மலர்களே.... மலர்களே.....

எப்பவுமே அலுக்காத ஒரு பொழுதுபோக்குன்னா எங்க ஹேக்ளி பார்க் போய்வர்றதுதான். ஊருக்கு நடுவிலே இருக்கு ! சுமார் 180 வருஷங்களுக்கு முன்  பார்க்கைச் சுத்திதான் நகரத்தையே நிர்மாணிச்சுருக்காங்க.  நகரமே , நியூஸியின் கார்டன் ஸிட்டி  என்றுதான் பெயர் வாங்கியிருக்கு !  

இங்கே வருமுன்,  கோபால்   வாங்கிவந்த க்றைஸ்ட்சர்ச் நகரப் படப்புத்தகம் பார்த்துட்டு, நாம் அங்கே போயிட்டால் தினமும் பார்க் போய் வரணும்னு நினைச்சுருக்கேன்.  நெனப்புத்தான் பொழைப்பைக் கெடுக்குதுன்னு சும்மாவாச் சொல்லிவச்சுருப்பாங்க ? 

தினமும் முடியறகாரியமா ? மாசம் ஒரு முறை போய் வந்தாலே அதிகம் இல்லையோ ! அதுவும் நடக்கலை.  குறைஞ்சபட்சம்  மூணுமாசத்துக்கொருமுறை ? அதான்   ஃபோர் சீஸன்ஸ்  ஊரில் இருக்கோமே......... ஊஹூம்..... வருஷம் ஒருக்கா கோடையில் மட்டுமே வாய்க்குது ! பொதுவா க்றிஸ்மஸ் தினம்தான் அமையும். அது தவறினால் புதுவருஷம். வேறெங்கும் போக முடியாதில்லை தானே ? 

இந்த முறை புதுவருஷ நாள்,   காலையில் நம்ம ஹரேக்ருஷ்ணாகோவில், மாலையில் நம்ம புள்ளையார் கோவில், இடைப்பட்ட நேரத்தில்,  வீட்டில் சின்னத் தொட்டிச் செடிகளுக்கு பெரிய தொட்டி  மாற்றம் , குங்குமப்பூ பூண்டுகளை நட்டுவைத்தல் என்று  கொஞ்சம் பிஸியாத்தான் போச்சு.  ராத்ரி ஒன்பதுக்கு மேலாகியும் கூட    சூரிய வெளிச்சம் இருந்தது அருமை. இனி ஒரு மூணு மாசங்களுக்கு இப்படித்தான் !

அதனால்  மறுநாள் நம்ம தோட்ட உலாவை நடத்தினோம்.  நாலு சீஸன்களில் ஒவ்வொன்னும் ஒருவித அழகுதான் ! முக்கியமாக் கோடையில் பசுமையும் மலர்களுமே ப்ரதானம். அதனால் பதிவில் எழுத்தைக் குறைத்துப் பசுமையை  ரசிப்போமா !!!!