திருநாங்கூர் கருட ஸேவை. (இந்தியப் பயணத்தொடர். பகுதி 63)

ரொம்பநாளா ஆசைப்பட்ட திருநாங்கூர் திவ்ய தேசக் கோவில்களை தரிசனம் செஞ்சுட்டு இந்தப் பகுதியில் இருந்து கிளம்பறோம்.  திருநாங்கூர்னு  சொன்னதும் அங்கத்து கருடசேவை நினைவுக்கு வராமப் போகாது. அவ்ளோ பிரபலம்!  நேரில் பார்க்காட்டாலும், அந்த சமயத்துலே  தினசரிகளில் இதைப் பற்றி எழுதி இருப்பதையெல்லாம் ஆர்வமா படிச்ச காலங்களும் உண்டு.

 இந்த  கருடசேவை தை மாசத்துலே நடக்குது.   நாமும் அதிசயமா இப்ப தை மாசத்தில்  இங்கே வந்துருக்கோம் என்றாலும்.........   விழாவைப் பார்க்கக் கொடுப்பனை இல்லை பாருங்க. இன்னும் எட்டு நாள் இருக்கு விழாவுக்கு.  நம்ம சூறாவளி  சுற்றுப்பயணத்தில்  எட்டுநாள் என்பது  ரொம்பப்பெருசு........  போகட்டும்....

கருடசேவையைப் பற்றியும், விழா நிகழ்வுகளையும் எனக்குத் தெரிஞ்ச விபரங்களையும்    இங்கே  பதிவு செய்வதன் மூலம் உங்களும் சொல்லிட எண்ணம்.

தை அமாவாசை, அதிகாலை ப்ரம்ம முஹூர்த்தத்தில்  திருநகரி கோவிலில் இருந்து நம்ம திருமங்கை ஆழ்வார் முதலில் அவருடைய அவதாரத் தலமான திருக்குறையலூருக்குப் புறப்பட்டுப் போறார்.  இங்கிருந்து ஒரு அஞ்சாறு கிலோமீட்டர் தூரத்தில் இருக்கு இந்த ஊர்.  போகும் வழியில்  பயிர் விளைஞ்சு நிக்கும் வயலில் இறங்கி அந்தப் பயிர்களை மிதிச்சுக்கிட்டுப் போறார்.

வயலுக்குச் சொந்தக் கார விவசாயி கோச்சுக்குவானா?   ஊஹூம்....   நம்ம வயலில் இறங்கி நடக்கமாட்டாரான்னு  ஏக்கம்தான் ஒவ்வொருத்தருக்கும்!   ஏனாம்?  திருமங்கை இறங்குன வயலில் அந்த வருஷம் விளைச்சல் அபாரமா இருக்குமாம்!  பின்னே கேட்பானேன்!

திருக்குறையலூர் போய்ச் சேர்ந்து ,  இங்கிருக்கும்  உக்ரநரசிம்ஹரை சேவித்து,  (இங்கே உக்ர  நரசிம்ஹர் கோவில் கொண்டிருக்கும்  விஷயம் நமக்குத் தெரியாததால் தவறவிட்டுட்டோம்.)

அங்கண் ஞாலமஞ்ச அங்கோர் ஆளரியாய் அவுணன்
பொங்க ஆகம் வள்ளுகிரால் போழ்ந்த புனிதனிடம்
பைங்கணானைக் கொம்பு கொண்டு பத்திமையால் அடிக்கீழ்
செங்கணாளி இட்டிறைஞ்சும் சிங்கவேள்குன்றமே

என்று பத்துப் பாசுரங்கள் பாடி அஹோபில நரசிம்ஹருக்கு ஈடான இவரை மங்களாசாஸனம் செய்தபின், அங்கே தரும் மாலை மரியாதைகளை ஏற்றுக்கொண்டு, மங்கை மடம் என்ற  ஊருக்கு வந்து அங்கே  வீரநரசிம்ஹரை  மங்களாசாஸனம் செய்கிறார்.  இங்கேதான் குமுதவல்லி  கல்யாணம் செஞ்சுக்கப் போட்ட நிபந்தனையின்படி தினமும் ஆயிரம் வைணவர்களுக்கு அன்னதானம் செய்தாராம்!

திருமங்கை குமுதவல்லி தம்பதியருடன், திருமங்கையின் தினசரி       பூஜையில் இருக்கும்  சிந்தனைக்கினியன்


அங்கிருந்து புறப்பட்டு திருக்காவளம்பாடி, திருபார்த்தன்பள்ளி கோவில்களுக்குப்போய் அங்கிருக்கும் பெருமாள்களை வணங்கி மங்களாசாஸனம்  செய்து, சாற்றுமுறை ஆனதும்  காவேரிக்கரையில் உள்ள மஞ்சக்குளி மண்டபத்துலே  மஞ்சக்குளி வைபவத்துக்குப் போறார்.  அங்கே திருநறையூர் நம்பி, அழகிய மணவாளர் ஆகியோருக்கு மஞ்சக்குளி (இது  மஞ்சள் சூர்ணாபிஷேகம்தானாம்) செய்தபின்,  திருமங்கைக்கும்  மஞ்சக்குளி நடக்கிறது.  இது  நம்ம்  பெருமாளே இவருக்குச் செய்த மரியாதையாம்!

கொஞ்ச நேர ஓய்வுக்குப்பின்  மறுபடி கிளம்பி திருவண் புருஷோத்தமம், வைகுந்த விண்ணகரம், செம்பொன்செய் கோவில், திருத்தெற்றி அம்பலம், அரிமேய விண்ணகரம் ஆகிய கோவில்களுக்குப்போய்  பாசுரம் பாடி மங்களாசாஸனம் செய்து பதில்மரியாதை பெற்று,  திருமணிமாடக்கோவிலுக்கு வந்து பத்ரிநாராயணரை வணங்கி  பாசுரங்கள், மங்களாசாஸனம் செய்த பின் இங்கேயே இரவு தங்கி விடுகிறார். எல்லாம் முடிச்சு வந்து சேரவே காலை 4  மணி ஆகிடுமாம்.  இப்படி முதல் நாள் உற்சவம் நிறைவாகிறது.

திருமங்கை ஆழ்வாராக பூவுலகில் இருந்தப்ப எப்படி  பெருமாள் கோவில்களுக்கு  எல்லாம் போய் பாசுரங்கள் பாடி வழிபட்டாரோ  அதை விடாமல்  இப்பவும்  அதேபடிக்குச் செய்கிறார் என்று நாம் புரிஞ்சுக்கவேணும்.   ( அதானே....        ஓடியோடி தரிசிச்ச  கால் சும்மா இருக்குமோ!) 


மறுநாள் (ரெண்டாம் நாளுக்கான ப்ரோக்ராம் ) என்னன்னு பார்க்கலாம்.
நேற்று இவர் போய் தரிசனம் செஞ்சு வந்த மற்ற எல்லாக் கோவில் பெருமாள்களும் கருடவாகனத்தில் ஏறி அவரவர்  ஊரில் இருந்து புறப்பட்டு இங்கே  திருமணிமாடக் கோவில்  வந்து சேர்ந்துடறாங்க. அதான் வாசலில் பெரிய பந்தல்  போட்டு வச்சுருக்காங்க பாருங்க. முத்துடைத்தாமம் நிறைதாழ்ந்த மாபெரும் பந்தல்!

மேலே நம்ம        கைலாஷியின் பதிவில் இருந்து  இந்த பதினொரு கருட வாகனங்களில்   ஒன்பதைச்  சுட்டுப் போட்டுருக்கேன்.

நண்பர் கைலாஷி அவர்களுக்கு நம் துளசிதளத்தின் மனம் நிறைந்த நன்றிகளை இங்கே பதிவு செய்கிறேன்.

நன்றி கைலாஷி.


காலை ஒரு பத்து மணிக்கு திருமணிமாடக்கோவில் நாராயணப்பெருமாள், திருவீதி  ஊர்வலம் போயிட்டுத் திரும்ப வாசலில் உள்ள பந்தலுக்கு வந்து சேர்கிறார்.  ஹோஸ்ட் இல்லையா? அதான் போய் ஊரை அழைச்சுட்டு வர்றார் போல!


மற்ற பத்து கோவில்களில் இருக்கும்  உற்சவர்கள்  வந்து சேர எப்படியும் பகல் 11 மணி ஆகிருமாம். கோவிலுக்குள் இருந்து ஆழ்வார்  வெளியே வந்து  ஒவ்வொரு பெருமாளுக்கும் பாசுரம் பாடி மங்களாசாஸனம் செய்யறார். சம்ப்ரதாயமா கோஷ்டி, அவரவருக்கு உண்டான பாசுரங்களைப் பாடி சாற்றுமுறை ஆகும்.

அப்புறம் திருமங்கை ஆழ்வாரை,  மணவாள மாமுனிகள்  பாசுரங்களால் மங்களசாஸனம் செய்யறார்.

அந்த பதினொரு கருடவாகனங்கள் என்னென்ன கோவில்களில் இருந்து வருதுன்னு பார்க்கலாம்.

1 திருமணிமாடக்கோவில்
2  வைகுந்த விண்ணகரம்
3 அரிமேய விண்ணகரம்
4 திருத்தேவனார் தொகை
5 திருவண் புருஷோத்தமம்
6 செம்பொன்செய் கோவில்
7 திருத்தெற்றியம்பலம்
8 திருமணிக்கூடம்
9 திருக்காவளம்பாடி
10 திருவெள்ளக்குளம் அண்ணன்கோவில்
11  திரு பார்த்தன்பள்ளி

அப்புறம் மாலை திருமஞ்சனம்.  எல்லாப் பெருமாள்களுக்கும் ஒரே சமயத்தில்!  கூடவே திருமங்கையாழ்வார் தம்பதிகளுக்கும். மனைவி குமுதவல்லியோடுதான் இவர்  கையில் வேல் பிடிச்சு  திரு நகரியில் இருந்து முதல்நாள் கிளம்புவது வழக்கம். இந்த வேல்?  அது திரு ஞானசம்பந்தர்  சீர்காழி தாடாளன் கோவிலில் இவருடைய பெருமையைப் புரிஞ்சுக்கிட்டுப் பரிசாகக் கொடுத்த வேல் ஆக்கும்!

திருமஞ்சனம் ஆனதும் அலங்காரங்கள் நடக்கும்.  கிட்டத்தட்ட  நடு ராத்திரி ஆகும்போது, இந்த பதினொரு பெருமாள்களும்  கருட வாகனத்தில் புறப்பாடு. திருவீதி வலம்! கூடவே  ஹம்ஸ வாகனத்தில்  திருமங்கை ஆழ்வார் ஜோடி.  இப்படி பனிரெண்டு வகையில் ஊர்வலம் பார்க்கக் கொடுத்து வச்சுருக்கணும்.   அவரவருக்கு அவரவர் கூட்டம் கூடவே போகும்!  அடடா... மனக்கண்ணால் பார்க்கும்போதே........   ஜிவ்ன்னு இருக்கு!



ஒரு நாலு நிமிட் வீடியோ கிடைச்சது:-)   வலையேற்றியவருக்கு நம் நன்றி.


ஊர்வலம் முடிச்சுத் திரும்ப மணிமாடக்கோவில் முத்துப் பந்தலுக்குத் திரும்பி வரும்போது எப்படியும் மூணரை நாலு மணி!   அப்புறம் திருவந்திக் காப்பு.  அடுத்து அர்த்தஜாமம் (!!!) பூஜை.

தோ....   பொழுது விடிஞ்சு  மூணாம் நாள் ஆரம்பிச்சுருச்சே!


காலை நேரத்துக்குண்டான  பூஜைகள் எல்லாம்  அவரவருக்கு நடந்த பிறகு, வந்த வேலை ஆச்சுன்னு  எல்லா கருடன்களும் தங்கள்தங்கள் பெருமாளைச் சுமந்தபடியே அவரவர் இருப்பிடத்துக்குப் போய்ச் சேர்ந்துடுவாங்க.

நம்ம திருமங்கை, அவருடைய இருப்பிடமான திருநகரிக்குக் கிளம்பிப் போயிருவாரா?  ஊஹூம்.... இல்லை. இவர் வழி தனி வழி :-)


 எல்லோரையும்  நிதானமா வழி அனுப்பி வைத்தபிறகு, பகல் 12 மணி போலக் கிளம்பி, 'திருவெள்ளக்குளத்துறைவோனே... எல்லா இடரும் கெடுமாறு அருளாயே'ன்னு  அண்ணனிடம் போய் சரணாகதி செய்து  அண்ணன் பெருமாளை ஸேவித்து, மாப்பிள்ளை ஜோரில் (குமுதவல்லி இங்கத்துப் பொண் இல்லையோ!) கிளம்பி நேரா  திருத்தேவனார்தொகை மாதவப்பெருமாளிடம் (கீழச்சாலை)  போய்  அவரையும் வணங்கி மங்களாசாஸனம் செஞ்சபின்,  தன் இருப்பிடமான திருநகரிக்கு எழுந்தருளுகிறார். (  கீழச்சாலையில் ஒரு கால பூஜைன்னு  அன்றைக்கு மதியம் கோவில் மூடி இருக்காதுன்னு நம்பலாம். நமக்குத்தான்  உள்ளே போக உத்தரவு ஆகலை....)

பத்ரிநாராயணர்  இங்கே திருமணிமாடக்கூடத்தில் எழுந்தருளும் போது  கருடன் மீதேறி வராமல் தேரில் வந்துட்டாராம். நான்கு குதிரை பூட்டுன தேர்.

 இந்த நான்கு குதிரைகளும் நாலு வேதங்கள். சூரியனும் சந்திரனும் தேர்க்கால்கள்! இதனால் கருடனுக்கு மன வருத்தம். இதைப் போக்கத்தான்  இங்கே பதினொரு கருட வாகனங்களில் ஒரே சமயம்  ஊர்வலமாக வருகிறார் என்றும்  சொல்றாங்க.

ஒரு கருடசேவை பார்த்தாலே புண்ணியமாம்.  அப்ப பதினொரு ஒரே சமயம் பார்த்தால்..............   ஹைய்யோ!!!!



கீழே    இருக்கும் படங்கள் நம்ம  அடையார் அநந்தபதுமனின் கருடசேவை. புண்ணியம் கிடைச்சது  2009  டிசம்பர் 29 வைகுண்ட ஏகாதசியில் :-)

தொடரும்.........  :-)