தில்லு துரைகள்!!!!!

இன்னிக்கு ஒரு கல்யாணத்துக்குப் போகவேணும்.  ஒரே மேடையில் ரெண்டு பெண்களுக்குத் தாலி கட்டப்போறான் மாப்பிள்ளை.!!!  அதுவும் நியூஸியிலே !  என்ன தில்லு , பாருங்க..............

நம்ம வீட்டுலே இன்றைக்குத்  தீபாவளி வேற கொண்டாடணும். அதுக்கான வேலைகளைக் கொஞ்சம் செஞ்சு வச்சுட்டுக் கல்யாணத்துக்குக் கிளம்பினோம்.  கோலப்புடவையில் கோலாகலம்தான் :-)

தம்பி கல்யாணத்தைப் பார்த்துக்கிட்டுப் பாவமா உக்கார்ந்திருந்தார் அண்ணன்.  அபிஷேகம் அப்பதான் ஆரம்பமாகி இருந்தது.  அழைப்பிதழில்  சொன்னதுபோல்  பூஜை நடத்திக்கொடுக்க நம்ம பண்டிட்கள் யாரையும் காணோம். நண்பர்தான் பூஜை நடத்திக்கிட்டு இருக்கார்.  அப்புறம் தெரிந்தது.... வரவேண்டிய பண்டிட்டுக்குத் திடீர்னு உடல்நலக்குறைவுன்னு....

அபிஷேகம் முடிஞ்சு , திரைமறைவில் அலங்காரம் செய்யும் நேரம் கலை நிகழ்ச்சிகள் ஒருபக்கம்!

அலங்காரம் முடிஞ்சதும் சீர்வரிசைகளோடு கல்யாணம் நல்லபடி நடந்தது. உடனே இரு மனைவியரோடு ஊர்வலம் புறப்பட்டார்  மாப்பிள்ளை !

https://www.facebook.com/1309695969/videos/371987508644194/

இன்னும் கோவிலைக் கோவிலாக் கட்ட ஆரம்பிக்கலை. ஒரு வணிக வளாகத்தில் ஒரு  வக்கீல் ஆஃபீஸை விலைக்கு வாங்கி, உள்புறத்தைச் சீரமைச்சு நம்ம கோவில் நடந்துக்கிட்டு இருக்கு இப்போதைக்கு ! ஓரளவு நல்ல கூட்டம்தான் !

கல்யாண விருந்து  விளம்ப நம்மவரும் நண்பர்களுமாப்போய் எல்லாத்தையும் எடுத்துவச்சாங்க. 

அன்னதானத்தோடு விழா முடிஞ்சது. நாங்க வீடு திரும்பியபோது மணி ரெண்டரை.

சாயங்காலம் நம்ம தீபாவளிநாயகனின் வருகை !  பண்டிகைக்குப் புதுத்துணி போடணும் ! போட்டுவிட்டோம்.  பொறந்தது முதல்  'எட்டுமாசமா' வேட்டி கட்டிக்கிட்டு இருக்கும் பாவனையில் இயல்பா  இருக்கான் ! 

https://www.facebook.com/1309695969/videos/424126880164441/

வீட்டில் பெருமாளுக்கு ஆரத்தி எடுத்துப் பூஜை முடிஞ்சதும்,  ஒரு  மினி விருந்து ! தீபாவளின்னா இட்லி தோசை முக்கியமில்லையோ :-)

கொஞ்சம் இருட்டினதும்  சம்ப்ரதாயமான  பட்டாஸ் கொளுத்தணும். கம்பி மத்தாப்பு எரிவதைப் பார்த்து மகிழ்ந்த  நம்  வீட்டு வீரன்,  பூச்சட்டி கொளுத்தியதும்  அழ ஆரம்பிச்சான்.  அவ்ளோதான் , கடையைக் கட்டிட்டோம்.  பாக்கி இருக்கும் பட்டாஸ் அடுத்த வருஷத்துக்கு :-)இத்தனைக்கும் இங்கே வெடிகள் ஒன்னும் கிடையாது.  ஒளி மட்டுமே ! 

https://www.facebook.com/1309695969/videos/1063449291384969/

குழந்தை தூங்கும் நேரம் வந்தாச்சு. இன்றைக்கு ஒரு மணி நேரம் லேட் என்று சொல்லிட்டுக் கிளம்பிட்டாங்க.  ஆச்சு நம்ம வீட்டு தீபாவளி !

பிள்ளைகள் படுக்கைக்குப் போக வேண்டிய நேரம் இங்கே நியூஸியில் ஏழரை.  இப்ப நமக்கு டேலைட் ஸேவிங்க்ஸ் காலம்.  உண்மையில் ஆறரை மணி என்பதை கடிகாரம் ஏழரையாக் காட்டும். எந்தப்பிள்ளைகளாவது நல்ல வெளிச்சம் இருக்கும் ஆறரைக்குத் தூங்குமான்னு நீங்களே சொல்லுங்க.............