திராக்ஷை ரஸம்...... ஹோம் மேட்!

நம்ம புழக்கடைத் தோட்டத்தில் இந்த வருஷமும் திராக்ஷை பழுத்துத் தொங்கலாச்சு.  இந்த ஊரில் நரி இல்லாததால்......  வேற வழி இல்லாம நானே பழங்களைப் பறிக்கலானேன். எல்லா வருசங்களையும் போல  டைனிங் டேபிளில் வச்சுட்டுப் போகவர ஒன்னு ரெண்டுன்னு எடுத்துத் தின்னது போக மீதியை 'அச்சச்சோ.....  கெட ஆரம்பிச்சுருச்சே.... தூக்கி வீச வேண்டியதுதான் இனி'ன்னு அதை ஒரு வழி பண்ணாமல், இந்த வருசம் உருப்படியா எதாவது செய்யலாமேன்னு ஒரு எண்ணம் திடீர்னு வந்தது!   

கொஞ்சம் பழங்களை அறுவடை செஞ்சேன் !

க்ரேப் ஜூஸ் பண்ணி, 'ஒரு கோப்பையிலே என் குடியிருப்பு'ன்னு  பாடிக்கிட்டே ஊத்திக்கலாமுன்னு முடிவு. 

இதுலே ரெண்டு செய்முறைகள் இருக்கு.

முதலாவது  ஈஸிபீஸி.  திராக்ஷைகளைக் கழுவிட்டு அப்படியே மிக்ஸி ஜாரில் போட்டு  பத்திருவது விநாடி ஓடவிட்டு வடிகட்டினால் ஆச்சு.  நம்மூர் (சென்னை)கடைகளில்  இப்படிச் செய்வதைப் பார்த்திருக்கேன். லேசா ஒரு பச்சை வாசனை இருக்கும்.....  ப்ச்....

ரெண்டாவது கொஞ்சம் வேலை வாங்கும் ப்ராசஸ்.  வெள்ளையர்கள் உலக ரெஸிபி :-) அப்படியே செஞ்சுடலாமே.....  ஐ மீன் செஞ்சு பார்க்கலாமே......

எதுக்கும்  முதலில்  பரிசோதனைக்குக் கொஞ்சமா செஞ்சு பார்த்தால் ஆச்சுன்னு   மூணு குலை திராக்ஷைகளைக் கழுவி, பழங்களை மட்டும் கொத்தில் இருந்து  பிரிச்செடுத்து,  ஒரு பாத்திரத்தில் போட்டு,  அது மூழ்கும்வரை தண்ணீர் ஊத்தி அடுப்பில் வச்சேன்.  அஞ்சு நிமிட்டில் கொதி வந்ததும், அடுப்பை ஸிம்மில் போட்டாச்.  இன்னும் ஒரு பத்து நிமிட்  மெள்ளக் கொதிச்சுக்கிட்டே இருக்கட்டும். அதுவரை? 

ஃபேஸ்புக், வாட்ஸப்ன்னு எத்தனை வேலை கிடக்கு.....

ஆனால் நடுவில் அஞ்சு நிமிட்டுக்கு ஒருமுறை மத்து எடுத்து மசிச்சு விடணும். மாடர்ன் மத்து இப்போதைக்கு  உருளைக்கிழங்கு நசுக்கி எடுக்கும் பொட்டேட்டோ மேஷர் :-)

திராக்ஷையின் தோலும் விதைகளும் பிரிஞ்சு வந்துருக்கும்.  கொஞ்சம் ஆறினதும் பெரிய வடிகட்டி எடுத்து அதில் ஊத்தி வடிகட்டிக்கணும்.  வடிகட்டியில் தங்கி இருக்கும் கூழை, அப்படியே இன்னொருக்கா மசிச்சு விட்டு அழுத்தினால்  எல்லா ஜூஸும் கீழே பாத்திரத்தில் இறங்கிடும்.
ஜூஸ் நமக்கு, வண்டல் குப்பைக்கு!  (இது தோட்டத்துக்கு நல்ல உரமும் கூட !)

ஜூஸ் பாத்திரத்தைக் கொஞ்ச நேரம் ஃப்ரிட்ஜில் வச்செடுத்து, ஜூஸைக் கப்பில் ஊத்திக் குளிரக்குளிரக் குடிக்கலாம்.  இன்னும் கொஞ்சம் இனிப்பா இருக்கணுமுன்னு நினைச்சால்  ஜூஸை வடிகட்டி எடுத்ததும்  சக்கரை சேர்த்து ஒரு அஞ்சு நிமிட் அடுப்பில் வச்சுக் காய்ச்சிட்டு ஆறினதும் ஃப்ரிட்ஜில் வைக்கலாம்.

சக்கரையைப் பாகாக் காய்ச்சியும் கலக்கலாம். அவரவர்  வசதி!  (பாருங்க உங்களுக்கெல்லாம் எவ்ளோ ச்சாய்ஸ் கொடுக்கறேன் !!!)

செஞ்சுவச்சதை ருசி பார்க்க..... சோதனை எலிக்குக் கொடுக்கணும். பெரிய பரீட்சை இது :-)

Doing things in style  என்ற வழியில்,  அன்றைக்கு டின்னரில் இதைப் பரிமாறணும்.  அன்றைய ஸ்பெஷல்   மெத்து மெத்து இட்லி,  கோங்கூரா பச்சடி. கூடவே  ரெண்டு ஒயின் க்ளாஸில் நம்ம 'ரஸம்' !

குடிக்கும் எலியின் முகத்தில் புஞ்சிரி!  'ஆத்தா..... நான் பாஸாயிட்டேன்'.......  :-)

மறுநாள் நம்ம தோழிகள் இருவர் (ஃப்ரம் மலேசியா) வந்துருந்தாங்க.   'கொஞ்சம் குடிங்க' ன்னதும் ஆஹான்னாங்க.  இருநூறு மார்க், நூத்துக்கு!

நாலுநாள் இப்படிக் குடியும் குடித்தனமுமா இருந்தேன்.

இன்றைக்கு  மீதி இருக்கும் திராக்ஷைகள் அடுப்புலே கொதிக்குது.  கொஞ்சம் வேறு வகையில் பரிமாறணும் :-)  யோசனையோடு பதிவை எழுத ஆரம்பிச்சேனா............

இப்ப    ரஸம் ஃப்ரிட்ஜுக்குப் போக ரெடியா இருக்கு! 

இந்த ரெண்டாவது முறைப்படி செஞ்சால் ..... ஒரு வாரம் பத்து நாள் ஃப்ரிட்ஜில் வச்சுப் பயன்படுத்திக்கலாம். கெடாது!  (கேரண்டீ!!!)

பதிவு எழுதி முடிச்சதும், இப்போ நம்ம வீட்டு திராக்ஷைத் தோட்டத்தை (!) படம் எடுக்கலாமுன்னு போனால்.... உள்ளே இப்படி இருக்கு! 

ஐயோ.... பெருமாளே..... எப்படி இதை குடிச்சுத் தீர்க்கப்போறேன்.......... :-)

வேறென்ன செய்யலாம்? புது ரெஸிபிகள் வரவேற்கப்படுகின்றன !!