வசந்தம் வந்ததே!!!!!

அதிகாலையிலே உறக்கத்திலே இருந்து மனசு முழிச்சப்பவே 'இன்னைக்கு ஸ்ப்ரிங்கு'ன்னு
மண்டைக்குள்ளே ஒரே கூச்சல். ஆஹா செப்டம்பர் மாசம் முதல் தேதி. அதிகாரபூர்வமான
வசந்த காலம். குளிரை ஒரு மாதிரி சமாளிச்சாச்சு. இன்னும் ஆறு மாசம் கொண்டாட்டமே
கொண்டாட்டம்!!!!


இந்த வருசம் குளுர் பரவாயில்லை. ரொம்பவும் படுத்தாமப் போனதுபோல இருக்கு. ஒருவேளை
வெய்யிலைப் பார்த்தவுடனே பட்ட கஷ்டம் எல்லாம் மறந்துடுச்சோ? அதான் 'சூரியனைக் கண்ட
பனி போல'ன்னு உவமையெல்லாம் பெரியவுங்க ச்சும்மாவா சொல்லிவச்சிருக்காங்க?

எங்கே பார்த்தாலும் 'டாஃப்டில்' பூக்கள். நேத்துவரை $5.95க்கு வித்த இந்தப் பூங்கொத்து இன்னிக்கு
ஒரே ஒரு டாலர்! சூரியன் வந்தவுடவே, வீட்டுலேயும் வெளியேயும் செய்யவேண்டிய வேலைங்களும்
வந்துருச்சு. இனி ச்சும்மாச் சும்மா கணி ( இதுதான் சரியாமே?) முன்னாலே உக்காந்து ஓபி அடிக்கிற
தெல்லாம் நடக்காது(-:. மரியாதியா கொஞ்சம் வூட்டுவேலையும் செய்யணும்.

இந்தப் பக்கத்துலே 'ஓஸோன்'லே ஒரு பெரிய ஓட்டை இருக்காம். அமெரிக்கா தேசம் அளவு பெருசான
ஓட்டையாம். அதனாலே வெய்யில்லே இருந்து வர்ற UV கதிரோட பாதிப்பு கூடிடுதாம். பலபேருக்கு
ஸ்கின் கேன்சர் வந்துருது. ஒலகத்துலேயே இந்த ஸ்கின் கேன்சருக்கு மொத இடம் இங்கேதானாம்!

தொலைக்காட்சி, பத்திரிக்கை, இன்னும் வீட்டு வீட்டுக்கு வந்து போட்டுட்டுப் போற ஜங்க் மெயில்
எல்லாத்துலேயும் சகல இடத்திலும் விளம்பரம் வர ஆரம்பிச்சிருச்சு.

Slip Slop Slap And Wrap இதுதான் ஸ்லோகன்.

சன் ஸ்க்ரீன் க்ரீம் எப்படி, எந்த அளவு பூசிக்கணும், தலைக்குத் தொப்பி, கண்ணூக்கு கூலிங் க்ளாஸ்,
உடம்பை மூடிய உடை(!) இப்படின்னு அரசாங்கமும், கேன்சர் சொஸைட்டியும் சேர்ந்து சொல்லிக்கிட்டே
இருக்காங்க.

slipping on a shirt

sloping on sun screen

slapping on a hat

wrapping on sunglass

சூரியனைப் பார்க்க முடியாம ஊமை வெய்யிலா இருந்தாலும் இதையெல்லாம் காலையிலே 11 மணிமுதல்
மாலை 4 வரைக் கடைப்பிடிக்கணுமாம். முக்கியமா குழந்தைகளுக்கு இதைக் கட்டாயம் செஞ்சுவிடணும்.
அந்த வகையிலே ஆரம்பப் பள்ளியிலே டீச்சருங்க இதைக் கவனிச்சுச் செய்யறதைக் கட்டாயம் பாராட்டத்தான்
வேணும்.

எப்பவாவது 30 டிகிரி வெய்யில் வந்தாப் போச்சு, நம்மளைப் பாக்கறவங்கெல்லாம் சொல்றது, திஸ் ஈஸ் லைக்
இண்டியன் சம்மர்! நம்ம உடம்பும் இத்தனை வருசத்துலே, குளிருக்கு ஈடுகொடுத்துப் பழகிப்போய் இந்த முப்பதைத்
தாங்காதுன்னாலும் எல்லாருக்கும் வியாக்கியானம் சொல்லிக்கிட்டு நிக்கணுமான்னுட்டு, ஹி ஹின்னு அசட்டுச்
சிரிப்பு சிரிச்சிட்டுப் போகணும்!

நானும் போய் ஒரு தொப்பியை மாட்டிக்கிட்டு செடிகளுக்குத் தண்ணி ஊத்துற வேலையைப் பாக்கணும்.

இந்தப் பக்கம் இருக்கற ஆட்கள் எல்லாம், வசந்தம்&கோடை முடியுறவரைக்கும் கவனமா இருங்கோ!