கிரிவலத்தில் மீதி வலம் !!!! (பயணத்தொடர், பகுதி 44 )

சும்மாச் சொல்லக்கூடாது..... சாமியார் வேஷத்தில்  நகைநட்டெல்லாம் போட்டதும், அழகாத்தெரிவது இவர் மட்டும்தான்னு 'எனக்கு'த் தோணுது! நம்ம சிவாஜி மாதிரி (பழைய படங்களில்) எல்லா வேஷத்துக்கும் பொருத்தமான களையான முகம், இல்லே?

அப்பப்பச் செய்திகளில் பார்த்தவரின் 'அவதார' ஸ்தலம் இதுதானாமே!  கோட்டை மதில் போல  உயரமான சுவருடன் நித்யானந்த பீடம் & குருகுலம்!

கொஞ்ச தூரத்தில் சாமி சிலைகள் விற்பனைக்கூடம். சிவகுருநாதன் சிற்பக்கலைக்கூடம்னு பெயர்!

திரு நேர் அண்ணாமலையார் கோவில் ஒன்னு ரொம்பவே அழகா இருந்துச்சு.   மலை உருவில் இருக்கும் ஈசனை முதல்முதலில் சுற்றிவந்து வணங்கிய பார்வதி தேவிக்கு, சிவபெருமான் ரிஷப வாகனத்தில் காட்சி கொடுத்த இடமாம்!  ஆஹா....  கிரிவலத்தைத் தொடங்கி வச்சது இப்படித்தானா!!! இந்தக்கோவில், மெயின் கோவிலுக்கு நேரெதிரா இந்தாண்டை இருப்பதால் திரு  நேர் அண்ணாமலையார் கோவில்னு பெயர்!

தொட்டடுத்து  தாயார்  உண்ணாமுலை  அம்மனுக்கும் ஒரு தனிக்கோவில் இருக்குது.

குப்பன் விஜியா சிற்பக் கலைக்கூடத்தில் நம்ம புள்ளையார் வித விதமா போஸ் கொடுத்துக்கிட்டு  இருக்கார் :-)

வீடு போல இருக்கும் ஒரு இடத்தில்  வாசப்பக்கம் பெருமாள் நிக்கறார், இங்கே!  அட!  எப்படி? காலடியில் ரெண்டு பசுக்கள் வேற !  பக்கத்துலே ரெண்டுதலையும் ஓர் உடலுமா இன்னொரு சிலை.  ஜயவிஜயர்களா இருக்குமோ?  'பாத ஸேவை' செஞ்சுக்கலாம், இங்கே!

அகஸ்தியர் கோவிலையடுத்து இன்னும் ஒரு பெருமாள்  இருக்கார். விஷ்ணு துர்கையும் கூட !

வழியெங்கும் காவி உடையில் சந்நியாசிகள் நடமாட்டம்  ! இந்தப் பாதையில் அங்கங்கே நல்ல அகலமான  ப்ளாட்ஃபார்ம் போட்டு வச்சுருப்பதால், அதையே ஓய்வெடுக்கவும், தூங்கவும் பயன்படுத்திக்கறாங்க.  சாமியார்களா ஆகினால் நிம்மதிதான்! இல்லே... நிம்மதியை வேண்டி  சாமியார்களாகணுமோ?

அஞ்சாவது வருணலிங்கம், ஆறாவது வாயு லிங்கம், ஏழாவது குபேர லிங்கம், எட்டாவது ஈசான லிங்கம்னு அஷ்ட லிங்கங்கள்  மலையைச் சுத்திவரும் பாதையில் இருக்கு.  இவைகளைத் தவிர சூரிய லிங்கம், சந்திரலிங்கம், குழந்தையைக் காக்கும் குழமணிப் பிள்ளையார்,  அகஸ்திய முனிவர் & லோபமுத்ரா தேவி,   பழனி ஆண்டவர் , மகாசக்தி மாரியம்மன் , வீர ஆஞ்ச நேயர், ராஜராஜேஸ்வரி, இடுக்குப்பிள்ளையார், காளிங்கநர்த்தன கிருஷ்ணர்.............   ஹப்பா....  சொல்லி மாளலை.

இந்த இடுக்குப்பிள்ளையார் பத்தின விவரம் தெரியாம ஒரு கும்பிடு போட்டுட்டுப் போயிருந்தோம்.    இப்போ சில நாட்களுக்கு முன்னால் நம்ம வித்யா சுப்ரமணியம் அவர்களின் பதிவு பார்த்த பிறகுதான் 'இடுக்கு' வழியா நுழைஞ்சு வரலாமுன்னு தெரிஞ்சது.  மறுபிறவி  நோ சொல்லும் இடுக்காமே!   ஏற்கெனவே காஞ்சி கைலாஸநாதர் கோவிலில்  இப்படி ஒரு குட்டி இடுக்கில் நுழைஞ்சு வெளியே வந்ததால்....  மறுபிறவி இல்லைன்னு கைவசம் ஒரு கேரண்டீ  இருப்பதால் போகட்டுமுன்னு நினைச்சேன்:-) த்வார்காத் தீவு  த்வாரகீஷ் கோவிலிலும் ஒரு தூண் சுவர் ஓரமாக இருக்கு. அங்கேயும்  தூணுக்கும் சுவருக்கும் இருக்கும் இடைவெளியில் நுழைஞ்சு வந்தால் மறுபிறவி கிடையாதாம்!  நான் ரிஸ்க் எடுக்கலைப்பா.............

அஷ்டதிக்பாலர்கள் ஆளுக்கொன்னா மலையைச் சுத்தி எட்டு திசைகளிலும் நின்னு பரமனை வழிபட்டுக்கிட்டே இருக்காங்க.  இந்த அஷ்ட லிங்கங்களிலும், சில நல்ல அலங்காரங்களுடனும், சில ரொம்பவே சாதாரணமாவும்தான் இருக்கு!  கொடுக்கும் பலன்களுக்குத் தக்கபடிதான் சாமிக்கும் மவுசு போல.

கிரிவலப்பாதையில் இருந்து வெளியேறி இன்றைக்கு நாம் தங்கும் ஹொட்டேல் அர்ப்பணாவுக்குப் போறோம்.  அண்ணா (! ) ஆர்ச்சுக்குப் பக்கத்தில் இருக்காம்!  வலையில் பார்த்து புக் பண்ணார் 'நம்மவர்'.

அவுங்க வெப்சைட்டில்  போட்டுருக்கும் அளவுக்கு அவ்ளோ பிரமாதமா இல்லைதான். ஒரு  நைட்  மட்டும் தங்கல் என்பதால் போகட்டும்.....

மலை வ்யூ அறை கொடுத்தாங்க.  அறையும் சுமார்தான். ஜஸ்ட் பேஸிக்.  பால்கனியில் நின்னால் மலை!

வாங்க,  ஃப்ரெஷப் பண்ணி, ஒரு காஃபியும் குடிச்சுட்டுக்  கொஞ்ச நேரத்தில் கோவிலுக்குப் போகலாம்!!

தொடரும்......... :-)