ஏய்....சைலன்ஸ்...... பேசிக்கிட்டு இருக்கொம்லெ!

இந்தான்னு கோபால் என் 'கையில்' கொடுத்ததை வாங்கி இப்படியும் அப்படியுமாத் திருப்பிப் பார்த்தேன்.

பறவை, மிருகம் ரெண்டும் இருக்கு. பறவைக்குக் கருடமூக்கு! கீழே மிருகம் நம்ம நேயடு! ஆஹா..... சிறிய திருவடியின் தலையில் பெரிய திருவடி தன் 'அடி'யை வச்சு இறக்கைகளை மடக்கி அடக்கமா உக்கார்ந்துருக்கு போல! சிறியவரின் முகம் அச்சு அசலா நாம் சுசீந்திரம் கோவிலில் பார்த்த பல்வரிசை காமிக்கும் அனுமன்!
பின்பக்கம் திருப்புனா....மீன் வடிவம். அதன் கீழே..... ஆந்தைக் கண்ணோ? ஆனால் மூக்கைப் பார்த்தால் வராஹம் போல இருக்கே! ஆஹா....... மச்ச, வராஹ அவதாரங்களா?

பீடத்தின் முன்பக்கம் Talking Stick. இடது வசம் Seek first to understand வலதில் Then tobe understood இப்படி வாசகங்கள். 'புரிந்து கொள்ளப்பார் அப்புறம் புரிய வைக்கப்பார்!' அட! உண்மைதானே. எவ்வளவு எளிமையா வாழ்க்கைத் தத்துவத்தைப் போதிக்கும் சொற்கள்!
வட அமெரிக்கப் பழங்குடிகள் ( சிகப்பிந்தியர்கள்???) இதை பயன்படுத்தும் வழக்கத்தை ஆதிகாலத்தில் உண்டாக்குனாங்களாம். பேசும் குச்சி! இதைக் கையில் வச்சுருக்கும் நபர் மட்டும் பேச, மற்றவர்கள் கேட்கணும். பொதுவா கூட்டத்தின் தலை(வர்) வச்சுக்கிட்டு இருப்பார். வேற யாராவது எதாவது சொல்ல நினைச்சால் இடையில் கூவி விளிக்காம குச்சி அவர்கள் கைக்கு வந்ததும் சொல்லவேண்டியதைச் சொல்லலாம். இதைத்தானே இப்போதும் விஜய் டிவி நீயா நானாவில் பார்க்கிறோம். குச்சிக்குப் பதிலா 'மைக்'கு:-)
பண்டைய காலத்தில் பழங்குடிகள் தலைமை, குச்சி மட்டுமே வச்சுக்கணுமுன்னு இல்லை. சங்கு கூடக் கையில் வச்சுக்கலாமாம். சங்கேந்தியவன்தான் தலைவன் என்ற வகையில் சங்கேந்திய ஒருவன் குருக்ஷேத்ராவில் சொன்னது இன்னிக்கு உலகம் பூராவும் பரவி பலமொழிகளில் மொழிமாற்றம் செய்யப்பட்டு ஏராளமானவர்களுக்கு 'புரிதல்' உண்டாக்கி இருக்கு பாருங்க!!!!!!

பேசும் குச்சிகள் வெவ்வேற அளவு, வடிவம், அமைப்பு ன்னு வெவ்வேற காலங்களில் வந்துருக்கு, ஒரு குச்சியில் ரெண்டு பருந்து இறகுகளைக் கட்டிவிட்டாலும் போதுமாம். நம்ம 'கையில்' இருப்பது கொஞ்சம் மாடர்ன் வகையாக இருக்கலாம். தொழிற்சாலைத் தயாரிப்பு (சீனாவோ????. அப்படித்தானிருக்கணும்)
என் தீவிர ஆராய்ச்சியைப் பார்த்துட்டு 'டாக்கிங் ஸ்டிக்'ன்னு சொன்னார் கோபால்.

இதுதான் சொந்த செலவில் சூனியம் வச்சுக்கறது'...............

'குச்சி இப்போ யாரு கையிலே இருக்குன்னு கவனிக்கலையா! இனி இது ஒருக்கிலும் கைமாறச் சான்ஸே இல்லை' ன்னேன்:-)