வீடு 'வா வா'ங்குது ! பகுதி 44

28/2
பத்துநாளா வீட்டை ஒழுங்கு பண்ணறதும் சாமான்களை எடுத்து வைக்கறதுமாவே இருக்கோம்! பசங்க ஒரு வழியா செட்டில் ஆயிருச்சுங்க!
கப்பு மகளுக்கு ஒதுக்குன ரூமை எடுத்துக்கிட்டா(ள்)ன்! அவ(ளு)னுக்கு 'டபுள் பெட்!'

கராஜ் பின் கதவு மூலம் வெளியே போறான். கொஞ்ச நேரத்துலே நல்ல பிள்ளையா தானே திரும்பிடுறான்! சாப்பாடு, டைம் டைமுக்கு!
'அப்பி, ச்சுச்சூ' எல்லாம் 'லிட்டர் ட்ரே'லே! ஜமாய் ராஜா ஜமாய்!!!!

ஜிகே மட்டும் லேசுப்பட்டவனா? பெரிய ஆள்! கப்பு ஒரு அறையை எடுத்துக்கிட்டதும், இன்னொரு படுக்கை அறையை இவன் எடுத்துக்கிட்டான். பழைய வீட்டுலே அறைகளுக்கு எண்கள் வச்சுச் சொல்லிக்கிட்டு இருந்தேன்.
இங்கே அறைகளுக்கு இனி இவுங்க பெயர்தான். கப்பு ரூம், ஜிக்கு ரூம்:-)

அங்கே ரொம்ப நாள்(வருசம்)வரைக்கும் ஒரு அறையை 'எம்மா ரூம்'னே சொல்லிக்கிட்டு இருந்தோம். அவுங்கதான் அங்கே பழைய ஓனரின் பொண்ணு..அப்புறம் ஒரு நாள் திடீர்னு ஞானோதயம். இந்த வீட்டைத்தான் நாம் வாங்கிட்டோமே.... இன்னும் என்ன எம்மா?ன்னு:-)))) நம்பர் போட்டது அதுக்குப் பிறகுதான்.

நாளைக்குக் காலையிலே காங்க்ரீட் போட ஆளுங்க வராங்களாம்! நேத்தே கம்பியெல்லாம் போட்டு ரெடி பண்ணிட்டாங்க.
1/3
காலையிலே 6 மணிக்கெல்லாம் வந்துட்டாங்க.. வெளியே அலங்காரத்தூண்களுக்கு ப்ளாஸ்டிக் ராப்பர் போட்டுச் சுத்திட்டு, காங்க்ரீட் ஊத்திட்டாங்க.

அப்புறம் அதும்மேலேயே ஒரு மஞ்சக்கலர் பவுடரை அள்ளித்தெளிச்சுக்கிட்டு இருக்காங்க. அப்புறம் அதைச் சமப்படுத்தி இன்னும் ஒரு டார்க் ஷேடு மஞ்சப் பவுடர் போட்டுக்கிட்டே இருக்காங்க!

நானும் கிளம்பி லைப்ரரிக்குப் போயிட்டு 12 மணிக்கு வந்தேன். அப்ப(வும்) ஒரு செம்மண்ணு கலருலே இன்னோரு பவுடரைத் தூவிக்கிட்டு இருந்தாங்க!
ரெண்டு பக்கமும் கம்பிப்பிடி வச்ச ஒரு பலகையிலே ஒரு ஆள் ஏறி நிக்கறார். அதே மாதிரி இன்னொரு பலகை பக்கத்துலே இருந்துச்சு. அதுலே
தாவிக்கிட்டு மறுபடி முதல் பலகையை இந்தப்பக்கம் வச்சுட்டு உடம்பை அழுத்தி இந்தப் பலகைக்கு ஒரு தாவு. ஸ்டாம்ப்டு காங்க்ரீட்டுக்கு டிசைன்
போடறாராம்:-) இதுக்கு மட்டும் மெஷின் இல்லைபோல. ஈரக் காங்ரீட் மேலே
மெஷினை ஓட்டமுடியாதாமே. அழுந்திருமாம்.

நான் மறுபடியும் ஒரு மீட்டிங்குக்கு போயிட்டு சாயந்திரம்தான் வந்தேன். செங்கல்சிகப்பா பவுடர் அப்பியிருக்கு! குறுக்காலெ யாரும் போகாம இருக்க
கயிறு கட்டி வச்சிருக்கு! அவுங்க மறுபடி நாலைஞ்சு நாளுலே வந்து கழுவிட்டு சீலெண்ட் போடுவங்களாம்! அதுவரைக்கும் பின்பக்க வழிதான்!

2/3
நெட் கனெக்ஷன் ADSL போட ஒரு ஆள் டெலிகாம்லெ இருந்து வந்தார். பாக்கறதுக்கு இந்தியன் மாதிரி இருக்கேன்னு கேட்டேன். தென்
ஆப்பிரிக்காவாம். பேர் குமாரன். கேபிள் போடறப்ப ஒர்க் ஆர்டர்லே என் பேரைப் பார்த்துட்டு, நீங்கதான் துள்சியா. என் மனைவிக்கு ஒரு
துள்சியைத் தெரியும்ன்னு சொன்னார். அப்பத்தான் ஞாபகம் வருது, ஒரு தென்னாப்பிரிக்காவைச் சேர்ந்தவங்க ஒரு உதவி முந்தி கேட்டது!
அவுங்க மனைவி பேரு அவாந்த்ரியான்னு கேட்டா, ஆமாம்ன்னு சொன்னார். பாருங்க உலகம் எப்படி சுருங்கிருச்சுன்னு!

புது கனெக்ஷன் நல்ல ஸ்பீடா இருக்குன்னு நினைக்கறேன்! பார்க்கலாம். ஆனா, டிஸ்கனெக்ட் செய்யாம அப்படியே விட்டுறலாமுன்னு சொன்னதுதான் எப்படியோ இருக்கு!`' டயல் அப்'லெ அப்பப்ப டிஸ்கனெக்ட் பண்ணி அதுவே ஒரு பழக்கமா ஆகிப்போயிருக்கு. மனுஷன் பழக்கத்தின் கைதிதானெ? நல்ல வேளை இதுக்கு ஃப்ளாட் ரேட்தான்.

4/3
9 மணிக்கு ரெண்டுபேர் வந்து ஹைப்ரெஷர் மோட்டார்வச்சுக் கழுவுறாங்க, கழுவறாங்க, அப்படிக் கழுவுனாங்க! அழுக்குச் சிகப்பான கலருலே தண்ணி
அடிச்சுக்கிட்டுப் போகுது! அப்புறம் பார்த்தா, கதவுக்குள்ளெயும் தண்ணி கசிஞ்சு, உள்ளேயும் நனைஞ்சிடுச்சு! பழைய துணி எடுத்துத்
துடைச்சுக்கிட்டு இருந்தேன்!
கொஞ்ச நேரம் கழிச்சு வரோம் அதுக்குள்ளெ நல்லா காயணும்ன்னு சொல்லிட்டுப் போனாங்க! பழையபடி 2 மணிக்கு வந்தாங்களா, அவுங்க
கூடவே தார் போடற ஆளுங்களும் வந்து ஃபுட் பாத்'லே தார் போட்டு ரோல் செஞ்சாங்க!

அப்புறம் ஒரு சீலண்ட் மாதிரி என்னத்தையோ ஸ்ப்ரே செஞ்சாங்க. ரெண்டுதடவை ஸ்ப்ரே செஞ்சுட்டு, திங்கள் கிழமை நடக்கலாம். நாலுநாள் கழிச்சு வெள்ளிக்கு வண்டியை அதும்மேலே விடலாம்ன்னு சொல்லிட்டுப் போயிருக்காங்க! இனி கேட் ஃபென்ஸ் போடற கேரிக்குச் சொல்லணும்! எத்தனை கேரிகள் இங்கெ!!!!

5/3 முதல் 17/3 வரை:
கேரிக்குச் சொல்லியாச்சு. வந்து அளவெடுத்துக்கிட்டுப் போயிட்டார். பின்னாலே தோட்டத்துக்கு என்ன செய்யலாமுன்னு மண்டையை
ஒடச்சுக்கிட்டு யோசிக்கிறோம். நமக்கோ வயசாகிக்கிட்டே போகுது. சுலபமா மெயின்டைன் செய்யறமாதிரி தோட்டம் வேணும்.
முந்திமாதிரி தோட்டவேலை செய்ய இப்பெல்லாம் தெம்பு இல்லை!

முன்னால் போட்ட ஸ்டாம்ப்டு காங்க்ரீட்லே ஒரு மயிரிழை அளவில் விரிசல் வந்துருக்கு. தெருப்பக்கம் இருந்து ஆரம்பிச்சு அப்படியே கராஜ் தூண் வரைக்கும் போயிருக்கு. காங்க்ரீட் போட்ட ஆளுங்களுக்குத் தகவல் அனுப்புனோம். அப்பத்தான் தெரியுது, போட்ட மறுநாளே ஒருத்தர் வந்து காங்க்ரீட்டைக் கட் பண்ணி இருக்கணுமாம். வரலையான்னு எங்களையே கேக்கறாங்க. தரையை கழுவவந்த ஆளுங்களும் அங்கே கட் பண்ணாததைப் பார்க்கலையாம்!

இப்ப ஒருத்தர் வந்து கட் பண்ணிட்டுப்போனார். விரிசல் விழுந்தை ஒண்ணும் பண்ண முடியாதாம். அது அப்படியேதான் இருக்குமாம். அதுக்குமேலெ ஒரு சீலண்ட் போடறேன்னு சொல்லிப் போட்டாங்க.

இதுக்கு நடுவிலே இந்த வீட்டுக்குப் பின்னாலே ஒரே டென்ஷன்! பின்னாலேன்னா இந்த வீட்டு வேலைங்க சம்பந்தமா
ஓடியாடிக்கிட்டு இருந்ததைச் சொல்றேன், நீங்கவேற வீட்டுக்குப் பின்பக்கத்துலே டென்ஷன் வந்து உக்காந்திருக்குன்னு
நினைச்சுக்கப்போறீங்க:-)

கொஞ்சம் மனசுக்கு ஓய்வு கொடுக்கலாமுன்னு பார்த்தேன். இவரும் சொன்னார் எங்கியாவது ஒருவாரம் ச்சின்ன ஹாலிடே
போகலாமுன்னு. இந்தப் பசங்க இருக்காங்களே, அவுங்களை எங்கே கொண்டு விடறது? அதுலே ஒரு ஆளுக்கு ஒடம்பு சரியில்லை.

சக்கரை வியாதி. கவனமாப் பார்த்துக்கிட்டு, அப்பப்பத் திங்கத் தரணும். இன்னொண்ணு, எங்கியாவது கொண்டுபோய் விட்டா, சாப்பிடவே சாப்பிடாது!

நான் மட்டும் சிங்கப்பூர் போகலாமுன்னு முடிவாச்சு. ஒரு வாரத்துலே இந்தியா போயிட்டு வர்றதுன்னா வேஸ்ட்தானே?
(ஆச்சு. போய்வந்து இதைப் பத்திப் பதிவுகளும் எழுதிக் குவிச்சாச்சு.)


பளபளன்னு இருக்கற காங்க்ரீட் தரையிலே கறுப்பா அசிங்கமா ஒரு டயர் தடம். இது அகலம் குறைஞ்சது. என்னவா
இருக்குமுன்னே மொதல்லே புரியலை. விசாரணைகளுக்கப்புறம் தெரியவந்த விவரம் கோவத்தைத்தான் கொடுத்துச்சு.

பசங்க செய்யற வேலையாம். எங்கியாவது இப்படி அழகாத் தரை இருந்தா சைக்கிள்லே போய் டயரைத் தேச்சு அங்கே
மார்க் பண்ணிட்டுப் போவறது ஒரு வேடிக்கை விளையாட்டாம். அந்த வார இறுதி வந்தவுடன், இதை அழிக்கறதுக்காக
என்னென்னவோ சொல்யூஷன் எல்லாம் வாங்கிவந்து போட்டு, ஊறவச்சு ப்ரஷ் வச்சுத் தேய்ச்சோம். லேசாப் போனதே
தவிர அப்படியேதான் இருந்துச்சு. தேய்ச்ச இடத்துலே காங்க்ரீட் மேலே போட்ட பாலீஷ் மறைஞ்சு மனசுக்குக் கஷ்டமாப்
போச்சு. மறுநாள் பார்த்தா இன்னும் ரெண்டு இடத்துலே இதே மாதிரி பண்ணிவச்சுட்டுப் போயிருக்கறான். யாருன்னு
தெரியலை. இதென்னடா புதுத் தொந்திரவுன்னு ஆச்சு.

கேட் போடற வேலையை முடுக்கி விட்டோம். கேட் ஒரு மாதிரி வந்துருச்சு.

அப்படியும் ஒரு நாள் இவர், ட்ரைவ் வே கேட்டைத் திறந்து வச்சுட்டுக் கராஜ் முன்னாலே வண்டியை நிறுத்திட்டுச் சாப்பிடவந்தார். ஒரு பத்து நிமிஷம்தான் இருக்கும். எவனோ அதுக்குள்ளே அங்கே காருக்குப்
பின்னாலே சைக்கிள் டயர் பர்ன் செஞ்சுவச்சுட்டுப் போயிருக்கான். சல்லியம்.

இனிமேப்பட்டு எப்பவும் கேட்டை அடைச்சு வைக்கணும். பசங்களுக்கு இங்கே ஏகப்பட்ட உரிமைகள் இருக்கு. பிடிபட்டாலும்
அவுங்களுக்குத் தண்டனை கிடையாதுன்றதாலே எல்லாம் துளிர்விட்டுக் கிடக்குங்க. எதுக்கும் இருக்கட்டுமுன்னு போலீஸ்லே ஒரு
புகாரும் கொடுத்து வச்சேன்.

தொடரும்...............

==========================

வீடு 'வா வா'ங்குது ! பகுதி 43

13/2
பாதிக் குடும்பம் அங்கே மீதிக் குடும்பம் இங்கேன்னு நம்ம கப்பு, ஜி.ஜே ரெண்டும் அங்கே (311)தான் இருக்காங்க. இங்கே ஒருமாதிரி ஒழிச்சு வச்சாத்தான் அவுங்களைக் கொண்டுவர முடியும்.

ஆனா, பிள்ளைங்க பசியாலே துடிச்சிடுமே! காலையிலே 7 மணிக்குக் கிளம்பி அங்கெ போய் சாப்பாடு கொடுக்கலாம்ன்னு முடிவாயிருக்கு.
ஆனா, ஒருதடவை இல்லே, பலமுறை போகணும். கப்பு பரவாயில்லெ . ஜிகே உடம்பு சரியில்லாத ஆளாச்சே!
இன்னைக்கும் இங்கே வீடு அடுக்கற வேலை! கூடவே 311 சுத்தம் செய்யறவேலையும் சேர்ந்துக்கிச்சு!




14/2
இன்று காதலர் தினம்! காதலர்கள் ரெண்டு பேருமா சேர்ந்து வீடு அடுக்கணும்! எங்கே? இவர் வேலைக்குப் போயாச்சு! நாந்தான்
பசங்களுக்குச் சாப்பாடு கொடுத்துட்டு, அங்கே கொஞ்சம் சுத்தம் செஞ்சிட்டு வந்தேன். ஒரேடியா முடியாதே(-:


4.50 சாயந்திரம், 'சிடிகேர் டிக்கர்' கொண்டுவந்து வச்சிட்டுப் வயித்துலே பாலை வார்த்துட்டுப் போயிருக்காங்க! வீட்டுக்கு முன்புறம் சமன் செய்யணும். மழைவந்தாச் சகதியாப் போயிரும். அப்படி இருக்கு மண்வாகு. நம்ம க்ளீண்டன் செஞ்சுவச்ச மணைக்கட்டைதான் இப்ப முன்வாசலுக்குப் படி.

இன்று நோ சமையல், சாயந்திரம் 'ஸ்பகெலேமி'யிலே பிட்ஸா வாங்கித் தின்னாச்சு!


15/2
இப்பல்லாம் காலையிலே சீக்கிரமாக் கிளம்பி 311 போய் பசங்களுக்கு சாப்பாடு கொடுத்துட்டு வரோம். கப்புதான் ரொம்பவே 'சோகமா'
இருக்கா(ள்)ன்! புரியுது போல, 'அம்மா' வீட்டுலே இல்லே எங்கேயொ தொலைஞ்சிருச்சுன்னு!
8 மணிக்கு முன்னாலேயெ 'சிடி கேர்' ஆளுங்க ரெண்டு பேர் வந்து வேலையை ஆரம்பிச்சிட்டாங்களாம். நான் 311 லேயிருந்து 9 மணிக்குத்தான்
வந்தேன்.
பள்ளம் தோண்டி மண்ணை வாரிக்கிட்டு இருந்தாங்க! அதை 'டம்ப்' செய்ய நாம தனியாக் காசு தரணும்ன்னு சொன்னாங்க! நாம் அடிச்சோம் ப்ரைஸ்!

நமக்கோ பின்பக்கத் தோட்டத்துலே லெவல் கீழே இருக்கு. மழைத்தண்ணி நின்னுச்சுன்னா கஷ்டம். அந்தத் தரையை பக்கத்து வீட்டு லெவலுக்கு உயர்த்தணும்ன்னு இருந்தோம். அதுக்கு நாம் மண்ணை வெளியே வாங்கணும். இப்ப நம்ம வீட்டு மண்ணே இருக்கு! அதை அங்கேயே போடச் சொன்னோம். சரின்னுட்டு, ட்ரக்லே ஏத்தி பின்னலெ கொண்டு போய் கொட்டினாங்க!


அது குவியல் குவியலா 9 குவியல் இருக்கு! அதை கொஞ்சம் நிரவி விட்டா நல்லது! அதனாலெ அதைக் கொஞ்சம் நிரவுங்கோன்னு
சொன்னதுக்கு நாளைக்கு செய்யறேன்னு சொன்னாங்க! முதல்லே இவர் என்கிட்டே சொன்னாரு, ஒரு 'வீல் பாரோ' வாங்கணும்னு.


எதுக்காம்? மண்ணை அள்ளி நிரவறதுக்காம்! சரியாப் போச்சு, இது செய்து முடிக்க நமக்கு ஒரு வருசம் ஆயிருமே! அவுங்களையே கேளுங்க.
அந்த 'டிக்கர்' லேயெ செஞ்சிருவாங்க. அதுக்குத் தனியா பணம் வேணுமுன்னா கொடுத்தரலாம்! அப்படியே ஆச்சு!


சாயந்திரம் வரை 'ட்ரைவ் வே' வேலை செஞ்சாங்க. நாளைக்கு 'ரோலர்' கொண்டு மண்ணை அமர்த்திட்டு, ஜல்லி போட்டு கம்பி
வச்சிருவாங்களாம். அப்புறம் அதுமேல காங்க்ரீட் ஊத்துவாங்க போல!




16/2
ஒரு மணி நேரத்துலே மண்ணையெல்லாம் நிரவியாச்சு! ரோலர் போட்டுக்கிட்டு இருக்காங்க! நம்ம வீட்டுலே புதுசா டி.விக்கு
ஆன்டெனா போட்டோமில்லையா, அதோட ரிசப்ஷன் சரியா இல்லை. அதை ட்யூன் செய்யணுமாம்.நாளைக்கு மத்தியானமா
ஒருத்தர் வருவாராம். அதுக்கு சார்ஜ் 40 $ ஆன்டெனா போட்டு ட்யூன் பண்ணிக் கொடுக்கமாட்டாங்களா? ஒவ்வொண்ணுக்கும் தனிக்காசா? நல்ல கதை(-:






நாளைக்குப் பகல் 12.30க்கு ஷவர்க்குக் கண்ணாடி தடுப்புச்சுவர் போட ஆள் வருது! பேசாம இன்னொரு குளியலறையில் இருக்கரதுபோல க்யூபிக்கிள் வச்சுருக்கலாமோ?


நான் இன்னைக்கு 'ஆல்தெர்ம்'க்கு ஃபோன் செஞ்சு, நம்ம வீட்டுலே அவுங்க கார்டு இருந்ததைச் சொன்னேன். (வீட்டுவாசல்லே கொண்டுவந்து வச்சுட்டுப் போயிருக்காங்க. எல்லாம் ஒரு வியாபாரத் தந்திரம்தான். புது வீட்டுலே எதாவது வேலை இருக்காதா என்ன? ) அப்படியே
நமக்கு ஒரு கன்சர்வேட்டரி வேணும்ன்னு சொன்னதுக்கு ரிச்சர்டுன்னு ஒருத்தர் நாளைக்கு 2 மணிக்கு வந்து பாக்கறேன்னு சொன்னார். இதை மட்டும் நம்பாம இன்னும் ரெண்டு மூணு இடத்துலே க்வோட் எடுக்கணும்!





நம்ம கப்புதான் பாவம்! சாப்பிடாம துக்கிதனாக இருக்கான்! ரொம்ப நாசூக்கான சுபாவம்.

17/2
ஷவர் கண்ணாடி போட்டுட்டாங்க. நம்ம பாத்ரூமில் ஷவர்க்கூடு வைக்கலை. தடுப்புச்சுவரா ஒரு 10 மிமீ கனமுள்ள 1.2 மீட்டர் அகலக் கண்ணாடி மட்டும்தான். ஆனா அது உயரமா ரெண்டு மீட்டருக்கு நெடுநெடுன்னு இருக்கு. அது கொஞ்சம் ஆடுமோன்னு பயமாவும் இருக்கு. . அதுவும் டாய்லெட்க்கு ராத்திரி தூக்கக் கலக்கத்துலே இவர் போய் இடிச்சுக்கிட்டாருன்னா?







அந்த ஆளுங்களே இன்னொரு கண்ணாடித்துண்டு குறுக்காலே வச்சு சப்போர்ட் தரோம்னு சொன்னாங்க. ஆனா அதுக்கு அளவெடுத்து
வெட்டிக்கிட்டு வரணுமாம். அடுத்த வியாழன்னு முடிவாச்சு. அந்த 'சீல்' காயறவரைக்கும் 24 மணிநேரம் ஷவரை உபயோகப் படுத்த வேணாம்னு
சொல்லியிருக்காங்க. 24 மணி நேரம் என்ன? சப்போர்ட் கண்ணாடி வர்ற வரைக்குமே யூஸ் பண்ணாம இருந்தாப் போச்சு! அதான் இன்னோரு

பாத்ரூம் இருக்குல்லே!




18/2
இன்னைக்கும் வழக்கம்போல பசங்களுக்குச் சாப்பாடு கொடுக்கப் போயிட்டு வந்தேன். சாயந்திரம் கப்புவை மட்டும் இங்கே கொண்டு வந்துட்டோம்!
வந்தவுடனே நேரா சாமிகிட்டே போய் கும்பிட்டுக்கிட்டு, நம்ம படுக்கையறைக்குக் கொண்டு போனேன். அந்த 'ஷீட்' வாசனைக்காக அதையெல்லாம் மாத்தாமலெயே போட்டு வச்சிருந்தோமில்லே. அதையெல்லாம் மோந்து பார்த்துட்டு கொஞ்ச நேரம் அங்கெயே படுத்துக்கிட்டான்!




இவர் சொல்லிக்கிட்டே இருக்கார், 'அவன் ராத்திரியெல்லாம் 'கத்தி'க்கிட்டு இருக்கப் போறான். கராஜ்லே விட்டுடு'. ஆனா, நம்ம கப்பு 'பட்டுச்செல்லம்!' ச்சுப்புன்னு இருந்தது. ராத்திரியெல்லாம் என்கிட்டேயே படுத்துச்சு!






19/2
காலையிலே கோயிலுக்குப் போனோம். ஜிகேவை எஸ்பிசிஏ விலே கொடுக்கணும்ன்னு சொல்றார். எனக்கோ துக்கம் துக்கமா வருது!
சாமிகிட்டே முறையிட்டுக்கிட்டு இருக்கேன்.


அப்புறம் ஒரு முடிவுக்கு வந்தேன், 'என்ன ஆனாலும் ஜிக்குவை புது வீட்டுக்குக் கொண்டு போகலாம். வெளியே வைக்கலாம். இருந்தா
இருக்கட்டும். இல்லைன்னா அவனா வேற இடம் போனாப் போகட்டும்'!
அது சரியான பயந்தாங்குள்ளீ. கொண்டு வரப்பயே பயத்துலே ச்சுச்சு போயிருச்சு! அப்புறம் கோவமா 'சிங்கம்' போல நடந்துக்கிட்டு இருக்கு.
பின்பக்கத்து வீட்டுக்கும் நமக்கும் இருக்கற ஃபென்ஸ் ஓட்டையிலே அடியிலே போய் அவுங்க வீட்டுலே செடிக்கடியில் உக்கார்ந்துக்கிட்டு இங்கே நம்ம வீட்டை ஓரக்கண்ணுலே பார்த்துக்கிட்டு இருந்தது!



நான் அப்பப்பப்போய் அவன் அங்கேதான் இருக்கணுமுன்ற ஒரு அனுமானத்திலே 'ஜிக்கு ஜிக்கு'ன்னு தர்மக்கூச்சல் போட்டுக்கிட்டே இருந்தேன்.




சாயந்திர, மெதுவா வெளியிலே வந்தது. நான் ஒண்ணும் தெரியாதமாதிரி, வழக்கம்போல சாப்பாடைத் தட்டுலே வச்சேன். அதுவும் ஏதும் நடக்காத மாதிரி நல்லா சாப்பிட்டுச்சு! ஒரு ப்ளாங்கெட்டை விரிச்சுப் போட்டேன். ஜம்முன்னு அதுலே படுத்து தூங்கிடுச்சு! ஸோ செட்டில்டு!


தொடரும்.......

------------------------------

வீடு 'வா வா'ங்குது ! பகுதி 42

4/2
காலையிலே 9.30க்குப் போனேன். அந்த 'லக்ஸ் ஆளு க்ரெம்' வந்து என்னென்னன்னு சொன்னார். எல்லா இன்லெட்டும் வேலை செய்யுதான்னு
பார்த்தார். இந்த மெஷினை யூஸ் செஞ்சிருக்கேன்னார். அப்படியான்னு கேட்டேன்!

சாயந்திரம் எட்டுக்கு கிங் வந்து அளந்தார். அப்புறம் அடுக்களையிலே பெஞ்சுலே ஸ்டீல் மேலே ஒட்டியிருந்த ஃப்லிம் எடுத்துச் சுத்தம் செஞ்சார்.
ஊஞ்சல் தயாரா இருக்காம். கார்பெட் போட்டது எனக்குத்தெரியாது. இல்லேன்னா ஊஞ்சல் கொண்டு வந்திருப்பேன்னு சொன்னார்.
நான் எப்ப வருவீங்கன்னு கேட்டதுக்கு ஞாயிறுன்னார். நாளைக்கு முடியுமான்னு கேட்டேன். ஏன், ஏதாவது ஸ்பெஷல்லான்னார்.
ஆமா. எனக்கு பிறந்தநாள்ன்னு சொன்னேன். நாளைக்கு பகல் 2 மணிக்கு வரேன்னுட்டுப் போனார்.

நான் போனப்ப எல்லா ஃபோட்டோ ஆல்பமும் கொண்டு போய் அடுக்கி வச்சேன்! எவ்வளோ படங்கள் எடுத்துத் தள்ளி இருக்கோம் இந்த 22 வருசத்துலென்னு புரியுது. இப்போ டிஜிட்டல் வந்தபிறகு நல்லதாப் போச்சு. இல்லேன்னா ஆல்பம் வாங்கியே போண்டியாகி இருப்போமோ? போட்டொ எடுத்துக்கிட்டா ஆயுசு கம்மியாகிருமுன்னு முந்தி ஒரு நம்பிக்கை இருந்துச்சாம். பாட்டி சொல்லிக்கிட்டு இருப்பாங்க. அந்தக் கணக்குலெ பார்த்தா 'எப்பவோ நான் போயிருக்கணும்' :-)

5/2
இன்னைக்கு எனக்குப் பிறந்தநாள்! காலையிலே வீட்டுலே சாமி விளக்கேத்திட்டுக் கோயிலுக்குப் போனேன். மகள் செல்ஃபோன்லே
கூப்பிட்டு இருக்காள். நான் கோயிலுக்கு உள்ளே போறப்ப ஃபோனை ஆஃப் செஞ்சு வச்சிருந்தேன். வெளியே வந்து 'ஆன்' செஞ்சப்பத்தான்
தெரிஞ்சது மகள் கூப்பிட்டது!

நான் பதிலுக்குக் கூப்பிட்டேன். 'ஹாப்பி பர்த்டே' சொன்னாள். அப்புறம் வீட்டுக்கு ஃபோன் செய்ன்னு சொல்லிட்டு நான் வீட்டுக்கு வந்துட்டேன்.
அப்புறம் அவளே கூப்பிட்டு 1.30க்கு வரேன்னதும். நான் ஊஞ்சல் விஷயம் சொல்லி அங்கே போகணும்னு சொன்னேன்.

அவ ஒரு மணிக்கே வந்து என்னைப் பார்த்து விஷ் செஞ்சிட்டு 'கல் பதிச்ச யானை' கொடுத்தா. அப்புறம் அங்கே வந்து பார்க்கறேன்னு
சொல்லிட்டுப் போயிட்டாள்.

மகள் கொடுத்த யானையும், கோபால் ஜப்பானில் இருந்து வாங்கியாந்த பூனையும்

நான் ரெண்டு மணிக்குப் போனேன்! கிங் ஊஞ்சலைக் கொண்டுவந்து போட்டார். நல்லாதான் இருக்கு! முதல்முதல்லே சாமிக்கு இருக்கட்டுமுன்னு அங்கெ கப்போர்ட்லெ இருந்த சாமிப்படத்தை வச்சு மனசுலே கும்புட்டுக்கிட்டேன். ரீ இன்ஃபோர்ஸிங்/சப்போர்ட் கொடுக்கன்னு ஒரு மெட்டல் ஸ்ட்ரிப் கொண்டு வந்திருந்தார். அதை வச்சிட்டுப் போறேன். வேணும்ன்னா போடலாம்னு சொன்னார்! நான் தான் இப்பவே போட்டுருங்கன்னு சொல்லி போட வச்சேன். . கிங் போன பிறகு மகள் வந்தாள். ஊஞ்சல் ரொம்ப நல்லா இருக்காம்! ரொம்பப் பிடிச்சுப்
போச்சாம்! உக்கார்ந்து ஆடுனா,. படுத்து ஆடுனா! நான் சிரிப்பை முகத்துலே காட்டாம இருக்க ரொம்பப் பாடுபட்டேன்.

நான் கொஞ்சம் ஃபோட்டோஸ் எடுத்தேன்! அப்புறம் மாஸ்டர் பெட்ரூம் சின்ன ஜன்னலுக்குக் கர்டெயின் போட உதவி செஞ்சது மகள்தான்.
அங்கிருந்து ரெண்டு பேரும் 'வேர் ஹவுஸ்' கடைக்குப் போனோம். ஸ்டெயின்லெஸ் ஸ்டீல் ரப்பிஷ் பின் ( 50% சேல்) வாங்கினோம்.அப்புறம் மெட்டல் பக்கெட் 'சவுத் சிடி' வேர்ஹவுஸ்லே இருக்குன்னு அங்கே போனோம். போற வழியிலே அவளோட ஃப்ளாட்டுக்குப் போனோம். நல்லா அருமையா வச்சிருக்கா. 'கலர் ஸ்கீம் ப்ளூ'. பயங்கர கோஆர்டினேஷன். அட்டகாசமா இருக்கு. நல்லா இருந்தாச் சரி! பாராட்டினேன். வேற என்ன சொல்றது? எல்லாம் தனக்குத் தனக்குன்னா மிடுக்காத்தான் களை வெட்டுறாங்க.:-)

சவுத் சிடி கடையிலே மெட்டல்ன்னா, Zinc ஸிங்லே இருந்தது. சரின்னு ஒண்ணு வாங்கினேன். வேற எங்கியோ ஸ்டெயின்லெஸ் ஸ்டீல் பக்கெட் விளம்பரம் பார்த்த ஞாபகம். கிடைச்சா ஒண்ணு வாங்கிக்கணும்.

சாயந்திரம் 7 மணிக்கு ரூபியோட அப்பாவுக்காக நடந்த இரங்கல் கூட்டத்துக்கு டெலினா வீட்டுக்குப் போனேன்.

இவர் இப்பத்தான் சிங்கப்பூர்லே இருந்து கூப்பிட்டார். கோயிலுக்குப் போயிட்டு சாமான் ஏதாவது வாங்கிக்கிட்டு (எல்லாம் நொறுக்குத் தீனிவகைகள்தான். இங்கெதான் ஒண்ணும் கிடைக்கறதில்லையே) திரும்ப ஏர்போர்ட்டுக்கு எட்டு மணிக்குப் போயிருவாராம்! ஒம்போது மணிக்கு ஃப்ளைட். இன்னும் ஊஞ்சல் விஷயம் சொல்லலை! நாளைக்கு அவரே வந்து பார்க்கட்டும்!

பொதுவா இன்னைக்கு நாள் நல்லாப் போச்சு! கடவுளுக்கு நன்றி.

6/2
இன்னைக்கு இவர் வந்துட்டார். காலையிலே நம்ம பக்கத்து வீட்டு (31) கார்ல் ஃபோன்லே கூப்பிட்டு அவங்க பக்கம் ஃபென்ஸுக்கு
ஸ்டெயின் செய்யப்போறென்னு சொன்னார். பிரவுண் கலர்ன்னு சொன்னார். நான் எதுவா இருந்தாலும் சாயந்திரம் இவர் வந்தபிறகு வந்து பாக்கறேன்னு சொல்லிட்டேன். அவுங்க என்ன கலர் அடிச்சாலும் சரி! நமக்கென்ன? அந்தக் கலர் இந்தப்பக்கம் ஊறிவராம இருக்கணும்! அவ்வளவுதான்!

இவர் , என்னைக்கும் இல்லாத பழக்கமா வந்ததும் சாப்பிட்டுட்டுத் தூங்கிட்டார். அப்புறம் சாயந்திரம் போய் பார்த்தோம். "அட! ஊஞ்சல் போட்டாச்சா? நல்லாத்தான் இருக்குல்லே?" ஊஞ்சலில் படுத்தெல்லாம் பார்த்தார்.
ம்ம்ம்...கொடுத்துவச்ச மகராசன்:-) போகட்டும். ஆலிலைக்கண்ணனைப்போல் ஊஞ்சல் கோபால்.

7/2
வாசல் முன்னாலே காங்க்ரீட் போடற 'சிடி கேர்' ஆளுங்க யாரும் வரலை!
நாங்க தினமும் கொஞ்சம் கொஞ்சமா சாமான்களை எடுத்து வச்சுக்கிட்டு இருக்கோம். இந்த வீக் எண்ட் மூவர்ஸ்க்கு சொல்லி இருக்கு. நம்ம பெட்ரூம் ஸ்யூட், மத்த மூணு படுக்கைகள், ஃப்ரீஸர், ட்ரையர்னு சில சாமான்களைதான் கொண்டுபோறொம். புக் ஷெல்ஃப் ஒரு மூணு இருக்கு. ஷோ கேஸ், டைனிங் டேபிள், சின்ன மேஜை ஒண்ணு, கம்ப்யூட்டர் மேஜை ஒண்ணு. அவ்வளோதான். எக்ஸர்சைக்கிளும், ட்ரெட்மில்லும் கட்டாயம் கொண்டுபோகவேண்டிய ஐட்டங்கள்:-) தினமும் உடற்பயிற்சி செய்யறேனோ இல்லையோ அதுகளைப் பார்த்துக்கிட்டு இருந்தாலாவது உடம்பு கொஞ்சம் இளைக்குமோன்னு ஒரு நப்பாசைதான்.

சோஃபா செட்டை மகளுக்குக் கொடுத்தாச்சு. நல்லவேளை பியானோவை முந்தியே வித்துட்டோம்:-)))) அது இப்ப இலங்கையில் யார் வீட்டுலெ இருக்கோ?

நம்ம பெட்ரூம் ஃபர்னிச்சர் கொஞ்சம் யுனீக் டிஸைன். மவோரி கார்விங் டிசைன். இந்த மாதிரி நான் வேற எங்கேயும் பார்த்ததில்லை. கவுரி மரத்தில் செஞ்சது. அதைமட்டும் மாத்தவே கூடாதுன்னுதான் நம்ம மாஸ்டர் பெட்ரூமுலே ட்ரெஸ்ஸிங் டேபிளுக்கு இடம் சரியான அளவு விட்டு, ஜன்னல்களை வச்சுருக்கு. நம்ம 'ஆர்க்கிடெக்ட் டிசைனர் பொய்ட்' ஒருமுறை நம்ம (பழைய) வீட்டுக்கு வந்து, இங்கிருந்து புது வீட்டுக்குக் கொண்டுபோகும் சாமான்கள் என்னெல்லாம்னு கேட்டு அதுக்குத் தகுந்தாப்புலே இடம்விட்டுப் ப்ளானில் வரைஞ்சும் கொடுத்தார்.

8/2
சாமான்களைக் கொண்டு போற வேலையை முடுக்கி விட்டோம்! இன்னைக்கு நம்ம கணேஷ் உதவி செய்ய வந்தார். கோபாலும்ஒரு ட்ரெய்லரை

வாடகைக்கு எடுத்து, சில ஷெல்ஃப்ங்களை கொண்டு போனார். ஆன்னா ஊன்னா கணேஷைக் கூப்புட்டுருவோம். புள்ளையாரை மறக்கலாமா? :-))))

நம்ம கிச்சன் கிங்கும் சாயந்திரம் வந்து வாஷ் பேசின் சிங் ஸ்டேண்டை மூடற பலகையைச் செஞ்சு கொண்டு வந்தார். ஆனா அளவு
சரியில்லை! சரி பண்ணிட்டு வரேன்னு போனார்.

11/2
இன்னைக்கு கோபால் லீவு போட்டார். நம்ம அதிர்ஷ்டம் பாருங்க, நசநசன்னு ஒரே மழை! அப்படியும் பல சாமான்களைக் கொண்டு போனோம்.
நாளைக்கு காலையிலே எட்டரைக்கு 'மூவர்ஸ்' வராங்க!

12/2
நாங்க காலையிலே 6 மணிக்கு முன்னாலேயே அவதி அவதின்னு எந்திரிச்சு, கொஞ்சம் சாமான்களை ஒழுங்கா எடுத்து வச்சிட்டோம்.
8.50க்கு மூவர்ஸ் வந்தாச்சு! 3 ஆளுங்க. வந்தவுடனே முதல் வேலையா, ஒரு அச்சிட்ட தாள்லே விவரம் எல்லாம் கையெழுத்து வாங்கியாச்சு!

8 மணிக்கு அவுங்க டெப்போவிலிருந்து புறப்பட்டாங்களாம்! இந்த ஊர்லே 15 நிமிஷம் போதும் ஒரு கோடியிலே இருந்து மறுகோடி போக!
அதுக்கப்புறம் ரெண்டே மணிநேரத்துலே எல்லாப் பெரிய சாமானும் அங்கே போய், இறக்கியும் வச்சாச்சு! 10.52க்கு ஃபினிஷ்! ஆனா திருப்பிப் போக

அரைமணி சேர்ப்பாங்களாம். மொத்தம் 3 மணிநேரம். அது என்ன கணக்கோ?மணிக்கு $75. ஜி.எஸ்.டி. தனி. மொத்தம் 255$ஆச்சு. கேஷ் கொடுத்தா 250$ போதுமாம். சரின்னு கொடுத்தாச்சு!

இன்னிக்குத்தானே அஃபிஷியலா வீடு மாத்தறோம். நம்ம வீட்டு ஸ்வாமி விக்கிரகங்களைக் கொண்டுபோய் முதலில் ஊஞ்சலில் வச்சேன். இன்னிக்கு ஊஞ்சல் சேவை:-) திருச்சானூர்லே ஒரு சமயம் பார்த்த தாயாரின் ஊஞ்சல்
மனக்கண்லே வந்துச்சு. அரக்கப்பரக்க ஓட்டமும் நடையுமா கோவிலுக்குள் காலடி வைக்கிறேன், எதிரில் மண்டபத்தில் ஊஞ்சலில் பளபளன்னு டாலடிச்ச வைர நகைகளோடு ......ஹப்பா.....

அப்பாடான்னு மூச்சு விடறப்பப் போன் பெல் அடிக்குது. யாரா இருக்குமுன்னு
யோசனையோட எடுத்தா......

" உங்க வீட்டுக்கு நல்ல ஆஃபர் வந்துருக்கு. விக்கப்போறிங்களா?"
ரியல் எஸ்டேட் ஆளுதான்.

(அடப்பாவிகளா.... இப்பத்தான் வந்து செட்டில் ஆகப்போறோம். அதுக்குள்ளேயா?)

"உங்களுக்கு யார் சொன்னது வீட்டை விக்கறோமுன்னு?"

" இல்லை. ஒரு buyer அந்தப் பக்கம் வந்தப்ப வீட்டைப் பார்த்தாராம்"

" இன்னிக்கு பிஸியா இருக்கேன். விக்கறதா இல்லையான்னு நாளைக்கு யோசிச்சுச் சொல்லவா?"

யாரு ஃபோன்லே?ன்னு கேட்டுக்கிட்டே வந்தார் கோபால். வீட்டை விக்கறயான்னு கேட்டாங்கன்னு சொன்னேன்:-)


மத்தியானதுலே இருந்து ஆரம்பிச்சிடுச்சு வீட்டை ஒழுங்குபண்ணற வேலை! மகளும், ஆலனும் வந்து டிவி, ஆடியோ சிஸ்டம் எல்லாம்
வச்சுத் தந்தாங்க! அடுக்களை ஒருமாதிரி சரி பண்ணிட்டேன். ஆனா, எது எது எங்கேன்னு புரிய நாளாகும்! அடுக்களை பேண்ட்ரி மட்டும் எல்லாம் ப்ளீர்னு இருக்கு. மூணு லிட்டர் ஜூஸ் வாங்கும் பாலிக்கார்பொனேட் பாட்டில்களில்
பலசரக்கு வச்சுக்கற பழக்கம். எல்லாம் யூனிஃபார்மா ஒண்ணுபோல இருக்கும். என்ன இருக்குன்னும் கண்ணுக்கும் தெரியும்.கொஞ்சம் அழுக்காச்சுன்னா, தூக்கிப்போட்டுட்டு வேற பாட்டிலில் ரொப்பிக்கலாம். அதான் எப்பவும் ஜூஸ் வாங்கிக்கிட்டேதானே இருக்கோம். (ச்சும்மா ஒரு கிச்சன் டிப்ஸ் உங்களுக்கு)

இவர் படுக்கை அறையைச் சரி செஞ்சாரு. இன்னும் ரெண்டு பெட் ரூம் அப்படியே கிடக்கு! எல்லா சாமானையும் அங்கேதான் கொட்டிக்
குவிச்சு வச்சிருக்கு!


தொடரும் .......

( வீட்டுலே ஹைலைட் ஊஞ்சல் என்றதாலே சில படங்களை கூடுதலாப் போட்டுருக்கேன். எல்லா ஆங்கிளிலும் பார்க்கணுமா இல்லையா? :-))))

=========================