Wednesday, April 02, 2025

நாட்டு நடப்பு என்னன்னு பார்க்கலையே......

நம்ம லோட்டஸில் தினசரி வகையில் தினத்தந்தியும் வச்சுருப்பாங்க. பார்த்தே பல வருஷம் ஆனதால் முதலில் அதில் ஒரு நோட்டம் ! முப்பது பேரா? பகீர்னு இருந்தது....
அண்ணன் வீட்டுக்குப் போனதும் குசலவிசாரிப்புகள் ஆனதும், நம்ம பயணத்திட்டம் கேட்டவர் அதையே உறுதிப்படுத்தினார். இப்பப்போய்  அங்கே போகணுமா ?  கேன்ஸல் செஞ்சுட்டு,  மார்ச் முதல் வாரம்  போங்கன்னார். 
ஆகஸ்ட் மாச ஹொட்டேல் புக்கிங் பண நஷ்டம், இப்ப ஸ்பெஷல் தரிசனத்துக்குப் பட்ட பாடுன்னு பலதும் மனசுக்குள்ளே வந்து பயமுறுத்தியிருக்கும்போல.....  'பெருமாள் மேல் பாரத்தைப் போட்டுட்டுப் போய்வரணும் 'என்றார் நம்மவர். நானும் 'ப்ரயாக்ராஜில்தான் கூட்டம்,  அயோத்யாவில் அவ்வளவா இருக்காது'ன்னு என் பங்குக்குச் சொன்னேன்.  நினைப்புதான் பொழைப்பைக் கெடுக்கப்போகுதுன்னு......  ப்ச்....

இந்தக் கால்பிரச்சனை வேற  இருப்பதால் எதுக்கு முன்னுரிமை என்பதிலும் ஒரு தயக்கம் இருந்ததே...கால் வலி இன்னும் அதிகமா ஆனா..... நகரவே முடியாதே.....  கடைசி ஆசை நிறைவேறாமப் போயிருச்சுன்னா..........(நம்மவரின் மனக்குரல் !)

ஆய்ர்வேத சிகிச்சைக்குக் கேரளா போனால் நல்லது என்றாலும்,  அங்கேயே தங்குவதில் நம்மவருக்கு சிரமம்தான். எப்பவும் நோயாளிக்கு இருக்கும் சலுகை, கூட வர்றவங்களுக்கு இல்லைதானே ? அதனால் இங்கே சென்னையிலேயே இருக்கும் சிலபல கோட்டக்கல் ஆயுர்வேத கிளை மருத்துவ மனைகளில் சிகிச்சை எடுத்தால் நல்லது. தினமும் சிகிச்சைக்குப்போய் திரும்பி லோட்டஸுக்கு வர்றமாதிரி....

திநகரில்  நம்ம மங்கேஷ் தெருவில் ஒரு  மருத்துவர் இருக்கும் விவரம் கிடைச்சுப் போனால்.....  சொன்ன நேரத்தில்  சொன்னபடி எங்கே ?  நாம் காத்திருக்கும்போது, ஆற அமர வந்த பணியாளர், கதவைத்திறந்து  உள்ளே வந்து உக்காருங்கன்னார்.  சின்ன அறைதான்.  அலமாரிகளில் மருந்துகள் நிறைஞ்சுருக்கு.  சிகிச்சை அங்கேதானான்னு தெரியலை.  விசாரிச்சதில்  கன்ஸல்டேஷன் மட்டுமாம்.  ஓ.....   டாக்டர் எப்ப வருவாராம் ? தெரியாதாம் ! சிலநாட்கள் வர்றதே இல்லையாம்.....    

  இருக்கட்டுமுன்னு அங்கிருந்து கிளம்பி, கூகுளாரின் வழிகாட்டுதல்படி நுங்கம்பாக்கம் போனோம். கொஞ்சம் பெரிய மருத்துவமனையாகத்தான் இருக்கு !  தி நகர் மருத்துவர் பெயரும் வாசல் போர்டில் இருக்கு ! ஆ...... ஒரு நாலைஞ்சு மருத்துவர்கள் இருக்காங்க இங்கே !  வெவ்வேற நாட்களில் வருவாங்களாம் !
 கொஞ்ச நேரக் காத்திருப்புக்குப்பின் அன்றைய மருத்துவர் வந்தாங்க. அவுங்க பெயர் எனக்கு ரொம்பவே பிடிச்சுப்போச்சு !  ஜனனி ! அட ! நம்ம ஜன்னு ...
பரிசோதனைக்குப்பின்  '21 நாட்கள் சிகிச்சை எடுக்கணும். தினமும் வந்து போகலாம். உள் நோயாளியா இருக்க வேண்டியதில்லை'ன்னாங்க. நம்ம அயோத்யா பயணம் முடிச்சுதான் வரமுடியும்னு சொன்னதும், அதுவரை காலுக்குத் தடவ வேண்டிய குழம்பும் ( இது நம்ம குழம்பில்லை. மலையாளக்குழம்பு. தைலமுன்னு சொல்வோமே அது !) உள்ளுக்கு சாப்பிடவேண்டிய மாத்திரைகளுமா ரெண்டு வாரத்துக்கு எழுதிக்கொடுத்தாங்க.  ரெண்டாவது யோசனை இல்லாம குடுகுடுன்னு போய் மருந்துகளை வாங்கினார் நம்மவர்.

எந்த மருந்து மாத்திரைகளையும் உள்ளுக்கு எடுத்துக்கும் எண்ணம் எனக்கு  அறவே இல்லையாக்கும்...

ஆங்.... சொல்ல  விட்டுப்போச்சே.... இந்த முறையும் நமக்கான சாரதி, நம்ம விஜிதான். நல்ல பையர். நம்ம புள்ளெமாதிரிதான். 
பாண்டிபஸார் கடைகள் விஸிட், நம்ம டெய்லர் கடை, கீதா கஃபே எல்லாம்  இடைக்கிடை நடந்துக்கிட்டுட்டு இருந்துச்சுன்னுத் தனியா சொல்லவேணாம்தானே ? பாண்டிபஸாரில் நடைபாதை நெடுக நடக்க முடியாதவர்களுக்காக ஒரு வண்டி இயங்குவதைப் போன பயணத்துலேயே கவனிச்சுருந்தேன்.  அப்ப கால் நல்லாத்தானே இருந்துச்சு.....  இப்ப இந்த வண்டியைப் பயன்படுத்திக்கணும்தான்!  ஓட்டுனர் பழனி, ரொம்ப நல்லவரா இருக்கார்.  ஒரு கோடியில் இருந்து மறுகோடிவரைக் கொண்டுபோனார் !

நம்மவரின் ப்ரேஸ்லெட் கொஞ்சம் லூஸாக இருந்ததால், அதைச் சரியாக்கிக்கலாமுன்னு நம்ம சீநிவாச ஆசாரியின் ,  மங்கேஷ் தெரு கடைக்குப்போனால்  மூடி இருந்தது. அப்புறம் அண்ணிதான் சொன்னாங்க... அவர் வேற இடத்துக்குக் கடையை மாத்தியிருக்கார்னு.  தேடிப்போய் நம்ம வேலையை முடிச்சுக்கிட்டோம். ஒரு இஞ்சுத் துண்டு வெட்டி எடுத்து என்னாண்டை கொடுத்தார். 

கூடியவரை உறவுகளையும் நட்புகளையும் சந்திப்பதை மறக்கவில்லை. எல்லோரும் அன்பு மழையில் நம்மைக் குளிர்விச்சது உண்மை !  நம்ம அநந்தபதுமன் தரிசனத்துக்குப் போயிட்டு, அப்படியே நம்ம நைன்வெஸ்ட் நானானியின்  வீட்டுக்கும்போய், புதுவரவு பட்டுவைக் கொஞ்சிட்டும் வந்தாச் !





பதிவுலக நண்பரும், எங்கள் பிள்ளையுமான கார்த்திக், கைநிறையப் பரிசுப்பொருட்களோடு குடும்பத்துடன் வந்து சந்திச்சார். பரோபகாரி ! போனமுறை நம்மவர்,  உடல்நலக்குறைவால் மருத்துவமனையில் இருந்த காலங்களில் இவர் செய்த உதவிகளை, இந்த ஜன்மத்தில் மட்டுமல்ல.... எப்பவுமே என்னால் மறக்கமுடியாது.  இந்தப் பயணத்திலும்  இவர் உதவிக்கொண்டே இருந்தார் ! இந்த இயல்பான குணம் அமைவது அபூர்வம் !

'நம்மவர்' படிச்ச எஞ்சிநீயரிங் கல்லூரியில் அவருடைய க்ரூப் மக்கள் சேர்ந்து ஐம்பதாவது ஆண்டு விழாவைக் கொண்டாடப்போவதாக ஒரு ரெண்டு வருஷத்துக்குமுன் தகவல் அனுப்பியிருந்தாங்க. நேரில் கலந்துக்க முடியாது என்பதால்  எதோ குறிப்பிட்ட தொகை ஒன்னை அனுப்பி இருந்தார்.  விழா முடிஞ்சதும்,  அங்கங்களுக்குண்டான பரிசுப் பொருட்களை உள்ளுர் விலாசத்துக்கு அனுப்புவோம்  என்றதும்,  கார்த்திக் அவர்களின் விலாசத்துக்கு அனுப்பச் சொன்னார் நம்மவர்.  அதில் ஒரு 'தங்கக்காசு'ம்  இருப்பதாகவும், அதை மட்டும் சென்னையில் ஒரு விலாசத்தில் போய் நேரில் வாங்கிக்கணும் என்றும் சேதி. எல்லாம் அப்படியே ஆச்சு. 

'தங்கத்தைத் தபாலில் அனுப்ப முடியாதென்பதால், அதை விட்டுட்டு, மற்ற பரிசுப் பொருட்களை நமக்குக் கொலுப்படிகள் வாங்கி அனுப்பும்போது அந்தப்  பொதியில் வச்சுருந்தார். ஒன்னும் சொல்லிக்கற அளவுக்குத் தரமான சமாச்சாரமெல்லாம் இல்லைதான். ஆனால் 'சம்பந்தப்பட்டவருக்கு' அது மதிப்புள்ளதா இருந்துருக்கணும். போகட்டும்.....

வீட்டில் பத்திரமா வச்சுருந்த அந்தத் 'தங்கக்காசு'  நம்மவரிடம் அன்றைக்கு வந்துசேர்ந்தது. கல்லூரியின் பெயர், வருஷம் ஏதாவது பொறிச்சுருக்குமோன்னு பார்த்தால் சுத்தம். குறைஞ்சபக்ஷம் 50 ன்னு போட்டுருக்கலாம். ஒரு பக்கம்  ஜார்ஜ் மன்னரின் தலை, அடுத்த பக்கம் தூத்துக்குடியில் இதைச் செஞ்சு கொடுத்த கடைப்பெயர்.  விழாக்குழுன்னு ஒன்னு இருந்துருக்கும்தானே.... எல்லாருக்குமா மேல்மாடி காலி ?  தலையில் அடிச்சுக்க  இன்னும் நாலு கைகள் இல்லையேன்னு கவலைப்பட்டேன்.

'சம்பந்தப்பட்ட நபருக்கு' அது மதிப்பு வாய்ந்ததா இருக்குமோ என்னவோ.....  நமக்கெதுக்கு வம்புன்னுட்டு,  நம்ம ஆசாரி கடைக்குப்போய்  ப்ரேஸ்லெட்டில் வெட்டியெடுத்தத் துண்டையும்,  இந்தக் காசையும் கொடுத்து, சுத்திவர  சின்ன டிசைனில் வளையமும் செயினில் மாட்டும்வகையில்  ஒரு சின்ன வளையமும் போட்டுக்கொடுக்கச் சொன்னேன்.
இதுதான் நம்ம ஆசாரியின் புது விலாசம்.  யாருக்காவது பயன்படுமேன்னு படம் போட்டுருக்கேன்.

ஞாயிறு வரட்டும்னு காத்திருந்து மச்சினர் பேரனைப் பார்க்கப்போய் வந்தோம். நம்மவனை விடச் சரியா மூணுவாரம் மூத்தவன். முதலில் கொஞ்சம் தயங்கினாலும், அப்புறம் தாத்தாவிடம் ஒட்டிக்கிட்டான்.  குழந்தை நல்லா இருக்கணும். 
பொதுவா, இந்தியப்பயணங்களில்  முடிந்தவரை தினமும் எதாவது கோவிலுக்குப் போய்வர்றதுதான் வழக்கம் என்றாலும், இந்த முறை வழக்கத்தை மாத்திக்கவேண்டியதாப் போயிருக்கு.  முடிஞ்சபோது கோவில்னு இருந்தேன்.   ரதசப்தமி தினம், அல்லிக்கேணி கண்டேனேன்னு போய் வந்தோம்.  எனக்கு ரொம்பவே பிடிச்சவர் நம்ம பார்த்தசாரதிதான். ஒளிவு மறைவு, இருட்டு, விரட்டுன்னு ஒன்னும் இல்லை. பளிச்னு நம்ம மேல் பார்வை செலுத்துவார் !


 

திடீர்னு நம்மவருக்குப் பல் பிரச்சனை.  நம்ம கார்த்திக்தான் ஒரு இடம் சொன்னார். தி நகரிலேயே இருப்பதுதான் நமக்கு வசதி ! டாக்டர் ஹரிணி !  'டென்டல் ஹௌஸ்' என்ற பெயரில் க்ளினிக். நம்ம ராகவேந்த்ரா கோவில் இருக்கு பாருங்க.... அதுக்கு ரெண்டாவது கட்டடம்.  சின்ன சமாச்சாரம் என்று போனது கடைசியில் கொஞ்சம் இழுத்துருச்சு.  டாக்டர் ஹரிணி, நல்ல ஃப்ரெண்ட்லி டைப்.  நல்லாவே கவனிச்சுப் பார்த்தாங்க. ஒரு பத்துமுறை அவுங்களைப்போய்ப் பார்க்கும்படியாச்சு. ரொம்ப நிதானமா நமக்கு நேரம் ஒதுக்கித் தந்ததையும் பாராட்டத்தான் வேணும் !

  போனமுறை நம் வலிகளுக்கு அக்குப்ரெஷர் சிகிச்சை கொடுத்த சித்ரா அவர்களும் என்னை சந்திக்க ஹரிணியின் பல் மருத்துவமனைக்கே வந்தார்.  நம்மவரை ஹரிணியின் வசம் ஒப்படைச்சுட்டு, நானும் சித்ராவும் லோட்டஸுக்கு வந்து பேசிக்கிட்டு இருந்தோம். ஒரு நல்ல தோழியுடன்  செலவழித்த நேரம் அருமை !

இப்போ ஹரிணியும் நம்ம தோழிகள் லிஸ்டுலே இருக்காங்க என்பதையும் சொல்லிக்கொண்டு.......... ஹாஹா

தொடரும்......... :-)


Sunday, March 30, 2025

நண்பர்கள் அனைவருக்கும் இனிய யுகாதி வாழ்த்துகளுடன் என் பேரன்பும் !
இந்தியப்பயணம் போய் வந்து ஒரு பதினைஞ்சு நாட்கள் ஆச்சு.  முதலில் எழுதணுமா, வேண்டாமான்னு (வழக்கம்போல்) ஒரு எண்ணம்.  போகட்டும் போ..... எழுதியே வைக்கலாமுன்னு அப்புறம் ஒரு தோணல்.  அதுக்கேத்தாப்போல் சில நட்புகள். தனிப்பட்ட செய்திகளை அனுப்பி 'எப்போ எழுதப்போறே, எப்போ எழுதப்போறே'ன்னு  விசாரிச்சாங்களா....   ஹாஹா.... நமக்கு இப்படி ஒரு வரவேற்பான்னு.... எழுத ஆரம்பிச்சுருக்கேன்.  
பயணத்தின் ஆதியோடந்தமா ரொம்ப விஸ்தரிப்பு இல்லாம எழுத நினைச்சுருக்கேன். கடவுள் உங்களைக் காப்பாற்றுவாராக !

என்னதான் கவனமா இருக்கோம் என்றாலும் அவசரத்தில் சிலபல குழப்பங்கள் ஏற்படத்தான் செய்கிறது, இல்லை?

உடல்நலக்குறைவு காரணம், போன வருஷம் ஆகஸ்ட்டில் போக வேண்டிய இந்தியப்பயணத்தைக் கடைசி நாளில் ரத்து செய்யும்படி ஆச்சுன்னு ஏற்கெனவே புலம்பி இருந்தேன். 

விசேஷ மருத்துவரைக் கண்டு அதுவரை நடந்த சிகிச்சையின் நிலையைப் பற்றி விசாரிச்சப்ப,  'ரொம்ப மெதுவாகத்தான்  குணம் தெரியும்.  அடுத்த ஆறு மாசம் கழிச்சு, உங்களை மீண்டும்  சந்திப்பேன்' என்றார்.   அப்படியானால்   பயணம் போகலாமான்னு கேட்டதும், 'போகலாம். மறக்காமல்  வலிநிவாரணி மருந்துகளை சரியான நேரத்துக்கு எடுத்துக்கணும்'னு சொன்னார்.

 வேறுவகையான சிகிச்சை முறைகளைப் பின்பற்றலாமான்னு இன்னுமொரு கேள்வி.  என்ன முறைன்னு  அவர் முழிச்சதும், ஆயுர்வேத சிகிச்சைன்னார் நம்மவர்.  பிரச்சனை இல்லைன்னு பதில் வந்தது.  (ஆறு மாசம் கழிச்சுதான் அடுத்த சந்திப்பு. அதுவரை என்னவாச்சும் செஞ்சுக்கோ.... )

வீட்டுக்கு வந்ததும், சிங்கப்பூர் ஏர்லைன்ஸ் ஸ்பெஷல் ஏதாவது இருக்கான்னு பார்த்த நம்மவர்,  ஜனவரி 29க்கு இந்தியா போறோமுன்னார். போகும்போது ரெண்டு நாட்கள் சிங்கப்பூரில் தங்கல்.  வழக்கம்போல் கோவில் பக்கத்தில் பார்க் ராயலில் ரூம் போட்டாச். திரும்பி வரும்போது   சிங்கப்பூரில் தங்கல் கிடையாது. நேராக ஊருக்குத் திரும்பிருவோம். மொத்தம் ஆறு வாரம்.   கோட்டக்கல் ஆர்யவைத்யசாலாவில் கால்வலிக்கு சிகிச்சை எடுக்கறோம். எல்லாம் தகவல்கள்தான். 


அந்த தேதிகள் சரிப்படுமா? எத்தனை நாட்கள் போகலாம்? இப்படி ஒரு பேச்சும் இல்லை. ராணுவநடவடிக்கையா இருக்குல்லெ ?  


ஒரு விநாடி ஙேன்னு முழிச்ச நான், 'அயோத்யா போறோமா இல்லையா ? ' ன்னு கேட்டேன். போறோம். அங்கே தரிசனத்துக்கு ஒரு ஏற்பாடு  இருக்கு. அதுலே  புக் பண்ணிடலாமுன்னார்.

தினமும் நூற்றைம்பது பேருக்கு தரிசன நேரம் ஒதுக்கித் தர்றாங்களாம்.  அதைப்பற்றி முதலில் நான் ஒன்னும் கேட்டுக்கலை. அப்புறம்தான் தெரிஞ்சது..... நாம் தரிசனம் செய்ய நினைக்கும் நாளுக்குச் சரியாப் பதினைஞ்சு நாட்களுக்கு முன்னால்  கோவில் வலைப்பக்கத்தில் போய்  பெயரைப் பதிவு செஞ்சுக்கணும். பெயர் மட்டுமா..... மற்ற தனிப்பட்ட விவரங்களும்தான் !  இந்திய நேரம் ராத்ரி 12 ஆனதும் அந்த சைட் திறக்கும்.  நாம் , நம்ம விவரங்கள் எல்லாம் அந்தந்தப் படிவத்தில் நிரப்பியதும்   நமக்கான நேரம்  கொடுக்கப்படும்.  ரொம்ப சிம்பிள் இல்லை !!!!


இல்லை.....  படிவம் நிரப்பிக்கிட்டு இருக்கும்போதே.... அன்றைய கோட்டா முடிஞ்சதுன்னு  செய்தி வந்துரும். இந்திய நேரத்துக்கும் நமக்கும் ஏழரை என்பதால்..... காலை ஏழேகாலுக்கெல்லாம் தயாரா கணினியும் கையுமாக உக்கார்ந்திருப்பார் நம்மவர். தினமும் இதுவே ஒரு போராட்டம்..... இப்படிப் பலநாட்கள் போனபின் ஒருநாள் நமக்கு இடம் கிடைச்சுடுத்து !!!!   ஃபிப்ரவரி  11 பகல்  3 முதல்  4.30 வரை !

இனி உள்ளுர் பயணத்துக்கு சென்னை- அயோத்யா  டிக்கெட் ஏற்பாடு செய்யணும்.  அதுவும் ஆச்சு. "தரிசன நாளுக்கு முன்னும் பின்னும்  ஒன்னும் ரெண்டுமா மூணு நாட்கள் அங்கே தங்கறோம். அங்கிருந்து கிளம்புவது  சாயங்காலம் நாலுதான், உனக்கு இன்னும் அரைநாள் கூட  ஷாப்பிங் செய்யலாம். "

இங்கே  நியூஸி வீட்டில் மற்ற வேலைகளுக்கு(முக்கியமாச் செடிகள்) உண்டானவைகளை ஒருவிதம் சரி ஆக்கினோம். வீட்டுக்குள் இருக்கும் செடிகளுக்கு மகளும், தோட்டத்துச் செடிகளுக்கு பக்கத்துவீட்டுக்காரர் மகளும் பொறுப்பு !

புதுசா ஒரு சங்கடம் இப்போ. வெளிநாட்டிலிருந்து இந்தியா போகும் நம் மக்கள், தங்கம் கொண்டுபோகும் அளவைக் குறைச்சுருக்காங்களாம்.  நாம் என்ன கிலோக்கணக்குலேயா வச்சுருக்கோம் ?  பெண்கள் 40 கிராம், ஆண்கள் 20 கிராம்தானாம். கம்மல், மூக்குத்தி, வளையல், தாலிச் செயின்தான் எப்பவுமே.... அதுக்கும் வச்சுட்டாங்க ஆப்பு....  இருக்கறதுலேயே தேசலா இருக்கும் ஒரு சங்கிலியை மாட்டிக்கிட்டுக் கிளம்பணும்.



கிளம்பும் மூணு நாட்களுக்கு முந்தி, சிங்கைத்தங்கல்  ரத்து. சீனப்புத்தாண்டு தினமாம்.  மக்கள் கூட்டம் அதிகமா இருக்கும் காலம். மேலும் ஏதோ ஒரு வைரஸ் தொற்று வந்துருக்காம். (நமக்குன்னு வருது பாருங்க இப்படியெல்லாம்....) நேராச் சென்னை போய் இறங்கறோமாம்.  சிங்கையில் தோழியையும், மற்ற நண்பர்களையும்  சந்திக்கும் வாய்ப்பு போயே போயிந்தி...... 


ரெண்டுநாள் முன்பே சென்னைக்குப் போறதால்....நம்ம லோட்டஸ் புக்கிங் எல்லாம் மாத்தவேண்டி இருந்தது. எல்லாம் ஒருவழியா ஆச்சு.
சிங்கையில் ட்ரான்ஸிட்லே கொஞ்சம் வேடிக்கை பார்த்துட்டு சென்னை விமானம் ஏறினோம். 
மறுநாள் காலையில் லோட்டஸ் மக்களின் 'எப்ப வந்தீங்க?'  என்றதுக்கெல்லாம்  மகிழ்ச்சியாப் பதில் சொல்லிட்டுப் பெருமாளைப் பார்க்கக் கிளம்பினோம். அவரையும் பார்த்து வருஷம்  ரெண்டேகாலாச்சே !  கோவில் வாசலில் சாமுண்டி ! சட்னு ஒரு முழம் மல்லிகையை எடுத்து நீட்டுன அன்பை மறக்கவே முடியாது ! இருவது வருஷப்பழக்கம். 
பெருமாளுக்கும் தாயாருக்குமாப் பூச்சரங்களை வாங்கிக்கிட்டு, மொத்தக்காசையும் கொடுக்காம ஒரு பகுதியைக் கடன் வச்சுட்டு,  கடன்வாங்கிட்டு முழிக்கறவனுடைய தரிசனமும் ஆச்சு. இனி பேங்குக்குப்போய் உள்ளுர் காசெடுத்தால்தான் கடனை அடைக்க முடியும் !

நம்ம கணக்கிருக்கும் பேங்க் பக்கத்தில்தான்  புதுசா வந்துருக்கும் பத்மாவதி தாயார் கோவில்.  முதல்முறையா அங்கேயும் போனோம்.  நாம் திருச்சானூரில் பார்க்கும் அதே தாயார் !!!  பரவசத்துடன் தரிசனம் ஆச்சு. 



களைப்பு ஒரு பக்கம் இருந்தாலும், நெருங்கிய தோழி, மறுநாள் ராஜபாளையம் போறாங்க என்பதால்  அவசரமாக ஒரு சந்திப்பும், இலவச இணைப்பாக  இன்னும் இரண்டு நெருங்கிய தோழிகளையும்  அன்றே போய் சந்தித்தோம். நாலு பெண்கள் சேர்ந்தால் எவ்வளவு கொண்டாட்டம் என்பது.... உங்களுக்குத் தெரியாதா என்ன ?  அதுவும் எழுத்தாளினிகள் வேற..... கூடவே  ரெண்டு செல்லங்களும் !

தொடரும்.......... :-)












Saturday, February 08, 2025

குழந்தையைக் காணோம்.....

இங்கே க்றிஸ்மஸ் தினத்தில் எந்த ஆரவாரமும் இல்லாமல் ஊரே ஜிலோன்னு கிடக்கும். டிவியில்   கமர்ஸியல் கூட  இருக்காது. எதாவது பக்திப்படமோ, ம்யூஸிகலோ தான் ! ஊர் முழுக்க கடைகண்ணிகள் மூடி,  எங்கியோ ஒரு டெய்ரி ஷாப் திறந்திருக்கும்.  கார் நடமாட்டமே கூட அவ்வளவா இருக்காது. 
சாயங்காலம் ஒரு அஞ்சுமணி போலக் கிளம்பி பீச்சுக்குப் போறோம்.      
மெட்ராஸ் தெரு தாண்டும்போது,  'கார்ட்போர்ட்' கதீட்ரலுக்குப் போயிட்டுப்போகலாமான்னார் நம்மவர். எனக்கொரு விரோதமும் இல்லை. எங்க கதீட்ரல் இடிஞ்சு விழுந்தபிறகு, திரும்பக் கட்டிமுடிக்கும்வரை தாற்காலிகமா ஒரு சர்ச் கட்டிவிட்டது, ஏஞ்சலிக்கன் சர்ச் நிர்வாகம். ஒரு ஜப்பானியக் கட்டடக்கலைஞர் கார்ட் போர்ட் வச்சுக் கட்டினார். அஞ்சு மில்லியன் செலவாகும்னு சொல்லி ஏழு மில்லியன் டாலருக்கு  இழுத்துருச்சு.
போற போக்கைப் பார்த்தால் இதுதான் நிரந்தரம்னு தோணும்.  பதினாலு வருஷம் ஆகப்போகுது இப்போ...... பழசைத் திரும்பிக் கட்டறோமுன்னு    வேலையை  ஆரம்பிக்கவே  வருஷங்களா இழுத்தடிச்சு, ரெண்டு வருஷத்துக்கு முன் தொடங்குன வேலையை, இப்போ  எதிர்பார்த்ததைவிட  பட்ஜெட் கூடுதலாகுதுன்னு  நிறுத்திட்டாங்க. ப்ச்.....அட்டைகோவிலுக்கு அஞ்சுமில்லியனான்னு அப்போ பதிவெல்லாம் எழுதியிருந்தேன்.

 இந்தச் சர்ச்சாண்டைதான் ஒரு கட்டடம் இடிஞ்சு விழுந்து, 115 பேர் இறந்துட்டாங்க.  இவர்களில் பெரும்பாலோர், ஜப்பான் நாட்டிலிருந்து இங்கே இங்லிஷ் படிக்கவந்த மாணவர்கள்.  அவுங்க வந்திறங்கிய மறுநாள்தான் நிலநடுக்கம். ப்ச்.... 
இப்ப அந்த கட்டடம் இருந்த இடத்தில் சின்னதா ஒரு தோட்டமும், புதுசா  க்ரே கலரில் அழுதுவடியும் நினைவுச்சின்னமும். நமக்குப் பார்க்கிங் அங்கே கிடைச்சதேன்னு எட்டிப்பார்த்தேன்.

 எர்த்க்வேக் மெமோரியல்னு ஆத்தங்கரையில் சுவர் எழுப்பி அங்கே, இறந்துபோன 185 நபர்களின் பெயர்களையும் சலவைக்கல்லில் பொறிச்சு வச்சுருக்கு சிட்டிக்கவுன்ஸில்.  என்ன ஒன்னு.....  கண்ணுலே விளக்கெண்ணெய் ஊத்திக்கிட்டுப் பூதக் கண்ணாடி வச்சுப் பார்த்தாலும் அந்தப்பெயர்களை நாம் வாசிக்கமுடியாது.....  எந்த மஹானுபாவரின் ஐடியாவோ...... மொத்தத்தில் கலர்சென்ஸ் இல்லாத நிர்வாகம். 
சாலையைக் கடந்து எதிர்வாடைக்குப்போனால்.....  கார்ட்போர்ட் சர்ச்சில் சர்வீஸ் நடந்துக்கிட்டு இருக்கு.  எனக்கு குடில் பார்க்கணும் என்பதால் முன்வரிசையாண்டை போய் உக்கார்ந்தேன்.  சர்வீஸ் நடக்கும் சமயங்களில் படம் எடுக்கக்கூடாதுன்னு விதிமுறை உண்டு. பத்துப்பதினைஞ்சு நிமிட் ஆனதும், போலாம் போலாமுன்னு  ஜாடை காமிச்சுக்கிட்டே இருக்கார் நம்மவர்.  பொறுத்துப்பொறுத்துப்பார்த்து, முடியலைன்னு பாதியில் கிளம்பி வந்துட்டோம். குழந்தையைப் பார்க்கலையேன்னு இருந்துச்சு. 

பீச்சுக்குப்போய் நியூஸி க்றிஸ்மஸ் மரம் என்ற பொஹுட்டுக்காவா மரத்தைப் பார்த்துட்டுக் கொஞ்ச நேரம்  ஒரு பெஞ்சில் உக்கார்ந்துட்டு வீடு வந்தோம். இந்த மரத்தின் மீது எனக்கொரு ஆசை பலவருஷங்களாக....  போனவாரம் ஒரு கார்டன் சென்ட்டரில் விற்பனைக்கு  வந்த சின்னச் செடியை வாங்கிவந்து கொஞ்சம் பெரிய தொட்டியில் நட்டுவச்சுருக்கோம்.  சின்னதா ஒரே ஒரு கொத்து பூ பூத்துச்சு. 
ரெண்டு நாளுக்கப்புறம் மத்யானமா,  இண்டியன் கடைக்குப் பலசரக்கு வாங்கப்போனப்போது, குழந்தையைப்பார்த்துட்டு வரலாமுன்னு போனால்.... எல்லாரும் அப்படிக்கப்படியே இருக்காங்க. புள்ளையைக் காணோம் !!! திக்னு ஆச்சு!





சர்ச் ஆஃபீஸ் வாலண்டியர்களைக் கேட்டால்.... என்னது...பிள்ளையைக் காணோமான்னு கூடச் சேர்ந்து திகைக்கிறாங்க. அடப்பாவமே......ன்னுட்டு. போலிஸ்லே கம்ப்ளெயின்ட் கொடுங்கோன்னுட்டு வந்தேன்.
வருஷம் முடியப்போகுதுல்லே ?  டிசம்பர் 30, மூலநக்ஷத்திரம். நம்ம ஆஞ்சுவுக்குப் பொறந்தநாள் ! கொஞ்சமா கேஸரி செஞ்சு பூஜை முடிச்சுட்டு, சம்பந்தி வீட்டுக்குக் கிளம்பினோம்.  அவுங்க வீட்டில் ஹனூக்கா பண்டிகை.  நம்ம நவராத்ரி போலத்தான் ஒன்பதுநாட்கள் கொண்டாடுவாங்க. குடும்பத்தினரின் வசதியை முன்னிட்டு,  அந்த ஒன்பது நாட்களில் வரும் வீக்கெண்டில்   எல்லோரும் வந்துருந்து கூடியிருந்து குளிர்ந்தேலோதான்.
அன்றைக்குத் திங்களாக இருந்தாலும்  விடுமுறைக் காலம் தானேன்னு  அழைப்பு.  நாம் கொஞ்சமா, துளி  மஸாலா சேர்த்து இண்டியனைஸ்ட் பாஸ்தா கொண்டு போனோம். சம்பந்தியம்மாவின் தகப்பனார், (குடும்பத்தில் பெரியவர், 97 வயசு)எல்லோருக்கும் ஆசி வழங்கினார். நம்ம இவன் கொள்ளுப்பேரன், பேத்திகளில் ஏற்றவும் இளையவன்! 



வருஷத்தின் கட்டக்கடைசி நாள், நடந்தவைகள் இந்த வருஷ முதல் பதிவில்  எழுதியிருக்கேன் !

விருப்பம் இருந்தால் வாசிக்க.... இங்கே க்ளிக்கலாம் !

https://thulasidhalam.blogspot.com/2025/01/blog-post.html

பயணத்தில் இருப்பதால்..... மற்றவைகளை அப்புறம் பார்க்கலாம்!


நன்றி ! வணக்கம் !