யாம் செய்த 'யாம்'.

இன்னிக்கு 'நம்ம வகுப்புக் கண்மணிகளுக்காக என்ன சமைக்கலாமு'ன்னு யோசனையா இருக்கும்போது 'யாம் இருக்க பய(யா)ம் ஏன்?' ன்னு கேட்டுகிட்டேச் சிவந்த கண்ணோடு என்னைப் பார்த்துச்சு இந்த யாம்.

இது இங்கிலந்துப் பக்கம் இல்லையோ என்னவோ? நமக்குத் தெரிஞ்ச ஒருத்தர்,
(இங்கிலாந்துப்பெண்மணி) வீட்டுக்கு வந்தப்ப இங்கத்துக் காய்கறிகளைப் பத்திப் பேச்சுவந்துச்சு. அவுங்க வந்து ஒரு ரெண்டுவாரம்தான் ஆகி இருந்துச்சு அப்ப. இந்த 'யம் எனக்கு ரொம்ப யம்மியா இருக்கு'ன்னு சொன்னாங்க. முதன்முதலா இங்கேதான் இதைப் பார்த்தாங்களாம்.

New Zealand Yam ன்னு பொதுவா இங்கே சொன்னாலும் நம்ம விக்கியண்ணன் சொல்லும் பெயர் Oca.

நம்மூர்லே பச்சை மஞ்சள் இருக்கு பாருங்க ஏறக்கொறைய அப்படியான வடிவம். சிவப்பும் மஞ்சளுமான நிறம். உள்ளே இளமஞ்சளா இருக்கு.
இங்கே உள்ள மக்களுக்கு எதையெடுத்தாலும் அவனுக்குள்ளே(எவன்?) போட்டு 'பேக்' பண்ணித் தின்னணும். நமக்கு? எதையெடுத்தாலும் தாளிச்சுக்கொட்டிக் கறியாப் பண்ணிக்கணும்.

இது ரெண்டுக்கும் இடைப்பட்டதா எதாவது செய்யணுமுன்னு தோணிப்போச்சு. ஒரு நாள் 'நம்வழி'யில் செஞ்சதை மகளுக்குப் பரிமாறுனப்ப நல்லா இருக்குன்னு சொல்லிட்டாள். காய்கறிகள் எதைக் கொடுத்தாலும் 'யக்கி யக்கி'ன்னு சொல்லும் பெண் 'இதை யம்மி'ன்னு சொன்னதும் பிடிச்சுக்கிட்டேன்.

இவள்தான் நம் வீட்டின் சுவை 'மானி.'

இதுலே சிகப்பு நிறம் இல்லாமலும் இளமஞ்சளா ஒரு வகை சமீபத்தில் வர ஆரம்பிச்சிருக்கு. அதுக்குப்பெயர் கோல்டன் யாம்! தங்கத்தை விடமாட்டேங்கறாங்கப்பா:-))))

'கோல்டன் கூமரா'ன்னு இருப்பது என்ன தெரியுமா? நம்மச் சக்கரைவள்ளிக் கிழங்குதான். வெள்ளைத்தோலா(??) இருக்கும் மண்கலரில்:-)

சீஸன் வந்து எப்ப இது கிடைக்குதோ....அப்பெல்லாம் யாமே யாம். நம்ம ரெஸிபியைப் பார்க்கலாம் வாங்க.

யாம் :285 கிராம்

பச்சை மிளகாய் : 2

மிளகாய்ப்பொடி : அரைத்தேக்கரண்டி

கறிமாப் பொடி : 1 தேக்கரண்டி

உப்பு : அரைத் தேக்கரண்டி

பெருங்காயம் : ஒரு சிட்டிகை

எண்ணெய் : ரெண்டு தேக்கரண்டி

யாமைக் கழுவி எடுத்துக்கணும். மண்ணெல்லாம் இருக்காது.
தலை & கால் பக்கம் ( எது தலை எது காலுன்னே புரியாமல் இருந்தாலும்!!)
லேசாக் கத்தியால் சுரண்டிறணும்.

இப்ப வட்டவட்டமா அரை செ.மீ தடிமனில் ஸ்லைஸ் செஞ்சுக்குங்க.
ஒரு கண்ணாடிப் பாத்திரமோ இல்லை மைக்ரோவேவில் பயன்படுத்தக்கூடிய பிளாஸ்டிக் பாத்திரமோ எடுத்து அதில் நறுக்கிய துண்டங்களைப் போட்டு, ஒரு டேபிள் ஸ்பூன் தண்ணீர் தெளித்து 4 நிமிசம் மைக்ரொவேவ் அவனில் 100 % பவரில் வச்சு எடுத்துக்கணும். அடுத்து ஒரு ஃப்ரையிங் பேன் ( குழியான அடிப்பாகம் இல்லாமல் தட்டையா இருந்தால் ரொம்ப நல்லது) அடுப்பில் வச்சு(அடுப்பு எரிய வேணாம்) ரெண்டு டீஸ்பூன் எண்ணெய் சேர்த்து அதில் மி. & க.பொடிகளையும் உப்பு & பெருங்காயத்தையும், நறுக்கிய ப.மிளகாயையும் சேர்த்துட்டு அடுப்பை எரிய விடுங்க. சிம்மிலே இருக்கட்டும் தீ.

எண்ணெய் சூடாக ஆரம்பிச்சதும் அதில் சேர்த்த மசாலாக்களை ஒரு கிளறு கிளறிட்டு, வெந்த யாம் துண்டங்களை மட்டும் பரவலாக அதில் சேர்க்கணும்.
யாமில் கொஞ்சூண்டு தண்ணீர், பாத்திரத்தின் அடியில் இருக்கும். அது வேணாம். கொஞ்சம் கொளகொளன்னு வெண்டைக்காய்த் தண்ணீர் போல இருக்கும்.

அப்பப்பக் கொஞ்சம் பிரட்டிவிட்டால் போதும். துண்டங்களில் எல்லாம் மசாலா சரிசமமா ஒட்டிப்பிடிக்குதான்னு பாருங்க. லேசா பாத்திரத்தைக் குலுக்குனாவே போதும். அஞ்சு நிமிசத்தில் கொஞ்சம் கிரிஸ்ப்பா வந்துரும். அவ்வளோதான்.

அடுப்பு ஆஃப்.

இந்தக் கறிமாப்பொடி இல்லைன்னா குடி முழுகிறாது. இருக்கவே இருக்கு கடலை மாவு. மிளகாய்ப்பொடியை இன்னும் ஒரு அரைக்கரண்டி கூடுதலாச் சேர்த்துட்டு அதில் ஒரு டீஸ்பூன் கடலைமாவையும் போட்டால் ஆச்சு. எல்லாம் ஒரு லேசான மொறுமொறுப்பு வர்றதுக்குத்தான்.

இல்லே....எனக்குக் கறிமாப்பொடிதான் வேணுமுன்னு அடம் பிடிச்சா......

இதோ அதுக்குண்டான செய்முறை. (துள்சியின் வழக்கப்படி, "செய்யறது செய்யறோம் கொஞ்சம் கூடுதலாச் செஞ்சு, பாக்கியை ஃப்ரிட்ஜில் வச்சுக்கிட்டா வேற சமையலுக்கு ஆச்சு". இல்லை?)

கடலைப்பருப்பு : ரெண்டு மேசைக்கரண்டி

உளுத்தம் பருப்பு : உ. பருப்பு ரெண்டு மேசைக்கரண்டி

சீரகம் : 1 மேசைக்கரண்டி

மிளகு : 1 மேசைக்கரண்டி

விரும்பினால் மட்டும் : துளி எண்ணெயில் வறுத்த மிளகாய் வத்தல் 4

இது எல்லாத்தையும் வெறும் வாணலியில் நல்லா வாசனை வர வறுத்து, ஆறுனதும் பொடிச்சு வச்சுக்கணும்.

மிளகாய் வத்தல் வேணுமுன்னா ரெண்டு மூணு சேர்த்துக்கலாம். இதை மட்டும் கொஞ்சம் எண்ணெயில் லேசா வறுத்துக்கணும். வேலை மெனெக்கடணுமா இதுக்குன்னு? வேணாம். வேற சமயலுக்கு எதாவது தாளிக்க வேண்டி இருக்குமுல்லே....அப்ப நாலைஞ்சு காய்ஞ்ச மிளகாயைக் கிள்ளாம முழுசா அந்தத் தாளிப்பில் சேர்த்துட்டு, உடனே அதை மட்டும் தனியா எடுத்து வச்சுக்கிட்டா ஆச்சு.

பிகு: நம்ம வீட்டுச் சமையலில் காரம் உப்பு எல்லாம் வழக்கத்தைவிடக் கொஞ்சம் குறைவுதான். அதனால் உங்க இஷ்டத்துக்கு இவைகளை 'இப்போதைக்குச்' (ஆடும்வரை ஆட்டம்) சேர்த்துக்குங்களேன்:-)))