வாங்களேன்...கேக் சாப்புடலாம்:-)

வாழைப்பழக் கேக் (மைக்ரோவேவ் சமையல்)

வாழைக்காய்போல இருந்த வாழைப்பழங்களைத்தான் வாங்கி வச்சேன். நிதானமாப் பழுக்கும்போது ஒவ்வொன்னா எடுத்து முழுங்கலாமுன்னு. அடியாத்தீ..... இப்படி ஒரே சமயம் பழுத்துப்போகுமுன்னு கண்டேனா....

(ஒரே சீப்புப் பழங்கள் பின்னே எப்படிப் பழுக்குமாம்) அதுவுஞ்சரி, இது சரியான சீப்புதான். மத்தகடைகளைவிட இங்கே ஒரு டாலர் விலை மலிவு.


கழிச்சுக் கட்ட என்னென்ன வழின்னு பார்த்தால்.....


1.தோட்டத்தில் பறவைகளுக்குப் போடலாம்.

2. சைலண்டா இதுகளைக் குப்பைப் பையில் போட்டுறலாம்.

3. எதாவது சமையலில் சேர்த்துக்கலாம்.

ஒன்னாவது............பாவம் அதுகள். நேத்து வச்ச பழத்தையேத் தின்ன முடியாமல்/தெரியாமல் பாதியை அப்படியே விட்டு வச்சுருக்குகள்.

ரெண்டாவது............ அடுத்த வியாழன்வரை காத்துருக்கணும். இல்லேன்னா வேஸ்ட்மாஸ்டரில் போட்டு அரைச்சுக் கழிவுநீர் குழாயில் தள்ளிறலாம். காசு கொடுத்து வாங்குனதை இப்படி வீணாக்க, ஜஸ்டிஃபை
பண்ணிக்கனுமுன்னா இன்னும் நாலு நாள் காத்துருக்கணும், அழுகட்டுமேன்னு.


மூணாவதுக்கு அடிச்சது ப்ரைஸ். பழங்கள் நல்லாப் பழுத்துக் கனிஞ்சுருக்கு. உரிச்சுப் பார்த்தால் பால்வெள்ளை. பனானா கேக். முடிவு பண்ணிட்டேன். அடுப்புடன் சேர்ந்திருக்கும்அவன் எல்லாம் சூடாக்கிச் செய்யச் சோம்பலா இருக்கு. அவந்தான் எண்ணெய்ச்சட்டி, தோசைக்கல் எல்லாம் வைக்கும் ஸ்டோரேஜ் யூனிட்டா வேற டபுள் ஆக்ட் கொடுத்துக்கிட்டு இருக்கானே. எல்லாத்தையும் வெளியே எடுத்துவைக்கணும்(-:

மைக்ரோவேவ் எதுக்கு இருக்கு? கேக்குக்குத் தேவையான பொருட்கள் கைவசம் இருக்கான்னு பாண்ட்ரியில் தேடுனப்ப ...... அதிர்ஷ்டதேவன் என்னப் பார்த்துச் சிரிச்சான்.

செய்முறையைப் பார்ப்போம்.


தேவையான பொருட்கள்:

செல்ஃப் ரெய்ஸிங் பவுடர் - ஒன்னரைக் கப்

ஸாஃப்ட் ப்ரவுண் ஷுகர் - ஒன்னரைக் கப்

மார்ஜரின் - 250 கிராம்

முட்டை- 2 (சைஸ் 7)

பால் - முக்கால் கப்

வாழைப்பழம் - ஆறு. கனிஞ்சதா இருக்கணும்:-))))))))

ஏலக்காய்த் தூள் - முக்கால் தேக்கரண்டி

ஒரு பெரிய கண்ணாடிப் பாத்திரத்தில்( மைக்ரோவேவில் வைக்கக்கூடியது) மார்ஜரின், பால் ரெண்டையும் சேர்த்து 40 வினாடி வைக்கணும். ஜஸ்ட் உருகி ஒரு கலவை கிடைக்கும். அதுலே ப்ரவுண் சக்கரை சேர்த்து நல்லாக் கலக்கணும். ரெண்டு முட்டையை உடைச்சு கலவையில் சேர்த்து நல்லா அடிச்சுக் கலக்கணும். இப்போ வாழைப்பழங்களை உரிச்சு ஒரு ஃபோர்க்கால் அழுத்தமா நசுக்கி கொஞ்சம் கூழானதும் கலவையில் சேர்க்கணும். ஏலக்காய்தூள் போட்டுக்குங்க. கடைசியா மாவு சேர்த்துக் கலக்கிக்குங்க.

மைக்ரோவேவ் கேக் செய்யும் பாத்திரத்தில் கொஞ்சம் மார்ஜரீனைத் தடவிட்டு, இன்னும் ரெண்டு தேக்கரண்டி மாவைத் தூவி எல்லாப் பக்கத்திலும் ஒட்டுவதுபோல் பாத்திரத்தைச் சாய்ச்சுக் குலுக்கிட்டு கூடுதலா இருக்கும் ஒட்டாத லூஸ்மாவை(?) கேக் கலவையில் சேர்த்துருங்க.
கேக் பாத்திரத்தில் அரை அளவுவரை கலவையை நிரப்பணும். மைக்ரோவேவில் வைக்கக்கூடிய ஒரு பிரிமணை/ ஸ்டேண்டு ஒன்னை அவனில் வச்சு அதுமேலே கேக் பாத்திரம் வையுங்க. ஆறு நிமிஷம் 100% பவரில் வச்சு அவனை ஆன் செஞ்சுருங்க. அம்புட்டுதான். அவன் பீப்புனதும் வெளியே எடுத்து இன்னொரு ஸ்டேண்டு மேல் அஞ்சு நிமிசம் நிக்க வச்சுட்டு (இதுதான் ஸ்டேண்டிங் டைம்) இன்னொரு தட்டோ அல்லது வலை கம்பி ரேக்கோ எடுத்து அதுலே கேக் பாத்திரத்தைத் தலைகீழா வச்சு லேசா ஒரு தட்டு.

டபக்னு கேக் வந்து விழுந்துரும். இதுக்குமேல் 'அலங்காரம்' செஞ்சுக்கவேண்டியது உங்க விருப்பம்.

டபுள் க்ரீம் கடையில் கிடைக்கும். அதை நல்லா அடிச்சுக் கெட்டிக் க்ரீம் ஆக்கி மேலே தடவலாம். விருப்பமான ஜாம் அதுக்குமேலே பூசலாம். ஜாம் வேணாமுன்னா க்ரீம் தடவுனதுக்குமேல் செர்ரிப் பழங்களை வைக்கலாம்:
-))))) (இன்னும் செர்ரீஸ் பாக்கி இருக்கு)

ஐஸிங் செய்யணுமுன்னா செஞ்சுக்கலாம். ஹண்ட்ரட் தௌஸண்ட்ன்னு கடுகு சைஸில் கலர்கலரா முட்டாய்(கேக் அலங்காரத்துக்குன்னே ஏகப்பட்ட சமாச்சாரங்கள் கிடைக்குது. சூப்பர் மார்கெட்டில் தேடுங்க) ஐஸிங் உலருமுன்னே தூவி விடுங்க.

இத்தனை சீர்செனத்தி செய்யணுமான்னு (என்னைப்போல நினைச்சா) கொஞ்சம் ஐஸிங் சக்கரையை மேலாகத் தூவி விடுங்க. கேக் நல்லா ஆறினபிறகு தூவணும்.


ஒரு அஞ்சாறு வருசமுன்னே ஒரு டாலருக்கு ஸேலில் வாங்குன கேக் ராக், இன்னிக்கு வெளியே வந்துருக்கு. எல்லாம் ஆறுபழத்தின் புண்ணியம்


குக்கிங் டிப்ஸ்:

இதெல்லாம் சொல்லாட்டி சமையல் நிபுணின்னு யாரும் ஒத்துக்கமாட்டாங்க அதனால்:-)

நம்ம வீட்டில் இருக்கும் மைக்ரோவேவ் 1000W பவர் உள்ளது. கூடுதல் அல்லது குறைவான பவர் அடுப்பு வைத்திருப்பவர்கள் சமைக்கும் நேரத்தை குறைச்சோ இல்லை கூட்டியோ வச்சுக்கணும்.

மைக்ரோவேவ் கேக் செய்ய எப்பவும் ரிங் போல வடிவுள்ள பாத்திரம்தான் சரிப்பட்டுவரும். சாதாரணப் பாத்திரமுன்னா கேக் நடுப்பகுதியில் வேகாம இருக்கும்.

ஹைகிரேடு மாவுன்னு பேக்கிங் செய்ய கைவசம் இருந்தாலும் என் ச்சாய்ஸ் இந்த செல்ஃப்ரெய்ஸிங் மாவுக்குத்தான். பேக்கிங் பவுடர், பேக்கிங் சோடான்னு எதுவும் இதுக்குத் தனியாச் சேர்க்க வேணாம்.

வெள்ளைச் சக்கரையை விட்டுட்டு ப்ரவுண் ஷுகர்( அந்த ப்ரவுண் ஷுகர் இல்லைப்பா. இது ஆபத்தில்லாத கரும்புச்சக்கரை) எதுக்குன்னா..... மைக்ரோ அவனில் பேக் செய்வதால் எலெக்ட்ரிக் அவனில் செஞ்ச இளம் ப்ரவுண் நிறம் கிடைக்காது. அதைச் சரிக்கட்டத்தான் இப்படி. வெள்ளையைவிட இதில் சக்தி கூடுதலாம்!

ஏலக்காய்த் தூள், முட்டை வாசனையைப் போக்க. இதுலே இண்டியன் டச் வேற கிடைக்கும். வெனில்லா எசென்ஸ் இருந்தால் சேர்க்கலாம்.

வெண்ணெய்க்குப் பதிலா நான் மார்ஜரீன் சேர்த்துருக்கேன், வெயிட் ப்ராப்ளம் இல்லாதவங்க வெண்ணையே சேர்த்துக்கலாம்

ஏற்கெனவே உடம்பு வெயிட் போடுது அது இதுன்னு ஏகப்பட்டது. இதுலே டபுள் க்ரீம் வேறயா? போச்சுறா...... அதுக்குத்தான் சிம்பிளா ஐஸிங் ஷுகர். இதைத் தூவ ஒரு டீ வடிகட்டியை பயன்படுத்தலாம். ஒரு ஸ்பூன் சக்கரையை டீ வடிகட்டியில் போட்டு அதை விளிம்பில் லேசாத் தட்டுனால் பூ மாரி பெய்யும்.


மேற் சொன்ன கலவையில் ரெண்டு கேக் செஞ்சேன். ஆறு பழம் இருந்ததே. ஒருவழியாப் பழம் தீர்ந்துச்சு. இப்போ...... கேக் உக்கார்ந்துருக்கு.



இப்ப அடுத்த முக்கியமான விஷயம்..... இதைத் திங்க ஆள் தேடணும்.

ஆறு வாழைப்பழங்களை ஒழித்துக் கட்டுவது எப்படின்னு தலைப்பு வச்சுருக்கலாமோ???