அர்பன் விவசாயியின் அலட்டல்கள்.

காலம் யாருக்கும் காத்திருப்பதில்லைன்னு நம்மைவிட இந்த மரம் செடிகொடிகளுக்கு நல்லாவே தெரிஞ்சுருக்கு.  அதிலும் குறிப்பாக இந்தக் குளிர் காலம் முடிஞ்சு வசந்தகாலம் வருது பாருங்க.  அது என்ன கணக்கு வச்சுருக்குதுங்களோ!  இங்கே நியூஸியில் அஃபிஸியல் குளிர் காலம் ஆகஸ்ட் 31 முடியும். மறுநாள் செப்டம்பர் முதல் தேதி முதல் வசந்தம்.

எப்பவோ வாங்கி நட்டு வச்சுருந்த  பல்புகள் எல்லாம் வெளியே தலை காட்ட ஆரம்பிச்சுரும்.  அதிலும் டாஃபடில் என்னும் பூக்கள் இன்னும் கொஞ்சம் விவரமானதுகள்.  குளிர் முடியும் கடைசி ரெண்டு வாரங்களுக்கே   மஞ்சள் முகம் காட்டிக்கிட்டு நிக்கும். ஆகஸ்ட் கடைசி வெள்ளிக்கிழமை, இங்கே கேன்ஸர் சொஸைட்டி டாஃபடில் டேன்னு  ஊரின் பல இடங்களில்  புற்றுநோய் ஆராய்ச்சிகளுக்கு நிதி சேகரிப்பு வேண்டி ,  (செயற்கை) டாஃபடில் குவிச்சு வச்சுருப்பாங்க. அவுங்க  உண்டியலில்  கொஞ்சம் காசு போட்டுட்டால் நமக்கு ஒரு பூ கிடைக்கும். சட்டையில் குத்திக்கலாம். இந்த வசூல் எல்லாம் வாலண்டியர்கள் செஞ்சு கொடுப்பதுதான்.

எங்கூர் பொட்டானிக்கல் கார்டனில்  டாஃபடில் லான் என்றே ஒரு பரந்த  புல்வெளி உண்டு.  அங்கே கூட்டங்கூட்டமாய்  பூத்து நிற்கும் பூக்கள் சொல்லமுடியாத அழகு. இது நம்ம  வீட்டுப் பூ.  ஒன்னே ஒன்னு கண்ணே கண்ணுன்னு மலர்ந்து நிக்குது பாருங்க.

ஏர்லி ச்சியர்ஸ்ன்னு இன்னும் ஒரு வகை இருக்கு.  ஒரு தண்டில் ஆறு அல்லது ஏழு பூக்கள் கொத்தாக வரும்.  மணமோ..... மனதைப்பிடித்து இழுக்கும். மல்லிப்பூ வாஸம்.

இலையுதிர் காலத்தில், இந்த பல்புகளை வாங்கி நட்டு வச்சுட்டு மறந்து போகலாம். குளிர்காலம் முடிஞ்சு வசந்தம் வந்ததும் எல்லோரும் தலை நீட்டி  எட்டிப் பார்த்துருவாங்க. இந்த வருசம் ஏப்ரலில் நான் ஏர்லி ச்சியர்ஸ் பல்புகளை மட்டுமே வாங்கி நட்டேன். அடுக்களை  ஜன்னலில் இருந்து பார்த்தால் இப்படி இருக்கு !

இந்தப் பூக்களைப் பறிக்காமல் செடியிலேயே விட்டு வச்சாலும் சரி, இல்லே கட் பண்ணி ஃப்ளவர்வாஸில் வச்சாலும் சரி ஒருபத்து நாளைக்கு வாடுவதே இல்லை. நாந்தான் ஒரு தப்பு செஞ்சுட்டேன்.  பல்புகளை  மூணு பங்காப் பரிச்சு ரெவ்வெண்டு வார இடைவெளியில் நட்டுருந்தால்  பூக்கள் தொடர்ச்சியா ஒரு ரெண்டு மாசத்துக்கு வந்துருக்கும்.  எல்லாத்தையும் ஒரேடியா நட்டதால் தோட்டத்தில் நிறையப் பூக்கள் இருக்கு இப்போதைக்கு!

ஹையாசிந்த்ன்னு  ஒரு வகை. இதுவும் டாஃபடில்போல் ஊருக்கு முன்னாலே பூத்துரும். நல்ல மணமும் உண்டு.  நம்ம வீட்டுலே நாலு வருசமா  இருக்கும்  பல்புகளில் இருந்து  வருசாவருசம் தவறாமல் முளைச்சு வந்து பூத்துட்டுப் போயிருச்சு.  கடமை தவறாத கண்ணியம்!

செர்ரி ப்ளாஸம்  சீஸனும்  இப்போதான்.  சமீபகாலமா ஊரெங்கும்  செர்ரி மரங்களை நட்டு வச்சுருக்காங்க.  முந்தியெல்லாம்  எங்க ஹேக்ளி பார்க்கை ரெண்டாப் பிரிச்சுப் போட்டச் சாலையின் ஒரு பக்கத்தில் மட்டுமே இருக்கும். நம்ம பழைய வீட்டில்கூட ஒரு செர்ரி மரம் இருந்தது.  இந்த வகை மரங்கள்  வெறும் பூக்களுக்கு மட்டுமே.  தின்னும் செர்ரிப் பழம் இதுலே கிடைக்காது.

இந்த வசந்தத்துக்கு நாம் என்ன செஞ்சோமுன்னு பார்க்கலாம்.  முதல்மாசம் (செப்டம்பர்) முழுசும் உடம்பு சரியில்லாமப் போனதுடன், வெளியே தலை காட்டமுடியாதபடி தொடர்மழையும் குளிரும்  :-(   உருப்படியா ஒன்னுமே செய்யலை.

grow  bag ஒன்னு  வாங்கியது அப்படியே கிடக்கேன்னு  பிரிச்சுப் பார்த்தால்.....  அம்மாடியோவ்!   இதுக்கே  அஞ்சு பைகள்  பாட்டிங் மிக்ஸ் ( 40 லிட்டர் X 5 ) போடவேண்டியதாப்போச்சு !   தக்காளி, லெட்யூஸ் நட்டு வச்சுருக்கோம்.  செடிகளாகவே  வாங்குனதுதான்.

ECO Shopலே ஒரு பாத் டப் ஸ்டேண்டோடு கிடைச்சது. அதை வாங்கிவந்து  பாட்டிங் மிக்ஸ் ரொப்பி,  காலி ஃப்ளவர் (முதல்முறையாக)  சின்ன வெங்காயம், (இது ரெண்டும்   ரெடிமேட். குழந்தைச் செடிகளா வாங்குனது)  கூடவே ஒரு ஓரமா  Gherkins விதைகள்  போட்டுருக்கேன்.

நேத்துக் கடைக்குப்போனபோது கோபாலின் கண்ணில் வெண்டைக்காய் விழுந்துருச்சு.  மற்ற விதைகளைப்போல் இல்லாமல் ரெண்டு மடங்கு விலை. ஒரு  பத்துப்பனிரெண்டு விதைகள்கொண்ட பாக்கெட் இது.  ஆறு விதைகளை மட்டும் ஒரு தொட்டியில் நட்டு வச்சுருக்கேன். வருமான்னு தெரியலை.  விதைப் பாக்கெட்டிலும் நியூஸியின் வடக்குத் தீவில் மட்டும் முளைக்குமுன்னு படம்போட்டு வச்சுருக்கு. அப்ப ஏன் நம்மூர் கடைகளில் வச்சுருக்காங்க?

சமையலுக்கு வாங்கின பூசணியின்  விதைகளைப் போன சம்மரில் போட்டு வச்சுருந்தேன்.  அதுலே பூ பூத்து, ஒரு காய் கூட வந்துச்சு.  பிஞ்சாக இருக்கும்போதே   குளிர் வந்துட்டதால்  அப்படியே எல்லாம் கருகிப்போச்சு.  மார்ச் கடைசி வரை தாக்குப்பிடிச்சது பாவம்!  பாக்கி இருந்த விதைகளில் கொஞ்சத்தை இப்பவே தூவி விட்டுருக்கேன்.  பூ வந்தால் மார்கழிக் கோலத்துலே வைக்கலாம்!

குளிர்காலமா இருந்தாலும் கண்ணுக்குக் குளிர்ச்சியும் மனசுக்கு மகிழ்ச்சியையும் தரட்டுமேன்னு கடைகளில்  பூவோடு விற்கும் செடிகளை, குறிப்பாக  பாலியந்தஸ் வகைகளை   தட்டுக்கு ஒன்னா  அடுக்கி வைப்பது உண்டு.  இதுக்குன்னே ஒரு  மூங்கில் ஷெல்ஃப் வச்சுருக்கேன்.  வீட்டுக்குள்ளே கன்ஸர்வேட்டரியில் வைப்பதுதான்.

வருசத்துக்கு ஒரே பூ மட்டும் பூக்கும்  சாந்திச்செடி (Peace Lily)  இந்தமுறை அதிசயத்திலும் அதிசயமா ரெண்டு மொட்டுகளோடு வந்துக்கிட்டு இருக்கு.  பூத்து நிக்கும்போது  ரொம்ப  அழகா  இருக்கும்.   செடியிலேயே விட்டு வச்சால் பூவும் ஒரு மூணு வாரத்துக்குத் தாக்குப் பிடிக்கும்.

போனவருசம் நம்ம வெங்காயச்செடிகளில் பூக்கள் பூத்து  காய்ஞ்சு போனதும்  விதைகளை எடுத்து வச்சுருந்தேன்.  ஒரு பரிசோதனைக்காகக் கொஞ்சம் எடுத்து ஒரு தொட்டியில்  நட்டுவச்சதில்  புல்மாதிரி முளைச்சு வந்துருக்கு.

சமைக்க வாங்கி வச்சுருக்கும் வெங்காயங்களில்  சில  முளைக்க ஆரம்பிக்கும் பாருங்க.... அவைகளை அப்படியே நட்டு வைப்பதுதான் வழக்கம்.  அவைகளும் இப்போ நல்லாவே வளர்ந்து நிக்குதுகள்.

சமையலுக்கு வாங்கும்  காய்ஞ்ச மிளகாயில் இருக்கும் விதைகளையும் சின்னச்சின்ன தொட்டிகளில் விதைச்சுருக்கேன்.  வளர்ந்து  நாத்து பிடிச்சால் இடம் மாற்றி பெரிய தொட்டிகளில் நடணும்.

எங்கூர் மார்கெட்டில்  நாத்துகளே விலைக்கு வரும்.  ரெண்டு செடிகள்  இருக்கும்  சின்ன தொட்டிகள் ரெண்டு டாலர். கத்தரிக்காய், மிளகாய், வெள்ளரி எல்லாம் கிடைக்கும்.  ஆனால்  இன்னும் சரியான காலநிலை வரலை. அநேகமா அக்டோபர் கடைசியில்தான்  வருமாம்.


இன்னும்  அஞ்சு மாசம் வெயில் இருக்கும் என்ற அதீத நம்பிக்கையில் இன்னும் கொஞ்சம் செடிகளை நட்டு வைக்கணும். கிடைக்கும்  வகைகளைப்பொறுத்துதான் எல்லாமே!

விதைக்கிற காலத்தில் விதைச்சால்தான் அறுக்கிற காலத்துலே அருவாளைத் தூக்கமுடியுமாம்!  அதனால் கூடியவரை  விதைச்சு வச்சுருக்கோம்.

 பார்க்கலாம் எப்படி வரப்போகுது என்பதை!