சங்கத்தின் வெள்ளிவிழா !

காலநிலையும், இப்போக் கொஞ்சம் மேம்பட்டு இருக்கு ! மூணு மாச வசந்தகாலத்தில் ரெண்டு மாசம் முடியப்போகுது.  செடிகளும் கடமையாற்றத் தொடங்கிட்டதால் தோட்டப் பராமரிப்பு, தோட்டவேலைன்னு அது ஒருபக்கம் ! செஞ்சுதான் ஆகணும்.  வண்ணப்பூக்களைப்  பார்க்கும்போது வர்ற மகிழ்ச்சிக்குக் கூலி !

தசரா முடிஞ்சு, வரும் பௌர்ணமிக்கு அடுத்து வர்ற  அமாவாசைதான் தீபாவளிப் பண்டிகை. அதுவரை கொஞ்சம் ஓய்வெடுக்கலாமுன்னு நாம் நினைச்சாலும், நம்ம சமூகம் அப்படி விட்டு வைக்கறதில்லையே..... 

எத்தனை குழு இருக்கோ அத்தனை தீபாவளியைக் கொண்டாட வேண்டி இருக்கு ! 

நம்ம தமிழ்ச்சங்கத்தின் வெள்ளிவிழாக் கொண்டாட்டம் ஒரு  மூணுவருஷமா நிலுவையில் இருக்கு. அதான் கோவிட் வந்து புண்ணியம்  கட்டிக்கிச்சு இல்லையா ?  சிட்டிக்கவுன்ஸில் ஃபண்டிங் வேற கொடுத்துருக்கு !  வழக்கமா நம்ம சங்க விழாவின் பாட்லக் டின்னருக்கு லீவு !  சங்கமே சோறு போடுதாம் !  ஆஹா....   முதல் முறையா  இலவசச் சோறு!

இந்த சனிக்கிழமை வச்சுக்கலாமுன்னு முடிவு செஞ்சு, இதோ அந்த நாளும் வந்துருச்சு.  வெள்ளிவிழா, நவராத்ரி & தீபாவளின்னு முப்பெரும் விழான்னு சொல்லிக்கலாம். எத்னிக் கம்யூனிட்டி தலைவரையும் அழைச்சுருந்தோம். நம்ம நண்பர்தான்.  எத்னிக் கம்யூனிட்டியின் பாராட்டுப் பத்திரத்தை  அளித்து சங்கத்தைப் புகழ்ந்து பேசினார் ! 

தமிழ்ப்பள்ளிக்கூட மாணவர்களின் தமிழ்த்தாய் வாழ்த்தும், நியூஸியின் தேசியகீதமுமாய் விழா ஆரம்பம் ஆச்சு.  கலைநிகழ்ச்சிகளில்,  நம்ம பிள்ளைகளின்  நடனங்கள், உள்ளூர் பரதநாட்டியப்பள்ளி ( தோழியின் பள்ளிதான் )மாணவியரின் நடனம், பாட்டு  இவைகளுடன்  சீனர்களின் சிங்க நடனம் வேற!

கீழே சுட்டியில் பார்க்கலாம்.  இப்பெல்லாம் யூட்யூபிலே ஏத்தவே முடியலை...ப்ச்........

https://www.facebook.com/1309695969/videos/1990832351285925/

நம்ம தமிழ்ச்சங்கத்தின் தமிழ்ப்பள்ளிக்கூடம் ஆரம்பிச்ச காலத்தில் அதில் சேர்ந்த முதல் மாணவியின்  குடும்பமும் வந்திருந்தாங்க. பள்ளிக்கூடத்தின் முதல் ஆசிரியை நாந்தான். அப்ப முதல்மாணவி யாராக இருக்கும் ? யூகிச்சுச் சொல்லுங்க, பார்க்கலாம் :-)

உள்ளுரில் உணவகம் நடத்தும் தோழிதான்  விருந்து படைச்சாங்க !

எத்தனையோ இடையூறுகள்,  முதுகில் கிடைச்சக் கத்திக்குத்துகள், தலைமைப் போர்,  வேறுபட்டக் கருத்துகள் என்று பலதரப்பட்ட அனுபவங்கள் இருந்தாலும் கூட , சங்கம் இவ்வளவு வருஷம் தாக்குப்பிடிச்சு  நிக்கறது எங்களுக்கு ரொம்பவே மகிழ்ச்சியான சமாச்சாரம்.  நாம் ஆரம்பிச்சுவச்ச சங்கம் என்ற பெருமையும் கூட !