போலீஸ் செல்லில் நான்.......

சின்ன அறை. ஸ்டெயின்லெஸ் ஸ்டீல் டாய்லெட், அதுக்கு மேலேயே சுவத்துலே பதிச்ச வாஷ் பேஸின்( எல்லாம் ஒரே யூனிட்டா பத்தவைப்பு ஒன்னுமில்லாமல் இருக்கு) காங்க்ரீட் மேடை, கட்டிலா இருக்க அதுக்குமேலே ஒரு ஃபோம் மெத்தை. பரவாயில்லை. நாட் பேட். என்ன ஒன்னு பாத்ரூமுக்கு மறைவு இல்லாததால் ப்ரைவஸி கிடையாது. உள்ளே கூரையில் பதிப்பிச்சு இருக்கும் லைட்டுக்கு ஸ்விட்ச் அறைக்கு வெளியில்.

ரெண்டு நாளைக்கு முன்னே ஆளும் கட்சிக்கான 'எத்னிக் லயஸன் ஆஃபீஸர்' இமெயிலில் விவரம் அனுப்புனாங்க, 'மறக்காதே'ன்னு. 'கவலையே படாதே...உள்ளே போக ஆர்வமா இருக்கு. ஆவன செய்வேன்'னு உறுதி அளிச்சேன். 'ஹேண்ட் கஃப் இல்லை'ன்னு அவுங்களும் பதிலுறுதி தந்தாங்க.

பத்து முதல் நாலுவரைன்னு மடலில் சேதி இருந்தாலும் விளம்பரம் எதையும் உள்ளூர் தினசரியில் பார்க்கலையேன்னு, காலையில் பத்துமணி போல தொலை பேசுனேன்.

'டூ யூ ஹவ் அன் ஓப்பன் டே டுடே?'

'எஸ். வீ டூ. பிட்வீன் 10 & 4 யூ ஆர் மோஸ்ட் வெல்கம்'
(என்னை உள்ளே பிடிச்சுப்போட இவ்வளோ ஆர்வமா?)
சனிக்கிழமையாச்சே. கோவிலுக்குப் போயிட்டு, நல்ல 'அறை'யாக் கிடைக்கணுமுன்னு வேண்டிக்கிட்டு அப்புறம் 'செல்'லுமிடத்துக்குச் 'செல்' லலாம். சரியா ஒரு மணிக்குப் போய்ச் சேர்ந்தேன். ஒரு ப்ளாக் முழுசும் தெருவுலே குறுக்கா 'போலீஸ் எமர்ஜென்ஸி'ன்னு டேப் கட்டி வச்சுருந்தாங்க. அதிகாரம் உன்வசம் இருக்கும்போது ஊரையே வளைச்சுக் கட்டினாலும் யார் என்ன செய்ய முடியும்?

நடுத்தெருவுலே நாலைஞ்சு கூடாரம் அடிச்சு வச்சுருக்கு. எல்லாம் வெளியேதான் விளக்கம். உள்ளே போகமுடியாதுன்னு கோபால் சொன்னார். யாரையாவது ( உங்களைன்னு படிக்கணும்) அடிச்சுட்டாவது, உள்ளே போகத்தான் போவேன்.....

முதல் கூடாரத்தில் டார்ச் லைட் வச்ச கைத்தடியுடன் ஒரு போ.ஆ(போலீஸ் ஆஃபீசர்) ரெண்டு சூட்கேஸ் திறந்து வச்சுருந்துச்சு. உள்ளே..... கட்டுக்கட்டாப் பணம்? ஊஹூம்.... வெறும் கம்ப்யூட்டர் மானிட்டர். மேற்கூரை இப்படி உசரமான இடங்களில் இருப்பதைப் பார்க்கும் சாதனம். கைத்தடியில் ஒரு சின்னக்கெமெரா. அது பார்க்கும் இடங்களைத் துல்லியமாப் பொட்டி காமிக்குது. இன்னொன்னு எக்ஸ்ரே மெஷீன். அங்கங்கே கேட்பாரற்றுக் கிடக்கும் பெட்டிகளில் உள்ளே குண்டு எதாவது இருக்கான்னு பார்க்க நாயெல்லாம் வேணாம். இதைப் பெட்டிக்கு வெளியில் வச்சாவே உள்ளே இருப்பது எல்லாம் பளிச்.
வெளியே ஒரு செவ்வகப்பெட்டி நிறைய அடுக்கடுக்காய்ப் பல கருவிகள். பூட்டு ரிப்பேர்க்காரர் வேணாம். பூட்டு முதல் இரும்புக் கதவு வரை எதைவேணுமுன்னாலும் திறந்துக்கலாம் ஓப்பன் சிஸமே.........திருடனும் ஒன்னு வாங்கி வச்சுக்குவானோ?


அடுத்த கூடாரம் கொலை, விபத்து இத்யாதிகள். அதுக்கு அடுத்துக் கைரேகை பார்ப்பது. அஷ்டமத்துச் சனி இப்போ எங்கேன்னும் கண்டுபிடிக்கலாமோ? சின்னப் பசங்க கூட்டம் நெரியுது( நம்ம வழக்கப்படி நாலு பேருக்கு மேல் நின்னால், கூட்டம் என்று கொள்ளணும்) பசங்க தங்களுடைய பெயர் எழுதுன காகிதத்தில் ரேகை பதிஞ்சு எடுத்துக்கிட்டு போகுதுங்க. ரெண்டு பெ.போ.அ.(பெண் போலீஸ் அதிகாரி) உதவி செஞ்சுக்கிட்டு இருந்தாங்க. கையில் இருக்கும் மசியைத் துடைக்க ஸ்ப்ரிட் கலந்த டிஷ்யூ எல்லாம் கொடுத்து எங்கள் கைகள் கறைபடியாமல் பார்த்துக்கிட்டாங்க! பசங்க பூந்து வெளையாடிக்கிட்டு இருந்துச்சுங்க. வாண்டட் அறிவிப்புலே நூறுவயசு அம்மாவை வரைஞ்சு வச்சது ஒரு குட்டிப்பொண்ணு. குற்றம்: டிவி பார்ப்பது!
பசங்க கூட்டம் அதிகமா இருந்த இந்தக் கூடாரத்தில் மயக்கமருந்து , P ன்னு 'செல்லமாச் சொல்லும்' methamphetamine,அதோட வரலாறு, அதைத் தொடர்ந்து பயன் படுத்துறவங்க உருவம் எப்படியெல்லாம் பயங்கரமா மாறிக்கிட்டு வருதுன்னு எல்லாம் படங்கள் வச்சுருந்தது பாராட்டப்படவேண்டியதுதான். வெறும் ஆபத்து, கூடாதுன்னு சொல்றதைப் படங்களால் விளக்கினால் வளரும் பிஞ்சுகளுக்கு மனசுலே பதிஞ்சுபோயிரும்தானே?




சுத்திவரக் கம்பிவலைத் தடுப்புப் போட்டு போலீஸ் ட்ரெய்னிங்ன்னு மேலே ஏறி குதிச்சு, சின்ன பொந்தில் ஊர்ந்து வெளியே வந்து ஓடின்னு பிள்ளைகளுக்குப் பயிற்சி. செஞ்சு முடிச்சவங்களுக்கு பேட்ஜ், ஸ்டிக்கர்ன்னு பரிசு. அந்தப் பகுதியில் இருந்த பெண் போலீஸிடம் கொஞ்ச நேரம் பேசிக்கிட்டு இருந்தேன். உள்ளே ஸ்டேஷனில் போய்ப் பார்க்கும் வரிசையில் கோபாலை நிக்க வச்சாச்சு. எட்டுவருசமா வேலை செய்யறாங்களாம். எத்னிக் மவொரி, பஸிபிக் தீவுகள் மக்கள் தொடர்பா வேலை பார்க்கணுமாம். முக்கியமா குடும்பப் பிரச்சனைகள். பெண்களுக்கெதிரான வன்முறைகள். வேலை பிடிச்சுதான் இருக்காம். பெண்களுக்கு மறைமுகமா நடக்கும் கொடுமைகளைக் குறைக்கணுமுன்னு நினைக்கிறாங்களாம். இவுங்க போலீஸ் துறையில் பெண்களுக்கு எதிரா எதாவது நடக்குதான்னு கேட்டேன். இல்லையாம். எல்லாரும் பெண்களை நல்லமுறையில்தான் நடத்தறாங்களாம்.

சாப்பாடு எல்லாம் கடைசிக் கூடாரத்துலே ஏற்பாடு செஞ்சுருக்கோம். சாப்பிட்டுட்டுப் போங்கன்னு உபசாரம்வேற செஞ்சாங்க. 1935 வது வருசம்தான் பெண்களைக் காவல்துறையில் சேர்க்கணுமுன்னு அப்போ ஆட்சியில் இருந்த தொழிலாளர் கட்சி தீர்மானிச்சது. ஆனாலும் ஆறு வருசம் கழிச்சுத்தான் 10 பெண்களைத் தேர்ந்தெடுத்து, பெண்களுக்கு எதிரான குற்றங்களைப் புலனாராய்வு செய்யும் பகுதிக்கு அனுப்பிப் பயிற்சி கொடுத்தாங்க. முக்கியமா இரவு நேரங்களில் ரொம்ப லேட்டா ஊர்ச்சுத்தும் இளம் பெண்களை, ஆபத்துகளில் இருந்துக் காப்பாத்தவேண்டி. உலகப்போர் காரணம், டவுன்களில் அமெரிக்கன் படைவீரர்கள் நடமாட்டம் அதிகம் இருந்த காலக்கட்டமாம்.

ஆரம்ப காலங்களில் பெண்களுக்குன்னு சீருடை கூட இல்லையாம். அரெஸ்ட் செய்யும் அதிகாரமும் இல்லையாம். குற்றம் நடக்கும் இடத்தில் இருந்தாலும், கூட ஒரு ஆண் போலீஸ் இருந்தால்தான் குற்றம் செய்பவரை அரெஸ்ட் செய்ய முடியுமாம். (அடக் கடவுளே) அதுக்குப்பிறகு 1952 இல் சீருடைகள் கொடுத்து, அதிகாரமும் கொடுத்தாங்களாம். அதுக்குப்பிறகு 4 வருசம் கழிச்சு 1956 முதல் பயிற்சி வகுப்புகள் ஆணுக்கும் பெண்ணுக்கும் ஒன்னுபோலவே ஆச்சுதாம். காவல்துறையில் இப்போதைக்கு பெண்கள் 16 சதமானம்.

காவல்துறைக்கு நாய்களைப் பயிற்றுவிப்பது இப்போ ஒரு 52 வருசமா இருக்கு. இங்கிலாந்தில் போலீஸ் நாய்களுக்குக் கொடுக்கும் பயிற்சியைக் கத்துக்கிட்டு 1956 லே மிஸ்கா என்ற பேருடைய முழுப்பயிற்சி பெற்ற நாயையும், இன்னும் 3 இளவயது நாய்களையும் கப்பலில் கூட்டிக்கிட்டு வந்தார் சார்ஜெண்ட் ரெய்லி என்றவர். கப்பலில் வரும்போதே விவகாரமாகி இங்கே வந்து இறங்கும்போது 12 நாய்க்குட்டிகள் எக்ஸ்ட்ராவா ஆகிப்போச்சாம். அதுதான் முதல் டாக் ஸ்க்வாடு:-))))

வரிசையில் நிக்கும் மக்களுக்குப் போரடிக்காம இருக்க டைம் பாஸுக்குன்னு தீனியாக் குக்கீஸ் கொண்டுவந்து கொடுத்துக்கிட்டு இருந்தாங்க. பார்ச்சூன் குக்கீஸ்:-)))) ரவுடியை எப்படிப் போலீஸ் பிடிக்குதுன்னு ஒரு காட்சி. தமாஷா இருந்துச்சு. உடையாத பாலிகார்பொனேட் தலைக்கவசம், உடல்கவசம் எல்லாம் நானும் போட்டுப் பார்த்தேன்:-))))

குற்றவாளிகளை அடையாளம் காட்டும் லைன் அப் ரூம், பார்வையாளர்கள் சந்திக்கும் இடம் எல்லாம் பார்த்தோம். கோபாலை லைன் அப் ஸ்டேஜில் நிக்கவச்சேன்:-))))


டைனிங் ஹால் முழுசும் காங்க்ரீட்டால் ஆன பெஞ்சுகளும் மேசைகளும். ரெண்டு மூணு வீடியோ கெமெரா பொருத்தி இருக்கு கண்காணிப்புக்கு. அங்கே இருந்த ரெஸ்ட் ஏரியாவில் எங்கே பார்த்தாலும் சுவரில் எழுதி வச்சுருக்காங்க.
ஆறடி அகலக் காரிடோர். ரெண்டு பக்கமும் அறைகள் உள்ள செல். காங்க்ரீட் (கட்டில்) மேடை. பதிவின் முதல் பாராவை ஒரு முறை பார்த்துக்குங்க.
கதவின் மேல் பாகத்தில் கம்பிகள் இருக்கு. ஆனால் தொட்டு எண்ண முடியாமல், கையால் பிடிச்சுக்கிட்டுப் போஸ் கொடுக்க முடியாமல் உடையாத ஃபைபர்க்ளாஸ் தகடை உள்பக்கம் பொருத்தி இருக்காங்க.
அங்கேயும் சுவரில் எழுத்தோ எழுத்து. மனசில் உள்ள அழுத்தம், எரிச்சல், ஆத்தாமை, கோபம் இதுக்கெல்லாம் வடிகால் இந்த மாதிரி எழுதி வைக்கறதுதானாம். இதை ஒருவிதத்தில் கண்டுக்காம இருப்பதுமாதிரி ஊக்குவிப்பாங்களாம். 'அடங்கட்டுமுன்னு'????
எழுத மார்க்கர், ஃபெல்ட் பென் எல்லாம் ஏதுன்னு கேட்டதுக்கு 'மர்மச் சிரிப்பு' சிரிச்சாங்க அந்த பெண் போலீஸ்:-))))

சிலசமயம். கஸ்டடியில் இருக்கும்போது தற்கொலைன்னு சேதிவருதே அது எப்படின்னு விசாரிச்சோம். ஆபத்துன்னு நினைக்கும் எல்லாப் பொருட்களையும் கழுத்துலே இருக்கும் நெக்லேஸ், பைஜாமா நாடா, காதணி இப்படி நீக்கிட்டுத்தான் செல்லில் விடுவாங்களாம். ஆனாலும் மெத்தைக்குப் போட்ட உறையையோ, போட்டுருக்கும் துணிகளைக் கிழிச்சோ டாய்லட்டைச் சுத்திக் கட்டி, அசம்பாவிதம் நடந்துருதாம். அதனால் இப்ப கொஞ்சம்கூட கூரான பாகம் இல்லாத கழிவறைச் சாதனம், கிழிச்சாலும்கூடக் கிழியாத துணின்னு கொடுக்கறாங்களாம். (இங்கே நியூஸியில் மரண தண்டனை கிடையாது)
கார் விபத்து நடந்து நொறுங்கிப்போன வண்டி ஒன்னு பார்வைக்கு இருந்துச்சு. பக்கத்தில் ஆம்புலன்ஸ். அதில் உள்ள வசதிகள்ன்னு ஒன்னொன்னாப் பார்த்துக்கிட்டுப் போகுது கூட்டம். விபத்துக் காட்சி ஒன்னைப் படம் எடுத்து வச்சுருந்தாங்க. பார்த்ததும் நெஞ்சு அப்படியே நின்னுபோச்சு. சம்பவம் நடந்த இடம் நம்ம வீட்டுப் பக்கம்!!!!

சுமைகளை அளவுக்கதிகமா ஏத்திக்கிட்டுபோறாங்கன்னு தெரிஞ்சா எடை எவ்வளவுன்னு உடனடியாப் பார்க்க தட்டையான ஸ்கேல் வச்சுருந்துச்சு. அதுலே கோபால் நின்னு பார்த்தார். 'நான் நிக்க மாட்டேன். என் எடை ஒரு ரகசியமுன்னு அந்த போலீஸ்காரர்கிட்டே சொன்னதுக்கு, லேடீஸுக்கு மன்னிப்பு உண்டுன்னு சிரிச்சார். போலீஸுக்கு நிக்காம ஓடும் வண்டிகளை நிறுத்த முள்கம்பித் தகடை எப்படி வீசி எறிஞ்சு டயர்களைப் பஞ்சர் பண்ணறதுன்னு காமிச்சார் ஒருத்தர். ஆனாலும் சில கில்லாடிகள் நிறுத்தாம பஞ்சர் ஆன டயரோடு 100 கிலோமீட்டர்வரை போயிருக்காங்களாமே!!!! (நெசமாவா???)

நேத்துமட்டும் 7000 பேர் வருகைன்னு இன்னிக்கு போலீஸ் வலைப்பக்கத்துலே போட்டுருந்துச்சு. கூட்டம் வரும் இடத்துலே தேவைப்படும் மக்களுக்காக செளகரியம் செஞ்சுவச்சதையும் சொல்லணுமுல்லே!

போலீஸ் வேலைக்கு இன்னும் ஆள் வேணுமாம். முக்கியமாப் பெண்கள் காவல்துறையில் சேரணுமுன்னு எல்லா இடங்களிலும் அறிவிப்பு இருந்துச்சு.
ஃபார்ச்சூன் குக்கீஸை திறந்தப்ப, எனக்கு வந்தது,' Everyday will be different(if you join the NZ police). கோபாலுக்கு A great fortune awaits you. (Start on a $50k + package @ NZ Police) அப்படியா? முதல்லே போலீஸ் கார்லே உக்கார்ந்து பார்க்கணும்,அப்படியே துப்பாக்கியைச் சரியாப் பிடிக்க வருதான்னும் பயிற்சி எடுத்துக்கணும்.


இந்திய சினிமாக்களில் மட்டும் போலீஸ் ஸ்டேஷன்களையும், பெண்கள் புகார் கொடுக்கக்கூடத் தனியாப் போக முடியாத நிலையில் இருக்கும் பயங்கர வேலிகளே பயிர் மேயும் நடைமுறைகளைத் தினசரிகளில் படிச்சும் இருந்த எனக்கு, இந்த நியூஸி போலீஸ் ஓப்பன் டே ஒரு புது அனுபவமா இருந்துச்சு. எப்ப இருந்து இப்படி பொதுமக்களைக் கூப்பிட்டு, போலீஸ் நடைமுறைகளைக் காமிக்கறீங்கன்னு கேட்டேன். இதுதான் வரலாற்றிலே முதல் முறையாம்!
அப்பாடா............. இதுக்கு முந்தி, எனக்குத் தெரியாம ஏதும் நடந்துருக்குமோன்னு பயந்துட்டேன்:-))))))