ஹனிமூனுக்குத் தனியா.....

இங்கே பக்கத்துலே ஒரு தீவுக்கு நாலுநாளைக்குப் போறோம். நீங்களும் வர்றீங்களான்னு கேட்டாங்க தோழி. நினைச்சவுடனே கிளம்புற கதியிலா இருக்கேன்? மொதல்லே இவர் டூர் கிளம்பாம இருக்கணும். அப்புறம் ஆஃபீஸ்லே லீவு..... எல்லாத்துக்கும் மேலா கோகிக்கு இடம் கிடைக்கணும். சட்னு ஏர்லைன்ஸ் டிக்கெட் கிடைச்சாலும் கிடைக்குமே தவிர இவனுக்கு இடம் கிடைக்கறது கஷ்டம்(-:

ஆஸ்தராலியாவுக்கும் நியூஸிக்கும் இடையில் வடக்கே இருக்கும் நார்ஃபோ(ல்)க் தீவு. தனி அரசாங்கமுன்னு சொன்னாலும் ஆஸ்தராலியாவின் ஆதரவுடன் ஆஸிக் கரன்ஸியை வச்சுச் சமாளிக்கிறாங்க.

நியூஸியைக் 'கண்டுபிடிச்ச' கேப்டன் குக் தான் இதையும் கண்டு பிடிச்சார். வர்ற வழியில் இருக்கேன்னு பார்த்துவச்சுக்கிட்டார். பிரிட்டனில் இருக்கும் குற்றவாளிகளை வேற எங்கியாவது வச்சுத் தண்டிக்கறதுக்கு அவுங்களுக்கும் இடம்வேணுமே. எத்தனையோ இடங்களைக் காலனிகளாப் பிடிச்சாச்சு, இதுவும் இருந்துட்டுப் போகட்டும். என்னா கொறைஞ்சுறப்போகுதுன்னு....... 1788லே இந்தத் தீவைக் கவனிச்சுக்கன்னு ஒரு 7 பேர் பிரிட்டிஷ் காரங்க ஆஸியில் இருந்து வந்தாங்க. இவுங்களுக்குச் சேவகம் செய்ய 9 ஆம்பிளைங்களும் 6 பொம்பளைங்களுமா ஒரு 15 பேர். இந்தப் பதினைஞ்சும் ஆஸியில் தண்டனை அனுபவிக்கும் குற்றவாளிகள்.

இப்ப இங்கத்து மக்கள் தொகை 2114. எல்லாருக்கும் எல்லாரையும் தெரியும்!!!ஒரு பதினைஞ்சு சதுரமைல் தான் இந்தத் தீவு. ஒரு ஆறுகிலோ மீட்டர் தூரத்துலே இருக்கும் இன்னொருதீவும் இதைச் சேர்ந்ததுதான். (பக்கத்துவீடு?)

வேலையில்லாத் திண்டாட்டம் அறவே இல்லை!!!!! அனாவசியமா ராணுவம் ஏதும் வச்சுக்கலை. பாதுகாப்பு வேணுமுன்னா ஆஸ்தராலியா கொடுக்கணுமுன்னு அம்மா (மாட்சிமை தாங்கிய மஹாராணியம்மா) சொல்லிட்டாங்க.

காலநிலை அருமையா இருக்கு. சப் ட்ராப்பிகல் க்ளைமேட். வாழை, மா, பப்பாளி எல்லாம் எக்கச்சக்கம். முக்கிய தொழில் சுற்றுலாப் பயணிகளை வரவேற்று உபசரிச்சு ஆனந்தப்படுவது.

வாரத்துக்கு ரெண்டு ஃப்ளைட் ஞாயிறும் வியாழனுமா, இங்கே ஏர்நியூஸிலாந்து, ஆக்லாந்துலே இருந்து போய்வருது. 95 நிமிசப் பயணம். 660 மைல்தான்.

1856 வது வருசம் பக்கத்துலே இன்னொரு தீவில் Pitcairn Island கலகம் நடந்து அங்கே உயிரோடு பாக்கி இருந்தவங்க அஞ்சுவாரம் கப்பல் பயணம் செஞ்சு இங்கே வந்து தங்கிட்டாங்க. 193 பேர் கப்பல் ஏறுனாங்க. இங்கே வந்து இறங்கும்போது 194 பேரா இருந்தாங்க. ஒரு குழந்தை இந்தப் பயணத்துலே பிறந்துருச்சு:-)))) இவுங்க வந்ததை நினைவுகூரும் விதமா ஜூன் மாசம் 8 இங்கே தேசிய விடுமுறை.

எல்லாருக்கும் செய்யறதுக்குன்னு ஒரு வேலை இருப்பதால் குற்றங்களின் எண்ணிக்கை ரொம்பக் குறைவு. இதுவரை நடந்த குற்றமுன்னு சொன்னால் ரெண்டு கொலை. அதுலே ஒருத்தரை அவர் மகனே சுட்டுட்டார். (குடும்பத் தகராறு?) இன்னொருத்தரைக் கார் ஏத்திக் கொன்னுட்டாங்கன்னு போனவருசம் தீர்ப்பு ஆகி இருக்கு. இப்ப அது கொலை இல்லை. விபத்துன்னு மனு கொடுத்துருக்கு. பார்க்கலாம், என்ன தீர்ப்புச் சொல்லப்போறாங்கன்னு.

திருடு, பிக்பாகெட்ன்னு ஒன்னுமே இல்லை. திருடிட்டு வேற எங்கே தப்பிச்சுப் போக முடியும்? இல்லே..... திருடுன காசைத்தான் எங்கேன்னு போய் செலவழிக்கிறது?

ஆங்.... சொல்ல மறந்துட்டேனே....... இங்கே வருமான வரிகூட கட்டவேண்டியதில்லையாம். சுற்றுலாப் பயணிகள் மூலமாக வரும் வருமானமே அரசாங்கம் நடத்தப் போதுமானதா இருக்காம். வரிச் சுமையும் இல்லை. வேலை இல்லாமையும் இல்லை. க்ரேட்......!!!!

நார்போ(ல்)க் பைன் மரம் ரொம்பவே பேர் போனது. தீவு முழுக்க எக்கச் சக்கமா விளைஞ்சு நிக்குதாம். இந்த 'நாட்டு'க்கொடியிலும் இதுவே இடம் பிடிச்சிருக்கு. இங்கே நியூஸியிலேயும் இந்த மரக்கன்று வாங்கலாம்.

தோழி ஊரில் இல்லாத சமயம் தோழியின் ரங்கமணி நல்ல ஆஃபர்லே வந்துருக்கேன்னு பயணத்துக்கு புக் செஞ்சுட்டார். இவர் ஒரு ஒர்க்கஹாலிக். லீவு எடுப்பதே ரொம்ப அபூர்வம். சொந்த பிஸினெஸ். பயணம் போறதுக்கே பிடிக்காது. எல்லாருக்கும் உதவி செஞ்சாகணும். நண்பர்கள் இவருக்குச் சொல்லாம வீடு மாத்துனா அவ்ளொதான்.....வீடு மாத்தச் சாமான்செட்டுகளை எடுத்துப்போய் அங்கே இறக்கிவைக்க ரெடியா இருப்பார்.(இந்தக் காலத்துலே..... இப்படி ஒரு மனுசன்)

இவர் ஏற்பாடு பக்காவாச் செஞ்சுட்டார். ஒருவாரம் இவரோட வேலையைப் பார்க்க மாற்று ஆளை ரெடி பண்ணியாச்சு. ஃபுட்(food) டிஸ்ட்ரிப்யூஷன் என்பதால் நிறுத்தி வைக்க முடியாது. இன்னொரு ஜோடியும்( நம்ம நண்பர்கள்தான்) இவுங்ககூடப் போறாங்க. அந்த ரங்கு, தோழியின் ரங்குவின் நெருங்கிய நண்பர்.

இப்படித் தடாலடியாத் தன்னைக் கேக்காம பயண ஏற்பாடு செஞ்சுட்டாரேன்னு ஒரு பக்கம் இருந்தாலும், அட்லீஸ்ட் இப்பவாவது ரெண்டுபேருமாச் சேர்ந்து போக ஒரு வாய்ப்பு கிடைச்சுதேன்னு தங்குவுக்கு மகிழ்ச்சி. ரெண்டாவது தேனிலவா இருக்கட்டுமுன்னு நானும் சொல்லிவச்சேன்.



ஞாயிறு காலை 5.45க்கு இங்கிருந்து ஆக்லாந்துக்கு விமானம் ஏறணும். இது 70 நிமிஷப் பயணம். பிறகு அங்கேயிருந்து தீவுக்கு 95 நிமிஷம். சனிக்கிழமை இரவு இங்கே பயங்கரமான பனி. ஸ்நோ விழுந்து ஊரெல்லாம் வெள்ளை. ஷட்டில் புக் பண்ணி காலையில் 4.45க்கு ஏர்ப்போர்ட்ப் போய்ச் சேர்ந்தாச்சு.
கூட வரும் இன்னொரு ஜோடி ஏற்கெனவே செக் இன் செஞ்சுட்டுக் காத்துருக்காங்க. இங்கேயே ரெண்டு ப்ளைட்டுக்கும் போர்டிங் பாஸ் கொடுத்துருவாங்க. தோழியோட டிக்கெட்டு, பாஸ்போர்ட் எல்லாம் ஸ்கேன் செஞ்சு போர்டிங் பாஸ் கையில் வந்துருச்சு. இப்ப தோழியின் ரங்குவின் முறை.

ஸ்கேன் செஞ்சால்....... ஐயகோ...... பாஸ்போர்ட் காலாவதி ஆகி இருக்கு!!!!!!
ஞாயித்துக்கிழமையாப் போச்சு. இல்லேன்னா அவசரகாலக் கடவுச்சீட்டுன்னு 100 டாலர் கட்டி எடுக்கலாமாம். குறைஞ்சபட்சம் ஸ்கேன் செய்யுமுன் பார்த்திருந்தா வேற எதாவது செஞ்சுருக்கலாம்.ஒரு தடவை ஸ்கேன் செஞ்சுட்டா அது பதிவாகிரும். இப்ப ஒன்னும் செய்ய முடியாதுன்னுட்டாங்க.
தோழி மட்டும் இன்னைக்குப் போகட்டும். அடுத்த ப்ளைட்டுக்கு இவர் போய்ச் சேர்ந்துக்கலாமுன்னா..... அது வியாழக் கிழமைதான். ஏற்கெனவே செஞ்ச பேக்கேஜ் டீல் படி இவர் போய் இறங்கும் ப்ளைட்டில் தோழி கிளம்பி வந்துறணும்.

அப்புறம்?

தோழியை வற்புறுத்தி 'நீயாவது போயிட்டுவா இல்லேன்னா கட்டுன காசு பாழாகிருமு'ன்னு அனுப்பி வைச்சுருக்கார்.

இதனால் அறியப்படும் நீதி என்ன?

கடவுச் சீட்டுக் காலாவதியாகும் நாளைக் கணக்கு வச்சுப் புதுசு வாங்கிக்கணும்.


நம்ம வகுப்புக்கு ஒரு இன்ப அதிர்ச்சி:

இந்த வாரம் முழுசும் பயணம் செஞ்சு அலுத்துப்போன வகுப்புக் கண்மணிகளுக்கு ஒரு 10 நாள் விடுமுறை விட்டுருக்கேன். நல்லா ஓய்வெடுங்க.

நானும் அப்படியேப் பொடிநடையா ஃபிஜித் தீவுகளுக்குப் போயிட்டு வாரேன். அங்கே ஒரு கல்யாணம். ரங்குவும் கூட வருகிறார். ரெண்டு பேருக்கும் கடவுச் சீட்டு காலாவதி ஆகலை. ஆனால்....... ரங்குவின் சீட்டில் இன்னும் ஒரு தாள் (அதுவும் ஒரே ஒரு பக்கம்)தான் பாக்கி இருக்கு. பின்னே மாசம் நாலுமுறை நாட்டைவிட்டுப் போனா எப்படி?

எஞ்சாய் த ப்ரேக். பை பை. ஸீ யூ !!