ஹைய்யோ........ ஹைய்யோ............. (@அமெரிக்கா.... கனடா 28)

நாலுமணிக்குத் தோழியை வரவேற்கத் தயாராக இருந்தேன். மரத்தடி காலத்தில் இருந்து பழக்கம்.  அநேகமாக தினமும்  பேசிக் கொள்வோம்.... ஆனால் நேரில் சந்திப்பது இன்றுதான் முதல்முறை!  எனக்குத்தான் முதல்முறை! 'நம்மவர்'  சில வருசங்களுக்கு முன்னே சந்திச்சுட்டு வந்தார். அதுலே அவருக்கு ஒரு பெருமை! இருந்துட்டுப் போகட்டும் :-)

கொஞ்ச நேரம் பேசிட்டு, அவுங்களோடு கிளம்பினோம்.  நமக்கு டின்னர் அவுங்க வீட்டுலெதான்!

போறவழியில் ஒரு இண்டியன் கடையில் நுழைஞ்சாச்சு.  எனக்கு எப்பவும் வேற ஊர்களில் இருக்கும் இண்டியன் கடை, காய்கறிக் கடை எல்லாம் பார்க்கப்பிடிக்கும். நம்ம ஊருலே கிடைக்காத பொருட்கள் என்னன்னு பார்த்துக் கண்ணாலே தின்னுட்டு வருவேன். இப்ப  நம்ம கெமெராவும் தின்னுது :-)

ஹைய்யோ..... வாழைப்பூ, ஹைய்யோ.... தொண்டைக்காய்....  ஹைய்யோ.....புடலங்காய்....   ஹைய்யோ .....  கொடுத்து வச்ச மக்கள் !   விலையும் ரொம்பவே குறைவு!

பவுண்டுலே இருக்கு, பார்த்துக்கோன்னார் 'நம்மவர்' .  அப்பவும் கிலோவுக்கு மாத்துனால் விலை குறைவே!  அதை விடுங்க.....  முதலில் இதெல்லாம் கூட கிடைக்குதே....!!!! ஹைய்யோ....

தோழி வீட்டில் நம்மை வரவேற்கும் யானைஸ்!

உள் அலங்காரம் அருமை!

கீழே படங்கள் : தோழியின் பெற்றோர் கைவண்ணம் ! ஹைய்யோ!!!!

வெளியே,  பின் முற்றத்தில் பேசிக்கிட்டு இருக்கும்போதே, 'உங்க வீட்டுக்கு மான்கள் வரும்னு சொன்னீங்களே... இன்றைக்கு வந்ததா'ன்னு கேட்டு வாய் மூடலை.... மான்கள்  விஜயம்!  ஹைய்யோ!!!!

சின்னதா ஒரு நிமிச வீடியோ க்ளிப்  எடுத்தேன். ஆனா அது என்னமோ பக்கவாட்டில் காமிக்குது....   :-(
 அப்புறம் அப்படியே ஃபேஸ்புக்கில்  ஏத்திவிட்டு உதவி கேட்டப்ப அதை நம்ம வடுவூர் குமார் நிமிர்த்திக் கொடுத்துட்டார்!   வடுவூராருக்கு என் நன்றிகள் ! 

அமெரிக்க வீடுகளில் ஒன்னு கவனிச்சப்ப.... நியூஸி போல வீட்டுக்குக் காம்பவுன்ட் சுவரோ, ஃபென்ஸோ போட்டுக்கறதில்லைன்னு புரிஞ்சது.  வீட்டுக்கு முன்னாலும் பின்னாலும்   வேலியே இல்லை!   அதனால்  மான்களும் அப்படியே வீடுவீடாத் தாவிப்போய்க்கிட்டே இருக்குதுங்க !

 புல்வெட்டும் சமயம் என்ன ஆகுமுன்னு  பார்க்கணும்? அப்படியே வரிசையா வெட்டிருவாங்களோ?   இல்லே   கவுன்ஸிலே வந்து வெட்டுதா என்ன? தோழியிடம் கேக்கணும்.  பனி காலத்தில் வீட்டு வாசலில் குவியும் பனியையும்  எல்லோருமாச் சேர்ந்து  அள்ளித் தள்ளுவாங்களோ?

தோழியின் கணவரும் நெடுநாள் நண்பர் போல ரொம்ப இயல்பா பழகினார்.  புதுசாப் பார்க்கிறோம் என்ற  உணர்வு அறவே இல்லை !!

விருந்து அட்டகாசம்! ஒன்பதுவரை  கதையடிச்சுட்டுக் கிளம்பினோம். தோழிதான்  ஹொட்டேலுக்குக் கொண்டுவந்து விட்டுட்டுப்போனாங்க.

மறுநாள் ஞாயிறு என்பதால் தோழிக்கு வழக்கமான வீட்டுக் கடமைகளை செஞ்சு முடிக்க நேரம் வேணுமேன்னு திங்களன்று சந்திக்கலாம்னு  ஒரு ஏற்பாடு நமக்குள்:-)

இவ்ளோ வேலைகளுக்கிடையிலும் எழுத்துலக விஐபிக்கள்  அங்கெ  வரும்போது, உபசரிச்சு, ஊரைச் சுத்திக்காட்டி, அவுங்க போக வேண்டிய இடங்களுக்குக் கொண்டுபோய்னு 'விருந்தோம்பலை' செஞ்சுக்கிட்டு இருக்காங்க நம்ம பத்மா அர்விந்த்!  இதுலே வயலுக்கு இறைத்த நீர் ....   இந்தப் புல்லுக்கும் கிடைச்சதுன்னு வச்சுக்கணும் :-)


இன்னொரு காரணமும் இருக்கு. 'நம்மவரின்' தங்கை மகர் நியூஜெர்ஸியில்தான்  இருக்கார்.  தங்கையும் இப்போது மகன் வீட்டுக்கு விஸிட் என்பதால் அங்கே போகவும் நேரம் ஒதுக்கணும் என்று  பயண ஆரம்பத்துலேயே பேசி முடிச்சிருந்தோம். ஞாயிறு  என்பதால் பிள்ளைகளுக்கும் பள்ளிக்கூட விடுமுறை.

காலையில் நாத்தனார் மகரே வந்து நம்மை வீட்டுக்குக் கூட்டிப்போவார்.

படம்: மாமனும் மருமகனும் !

நாங்கள் வழக்கம்போல் எழுந்து  கீழே போய் ப்ரேக்ஃபாஸ்ட் முடிச்சுட்டு வந்தோம். இங்கே   இது அறை வாடகையில் சேர்த்தி இல்லை.  டைனிங் ஹாலை விட்டு வெளி வரும்போதே  குழந்தையும் (நாத்தனார் பேத்தி) அப்பாவுமா வந்துட்டாங்க.

கொஞ்ச நேரத்துலே கிளம்பிப்போனோம். சுமார் ஒரு மணி நேரம் ஆச்சு அவுங்க பேட்டைக்குப் போய்ச் சேர !

நாத்தனாரின் ஒரே அண்ணனும், செல்ல அண்ணியுமா நாங்க போயிருக்கும்போது  விருந்து தடபுடலா இருக்காதா என்ன? நம்ம வடை(யும்) இருந்தது  :-)

இவுங்க இருக்கும் ஏரியாவில்  அநேகமா எல்லோருமே இந்தியர்கள்!  வீட்டுக்குப் பின்னாலும் புழக்கடையில் வேலி இல்லாததால் பெருசா எதோ விளையாட்டுமைதானம்/பார்க் போல கிடக்கு!  எல்லார் வீட்டுப்பிள்ளைகளும் சகஜமா அங்கே ஓடி விளையாடுறாங்க!  (ஓ....லிட்டில் இந்தியா!)

குடும்பக் காரியங்கள் பேசி,  இந்தியாவில் இருக்கும் மற்ற மச்சினர்களோடு ஸ்கைப்பில் சமாச்சாரங்களைத் தெரிஞ்சுக்கிட்டு, சாப்பாடும் ஆனதும்,   மகரும், மனைவியும் எங்களைப் பக்கத்தூருக்குக் கூட்டிப்போனாங்க.

பிள்ளைகளுக்கு பேபி ஸிட்டர், நாத்தனார் :-)

சரித்திரப் புகழ் வாய்ந்த ஊர் !  சுமார் அரைமணி நேரப் பயணம்தான் :-)


தொடரும்......   :-)