ஆச்சரிய(ம்)

"வீடுகள் தோறும் வேதங்கள் சொல்லி, யாசகம் பெற்று வாழ்க்கை நடத்தும் உஞ்சவிருத்திபிராமணன் இனத்தைச் சேர்ந்த ஒரு இளைஞனின் கதை. இந்த இளைஞன் சந்தித்த நபர்களையும், சந்தித்த நிகழ்ச்சிகளையும் தொகுத்துத் தந்திருக்கிறோம்.

இது சினிமாக் கதை அல்ல. சுவாரஸியமாக இருக்கை நுனிக்குக் கொண்டு செல்லும் கற்பனைக் காட்சிகளோ, கூட்டம் கூட்டி ஆடும் ஆட்டம் பாட்டங்களோ, கட்டிப் பிடித்து உரசி உருளும்காதல் காட்சிகளோ இன்றி இந்த இளைஞனின் வாழ்க்கையைப் பின்தொடர்ந்து சென்று படம் பிடித்திருக்கிறோம்.

ரசிகர்களாகிய நீங்களும் எங்களைப் பின் தொடர்ந்து பயணிக்க வேண்டுமாய்க் கேட்டுக் கொள்கின்றோம் "

ஆரம்பத்துலேயே இப்படி ஒரு 'டிஸ்கி' போட்டுக்கறாங்க. இதைப் பார்த்ததும், அப்பாடா...ன்னு இருந்துச்சு.


தர்மம் செய்யறதையே நிறுத்திட்ட கிராமத்துலே உஞ்சவிருத்திக்கு ஒண்ணும் கிடைக்கலை. பசி. பசி. பசி மட்டும்தான்இருக்கு. பசியை ஜெயிக்க முடியாம ஓடிடறான் பையன். அப்பா ஏற்கெனவே போயாச்சு வீட்டைவிட்டு. அம்மாவைஊர்ஜனம் குதறியே கொன்னுருது. பையன், ஒரு இஸ்லாமியர்கூட இருக்கான். ஆனா நாமத்தை மட்டும் விடலை.


அப்புறம் பையர்( பெரியவனா வளர்ந்தாச்சு) வேலை தேடி ராமநாதபுரம் வந்து, எப்படி தாதாங்க கூட்டுலே போயாச்சுன்னு சொல்றாங்க. அங்கே சந்திக்கும் ஒரு சுவாரஸியமான மனுஷி நம்ம மாயாக்கா. அக்கா அக்கான்னு ஜனமே சுத்தி வருது.( ஒவ்வொரு தடவையும் 'அக்கா' ன்னு வர்றப்ப எனக்கு என்னமோ என்னைத்தான் சொல்றாங்களோன்னு ஒரு தோணல்)


சினிமாக் கதை இல்லைன்னு சொன்னாலும், நாயகி வேணுமில்லையா? வாழ்க்கை போரடிச்சுராதா? நாயகி வராங்க.மொத்தம் மூணே பெண்கள்தான் (சொல்லிக்கற மாதிரி அட்லீஸ்ட் ரெண்டு வாக்கியம் வசனம் பேசும் ரோல்) வர்றாங்க.நாயகி, மாயாக்கா & பாட்டி( நாயகியின் பாட்டி). நாயகனோட அம்மாவையும் வேணுமுன்னா சேர்த்துக்கலாம். ஆனாஅவுங்க வாயைத் திறக்கவே இல்லை. பாவம்........ பசி வாயைக் கட்டிப் போட்டுருச்சு.


நாஸர் இருக்கார். சரண்ராஜ் இருக்கார். கஞ்சாக் கருப்பு இருக்கார். ம்ம்ம்ம்ம்ம்ம்ம்ம் தேவன் இருக்கார். அதுவும் நல்லவரா இருக்கார்.
வெட்டுக் குத்து எல்லாம் தாராளமா இருக்கு. இன்னொருக்கா 'டிஸ்கி'யைப் பாத்துக்குங்க. இதைப் பத்தி 'மூச்' விடலை.


இதுலே அந்த முஸ்லீம் பெரியவர் எதுக்கு மூணே சீன்லே வர்றார்ன்னு தெரியலை. என்ன சொல்ல வர்றாங்க? 'நாயகனை இப்படி ஒரு குறிப்பிட்ட இனமாக் காட்டுவதன் மர்மம் என்ன?'ன்னு யோசிச்சேன். இன்னும் என்னென்னவோ யோசனைகள் வந்ததுதான். வாக்குவாதம் செய்ய மனமும், பலமும் இல்லாததால் இதைப் பத்தி ஒண்ணும் சொல்ல விரும்பலை( இப்ப பாருங்க என் நிலமையை. நானும் ஒரு 'டிஸ்கி' போட்டுக்க வேண்டியதாப் போச்சு)


மாயாக்கா அட்டகாசமாப் பண்ணி இருக்காங்க.


நாயகன்,நாயகி பேர் எல்லாம் டைட்டிலில் போடலை. யாரா இருக்கும். இந்த ஆளை எங்கியோ பார்த்திருக்கேனேன்னு மண்டையைப் பிச்சுக்கிட்டும் ஞாபகம் வரலை. நெட் எதுக்கு இருக்கு? தேடுனப்பக் கிடைச்சது. விக்னேஷ் & திவ்யா.


பஞ்சத்துலெ அடிபட்ட மாதிரி இல்லாம விக்னேஷ் நல்லா கொழுகொழுன்னு இருக்கார்.


சில போலீஸ் ஸ்டேஷன் காட்சிகள் 'இயல்பாய்' இருக்கு.


இயக்கம் & அது இது எல்லாம் ரவி. 'ம்யூஜிக்' ஸ்ரீகாந்த் தேவா.

ஒரு தடவை பார்த்து வைக்கலாம், இந்த ஆச்சார்யாவை.