Bird of the Paradise

சரியாச் சொல்லணுமுன்னா  2017 ஆம் வருஷம் நவம்பர் மாசம் ஒரு  நர்ஸரியில்  இந்த தேவலோகப்பறவைச் செடியைப் பார்த்து, ஆசையோடு வாங்கி வந்தேன்.  கொஞ்சம் கொஞ்சமா வளர வளரத் தொட்டிகளையும் அதுக்கேத்தாப்படி மாத்தி வச்சுக்கிட்டே இருந்தேனா....  கட்டக் கடைசியில் ஒரு மொட்டு விட ஆரம்பிச்சு, பதினைஞ்சுநாள் கழிச்சு லேசாக் கண் திறந்தது.  வாங்கிவந்த பின் மூணு வருஷம், நாலு மாசம், ஒன்பது நாள் ஆகி இருக்கு முகம் பார்க்க ! 

உண்மையில் ஒரு மொட்டுக்குள்ளே நாலு பூக்கள்.  அதுவும் ஒரே சமயத்தில் மலராமல் நின்னு நிதானமா ஒவ்வொன்னா... போதுமடா சாமி!  இவ்வளவு நிதானம் த்ரீ மச் இல்லையோ !  அதுக்காக நட்டதும்,  பூ அன்றே பூக்கணுமுன்னெல்லாம் எதிர்பார்க்கலை .

அதுக்கடுத்த ரெண்டாவது மொட்டு ஆறு மாசத்தில் வந்து நவராத்ரி சமயம் மலர்ந்தது. ஆனால் சும்மாச் சொல்லக்கூடாது.... ஒரு மொட்டு முழுசும் மலர்ந்தபிறகு மூணுமாசம் வரை அந்தப் பூ செடியிலேயே  இருந்துட்டுத்தான்  காய்ந்துபோகுது.  (அதானே... எவ்வளவுநாள் நிக்குதுன்னு கணக்குப் பார்த்துருவொம்லெ. ) இப்ப மூணாவது மொட்டு வர ஆரம்பிச்சு இருக்கு.

இப்போ கொஞ்சநாளுக்கு முன்னே.... எங்க யோகா பரிவாரோடு ஒரு பிக்னிக் போயிருந்தோம். வீட்டிலிருந்து ஒன்னேகால் மணி நேரப்பயணம். 67 KM தூரம். அவரவர் கிளம்பி அங்கே சந்திப்பதாக ஏற்பாடு.  நாம் போற வழியில் ஆக்ஸ்ஃபோர்ட் என்ற சிற்றூரில் ஒரு சண்டே மார்கெட் கூடியிருந்துச்சா.... அங்கே ஒரு ஸ்டாப் போட்டோம்.  ஒரு கடையில் குளிர்காலப்பூக்களுக்கான  கிழங்குகள் விற்பனைக்கு இருக்கவே , அதிலிருந்து ஒரு நாலுவகை வாங்கியாச்.

ஒரு கிழங்கில்  மொட்டு ஒன்னு முளைச்சு நின்னது. ஆஹான்னு அதையே வாங்கினேன்.  மறுநாள் தொட்டியில் நட்டு வச்சாச். எண்ணி அஞ்சாம் நாள் மொட்டு விரிய ஆரம்பிச்சது. இளம் பிங்க் நிறம் ! அடுத்தநாள் பார்த்தால் இன்னொரு பூ  அதுக்குப் பக்கத்தில் தெரிஞ்சது. இப்படியே ஒவ்வொன்னா வெளியில் வர மொத்தம் அஞ்சு பூக்கள் !  தேவதைபோல ரொம்ப நாட்கள் செடியில் நிக்கலை. எண்ணி ரெண்டு வாரம்தான்.

இதுவும் லில்லி குடும்பம்தான். Amaryllis (Belladonna lily)  என்று பெயராம். இந்தச் செடிகளுக்கு இலைகளே கிடையாது. கிழங்கிலிருந்து ஒரு தண்டு வளர்ந்துவந்து நுனியில் மொட்டு !  பூக்கள் எல்லாம்  வந்து முடிஞ்சாவுட்டு, நிதானமா  கிழங்கிலிருந்து இலைகள் முளைச்சு வருமாம்.  பார்க்கலாம், என்னதான் நடக்குமுன்னு....

இதுக்கு வெள்ளைக்காரன் வச்ச இன்னொரு பெயர் தெரியுமோ ? Naked ladies !