்சுக்குங்க.


திருமணமான தம்பதிகள் இருவருக்கும் சொத்தில் சரிபாதி பாகம் இருக்குன்ற சட்டமும் இந்த 1986ல்தான் வந்துச்சு.புதுசா எந்த சொத்தும் வீடோ, பண்ணையோ எதுவா இருந்தாலும் கணவன் & மனைவி ரெண்டுபேர் பெயரிலும்தான் பத்திரம் எழுதுனாங்க. இதனாலே பெண்களுக்கு ஒருவித நிம்மதியும் மகிழ்ச்சியும் வந்துச்சுன்றதைக் குறிப்பிடணும்.


ஒருமாதிரி சீரமையத் தொடங்குன நாட்டுக்கு குடிபெயர்ந்து வர மக்கள் உலக நாடுகள் எல்லாத்திலும் இருந்து ஆர்வம் காமிச்சது இந்தக் காலக்கட்டங்களில்தான்.