லோதி கார்டன்ஸ்

நெஞ்சாங்கூட்டில்.........நீயே நிற்கிறாய் ( பாகம் 11 )

லோதி கார்டனுக்குப் போனேன். வெய்யிலுக்கு இதமான இடம். வாசலில் பைரவர்கள் ஆழ்ந்த நித்திரையில். ரொம்பப் பழங்காலத்துலே கட்டுன பாலம். கீழே தாமரைப்பூக்கள் நிறைந்த தடாகம். அக்பர் ஆட்சியிலே அவரோடஒரு மந்திரி கட்டுன பாலமாம். தாஜ்மஹாலைவிடப் பழசோ! அவ்வளவாக் கூட்டம் இல்லை. மரங்கள் அடர்ந்து இருக்கும் பகுதிகளில் உலகை மறந்து இருக்கும் ஜோடிகள். ஜாக்கிங், நடைப்பயிற்சின்னு இருந்த ஒரு சிலர், குடும்பத்தோடு பிக்னிக் வந்த சிலர்ன்னு இருந்தாங்க.

'இங்கே இருக்கும் பறவைகள்'னு ஒரு போர்டு. அட! இத்தனை வகைகளா? எத்தனை வகை இன்னிக்குக் கண்ணுலே படுதுன்னு பார்த்துறணும். காக்காக் கூட்டம். அப்புறம்.........? இது மட்டும்தான் கூட்டம்கூட்டமா.கொஞ்சம் புறாக்கள். எல்லாம் கட்டிடத்து மேலே ஒட்டிப்பிடிச்சு உக்காந்துருக்கு.

எதிரும் புதிருமா ரெண்டு கட்டிடங்கள். பரா கும்பட், ஷீஷ் கும்பட். இஸ்லாமியர்கள் கட்டுனது பதினைஞ்சாம் நூற்றாண்டுலே.அப்ப சிக்கந்தர் லோதி, தில்லி மன்னரா இருந்துருக்கார். ஓஹோ... அதான் இந்தத் தோட்டம் லோதியின் பெயரில் இருக்கா?( ரொம்ப வருஷங்களுக்கு முன்னே தில்லி வந்தப்ப ஒரு லோதி ஹொட்டலில்தான் தங்குனோம். வெளியே அட்டகாசமான அலங்காரம். எல்லாம் ரிஸப்ஷன் வரைதான். உள்ளே போனால் அறைகள் ரொம்ப சாதா'ரணம்'. அப்ப ஜூன் மாசம் வேற. சூடு பொங்குது. அறைக் குழாயிலே காத்தும், எங்க கண்ணுகளில் தண்ணியும் வந்துச்சு) சரி. இன்னிக்குக் கதையைப் பார்ப்போம். இந்தக் கட்டிடங்கள் மசூதியாவும், சில முக்கிய புள்ளிகளின் சமாதியாவும் இருந்துச்சாம். இப்ப இங்கே சரித்திரச் சின்னங்களாத்தான் நிக்குது.

பரா கும்பட் உள்ளெ போனால் நல்ல உயரமான கூரை பேசுனாவே எதிரொலிக்குது. நான் போனப்ப அங்கே ரெண்டு இளைஞர்கள். ஒருத்தர் பாட்டுப் பாடறார். ஹே..........ஹே..ம்ம்ம்ம்ம்ஹா...........கோரா காகஸ்தா யே மனு மேரா........... மேரா........ மேரா......... எதிரொலி. அருமையான குரல். நல்லா இருக்குன்னு பாராட்டுனதும் அவருக்குக் கொஞ்சம் வெக்கமாப் போச்சு. 'நல்லா இருக்கா ஆண்ட்டி? இந்தப் பாட்டு'ன்னு சொல்ல ஆரம்பிச்சார். நான் அதுக்குள்ளெ 'தெரியும். ஆராதனா படம்'னதும் அவருக்கு கொஞ்சம் ஆச்சரியம். (இந்த மத்ராஸிக்குத் தெரிஞ்சுருக்கு பார்) படம் வந்த புதுசுலே மெட்ராஸ்லே அப்படி ஓடுச்சு. இதைப் பார்க்காதவங்கன்னு யாராவது இருந்துருப்பாங்களா? நம்ம பக்கம் ஆன்னா ஊன்னா இந்த 'மேடம் மேடம்' கேட்டுப் புளிச்சிருந்த காதுகளுக்கு இந்த 'ஆண்ட்டி' இனிமையா இருக்கு. நம்ம பசங்கன்னு ஒரு சொந்தம் வந்துருது. குடும்பமுன்னு வந்துட்டா உடனே ஒரு இளகுன மனம் அமைஞ்சுருது பார்த்தீங்களா?

இங்கே நாலு பக்கமும் அழகான வாசல்.அதுவழியா வெளியே பளிச்சிடும் வெயிலைப் பார்க்கும்போது என்னவோ சினிமாக் காட்சிபோல இருக்கு. ரொம்ப உயரமான வயசான மரங்கள். பச்சைப் புல்வெளி. பரா கும்பதைக் கடந்து நேர் எதிரில் இருக்கும் ஷீஷ் கும்பட் போனேன். இங்கே முன்புறச்சுவரில் ரொம்ப மேலே எட்டாத உயரத்தில் அழகான டைல்ஸ் பதிச்சு இருந்ததாலே இதுக்கு, இந்தப்பேர். ஷீஷ் ( கண்ணாடி) கும்பட். நிறைய ச்சில்லுகள் விழுந்துட்டு இருக்கு.உள்ளே போனால் வரிசையா ஏழெட்டு சமாதிகள். உள்ளே யாரும் இல்லை. நான் சொல்றது கட்டிடத்துக்குள்ளே! ஜன்னலில் வெளியே பார்த்துக்கிட்டு ஒருத்தர் உக்கார்ந்திருந்தார். ஐந்நூறு வருஷக் கட்டிடங்கள் இதெல்லாம். இன்னும் நல்லா ஸ்ட்ராங்காவே இருக்கு. தோட்டமும் நல்ல பராமரிப்பில் சுத்தமாவும் அழகாவும் இருக்கு.

அங்கிருக்கும் ரோஜாத் தோட்டத்துக்குப் போனேன். புதுத் தளிர்கள் வரும் சமயம். குச்சிகுச்சியா நிக்குது செடிகள்.வெளியில் வரும்போது அந்த பழைய பாலத்துக்கடியில் இருக்கும் வளைவுகள் மூலம் மாலைச்சூரியன் மஞ்சள்நிறத்தில் தாமரைத் தடாகத்துக்கு வந்திருந்தான். இந்தத் தடாகத்துக்குத் தண்ணி சப்ளை யமுனை நதியிலிருந்து கால்வாய் மூலம் வருதாம். தூக்கம் முடிஞ்சு பைரவர் ஸ்மார்ட்டா உக்கார்ந்துருந்தார். 'இந்தப்பக்கம் பாருடா'ன்னு சொன்னதும் அழகா போஸ் கொடுத்தார். எப்படியோ தமிழ் புரிஞ்சாச் சரி.

தில்லி மக்கள் நிறையப்பேர் ஜாகிங் செய்யவும், உடற்பயிற்சி வேகநடை நடக்கவும் அதுக்கேத்த காலணிகளோடு உள்ளே வந்துக்கிட்டு இருந்தாங்க. நம்ம நடேசன் பார்க் நினைவு வந்துச்சுங்க. பேசாம இங்கேயே ஒரு வலைப்பதிவாளர்கள் சந்திப்பு நடத்திறணும் அடுத்த முறை:-)

கிளம்பி ஜன்பத் மார்கெட்டில் இறங்கிக்கிட்டுக் காரை அனுப்பிச்சுட்டேன். காலையில் தில்லிஹாட்டில் பார்த்த அதே சாமான்களையும் கொஞ்சம் யானைகளையும் சல்லிசான விலைக்கு வாங்கிக்கிட்டேன். கறுப்புக் கல், வெள்ளைமெட்டல், மார்பிள், மரம், பித்தளைன்னு பலவிதத்தில் யானைகள் சூப்பரா இருந்துச்சு. 'மருமான்'கிட்டே பேரம் பேசிவாங்கினேன். இப்பெல்லாம் அடுக்கு மாடிக் கட்டிடத்தில் மார்கெட் நடக்குது. நின்னு நிதானமாச் சுத்தலாமுன்னா,நேரம் பொருத்தமா அமையலை. கோபால் கைப்பேசியில் கூப்புட்டு நான் எங்கே இருக்கேன்னு விசாரிக்கிறார். எனக்கும் கூடடையும் நேரமாச்சு. ஆகட்டும், அடுத்தமுறை இருக்கவே இருக்கு.

தொடரும்............