வீடு 'வா வா'ங்குது ! பகுதி 30

16/12
இவரு மட்டும் காலையிலெ எட்டரைக்குப் போய் என்ன நடக்குது? யாராவது வேலை செய்ய வந்திருக்காங்களான்னு பார்க்கப் போனார்.
யாரும் வரலையாம்! அப்புறம் ஜான் ராபின்சன் வேற ஒரு விஷயம் பேச வந்தார். அதுக்கப்புறம் போனோம். உள்ளே
பாத் ரூம்களை இன்னொருக்க அளந்துக்கிட்டோம். அப்பத்தான் பாக்கறோம், ஜன்னல் பாதி பாக்கி இருந்ததை வந்து சரி செஞ்சிட்டுப் போயிருக்காங்க!
கதவு பூட்டுனது பூட்டியபடி! அலாரம் வேற 'ஆன்' லே இருக்கு! மாயாஜாலம்?!

போற போக்குலேயே 'ட்ரெண்டி மிர்ரர்' கடைக்குப் போய் 'டான்' என்றவரைப் பார்த்தோம். அவர்தான் நம்ம வீட்டுக்குப் போடற கண்ணாடிங்க
அளவை வந்து எடுத்துக்கிட்டுப் போனவர். ரெண்டு வேனிடி ஹீட்டட் மிர்ரர் ,ரெண்டு ஃபோயர் மாடம், ஹால் டேபிளுக்கு மேலே ஆர்ச் மாதிரி வர்றது, புடவைக்குன்னு ஒரு பிரமாண்டம்ன்னு
கண்ணாடிங்க வேணும். கடை ஒனரும் இருந்தாரு. கொஞ்சம் பார்கெயின் செஞ்சு 1300க்கு முடிவாச்சு. ஆர்டர் கொடுத்துட்டு வந்தோம். ஜனவரி 10-14
வாரம் போட முயற்சிக்கிறேன்னு சொன்னார்.

நேத்து உடைஞ்சுபோன 'ஷாண்டிலியர்' கண்ணாடிக்குழாய் வாங்க லைட்டிங் கடைக்குப் போனோம். குழலில் மூணு பாகம் உள்ளது அங்கெ இருக்கு. ஆனா
நமக்கு வேணுங்கறது 2 பாகம் ( 2 துண்டாத் தெரியுற ஒரே குழாய்) அதுக்கு ஆர்டர் கொடுக்கணுமாம்! இது ஏதுடா வம்பாப் போச்சேன்னு
இருந்தது. இந்த மூணு துண்டு இருக்கே அதுவும் அந்த ரெண்டு துண்டும் ஒரே நீளம்தான். அது எவ்வளவுன்னு கேட்டதுக்கு, ச்சும்மாத் தரேன்னு
அந்தப் பையன் சொன்னாரு. 18லே ஒண்ணு, ரெண்டுக்கு மூணா இருந்தா யாரு பாக்கப்போறா? 'இலவசம்' வேற. சரி அதையே கொடுங்கன்னு
சொன்னேன். அப்ப ரெண்டு இருக்கு, ஒண்ணு கிறிஸ்டலோட ( எல்லாம் ப்ளாஸ்டிக் குண்டுதான்!) இருக்கு. ரெண்டையும் கொண்டுபோங்கன்னு
கொடுத்துட்டாரு. நல்லதுன்னு வாங்கிகிட்டு வந்துட்டோம்! கேரி இன்னொண்ணை உடைச்சாலும் இப்பக் கவலை இல்லை:-)

( கேரி : நம்ம எலெக்ட்ரீஷியன்)

கிச்சன் டைல்ஸ்க்கு இன்செட் வேணுமே. அதுக்காக ரெண்டுமூணு இடத்துலே பார்த்துட்டு, ப்ரிஸ்கோவுக்குப் பக்கத்திலெ ( கடை பேரு ' ப்ரைமேக்'?)
ஒரு கடையிலே இருந்த 5 டைல்ஸ்ஸையும் 40 டாலருக்கு வாங்கிகிட்டு, அப்படியே கிங்குக்குப் போன் போட்டுச் சொல்லிட்டோம். அவரும் வந்து
வாங்கிக்கிட்டுப் போயிட்டாரு. மொசைக். இந்திய டிஸைன் போல இருக்கு

அதுக்கப்புறம் வீட்டுலே கொஞ்சம் சமையலை முடிச்சிட்டு, நான் எங்க லைப்ரரி கிறிஸ்மஸ் லஞ்சுக்குப் போனேன். அப்புறம் மறுபடி டைல்ஸ் வேட்டை!
இப்ப காலையிலே போன 'மைல்ஸ் ஆஃப் டைல்ஸ்'க்கே போனோம். அங்கெயே ஏதோ ஒண்ணைத் தெரிந்தெடுத்துட்டு, காசையும் கட்டிட்டு
வந்துட்டோம்.மாறிமாறிப் பார்த்துப்பார்த்துச் சீன்னு போச்சு!

இப்ப கிங்குக்கு எவ்வளவு தூரம் டைல்ஸ் டைனிங் இடத்துக்கு வருதுன்னு தெரியணுமாம்!

இதோன்னு போய் மார்க் செஞ்சிட்டு வந்தோம். நாளைக்கு இவர் ஊருக்குப் போறார். இந்தமுறை என்னவோ கொஞ்சம் கவலையாவே இருக்கு!

18/12
இன்னைக்கு(ம்) அங்கெ போனோம். ஆனா உள்ளெ போகலை. இவருக்கு ஊருக்குக் கிளம்பற நேரம் ஆயிடுச்சுன்னு வந்துட்டோம். ச்சும்மா வெளியே இருந்தே ஒரு பார்வை.

19/12
மத்தியானம் 1.15க்கு கிங் ஃபோன்லே கூப்பிட்டு அங்கே 1.30க்குப் போறதாச் சொன்னார். நான் போய் கதவைத் திறந்து அலாரத்தை
நிறுத்தினேன். கிங்கும் போவும் எல்லாம் சுத்தம் செஞ்சுகிட்டு இருந்தாங்க.நான் வேலை முடிஞ்சவுடன் கூப்பிடச் சொல்லிட்டு வீட்டுக்கு வந்துட்டேன்.
அப்புறம் ஒரு அஞ்சுமணி ஆகறப்ப அந்தப் பையன் போ வந்து சொன்னார்.
நான் போனா, எல்லா கப்போர்டும் சுத்தமா இருந்தது. கீழே டைல்ஸ் போட தரையிலே மார்க் செஞ்சு வச்சிருந்தாங்க.அப்புறம் அலாரம்
ஆன் செஞ்சுட்டுக் கதவைப் பூட்டிட்டு வந்துட்டேன்.

ராத்திரி மச்சினரோட ஃபோன். அவரோட மாமனார் இறந்துட்டாராம். கோபால் ஃபோன் பண்ணாச் சொல்லணும். நாளைக்குக் கட்டாயம்
ஊருக்கு ஃபோன் செய்யணும். இப்ப எல்லாரும் கிளம்பி ஊருக்குப் போய்க்கிட்டு இருப்பாங்க.

20/12
காலையிலே சோம்பலா இருந்தது. எழுந்திரிக்கலாமா, இன்னும் கொஞ்சம் படுக்கலாமான்னு நினைக்கிறப்ப ஃபோன்.. பில்டர் வேலை செய்ய
வராராம். கதவைத் திறக்கணுமாம். 10 நிமிசத்துலே வரேன்னுட்டு ஓடுனேன். என்னென்ன செய்யச் சொல்லணும்ன்னு கோபால் எழுதிவச்சுட்டுப்
போயிருக்கார். அதையெல்லாம் சொன்னேன். டோர் ஸ்டாப்பர் வேணுமாம். ஏற்கனவே வாங்கி அங்கே வச்சிருந்ததைக் காமிச்சேன்.

அப்ப 'லாயிட்' ஃபோன்லே கூப்பிட்டு ஹீட் பம்ப் போட ஆளு வருது. கதவைத் திறக்கணும்ன்னு சொன்னார். நான் பில்டர் வந்திருக்காரு.
கதவு திறந்துதான் இருக்குன்னு சொல்லிட்டு, வீட்டுக்கு வந்து இந்தப் பசங்களுக்கு சாப்பாடு கொடுத்துட்டு, குளிச்சு சாமி கும்பிட்டு, சாப்பிட்டுட்டு
பத்தரைக்கு அங்கெ போனேன். எட்டரைக்கு 'வார்ம் அப்' கம்பெனி மார்க் கீகனுக்கு ஃபோன் போட்டு 'ஹீட்டிங் ஒயர் அண்டர் டைல்ஸ்'க்குப் போட எப்ப ஆளு வருதுன்னு கேட்டதுக்கு அவர் பத்தரைக்குன்னு சொன்னார்.

அடுக்களையிலும், ரெண்டு குளியலறைகளிலும் டைல்ஸ் போடறோமில்லையா,அங்கே குளிர்காலத்துலே நிக்கவே முடியாது. நமக்கோ வீட்டுக்குள்ளே செருப்போடு இருக்கும் பழக்கமும் இல்லை. அதனாலே அங்கெல்லாம் தரையைச் சூடாக்கி வைக்கறதுக்காக டைல்ஸ்க்கு கீழே
ஹீட்டிங் ஒயர் பதிப்பிக்கிறாங்க. தனித்தனிக் கண்ட்ரோல் ஸ்விட்ச் இருக்கு.
நமக்கு வேணுங்கற சூட்டுக்கு செட் பண்ணிக்கலாம். டைமர் இருக்கு. இன்னும் அதுக்குள்ளே சில ப்ரோக்ராம்கூட இருக்கு. எலெக்ட்ரிக் ப்ளாங்கெட்லே இருக்கறது போலத்தான் இந்த ஹிட்டிங் ஒயர் இருக்கு.

குளியலறையில் இருக்கும் கண்ணாடி, நீராவி படிஞ்சு புகைமூட்டமா இருந்தா என்ன பயன்? அதுக்காக அந்தக் கண்ணாடிகளுக்குப் பின்புறம் வலை மாதிரி இருக்கும் ஒயர்களை ஒட்டுறாங்க. அது சூடாகும்போது, நீராவி படிஞ்சாலும் கண்ணாடி பளிச்சுன்னு தெரியும். இந்த வேலையை நமக்குக் கண்ணாடி சப்ளை செய்யறவங்க முடிச்சுருவாங்க.

அங்கே ஒரு பையன் பேரு 'ஜோஷுவா' வந்து வேலை செய்ய ஆரம்பிச்சார். கிச்சனை அளந்துட்டு, அவுங்க 'க்வோட்' சின்ன இடத்துக்குத்தான்
கொடுத்தாங்களாம். இப்ப இடம் பெருசா இருக்காம். அதனாலெ இன்னும் கூட காசு ஆகும். என்ன சொல்றிங்கன்னார். எவ்வளவு ஆகும்ன்னா இன்னும்
50 டாலர் கூடவாம். இவர் ஊர்லே இல்லே. நீங்க வேலையைச் செய்யுங்க. அப்புறம் செட்டில் செய்யலாம்ன்னு சொன்னேன். எவ்வளவு
நேரம் ஆகும்ன்னா ஒரு மணி ஆகுமாம். ப்ளானைப் பார்த்துட்டுத்தானே க்வோட் செஞ்சாங்க. இப்ப இப்படி........................

நம்ம ஆன்ட்ரூ வந்து வெளியே ஹீட் பம்ப்புக்கு மெஷின் வச்சிகிட்டு இருக்காரு. லிவிங் ஏரியாவுக்குப் போட்டது ரொம்பப் பெருசு.
அதோட மெஷினே 'பூதம்' போல இருக்கு. பாத் ரூம் ஜன்னலுக்குக் கீழே வையுங்க. பக்கத்திலே படுக்கை அறை இருக்கு. அந்த
ஜன்னலை ஒட்டி வைக்க வேணாம்ன்னு சொன்னேன். லவுஞ்சுக்கானச் சின்ன மெஷீனை அடுக்களைப் பக்கமா வச்சாங்க.

பில்டர், கதவுப் பூட்டுக்குப் போடற ஒரு ப்ளேட் தப்பா இருக்கு. அதை மாத்தணும்ன்னு சொன்னார். அதை வாங்கிக்கிட்டு போற வழியிலேயே
ரமண் பையா, எலிநோர், ஃபர்ஸ்ட் வீட்டுப் பாட்டி இவுங்களுக்கு கிறிஸ்மஸ் கார்டை அவுங்கவுங்க வீட்டு மெயில் பாக்ஸ்லே போட்டுட்டு (ஸ்டாம்ப் செலவை மிச்சம் பண்ணறேனாம். பெர்சனல் டெலிவரி )
நாப்ஸ் அண்ட் நாக்கர்ஸ் போய் அந்த ப்ளேட்டை மாத்திக்கிட்டு, பில்டர்கிட்டே கொண்டுபோய் கொடுத்தேன்.

அப்ப நம்ம 'ப்ரிஜெட் டெய்லர்' அங்கே வந்தாங்க. என்னன்னா, அந்தப் பக்கம் வந்தேன் அப்படியெ உங்க வீட்டைப் பார்க்கலாம்ன்னு இங்கே வந்தேன்னு சொன்னாங்க. இவுங்க இந்த ஏரியாவிலே பேர்போன ரியல் எஸ்டேட் ஏஜெண்ட். வீட்டை விக்கணுமுன்னா எங்கிட்டே சொல்லுன்னு எப்பப் பார்த்தாலும் சொல்வாங்க. இங்கெ இருந்து வேற இடம் போனாத்தானே?.
இருக்கற விட்டை வித்துட்டு நான் எங்கே போவேன். நல்ல காலம் வந்தாச் சொல்றேன்னு சொல்லிக்கிட்டு இருப்பேன்.

உள்ளே கூட்டிட்டுப் போய் காமிச்சேன். அவ்வளவுதான். நல்லா இருக்கு. ரொம்ப நல்லா இருக்கு. எனக்கு வேணும் இந்த வீடுன்னு
சொன்னாங்க. நான் உடனே இந்த வீட்டை வித்தா எவ்வளவு வரும்னு கேட்டேன். 450. அதெப்படி அதுக்கு மேலே ரொம்ப செலவாயிடுச்சேன்னு
சொன்னேன். நிறைய காசுக்கு விக்கலாம். மில்லியன் டாலர்கூடப் போகும் அப்படின்னாங்க. இந்த ஏரியவுலே மில்லியன் டாலர் வீடு
யாரு வாங்குவாங்கன்னேன். எல்லாம் ஆளு இருக்குன்னு சொல்லிட்டு, வீடு நல்லா இருக்குன்னு சொல்லிச் சொல்லி மாஞ்சு போனாங்க.
கண்ணேறு கழிக்கணும்!

அப்புறம் போறப்ப, 'இங்கே குடிவந்த பிறகு அந்தப் பழைய வீட்டை நான் நல்ல விலைக்கு வித்துத் தரேன்'னாங்க. அப்பப் பார்க்கலாம்.

நானும் கடைக்குப் போய் இந்தப் பசங்களுக்குச் சாப்பாடு வாங்கிகிட்டு இருக்கறப்ப இவர் ச்சீனாலெ இருந்து கூப்பிட்டார். விஷயம் சொன்னேன்.
வீட்டுக்கு வந்து சாப்பிட்டுட்டு மூணரைக்குப் போனேன். இவர் எழுதிக்கொடுத்த 'ஒர்க் ஆர்டர் நோட்' எங்கியோ வச்சுட்டேன். இப்பக் காணோம்.
அதை தேடிக்கிட்டே நேரம் போயிருச்சு. நாலு மணிக்கு பில்டர் வேலையை நிறுத்தியாச்சு. நாளைக்கு காலையிலே ஏழரைக்கு வராராம்.
டவுன் பைப் பத்திக் கேட்டேன். இவருக்கு டைம் இல்லையாம் வேற ஆளு வருமாம். வெள்ளைக்கலர் பி.வி.சி. போடுங்க. நாம கலர்
அடிச்சுக்கலாம்ன்னு சொன்னேன்.

தொடரும்...............

வீடு 'வா வா'ங்குது ! பகுதி 29

பாலீஸ்டைரீன் பிள்ளையாருக்கு நேத்தே வெளியே இருக்கற மஞ்சள் அடிச்சு நல்லா காய விட்டு இருக்காங்க. இன்னைக்கு அதுலெ புள்ளையாருக்குமட்டும் ஸ்டீல் க்ரே அடிக்கணும். முன் கதவுக்கும் இன்னைக்கு வாக்ஸ் போடறாங்களாம். ப்ளம்பர் வரவே இல்லை! ஃபோன் போட்டா, மத்தியானம் 2.30 வரேன்னு நியூஸ் கிடைச்சது, வந்தாத்தான் உண்டுன்னு. பாத்ரூம் ஸ்டஃப் எல்லாம் வந்து இறங்கியிருக்கு!

திடீர்ன்னு எனக்கு அங்கெ போகணும்னு தோணிச்சு. அங்கே போனா அப்பத்தான் நம்ம புள்ளையாரை பொருத்திக்கிட்டு இருக்காங்க! சரியான சமயத்துக்குப் போயிட்டேன். நல்லா இருக்கு. ஆனா நமக்குத்தான் அது புள்ளையார். மத்தவங்களுக்கு அது ஏதோ ஒரு டிஸைன்!

இன்னும் கவனிச்சுப் பார்த்தா அது ஹனுமார் மாதிரியிருக்கு. 'பிள்ளையார் பிடிக்கக் குரங்காய் ஆனது' என்றது இதுதானோ?

கதவுக்கு 'ஸ்டீல் வுல்' போட்டுத் தேச்சு, அதுக்குமேலே சிடி50ன்னு ஒரு எண்ணெய் தேய்க்கணுமாம். டோனி அதுதான் நம்ம பெயிண்டர் அதை எப்படிச் செய்யணும்ன்னு காமிச்சார். கதவு நல்லா மின்னுது!

சாயந்திரம் வழக்கம்போல கிங் வந்து கொஞ்சம் வேலை செஞ்சார்.

சென்ட்ரல் வாக்குவம் க்ளீனருக்கு அடுக்களையிலே ஒரு 'இது' வச்சிருக்குல்லே' அது'க்கு ஸ்டீல் ப்ளேட் கட் செய்யறதுக்கு மார்க் பண்ணிட்டுப் போனார்.

15/12
இன்னைக்கும் பலதடவை போகும்படி ஆச்சு! எத்தனை முறைன்னு கணக்கே இல்லை! லைட்டுங்கல்லாம் போட ஆரம்பிச்சாச்சு! பெயிண்டருங்க லாஸ்ட் மினிட் வேலையிலே இருக்காங்க.

'ரெப்டைல்ஸ்' லே போய் டைல்ஸ் நாங்களே கொண்டுவந்தோம். ரெண்டு கிலோ மீட்டர் தூரத்துலேதான் இருக்கு கடை. டெலிவரி சார்ஜ் 50 $ நமக்கு லாபம் ! அர்பன் டைல்ஸ் போய் இன்னும் நடுவிலே போடற இன்செட்க்கு ச்சும்மா 5 தான், பணம் கட்டியாச்சு! லாண்டரிக்கு டைல்ஸ் (கருநீலம்) ஏற்பாடு செஞ்சாச்சு!

சென்ட்ரல் வேக் ஆளுங்க வந்து யூனிட் வச்சிட்டாங்க. அப்புறம் போய்ப் பார்த்தா, நல்லா பெயிண்ட் அடிச்சு முடிச்ச சுவத்துலே ரெண்டு ஓட்டை! கராஜ்லே இருக்கவேண்டிய இன்லெட் காணவே காணோம்!

பெயிண்டர் டோனி ஃபோன் செஞ்சார். நாளைக்கு 10 மணிக்கு 29 லே பார்க்க முடிவாச்சு. கொஞ்சம் டிஸ்கஸ் செய்யணுமாம். திரும்பத் திரும்ப ஓட்டைகளை அடைக்கறதாலே பெயிண்ட் செஞ்சுக்கிட்டே இருக்கமுடியாதுன்னு சொல்லப்போறாரோ?

சாயந்திரம் கிங் வந்து ஸ்டீல் தகடு போட்டாச்சு. இன்னும் கொஞ்சமே கொஞ்சம்தான் பாக்கி! 20 டைல்ஸ் கொண்டு போயிருக்காரு. தரையில் முடிக்கும் இடங்களுக்கு அளவா வெட்டிக் கொண்டுவருவாராம். ஃபேக்டரியில் வெட்டுனாத்தான் பிசிறில்லாம இருக்குமாம்.

வீட்டுக்கு வெளிப்புறச் சுவர்களில் பெயிண்ட் வேலைகள்
முடிச்சிட்டாங்க! அதுக்குத்தான் தனி ஒப்பந்தக்காரர்களாச்சே.

16/12
பத்துமணிக்குத்தான் போனேன். இவரு காலையிலேயே 'ஷாண்டிலியர்' போடணும்ன்னு கொண்டு போயிட்டார். சென்ட்ரல் வேக் ஆளுங்க வந்தாங்க. சுவத்துலே ஓட்டை அவுங்க தப்பில்லையாம். ஜிப் ஆளுங்க அப்படித் தப்பாப் போட்டுட்டாங்களாம். கராஜ்லெயும் ஓட்டையை அடைச்சது அவுங்கதானாம். அது எங்கேன்னு கண்டுபிடிக்கறது இப்பக் கஷ்டமாம். ஒண்ணு அங்கே சுவத்துலே பெரிய ஓட்டை(!) போட்டுக் கண்டுபிடிக்கலாமாம். இல்லேண்ணா, மேலே போய் அங்கே போகற ஹோஸை முழுசா அடைச்சிடலாமாம்.
என்ன வழின்னு மண்டையை உடைச்சுக்கிட்டே 3 பேரும் நின்னாங்க. நம்ம பெயிண்டர் டோனிதான் ஐடியாக் கொடுத்தாரு. அவுங்க அந்த யூனிட்டை ஆன் செஞ்சவுடனே 'சக்' பண்ணற சத்தம் வருமில்லே அது எங்கே வருத்துன்னு சுவத்துலே காது வச்சுக் கேட்டு ஒரு ஸ்க்ரூ ட்ரைவராலே ஒரு ச்சின்னக் குத்து! அப்படியே அந்த இன்லெட்டைக் கண்டுபிடிச்சுட்டார். வெல்டன் டோனி!!!!!!!

நாளைக்கு வந்து ச்சின்ன சின்ன ஓட்டைங்களை அடைக்கறதாவும், கதவுக்கு இன்னோரு கோட் எண்ணை அடிக்கறதாகவும் சொன்னார். இவர் சாப்பிட வந்தப்ப அவுங்க வந்தாங்களாம். செக் கொடுத்துட்டாராம். ரொம்ப நல்ல டீம்! நல்லா பழுதில்லாம, முகம் சுளிக்காம வேலை செஞ்சாங்க!

மத்தியானம் சாப்பிட்டுட்டு கொஞ்சநேரம் கம்ப்யூட்டர்லெ உட்கார்ந்தப்ப, சட்டுன்னு என்னவோ ஒரு தோணல். உடனே அங்கே போனா, கேரி லைட்டுங்களைப் போட்டுக்கிட்டு இருக்காரு. நம்ம 'வாட்டர் ஃபால் ஷாண்டிலியர்' என்ன உயரத்துலே இருக்கனும்னு கேட்டார். உயரம் சொன்னேன். அப்புறம் அதை எப்படி செட் செய்யணும்ன்னு கேட்டுக்கிட்டே அந்த பாக்ஸைப் பிரிச்சவர் கிறிஸ்டல்களைப் பார்த்தவுடனே திகைச்சுப் போயிட்டார். நான் செட் பண்ணறேன்னு சொல்லி அதை நம்ம ஊஞ்சல் கொக்கிலே கட்டிவிட்டு, பொறுமையா செட் செஞ்சேன். குட்டிச்சாத்தானுக்கு வேலை கொடுத்தாச்ச்சு:-))))

ஹீட் பம்ப் போடற ஆளுங்க இன்னைக்கே வரேன்னு சொன்னாங்களாம். ஆண்ட்ரூன்னு ஒரு பையன் வந்து போட்டுக்கிட்டு இருந்தாரு.மொத்தம் மூணு இடத்துலே ( முட்டாளுக்கு மூணு இடமோ?) போடணுமே.

லவுஞ்சிலேயும், மாஸ்டர் பெட்ரூம்லேயும் ஆச்சு. லிவிங்ரூம் பாக்கி. அப்பால அலாரம் செட் செய்ய 'லையோனில்' வந்து செட் செஞ்சாச்சு. வெளியே போறப்ப 60 உள்ளெ வர 30 விநாடிகள்!

அதுக்குள்ளே பில்கிங்டன் க்ளாஸ் ஜன்னல் கண்ணாடி போட வந்தாங்க. நல்ல வேளை போட்டு முடியட்டும்ன்னு இருந்துச்சு!

அப்ப நம்ம கிங் ஃபோன் செஞ்சு, இன்செட் டைல் வேணும்ன்னு சொன்னாரா, நான் அர்பன் டைல்ஸ் போனேன். நம்ம அதிர்ஷ்டம் பாருங்க, நாம் தேர்ந்தெடுத்தது இப்ப கிடைக்கறதில்லையாம்! காசு எல்லாம் கொடுத்திருக்கு, ஆனா இப்ப இந்த மாதிரி சொன்னா?

நாம எது கேட்டாலும் அங்கெ வேலை செய்யற பொண்ணு 'அன் ஃபார்ச்சுனேட்லி' ன்னு சொல்லியே கழுத்தை அறுக்குது! அஞ்சு டைல்ஸ்க்கு 60$ கொடுத்திருக்கு. 'அன் ஃபார்ச்சுனேட்லி' அவுங்க செக்காத்தான் அனுப்புவாங்களாம்! நம்ம கிட்டே காசா வாங்கிக்கிட்டாங்க! சரி. இருக்கட்டும், லாண்டரிக்கு டைல்ஸ்க்கு பே செய்யறப்ப அட்ஜஸ்ட் செய்யலாம்ன்னு வந்துட்டேன்

அப்ப இவர் போன் செய்யறாரு, ஷவர் போட ஆள் வந்திருக்குன்னு. சரின்னு திரும்ப வரும்போது, வீட்டுக்குப் போய் பல்புகளை எடுத்துகிட்டுப் போனேன். கேரி கேட்டிருந்தாரு.

ஷவர் ஆளு 'ரேமண்ட்' நல்ல மாதிரி. இப்ப இன்னோரு ப்ராப்ளம்! ஷவர் வால்லே சோப் வைக்க ஒரு மோல்டட் டிஸைன் இருக்குல்லே. அது ஏற்கனவே போட்ட பைப் லைனைத் தட்டுது! இப்ப ப்ளம்பருக்கு எங்கே போறது? அதுக்கு அந்த ரேமண்டே ஒரு வழி சொன்னாரு. நான் வேணா நகர்த்திப் போடவா? ஜிப்பைக் கட் செஞ்சு பைப்பை இழுத்துட்டு, திருப்பி ஜிப்பை ஒட்டறென்னு. எவ்வளவு காசு? 30 டாலர். 'சரி, செஞ்சுருப்பா'! வேலை முடியணுமே!

இப்ப கெரிக்கு ஒரு ப்ராப்ளம். லவுஞ்க்கு கிறிஸ்டல் கோர்த்துக் கொடுத்தது 18. அதுலெ ஒண்ணு சரியாப் போகலையாம் . என்னவோ அடைச்சதுபோல!அதுக்கு ஒரு ஆணியிலே ஓட்டையைப் பெருசு பண்ணலாம்ன்னு பார்த்தப்ப இன்னோரு கிறிஸ்டல் கீழே விழுந்து உடைஞ்சிடுச்சு!

கிறிஸ்டல் என்ன பெரிய கிறிஸ்டல் எல்லாம் ப்ளாஸ்டிக்தான்!ஆனா அதோட குழல் கண்ணாடி! கீழே கார்பெட் இருந்திருந்தா ஒருவேளை தப்பி இருக்கும். இன்னும் சிமெண்ட் தரைதானே. பளார்ன்னு தெறிச்சிடுச்சு! அதுக்கு ரீப்ளேஸ்மெண்ட் கிடைக்குமான்னு நாளைக்குப் பார்க்கணும்! கிடைச்சா வாங்கிருங்க. நான் அதுக்குண்டான காசைக் கொடுத்துருவேன்னு சொன்னார்.

கிங் 5 மணிக்கு வந்தாரு. கூடவே அவர் மனைவி காத்தரீனும்! நல்ல பொண்ணு..டைல் கிடைக்காத விஷயம் சொன்னேன். நாளைக்கு மறுபடியும் டைல்ஸ் வேட்டை! வாஷ் பேஸினுக்கு விலை குறைக்கச் சொல்லியிருக்கேன். பார்க்கலாம்!

இவர்வேற ரெண்டுவாரம் இருக்க மாட்டாரா............. அதுவே ஒரு கவலையா இருக்கு. என்னென்ன 'கடுபடு' பண்ணி வைக்கப் போறேனோ!

தொடரும்......................

==================

அச்சச்சோ.............

24 இளைஞர்கள்........................
அங்கங்கே கொத்துக்கொத்தா உக்கார்ந்துக்கிட்டு இருக்கும் இருபத்தினாலு இளைஞர்களைப் பாருங்க. முகம் மழிக்காம, தலை சீவாம முகத்தில் ஒரு சோகம் கப்பியிருக்க, பனியனும் கட்டம்போட்டக் கைலியுமா வெறுந்தரையில், பாறைகளில் உருண்டு கிடக்கும் இவுங்க எல்லாம் யாரு?


என்ன சோகமாம்?

வேறென்ன? இன்னும் கல்யாணம் ஆகலையாம்.

அடப்பாவிகளா?

சந்தோஷமா ஜாலியா இருக்கக் கிடைச்ச ச்சான்ஸை அனுபவிக்கத் தெரியலையே(-:

அது கிடக்கட்டும். ஏனாம் இன்னும் கல்யாணம் கட்டலை?

பொண்ணு கிடைக்கவேணமா?

இதென்னடா அதிசயம். ஏன் பொண்ணு கிடைக்காது?

இங்கெதான் வில்லங்கமே இருக்கு.

ஊர்க்கட்டுப்பாடு. அந்த ஊருலே இருக்கும் பொண்ணும் பையனும்தான் கண்ணாலம் கட்டணும். வெளியூர் சம்பந்தம் கூடவே கூடாது.
பொண்ணுக்குப் பதினெட்டு வயசு ஆனபிறகுதான் கல்யாணம். அதனாலே ஊருலே ஒரு பொண்ணு கல்யாண வயசை எட்டுனதும், இருக்கற கல்யாணங்கட்டாத பசங்க(??) எல்லாருக்கும் வீரவிளையாட்டுப்போட்டி நடத்தி, அதுலே ஜெயிக்கறவனைத்தான் அந்தப் பொண்ணுக்குக் கட்டி வைப்பாங்க.


சம்பவம் நடக்கறக் காலக்கட்டத்தில் ஊர் நாட்டாமையோட பையனும் திருமணத்தகுதிப் போட்டியில் தோத்துப்போயிக் கிடக்கார். ஒரு தகப்பனா மகனோட கவலை நாட்டாமைக்குப் புரியுது, ஆனா.................ஊர்க்கட்டுப்பாடு அவருக்கும்தானே?

அச்சச்சோ.............

இதுக்கிடையில் வெம்பித்திரியும் மனசுக்கு ஆறுதலா ஒரு 'ரோசனை' சொல்றார் நாட்டாமையின் மேல் கோவம் இருக்கற இன்னொரு மரத்தடிவாசி. ஊர்க்கூட்டத்தைக்கூட்டி நாட்டாமையே கேட்டுப்பிடலாமுன்னு ஐடியா.

கூட்டம் கூடுச்சு. வழக்கமான மரத்தடி மேடையில்.
எல்லாம் பேசி ஒரு முடிவுக்கு வர்றாங்க. அடுத்தமாசம் கூடும் கூட்டத்துக்கு ஊருக்குள்ளே பத்து வயசுக்கு மேற்பட்ட பொண்குழந்தை இருக்கறவங்களும், 20 வயசுக்கு மேற்பட்ட கல்யாணமாகாத வாலிபர்களும் குடும்பத்தோட கட்டாயம் வந்துறணும்.


இதுக்குள்ளெ ஊருக்குள்ளெ கணக்கெடுப்பு நடக்குது.மொத்தம் 24 இளைஞர்கள். 20 வயசுமுதல் 36 வயசுவரை. பத்திலிருந்து பதிமூணு வயசுலே ஏழு பொண்குழந்தைகள். ஒரு குடும்பத்தில் 14 வயசுப்பொண் ஒண்ணு வேற ஊரில் அத்தை வீட்டில் வளருது.

இந்த ஊரில் பிறந்த பொண்ணுன்றபடியால் அதுவும் ஊர்க்கட்டுப்பாட்டுக்குக்
கட்டுப்பட்டதுதான்னு நாட்டாமை அடிச்சுச் சொல்லிப்புட்டார்.

நாலு வருசம் கழிச்சுப் பொண்ணுக்கு ஊரே சேர்ந்து கல்யாணம் பண்ணி வைக்கும். அந்த 24 பேரில் ஒருத்தன் ஜெயிச்சுத் தாலி கட்டுவான்.


அச்சச்சோ.............


பொண்ணு ஊருக்கு வருது, மொத்த ஊரும் ஆரத்தி வரவேற்புக் கொடுக்குது. அந்த 24ம் 'ஆ'ன்னு வாய் பொளந்து நிக்குதுங்க. நாலு வருஷம் போகணுமே.
தாங்கமுடியாத தவிப்புலே அந்த 24ம் பக்கத்து டவுன் பாருக்குப்போய் 'பார்த்துட்டு' கண்களில் கனவு விரிய குடிச்சுக் கும்மாளமடிச்சுட்டு ஊருக்குத் திரும்பிவந்துடராங்க.


நாலுவருசம் பொறுக்கமுடியாத ஒருத்தன் ஊரைவிட்டு ஓடிப்போய் இன்னொரு ஊர்ப்பொண்ணைக் கல்யாணம் கட்டிக்கறான். பாவி............ அங்கெயே இருந்து தொலைக்கக்கூடாது? பொண்ணைக் கூட்டிக்கிட்டு இந்த ஊருக்கு வந்தான். தாய்தகப்பனைப் பார்க்கன்னு.


நாட்டாமை வந்து அதிரடித் தீர்ப்புச் சொல்லிட்டார். ரெண்டு பேரையும் கட்டிவைச்சு, உயிரோட எரிச்சுறனும்


.அச்சச்சோ.............


ஆச்சு. பத்தியெரியுது. 23ம் வாயிலெ வயித்துலெ அடிச்சுக்கிட்டு ஒப்பாரிவச்சு அழுவுதுங்க. கிட்டத்தட்ட இனி எல்லாரும் நடைப்பிணங்கள்.


ஒருநாள் 'கொத்தா' இருக்கும்போது 20க்கு 36 என்றது சினியர் சிட்டிசன் லெவலாப் போயிருதுன்னு பேச்சு. ரெண்டு பிரிவாப் பிரிச்சுக்கராங்க. 20 முதல் 28 ஒரு க்ருப். 29 முதல் 36 வரை இன்னொண்ணு. தனித்தனி தலைவர்கள். போட்டிக்குப் பயிற்சி நடக்குது.


அப்ப வரான் ஒரு புது ஆளு ஊருக்குள்ளே. நவநாகரிமான உடுப்பு, கண்ணுக்குக் கூலிங் க்ளாஸ், அட்டகாசமான பைக். அலட்சியப்பார்வை. நேரா வண்டி போய்
நின்னது 14 வயசுப்பொண்ணு வீட்டுமுன்னால். நகைக்கடைக்காரராம். பொண்ணோட அப்பா செய்யச் சொல்லி இருந்த நகையைக் கொடுக்கவந்தவர்.


இந்த ஒரு நகையோட நிக்காம, பொண்ணொட அப்பா பெரிய அளவுலெ ஒவ்வொரு நகையும் செய்யறார். ஒட்டியாணம்கூட இருக்குன்னா பாருங்க.
வரப்போக இருக்கும் நகைக்கடைக்காரருக்கும் அந்தப் பொண்ணுக்கும் ஒரு 'இது'
வந்துருது.


இதுக்குள்ளே நாலுவருசம் மெதுவா நகர்ந்து போயிருது. ஊர்த்திருவிழா. காப்புக் கட்டியாச்சுன்னா யாரும் ஊருக்குள்ளெ வர முடியாது. வந்தவங்க விழா முடியும்வரை வெளியெ போவும் முடியாது. திருவிழா முடிஞ்சவுடன் திருமணத்தகுதிப் போட்டி. யாரு அந்த அதிருஷ்டக்காரன்னு தெரிஞ்சுரும்.

அப்ப மத்தவங்க?


கொடியேத்தரதுக்குள்ளே ஊருக்கு வந்துறலாமுன்னு 23ம் டவுனுக்குப் போகுதுங்க. ஃபுல் அடிச்சுட்டுத் திரும்பி வரும்போது ட்ராக்ட்டர் மரத்துலே மோதி,
எல்லாரும் மப்புலே மயங்கிக்கிடக்குறாங்க.


அச்சச்சோ.............


அன்னிக்குப் பார்த்து ஊருக்குள்ளெ வந்த நகைக்கடைக்காரர், நாயகி வீடு
பூட்டிக்கிடக்கேன்னு காத்திருந்ததுலெ நேரம் போயிருச்சு. கடைசியில் நகையைக் கொடுத்துட்டுத் திரும்ப வந்து பைக்கைப் பார்த்தா..............ரெண்டு டயரையும் யாரோ(??) பஞ்சர் பண்ணி வச்சுருக்காங்க..


அச்சச்சோ.............


கோயிலில் கொடி ஏத்தியாச்சு. 23ம் ஊருக்கு வெளியில். நாயகன் ஊருக்குள்ளில்.
ஊர்நடைமுறை, பெண் குழந்தைகள் பிறக்காத காரணம் எல்லாம் மரத்தடியில் கோவப் பார்வையுடன் பீடி புகைச்சுக்கிட்டே இருக்கும் அந்த மரத்தடிவாசி நாயகனுக்குச் சொல்றார்.


ரொம்ப வருஷங்களுக்கு முன்னே வெளியூர்ப் பொண்ணைக் கட்டிக்கிட்டு கைக்குழந்தையோடு ஊருக்குவந்த ஒருத்தரைக் கொல்ல 'நாட்டாமை' கொடுத்த தீர்ப்பு. சாகும்போது அந்தப் பொண் விட்ட சாபம்.


"இன்னும் பத்து வருசத்துலெ இங்கே பொறக்கும் ஒரு பொண் குழந்தையாலெதான் நாட்டாமைக்குச் சாவு"


நவீன கம்சனா மாறிய நாட்டாமை. பொண்குழந்தைகளையெல்லாம் உயிரோடு பானையில் வச்சுப் புதைக்கிறார்.


அப்படி தன் குழந்தையை இழந்தவர்தான் அந்த மரத்தடிவாசி.


திருவிழா முடிஞ்சவுடனே 23ம் ஊருக்குள்ளெ ஒடிவருது.
ஊர்க்கூட்டத்தில், 'போட்டியில் வெற்றிபெறும் நபர் உன்னைக் கட்டிக்குவார்'னு நாட்டாமை பொண்ணுகிட்டே சொல்றார். பொண்ணு எதிர்த்து வாக்குவாதம் செய்யுது.


நியாயத்தை உணர்ந்த 23ம் நாயகனோட பைக்லே பொண்ணை ஏத்தி அனுப்பிடறாங்க.


அச்சச்சோ.............


எழுதறப்பவே கண்ணைக் கட்டிக்கிட்டு வருது..............ஸ் ப்ப்ப்பா


ஆரம்பத்தில் போட்ட டைட்டில் கார்டுகள்



புகை பிடித்தல் உடல் நலத்திற்குக் கேடு


உலகைக் காண ஆசையாய் பிறந்து,
பெண்களாய் பிறந்த காரணத்திற்காக
கொல்லப்பட்டு இறந்த அனைத்துப் பெண் சிசுக்களுக்கும்
இந்தத் திரைப்படத்தைச் சமர்ப்பிக்கிறோம்



இந்தியாவில் இந்த 20 வருடங்களில் கொல்லப்பட்டப் பெண் சிசுக்கள் ஒரு கோடி.


நல்ல கருத்துள்ள படம். ஆனால் கொஞ்சம் 'சாபம்'ன்னு குழப்பிட்டாங்க.


நாயகன், நாயகி & அந்த 24 பேர் எல்லாரும் புதுமுகங்கள்தானாம்.


இசை: நூருல்லாகான்

இயக்கம்: பால்ரே ( V.S.Balray)


தெரிஞ்ச முகங்கள் இரண்டு.
மரத்தடிவாசி = தலைவாசல் விஜய்
நாட்டாமை = சண்முக சுந்தரம்


எத்தனைபேருக்கு நான் பெற்ற இன்பம் கிடைச்சிருக்குமுன்னு தெரியாததால் வழக்கத்திற்கு மாறா முழுக்கதையையும் சொல்லி இருக்கேன்.


படத்தின் பெயர்: அச்சச்சோ