டாக்டர்ஸ், கொஞ்சம் என் காலைக் கடிங்க...............( கம்போடியாப் பயணம் 11 )

"பத்து........"


"ம்..... நாலு"

"எட்டு"

" ஊஹூம்...நாலு"

"ஏழு....."

"அஞ்சு"

டீல் சரியாச்சு:-)

கேக்க அநியாயமா இருந்தாலும் பேரம் பேசும் ஆட்கள் மனநிலையைத் தெரிஞ்சுக்கிட்டு வியாபாரிகளும் ரெட்டிப்பா விலையைச் சொல்றாங்களே!

தங்கத்தாமரைகளைப் பார்த்த கையோடு 'ஓல்ட் மார்கெட்' என்னும் பகுதியில் ஒரு காஃபி ஷாப்லே இறக்கி விட்டார் 'வேன்' இப்ப மணி ஆறு. சரியா எட்டரைக்கு வந்து அறைக்கு எங்களைத் திரும்பக் கூட்டிட்டுப்போகணும். போகவர ரெண்டுக்கும் சேர்த்து மூணு டாலர். எதிர்வரிசையில் வந்து நிப்பேன்னு சொல்லிட்டு போனார்.
நல்லா நீட்டா இருக்கு இந்தக் கடை. ரெண்டு கப்புச்சீனோவுக்குச் சொல்லிட்டு வெளியில் நடைபாதையை அடைச்சுப்போட்டு வச்சுருக்கும் இருக்கைகளில் அமர்ந்து வேடிக்கை பார்த்துக்கிட்டு இருந்தோம். சிங்கை லிட்டில் இந்தியாப்பகுதி செராங்கூன் ரோடை நினைவுபடுத்து சில பழைய கட்டிடங்களோடு இருக்கேன்னு பார்த்தால் கண்னுக்கு நேரா எதிர்வரிசையில் லிட்டில் இண்டியான்னு ஒரு உணவகம்!
நம்ம பக்கத்துக் கடையிலே மொலுமொலுன்னு 'டாக்ட்டர்ஸ்' ரொம்ப பிஸியா பேஷிண்டின் பாதங்களைத் தின்னுக்கிட்டு இருந்தாங்க. டாக்ட்டர் ஃபிஷ் மஸாஜ்.

( என்னடா....இது இன்னுமா இந்தியாவுக்கு வரலைன்னு நினைச்சேன். என் 'மனமுகூர்த்தம்' இந்தப்பதிவு எழுதும் நாள் இங்கே சண்டிகர் நகரத்திலும் டாக்குட்டர் ஃபிஷ் வந்துட்டார். படம் பார்க்கவும்)
நாங்க சாலக்குடியில் இருந்தப்ப, தினமும் சாலக்குடி புழை(ஆறு)யில்தான் குளியல். துணிதுவைக்கப் போட்டுருந்த கல்லில் காலை ஆட்டாமக் கொஞ்சநேரம் உக்கார்ந்தாப் போதும். மீன்கள் வந்து காலை மெள்ளக் கடிக்கும். கிச்சுக்கிச்சு மூட்டுவதுபோல் சிரிப்பாவும் கூச்சமாவும் இருந்தாலும் காலை அசைக்கவே கூடாது. தண்ணீரில் ஊறிப்போய் இருக்கும் இறந்த செல்களை நாசூக்காக் கடிச்சு எடுப்பதில் மீன்கள் கில்லாடிகள்.
காஃபியை குடிச்சுட்டு அப்படியே காலாற நடந்து போனது பழைய மார்கெட்கள் இருக்கும் இடம். இந்த ப்ளாக் முழுசுமே கடைகள் நெரிபட்டுக் கிடக்குன்னால் எதிர்வரிசையில் ஆற்றையொட்டி இருக்கும் பெரிய கட்டிடத்தில் அடுக்கடுக்கா கடைகள் வரிசை. பழையகால மெட்ராஸ் மூர்மார்கெட்டை நினைவு படுத்துது.
நகைநட்டு, நினைவுப் பொருட்களைப் பார்த்துக்கிட்டே நடக்கும்போது திடீர்னு, கட்டிப்போட்ட நண்டுகள் மெதுவாக் காலை உதறிக்கிட்டு இருக்குதுகள். நடுப்பகுதி முழுசும் உணவுப்பொருட்கள் காய்கறிகள் மீன்வகைகள்ன்னு நாலுவரிசை. நாம் கொஞ்சம் லேட்டாப் போயிருக்கோம். சில கடைகளை மூடத்தொடங்கி இருந்தாங்க. அவுங்கவுங்க கடைகளைக்கூட்டிப் பெருக்கி, குப்பைகள், ப்ளாஸ்டிக் பைகளையெல்லாம் ஒழுங்கா சேகரிச்சு பெரிய பொதிகளில் கட்டி நீட்டா வைக்கிறாங்க.
துணிமணிகள், கைக்கடிகாரங்கள், செருப்புகள், ஆபரணங்கள், நவரத்தினக் கற்கள் கண்ணாடிச் சாமான்கள், பொம்மைகள், வெள்ளிமுலாம் பூசிய ப்யூட்டர் கப், மக், பொம்மைகள் இப்படி ஏராளம் நம்ம பங்குக்கு ஒரு கால் மடிச்சு உக்கார்ந்துருக்கும் யானை, மகளுக்கு சில வெள்ளி ஆபரணங்கள் வாங்கிக்கிட்டு கட்டிடத்தைச் சுற்றிப்போகும் கடைவீதிக்குப் போனோம். பேரம் எல்லாம் கால்குலேட்டரை வச்சுத்தான். அவுங்க அடிக்கும் நம்பரை எடுத்துட்டு நாம் நம்ம விலையை அடிப்போம். நாலுமுறை கால்குலேட்டர் இங்கும் அங்கும் போனபிறகு பேரம் படிஞ்சுரும்:-))))

அந்திநேரக் கடைவீதி கலகலப்பா இருந்துச்சு. நம்ம 'பால் த ஆக்டோபுஸ்' போல புண்ணியம் செய்யாத பாவிகள், கருவாடாக் காய்ஞ்சு சுவற்றில் உக்காந்துருக்காங்க. ஒரு கடையில் தேள், பாம்பெல்லாம் பாட்டில் எண்ணெயில்! படத்தை விரிச்சு வச்சுருக்கும் பாம்பு! இந்த திரவத்தை என்ன செய்வாங்கன்னா.... குடிப்பாங்களாம்:(

உணவுக்கடைகள், ஓவியங்கள், துணிமணிகள், கைப்பைகளையெல்லாம் கடந்து போகும்போது ஆங்கோர் நைட் மார்கெட் கண் விழிக்க ஆரம்பிச்சது. மாலை 4 மணிக்கு இதைத் திறப்பாங்கன்னாலும் ஜிலுஜிலுன்னு விளக்கு வைக்கும் நேரம்தான் அழகு. இங்கே இரவு பனிரெண்டுவரை கடைகள் இருக்குமாம்.

மார்கெட் கட்டிடத்தில் பார்த்த அதே வகை சாமான்கள். ஆனால் இன்னும் விலை கொள்ளை மலிவு! அடாவடியா பேரம் பேசுனாலும் படிஞ்சுருது. ஆனால் நமக்கும் நியாயமுன்னு ஒன்னு இருக்குல்லே? டாலரை இந்திய ரூபாயா மாத்தி, இன்னொருக்கா நியூஸி டாலரா மாத்தி மனக்கணக்குப் போட்டுறமாட்டேனா என்ன? பார்கள் எல்லாம் கூட்டம் சேர ஆரம்பிச்சு.... எங்கே பார்த்தாலும் வெள்ளைக்கார சுற்றுலாப்பயணிகள். வறுத்த மோர் மிளகாயை வித்துக்கிட்டு வந்த பெண்ணிடம் அது என்னன்னு கேட்டேன். ஒன்னை எடுத்து வாயில் போட்டு 'கரக்'ன்னு கடிச்சு மென்னுக்கிட்டே என் கிட்டே கொண்டுவந்து காமிச்சாங்க...............அய்ய.............கரப்ஸ் நொறுக்ஸ் :(
கொஞ்சநேரம் சுத்திப்பார்த்துட்டு 'பனானா லீஃப்' என்ற கடையில் ராச் சாப்பாட்டை வாங்கிக்கிட்டு காஃபி ஷாப்புக்கு எதிரில் போய் நின்னா..... நமக்கான டுக்டுக் அங்கே ஏற்கெனவே வந்து காத்துருக்கு! உணவகங்கள் நடைபாதையில் அங்கங்கே பெரிய ஸ்க்ரீன் வச்சு உலகக் கோப்பைக் கால்பந்தாட்டம் காமிச்சுக்கிட்டு இருக்காங்க.

ஹொட்டேல் வாசலுக்கு வந்து இறங்கினா நம்ம ஸ்மெய் காத்துக்கிட்டு இருக்கார். சாயந்திரம் நாம் வெளியே கிளம்புன சமயம் நம்மைக் கூட்டிக்கிட்டுப் போகாதது மனசுக்கு வருத்தமாப் போயிருச்சாம். மன்னிக்கணுமாம்!!!!

மறுநாள் காலை எட்டுமணிக்கு வரச்சொன்னோம். நாளை பகல் 2 வரை நமக்கு ஊர்சுத்த நேரம் இருக்கு.

தொடரும்..........................:-)