அடங் 'கொய்யா 'லே!

ஆனாலும் இதுக்கு ஆயுசு கெட்டிதான்! முந்தி இருந்த வீடு மெயின்ரோடுலே இருந்துச்சுன்னாலும் அதிலும் பல வசதிகள் இருக்கத்தான் செஞ்சது. ஒரு நிமிச நடையில் ஷாப்பிங் செண்டரும் அதுக்குள்ளே சூப்பர்மார்கெட்டுமா , சட்னு ஒரு சாமான் வாங்க ஓடிப்போய் ஓடிவரமுடியும்.

எண்பதுகளின் கடைசியில் கார்கோ கிங் என்ற ஒரு கடை நம்மூரில் நடந்துக்கிட்டு இருந்தது. மலிவு விலையில் சீனப்பொருட்கள் விளையாட்டு சாமான்கள் இப்படி அவுங்க வியாபாரம். அப்போ இவ்வளவு சீனா சாமான்கள் நாட்டுலேயே கிடையாது. மற்ற எல்லா இடங்களிலும் தரமான உள்நாட்டு அண்ட் ஐரோப்பிய பொருட்கள்தான் விற்பனை.

 சீனாவோடு ஒப்பந்தம் போட்டுக்கிட்டு, அரசு அவுங்களுக்கான மார்க்கெட்டைத் திறந்து வச்சதில் இப்போ 90 சதமானம் பொருட்கள் அங்கிருந்துதான் இறக்குமதி. ஹாங்காங், பிரிட்டிஷார் கைவிட்டுப்போன சமயம் இங்கே ஏராளமான சீனர்கள் வரத்தொடங்கி...... காலம்போற போக்கைப் பார்த்தால் இவுங்க எண்ணிக்கை கூடியவிரைவில் மற்ற இனங்களை எல்லாம் தூக்கி முழுங்கிரும்போல இருக்கு! ஒரு ஷாப்பிங் ஏரியான்னால்.... அங்கே இருக்கும் வியாபாரங்கள் எல்லாம் ஒன்னொன்னா சீனர்கள் வசம் போய் கடைசியில் அந்த ஏரியா முழுக்க முழுக்க ச்சைனா டவுன் ஆகிவருவதைக் கண் முன்னால் கவனிச்சுக்கிட்டே இருக்கோம். இன்னும் நுழைவு வாசல் அமைச்சு, சிகப்பு நிறமடிச்சு சிங்கம் வைக்கலை!

இந்த கார்கோ கிங் ஓசைப்படாமல் நகர்ந்து வேர் ஹவுஸ் என்ற வியாபார நிறுவனம் விஸ்தரிக்கத் தொடங்குனது அப்போதான். மலிவான சீனப்பொருட்கள் மலிவு விலையில் விற்கத்தொடங்கி இப்போ இந்த நிறுவனம் சக்கைப்போடு போடுது. ஆரம்பிச்ச புதுசுலே ஷேர் அம்பது சதமுன்னு தொடங்குனது இப்போ..... 2.7 டாலர். கொஞ்சம் தரமான சாமான்களும் உலகின் பலபகுதிகளில் இருந்து இறக்குமதி செஞ்சு விக்கறாங்க. தங்கமும் வைரமும் கூட விக்கறாங்கன்னா பார்த்துக்குங்க.

ஆரம்பகாலத்தில் (1982) ஆக்லாந்து நகரில் சின்னதா ஆரம்பிச்ச கடை. ஸ்டீஃபன் டிண்டால் என்றவர், முதலுக்காக தன்னுடைய கேரவானையும் மனைவியின் காரையும் விற்று, தன்னுடைய சூப்பரானுவேஷன் காசை ( இது நம்மூர் ப்ராவிடண்ட் ஃபண்ட் போல ஒன்னு) எல்லாம் எடுத்துப்போட்டு தொடங்குனது. கடையின் கோலம் ஒரு பழைய ஷெட்டுலே இருக்கும் வேர்ஹவுஸைப்போல இருந்துச்சுன்னு கடைக்கே வேர்ஹவுஸ்ன்னு பெயர் வச்சுட்டார். where everyone gets a bargain. என்ற இவுங்க தாரகமந்திரம் எல்லோரையும் சட்னு கவர்ந்துருச்சு. இப்போ நியூஸி முழுசுக்கும், அண்டை நாடான அஸ்ட்ராலியாவுக்கும் சேர்த்து 253 கடைகள். பதினாலாயிரத்து எண்ணூரு பேருக்கு வேலை, வருசத்துக்கு தொன்னூறு மில்லியன் டாலர் லாபம்ன்னு ஜமாய்க்கிறாங்க. நம்மூரில் இருக்கும் ஆறு கடைகளில் பல இந்திய மாணவர்கள் குறிப்பா கேரளமாநிலத்தினர் வேலை செய்யறாங்க. நியூஸியில் மாணவர்களுக்கு வாரம் 20 மணி நேரம் வேலை செய்ய ஒர்க் பர்மிட் உண்டு. (படம்: முதல் கடை)

ஒரு இருவது வருசத்துக்கு முன்னே ஸ்டேஷனரிக்குன்னே ஒரு பிரிவு தொடங்கி வியாபாரம் எல்லாமே ஏற்றுமுகம்தான்!

 இப்படி இந்தக் கடையின் ஆறு கிளைகளில் ஒன்னு நம்மூட்டுக்கு எதிரில் இருந்த ஷாப்பிங் செண்ட்டரில் இருக்கும்போது சும்மாவாச்சும் ஒரு நடை போய் சேவிச்சுக்கிட்டு வருவேன். தினசரி நடைப்பயிற்சி உடலுக்கும் உள்ளத்துக்கும் நல்லதில்லையோ!!!! வீட்டுத்தோட்டம் சம்பந்தமான பொருட்களுக்கே தனிப் பகுதி ஒன்னு எல்லாக் கிளைகளிலும் உண்டு. ஒருநாள் கொய்யாச்செடி ஒன்னு ரெண்டு டாலருக்குக் கிடைச்சது. ஸ்ட்ராபெர்ரி கொய்யான்னு போட்டுருக்கு. சின்னச் செடிதான். ஒரு பத்து செமீ உயரம் உள்ள பேபி ப்ளாண்ட்.

 இந்த செடி எட்டுவருசமா தாக்குப்பிடிச்சு நிக்குது என்பதே வியப்புதான். வளரவளர வெவ்வேறு அளவுள்ள தொட்டிகளில் மாத்திக்கிட்டே இருந்தேன். இந்தியா வந்த சமயம் இங்கே உள்ளூர் தோழி வீட்டில் விட்டு வச்சேன். அப்போ சின்னதா சில காய்கள் வரத்தொடங்கி இருந்துச்சு. கொஞ்ச நாளில் அந்தப்பிஞ்சுகள் உதிர்ந்துபோச்சுன்னு தோழி மெயில் அனுப்பினாங்க. நாம் திரும்பி வந்தபிறகு செடியும் நம்மூட்டுக்குத் திரும்பிருச்சு. நல்லவேளை பொழைச்சுக்கிடக்கேன்னு தான் மகிழ்ச்சி.

 இன்னும் கொஞ்சம் பெரிய தொட்டியில் மாற்றிவச்சேன். இப்ப ஏராளமான பிஞ்சுகள் வரத்தொடங்கி.... இந்த நாலைஞ்சு மாசத்தில் பெருசாகிப் பழுக்கத் தொடங்கிருச்சு.

இந்தச்செடிகளில் ரெண்டு வகை இருக்கு. சிகப்பு நிறப்பழங்கள் ஸ்ட்ராப்பெர்ரி கொய்யா, மஞ்சள் நிறப்பழங்கள் எலுமிச்சைக் கொய்யாவாம். அடங்கொய்யாலே!

நம்மது சிகப்பு. சின்னச்சின்ன சைஸ் பழங்கள். முதல் பழத்தை ஆவலோடு பிச்சுப் பார்த்தால்.... க்யூட்டா ஒருத்தர் உள்ளே சாப்பிட்டுக்கிட்டு இருந்தார். ரெண்டாவது நமக்கு. ஸ்ட்ராபெர்ரியின் லேசான புளிப்பும், கொய்யா விதைகளோடு சதைப்பிடிப்பும்.

 ஆப்பிளுடன் ஒரு ஒப்பீடு  :-)

சின்ன மரமாகவும் வளருமாம்.ஒரு 20 இல்லை 25 அடி உசரம். Psidium cattleianum என்று பெயர், இது நம்ம கொய்யாவுக்கு நெருங்கிய சொந்தம்தான், ஒன்னு விட்டு ரெண்டு விட்டுன்னு எல்லாம் இல்லை:-) Peruvian guava என்ற பெயரும் சில இடங்களில் உண்டு. ப்ரேஸில் நாட்டுப்பகுதிகளில் நிறைய வளருதாம். இந்தப் பழங்களை ஜாம் செஞ்சும் ரொட்டியில் தடவிக்கலாம். (எல்லாம் அறுவடையைப் பொறுத்து!!)
இது சுட்டபடம்! கூகுளாருக்கு நன்றி.


சிகப்புத்தோல் கொஞ்சம் தடிமனா இருக்கு. சுவையில் கொஞ்சம் லேசான துவர்ப்பு. தோலை எல்லாம் சீவ முடியாது. கத்தி வைக்க இடம் வேணாமா? நடுவில் ரெண்டா வெட்டி, ஒரு ஸ்பூனால் தோண்டி எடுத்து வாயில் போட்டுக்கலாம். சின்ன ஸ்பூனா இருக்கட்டும் கேட்டோ:-)))


எப்படியோ நம்ம ட்ராப்பிக்கல் கலெக்‌ஷனில் கொய்யாவும் சேர்ந்தது மகிழ்ச்சிதான்!

 PIN குறிப்பு: ஆமாம்.... இந்த '' அடங்கொய்யாலே'' வுக்கு உண்மையான பொருள் என்ன? தெரிஞ்சவுங்க சொல்லுங்க. புதிய அகராதியின் பொதுமன்றத்தில் கேட்டு வச்சுருக்கேன். என்ன பதில் வருதுன்னு பொறுத்திருந்து பார்க்கலாம்!