ஆத்தா.....நானும் ஓட்டுப் போட்டுட்டேன்

எங்க நாடாளுமன்றத் தேர்தல் வரும் சனிக்கிழமை நடக்கப்போகுது. நவம்பர் 8. இப்போ இருக்கும் ஆளும் கட்சி ஹேட் ட்ரிக் அடிச்சதுபோல மூணாவது முறையாத் தொடர்ந்து ஜெயிச்சு இருக்கு. நியூஸி வரலாற்றில் கொஞ்சம் பின்னோக்கிப் போனாலே தெரிஞ்சுரும் ஆட்சிக்கு வரும் ஒவ்வொரு கட்சியும் மும்மூணு சுத்து சுத்திட்டுத்தான் போகுதுன்னு. இந்தக் கணக்கில் பார்த்தால் இப்ப வேற ஒரு கட்சிக்குத்தான் சான்ஸ் கூடுதல்.

மக்களுக்கு நன்மை செய்யறோமுன்னு பட்டியல் போட்டுக்கிட்டு இருக்கும் தொழிலாளர் கட்சி, ஒரு பக்கத்தையே ஊட்டி வளர்க்குது. அடுத்த பக்கம் சவலையாக் கிடக்குன்னு ஆதங்கப்படும் மக்கள் ஒரு பக்கம். இலவசமுன்னு நிறையத் தூக்கிக் கொடுத்துக்கிட்டு, கறவை மாட்டை ஒட்டக் கறக்குதே..... கன்னுக்குட்டிக்கு ஊட்டக்கூட ஒன்னும் விட்டுவைக்கலையேன்னு பலருக்கு எரிச்சல். கிடைச்சவரை லாபம்னு குளிர்காயும் கூட்டம் ஒரு பக்கம். பொறுத்துருந்து பார்க்கலாம். எதுவானாலும் சனிக்கிழமை ராத்திரி 12 மணிக்கு முடிவுகள் அநேகமா வந்துரும்.

ஓட்டுப்போடும் மக்களை, 'வாக்காளர் பட்டியலில் உங்க பேர் இருக்கான்னு பாருங்க'ன்னு நாலைஞ்சு மாசமா, டிவி, ரேடியோ, உள்ளூர் தினசரி, இலவசப் பத்திரிக்கை இப்படி எல்லா மக்கள் தொடர்பு சாதனங்கள் மூலமும் கூவிக்கூவிக் கூப்ட்டுக்கிட்டு இருக்காங்க. ஒரு இலவச தொலைபேசி எண்ணும் கொடுத்து அதுலே கூப்புட்டுப் பதிவு பண்ணிக்குங்க. இல்லேன்னா வலை விலாசம் கொடுத்து இணையம் வழியாவும் சேர்ந்துக்குங்கன்னு கெஞ்சிக்கெஞ்சிக் கூப்புடறாங்கப்பா.

பக்கத்து நாட்டுலே ஆஸியில் ஓட்டுரிமை உள்ளவங்க கட்டாயமா ஓட்டுப்போட்டே ஆகணும். இல்லேன்னா அபராதம் செலுத்தணும். எங்களுக்கு அப்படி இல்லை. ஆனா....கள்ள ஓட்டுப்போட்டா அபராதம் 40 ஆயிரம் டாலர்கள். நல்ல ஓட்டுப் போடவே ஆளில்லை. இதுலே கள்ள ஓட்டு வேறயா?


ஓட்டுப்போடும் முறைகளை ஆங்கிலம் தவிர 19 மொழிகளில் அச்சடிச்சு அனுப்பி இருக்காங்க. இந்திய மொழிகளில் ஹிந்தி, குஜராத்தி, பஞ்சாபின்னு மூணு இதில் இருக்கு! ( அன்னிக்குப் போலீஸ் ஸ்டேஷன் விஸிட் பண்ணப்பக்கூட 12 மொழிகளில் சேவை செய்யறோமுன்னு அச்சடிச்ச ஒரு புக் மார்க் கொடுத்தாங்க. அதில் ஹிந்தி இருக்கு.தமிழ் இல்லையான்னு கேட்டதுக்கு,பயந்துட்டார் போல. மன்னிக்கனும் என்பது போல் தலை அசைச்சார் அந்த போலீஸ்க்காரர். இனி ஆபத்துன்னு போலீஸைக் கூப்புடும்போது, 'பச்சாவ்...முஜே பச்சாவ்...'ன்னு கத்தலாமுன்னு நினைச்சுக்கிட்டு இருக்கேன்)

போனவாரம் தபாலில் நம்ம வீட்டுக்கே Easy Vote Card ன்னு ஒன்னு வந்துச்சு. இதை எடுத்துக்கிட்டு ஓட்டுப்போடப்போனல் 'சட்'னு வேலை முடிஞ்சுரும். இது இல்லாமையும் ஓட்டுப்போடப் போகலாம். அதுக்கு (ஒரு அஞ்சு நிமிசம் லைன்லே நிக்கணும்?) நேரம் எடுக்குமுன்னு இருந்துச்சு. அதுவுமில்லாம தேர்தல் அன்னிக்கு உனக்கு ஓட்டுச்சாவடி வரை போகமுடியலைன்னா கவலைப்படாதே.... இந்த வாரமே போய் ஓட்டுப் போட்டுக்கோ. இந்தந்த இடங்களில் உனக்காகவே நாங்க ஓட்டுச்சாவடி வச்சுருக்கோம். போய்ப் பாருன்னு இருந்துச்சு.

நாட்டில் எத்தனை கட்சிகள், யார் யார் எங்கே வேட்பாளர்ன்னு நாலு பக்கத்துக்கு விவரம் தபாலில் வந்துச்சு. லேபர், நேஷனல், க்ரீன் ன்னு இது மூணும் 65 இடத்துலே நிக்கறாங்க.மத்தக் கட்சிகள் எல்லாம் அவுங்கவுங்க வசதிப்படி. பதினெட்டு கட்சிகள் இப்போதைக்கு இங்கே:-)
Aotearoa Legalise Cannabis party ன்னு ஒன்னு 20 இடத்தில் நிக்குது!


எனக்காக இவ்வளோ செய்யும்போது, அந்த வசதிகளைப் பயன்படுத்திக்கலைன்னா எப்படி? மத்தியானம் இவர் சாப்பாட்டுக்கு வந்தப்ப, 'துளசி விலாஸில்' இட்லி சாம்பாரை ஒரு ப்ளேட் நல்லா அடிச்சுட்டுக் கிளம்பிப்போனோம்.

வாசலில் நின்னு ஒரு படம் புடிச்சுக்கலாமுன்னா...... கண்ணாடிக் கதவுக்கு அந்தப் பக்கமிருந்து ,வா வா....ன்னு வெத்தலை பாக்கு வைக்காத குறையா தலையை ஆட்டிக் கூப்புடறாங்க, போலிங் ஆஃபீஸர் அம்மா. பத்துமணி முதல் வெட்டுவெட்டுன்னு உக்காந்து, போரடிச்சுக் கிடந்தாங்கன்னு மூஞ்சே சொல்லுச்சு. உள்ளே போனதும் உக்காருங்க உக்காருங்கன்னு உபசாரம் வேற. படம் எடுத்துக்கவான்னு அனுமதி வாங்கிக்கிட்டு ஓட்டையும் போட்டுட்டு, க்ளிக்கிட்டும் வந்தோம்.


பதினெட்டுக் கட்சிகளில் 12 கட்சி நம்ம வார்டுலே நிக்குது. எண்ணிப்பார்த்தேன். ஆளுக்கு ரெண்டு ஓட்டு. ஒன்னு நல்ல ஓட்டு ஒன்னு கள்ள ஓட்டா? ..... ஒன்னு பதினெட்டுப் பட்டியில்....ச்சீச்சீ...பதினெட்டு கட்சியில் பிடிச்ச கட்சிக்கு. இன்னொன்னு 12 வேட்பாளர்களில் பிடிச்ச வேட்பாளருக்கு!




எதுக்காக தேர்தல் அன்னிக்கு என்னாலே ஓட்டுச்சாவடி வரமுடியலைன்னு ஏழெட்டு விளக்கம் ஒரு அச்சடிச்ச படிவம் இருக்கு. அதுலே விவரம் எழுதணும். அதுலே போட்டுருந்த காரணம் ஒன்னு வேடிக்கையா இருந்துச்சு. தேர்தல் நாளில் (சனி) ஓட்டுப்போடுவதை என் மதம் அனுமதிக்கலை, ரிலிஜியஸ் ரீஸன்ன்னு போட்டுருக்கு. அடக்கடவுளே!!!!!


வாக்கு சேகரிக்கும் பெட்டி வெறும் அட்டைப்பொட்டி. இதுக்குப்போய் பூட்டு எதுக்குன்னு ச்சும்மாக் கிடக்கு!

ஆத்தா நான் ஓட்டு போட்டுட்டேன் ன்னு ஒரு ஸ்டிக்கர் வேற வச்சுருக்காங்க. நாமே ஒன்னை எடுத்து ஒட்டிக்கிட்டு வரவேண்டியதுதான். நெத்தி சின்னதா இருந்ததாலே சட்டையில் ஒட்டிக்கவேண்டியதாப் போச்சு:-)