ப்ரொ டீ யா

அதென்ன டீ தானே? எத்தனையோ டீ குடிச்சிருக்கோம். இதைக் குடிக்கமாட்டமா?

அடக் கடவுளே..... இது ஒரு செடிங்க.

ப்ரொட்டீயா (Protea)ன்னு செல்லமாக் கூப்புட்டுக்கலாம்:-)

இதோட சொந்த நாடு ஆப்பிரிக்கக் கண்டத்தின் தென் பகுதியாம். இந்தச் செடிதான் இப்போ உலகில் இருக்கும் செடிகளுக்கு எல்லாம் மூத்த பாட்டி/தாத்தாவா இருக்கலாம். ஏன்னா இது கண்டங்கள் 'சமீபத்தில் பிரிவதற்கு முன் இருந்த கோண்டுவானாக் காலத்தில் இருந்தே இருக்காம். அதாவது ஜஸ்ட் 300 மில்லியன் வருசங்களுக்கு முன்புதான்.

ஒருமுறைச் சந்தைக்குப் போனப்ப அங்கே வித்துக்கிட்டு இருந்தாங்க. மக்களும் ஆர்வமா வாங்கிக்கிட்டுப் போறாங்க. அப்பத்தான் தெரிஞ்சது இதைப் பூச்சாடியில் அலங்காரமா வைக்கலாம் என்றதே. '

இதுலே 9 வகைகள் இருக்குன்னு இந்த ப்ரொடீயா சொஸைட்டியில் போட்டுருக்கு. கனமான மலர்கள். சின்ன மரமா வளர்ந்துருக்கு நம்ம பழைய வீட்டில். அப்போவெல்லாம் இதை நான் அவ்வளவாக் கண்டுக்கலை. பூச்சாடியில் வைக்கலாமுன்னா இந்தக் கனத்தைத் தாங்கும் அளவில் நம்மகிட்டே சாடிகள் கிடையாதுன்றதும் ஒரு காரணம். எல்லாம் 'கிண்'ன்னு இருக்கு ஒவ்வொண்ணும்:-)

இந்தச் செடிக்கு நாம் வழமையாத் தோட்டத்தில் போடும் உரங்கள் எதுவுமே தேவை இல்லையாம். அப்படிப் போடுன்னானாம். ஆஹா..... நமக்கு வேண்டியது இதுதான். மெனெக்கெட்டு உரங்கிரமெல்லாம் வாங்கிட்டாலும்.....இந்தப் பூ காஞ்சு போச்சுன்னாலும் அப்படியே இருக்குமாம். அதையுந்தான் பார்த்துருவோமுன்னு அங்கே இருந்து நாலைஞ்சை எடுத்துக்கிட்டு வந்தேன்.
மரத்திலேயும் சில வருசமாக் காஞ்சுப்போய்க் கிடக்கறதையெல்லாம் பிச்சுப்போட்டுட்டுக் கொஞ்சம் மரக்கிளைகளை வெட்டி ஒழுங்குபடுத்திட்டு வந்தேன்.

எனக்குத்தான் எது கையில் கிடைச்சாலும் வளருமான்னு சோதிச்சுப் பார்க்கும் குணம் இருக்கே. ஒரு சின்னக் கிளையைக் கொண்டுவந்துத் தொட்டியில் வச்சுருக்கேன். அதுலே ஒரு மொட்டும் இருக்கு.

மற்ற பூக்களை ஒரு சாடியில்(அன்பளிப்பா வந்தது) வச்சுட்டேன். அட! நல்லாத்தான் இருக்கு.

செடிகளை நடும்போது நல்ல காத்தோட்டமான, சூரிய வெளிச்சம் நிறைய வரும் இடத்தில் நடணும். பூமத்திய ரேகைக்கு தெற்கே இருக்கறவங்க மறந்தும் இதை வீட்டின் தென் பகுதியில் நட்டுறக் கூடாதாம். நல்லா வேர் பிடிச்சு வளர்ந்துச்சுன்னா, மூணாம் வருசத்திலே இருந்து பூக்க ஆரம்பிச்சுரும்.
ஆஸ்தராலியாவில் இந்தச் செடிகளும், விதைகளும் விற்பனைக்குக் கிடைக்குதாம். இங்கே நியூஸியில் அவ்வளவா இல்லை. இந்த ஒரு காரணம் போதாதா..... ஓடிப்போய் உபச்சாரம் செய்ய:-)))

இள அரளிப்பூ நிறத்தில் மேலே சின்ன இறகுகள் மாதிரி வெள்ளையா பட்டுப்போல இருக்கு. கூடவே கரும் புள்ளிகளும்.

போனவாரம் நம்ம ரமண் பையா மனைவி ( அண்ணின்னு கூப்புடுவேன்) வந்துருந்தாங்க. இதைப் பார்த்துட்டு 'இந்தச் செடியைத் தோட்டத்தில் கூட தரையில் நடலாம் தெரியுமா'ன்னாங்க. 'ஆமாம்'ன்னேன்.

"அட! பரவாயில்லையே..... தொட்டியில் சின்னச் செடியா இருந்தாலும் மொட்டு கூட வந்துருக்கே. எப்போ இருந்து வளர்க்கிறே?"

"மூணு நாளா "

!!!!

:-)))))))))))

சரியா மூணுவாரத்துக்குப் பிறகு ஜாடியில் உள்ள பூக்களின் நிலை.