நவராத்ரி சுபராத்ரி

இந்த வருசத்து நவராத்ரி விழாவுக்கு நம்ம வீட்டுலே  மூணு அம்மன்கள் வந்துருக்காங்க.  சாந்த முக துர்கையைப் பார்த்துருக்கீங்களோ!

கொஞ்சம் மெனெக்கெட வேண்டிவந்துச்சு. பெண்களூரில் இருந்து  தங்கை சாந்தி (மச்சினர் மனைவி) வாங்கிக் கொடுத்த திருமுகங்கள். முதலில் பெரிய தேவியை மட்டும்  புடவையால் அலங்கரிச்சு நெருங்கிய தோழிகளுக்கு அனுப்பி குற்றம் கடியச் சொன்னேன்.

'உயரம் அதிகம்,  தொம்பரக் கூத்தாடி போல் தோளைஅகலமா விரிச்சு வச்சுருக்கள்.  முகம் சாந்தமா இருக்கு.  ஆனால் கைகளைக் காணோமே..... இதுக்கெல்லாம் உனக்கு ஏது நேரம்? 'இப்படி எல்லாம் வீசப்பட்டக் கேள்விகளுக்கு  ஒண்டிக்கு ஒண்டியா ஈடு கொடுத்து சாக்குபோக்கு பதில்கள் எல்லாம்  கொடுத்து ஒரு வழியா பெரிய அம்மனை வழிக்குக் கொண்டு வந்தாச்.  இன்னொரு அம்மன் கொஞ்சம் சுலபமாகவே  முடிஞ்சது. நம்மவரின் அறுபதுக்கு வச்ச கலசம் இருக்கே!  மூணாவதா நம்ம கும்பவாஹினி. நம்ம தளத்தின் வாசகர்களுக்கு ஏற்கெனவே பரிச்சயமானவள்.  உண்மையில் இவள்தான் மூத்தவள் இல்லையோ!

தாயாரும் பெருமாளுமா  புது உடைகள் மாற்றி முதல்படியிலே வந்து நின்னாங்க மரப்பாச்சிகள். கூடவே பூரணப்ரம்மம் அண்ட் குழலூதும் கிருஷ்ணன். இந்தப் பயணத்தில் நியூஸிக்கு வரணுமுன்னு அடம்பிடிச்சு வந்தவங்க இவுங்க:-)

ரெண்டாவது படியில் சரஸ்வதி,  புள்ளையார், லக்ஷ்மி இவர்களுடன், பள்ளிகொண்ட பெருமாள்,  லக்ஷ்மி ஹயக்ரீவர், நின்றவர், குழலூதும் கண்ணன் இவர்களுடன் ரெண்டு யானைகள்.

மூணாவதில்....  ஆனந்த நிலையம், புதுக்கல்யாண ஜோடி, இசைக்குழுவினர் இவர்களுடன் (வியட்நாம்)தர்மராஜா! ஆரஞ்சுக் கலர் பொம்மை, நம்ம  சென்னை வீட்டுப் பாப்பா நமக்குக் கொடுத்த ரிட்டர்ன் கிஃப்ட்!

நான்காவது படியில்.... பாகிஸ்தான் மார்பிள் பழத்தட்டு, யானைகள், கொஆலா, கிவிப்பறவை,  பஞ்சவர்ணக்கிளி, ஜப்பான் வராக ஜோடி, எறும்புத்தின்னி, குகனின் உதவியால் கங்கையைக் கடக்கும் ராமனும் சீதையும், லக்ஷ்மணனுடன்.

அஞ்சாவது  மட்டும் வழக்கம்போல் நம்ம தீம் ஆன யானையும் பூனையும் மட்டும் இல்லாமல் சின்ன மாற்றத்தோடு கல் கொலு.  கடவுள் அமைத்த இயற்கைக் கற்கள் வரிசை.

கடைசியாகத் தரையில்  மனிதன் செஞ்ச கண்ணாடிக் கற்கள்.கோலம். நந்தி தேவர். இரவில் தேவியர் விளையாடப் பல்லாங்குழி, தாயக்கட்டைகள்.
இவர்களுடன், நம்ம ஜன்னுவும் க்ருஷ்ணனும்.

இப்படியாக வெரி சிம்பிள் கொலு.

வாசக அன்பர்கள், நண்பர்கள்  அனைவருக்கும் நவராத்ரி விழாவுக்கான இனிய வாழ்த்துகளை துளசிதளம் தெரிவித்துக் கொள்கிறது.

நம்ம வீட்டுத்தாயாருக்கும் பெருமாளுக்கும் புது உடுப்பு!  ரெண்டுமுழ அகல ஜரிகை போட்ட பட்டுப்பாவாடை! (தாயார் கையால் ரெண்டு முழம்!)

அனைவரும் வருக, வருக!